Epesodeniza 4:16 - Kulina New Testament Brazil

¹⁶ Itati essire zosse zosse narrarope iccarizaniuarrine, izepe irriniuarrine, irripaniuarrine narraroparri. Essirepe orrariraha naniza touaririzanipe uapi tani. Pina izepe, ibirri, emori, isso narraroparri. Bazima orrariqquizape essire dacorarraro. Narraro uimassa narrarope ia bazima Zeso Cristoza irrariqquizape idacorarraro. Izepe irrie onihi onihi icarriraha imecotedeni tezerre acco acco icanezape pina essire napirrarossa inarraro. Eti cauanerara caneza naqui icca queriqquinarra todacorani narraro.

Culina Mádija

¹⁶ Itati essire dosse dosse najaropi iccaridsanijine, idsepe ijinijine, ijipanijine najaropaji. Essirepi ojariraha nanidsa tohuariridsanipi huapi tani. Pina idsepe, ibiji, emori, isso najaropaji. Huapima ojariqquidsapi essire dacorajaro. Najaro imassa najaropi ia huapima Jesocristodsa ijariqquidsapi idacorajaro. Idsepe ijie onihi onihi icajiraha imecotedeni tedseje acco acco icanadsapi pina essire napijarossa inajaro. Eti cahanerara canadsa naqui icca queriqquinaja todacorani najaro.

Epesodeniza 4:16 Iomraidhean Croise

Huano 15:5

—Nazama ouape uva ede orrani. Tiadenipe uva inine tiquerrenani. Ouaza timadimananissa tezape tiadeniza omadinitoui. Nazama tiadenipe pina uva inine cacabonorride rarrarissa tiquenarraro. Rridacca tiadeniza omadi-rrerezape uima bicani tinanemana-rreranitouiraha.

Romanodenidsa 12:4

Ia bazimape essire imadirraro. Essire orrarieza uanarizanipe uapi tarraro. Naraha bazima narrarossa nerrerani. Nauatoue onihi onihi nehe carririzemanani.

1 Corintodeniza 10:17

Iape uapi ineraha pao orrariaza irripaqquirrarorrinea itassaqquirraro. Pina essire orrarirrarossa inarraroparri.

1 Corintodeniza 13:13

Uima bicani rricaquera taniccape 3 narraro. Orrariepe icca rrehenirri. Deoza parrissa izanaponitoui. Uima onihipe itezerremacca uima bicani touini imadi-zanaponitoui. Uima onihi naqui touati uanehe nema zanaponitoui. Arri uima 3 narrarope bicaqquiri naraha touati uanehena denima bica tarraro.

1 Corintodeniza 8:1

Rridapanana zamatapa, bani naha siba nauatoniza da da ihiquequenanarraricca uima ouacomerana. Narraro uimape ia bazimaza auato tani. Nauatoqquiri ineraha parri, nauatouepe ia deni tonana tani. Touati uanehena denima bica tani. Narrarope icca rrehenirri tonadacora tani.

Carasiadeniza 5:22

Naraha Zeso Cristoza iquerrenezape icca uima pina aua bicaui bonorride rarrarissa narraro. Deo Corimerrine bono inarrarope pina touati uanehe, uatizehe, rronehe narraro. Rrehe, Deo Corime ibodiza madirrarirrinea iape uapimaza eti uanaqquiri narraro. Deocca uatizehema imadirraro. Rroneqquiri ineza imadirraro, amazati edi-rrerarraro, etti bica teza uati uati inarraro. Uima bicanira inanarraro, Deozara rrehe izanaporraro.

Carasiadeniza 5:6

Zeso Cristoza iquerrenanissa tezape zopori cotani eteroni uissinarra icarriza icarri-rrereza naqui Deozape narrarossa caniqquimerarraro. Narraro uissinarracca uimape ponima torrarraro. Naraha uima parrisseheccape Zeso Cristo tauimariza rrehe inanissa tarrarona parri. Narraro rrehenirri auato taniuarrinepe Deocca touati uanehema itessedenitoui eti cauanarizerara canezana bica tani.

Epesodeniza 1:4

Deopa zama inauatopo-rrerazama itoui naporrari. Pocca madirra iquerrenaniuarrine ia tocatterrizabaqquirrari. Nama narraria Poua Bedi Zeso Cristoza parrissa inarrarodeni ibodi ssiuarraqquiri naza Deo Pouatouira imadinissa zanaponiuarrine. Ia qqui tabaqquizapa uimasiri icappirani ia qqui tabaqquiuitoui. Deopa iaza uati uana tarrari.

Epesodeniza 3:17

Zeso Cristoza parrissa tiquenaza tibodideniza madiuiuarrine Deoza uati uati onarraro. Deocca touati uanehema timadimananiuarrine naqui Pouaza uatide damera onarraro. Pina aua rrabo nami bodiuarri toqquezimarrarissa tiquenarri. Tirrabodeni Deocca touati uaneheza denima toqquezima-zanapozape Deoza tetideni uana taniuarrine, timecotedeniza naqui tetideni uana taniuarrine.

Epesodeniza 3:7

Ouape bica onerrereraha Deo ouaza bica taza ouaza uati uana tarrari. Pocca dacorehe ouaza inaparrirenissa teza oua cazosserrari. Zeso Cristo tauimari icassiuaueraniuarrinecca madirraza torraniuarrine maride orrarizarraro.

Epesodeniza 4:12

Nama nazapa pouaza toquerrenarrarideni inaparrirebaqquirrari, Deoza zepedeni irrimanauiuarrine, imecotedeni acco icanabaqqui- manauiuarrine. Nezape Zeso Cristo poua assiressa inarrarodeni icca rrehenirri denima todacorani naniuarrine.

Epesodeniza 4:15

Naraha iape Deocca marinarra parrisseheccazana rrehe inarraro. Narraroza imadirraro. Imecotedeniza eti uana tezape pouadeniza uima parrissehera uati uati inarraro. Nema inezape icca madie tobicazanaponitoui. Pina Zeso Cristocca madiessa nanitoui. Zeso Cristopa pocca iquerrenarraro ia Zossede. Pina itati essire zosse zosse narrarossa narraro.

Piripodeniza 1:9

Ouape titouideni Deoza uati uati ohonanarraro, tibodideniza Zeso Cristocca touati uanehe deni torrazanaponiuarrine. Nani imecote Zeso Cristoza parrissa quenarrarideni tezerre tetideni cauanerara canezape ticcadeni touati uanehe madirra bazimaza torraribaqquiniuarrine. Nani Deorrine tibodideni touattarraroma tetideni uanaqquiri naniuarrine. Nezape Deocca marinarra tazarrani tibodideni uatonissa teza uima bicani ticatterrizemananiuarrine. Narraro uima tazarrani madirraza tetideni uanaqquiri naniuarrine, ohonanarraro Deoza.

Corosadeniza 2:19

Pouadenipa Cristoza querrena-rraraui. Naraha iana Cristoza irrariqquizape pouapa pina itatissa narrari. Pouana irrariqquinicca ia Zossede. Iape poua assiressa inarraro. Nazama essirepe itone, essicone narraro tassaqquizape essire dacorarraro. Orrari nehe torrarraro. Rrirriparrine nanapi narraro. Narrarossa narraro Cristo pouaza itassaqquizape daco irrirarraro. Cristo poua attima, pocca dacorehema ihinapi narraro. Nema inanipe Deo Poua nacassa tarrarissa inanarraro.

Corosadeniza 2:2

Deo tibodideni tonauatizebaqquiuiuarrine, pocca touati uanehema tibodideni orrariqquinissa taniuarrine naqui touini onarraro. Deocca uima bicani auatora taporaha rridapape auato tarraro timittemananissa taniuarrine naqui damera onarraro. Narraro uima bicanipe Cristona parra. Pouaza tinoccodeni torrizera-zanapozape pouaza parrissa tiquenanissa taniuarrine titouideni Deoza uatide damera onarraro.

1 Tesaronicadeniza 1:3

Rrehe, Deoza uatide iquerrenezape ticcadeni uima bicani eti rrima-rrerarraro. Ticcadeni rrehenirri dacorarraroa tizepedeni ihirrimana narraroparri. Deocca zosseheza tizepedeni irrimaneza naqui touati uanehema tizepedeni ihirririzemana narraroparri. Ia Zozossede Zeso Cristocca tossiuauehetoui timadimanezape tiadeniza ocasserani ssonariraha tinauanemananiuarrine dacoraqquiri tiquenarraro.

1 Tesaronicadeniza 2:13

Ticcadeni uima Deoza uati uati ihinanezape: —Rrehe, peperri. Tirrine bica tani −ihinanarraro. Arri Deocca marinarra tiadeni mari icanabaqquirrarozape: —Madirra attia –tiquenerrerade. —Arrirraro marinarrape parrissa Deo Attia. Iaza torrana −tiquenade. Deo Atti parrisseheccara tiadeni mari icanabaqquirrarode. Pouaza parrissa tiquenezape Poua Atti tibodideniza torrarrarorrinea arri tibiquemana-zanaporraroparri.

1 Tesaronicadeniza 3:12

Ia Zozossede Deo tibodideniza touati uanehe denima inanazanaponiuarrine, inarraro. Pouarrinena denima tetideni cauanerara cananiuarrine, inarraro. Madirra ouahadeniza naqui tetideni uanaqquiri naniuarrine, pina arri ia tiadeniza eti uana tarrarossa tiquenaniuarrine nacassassa inarraro.

2 Tesaronicadeniza 1:3

Imecotedeni, ticcadeni uima bica tezape titouideni Deoza uati uati ihinanarraro: —Rrehe Abi Deo, bica tani. Imecotedeni Tesaronicauarri madimanarraridenicca uima bica teza Tiaza etizerraro −ihinanarraro. Nema inanipe bica tani. Arri ticcadeni rrehenirri Zeso Cristoza todacorani-zanaponicca uima imittani. Tetideni cauanerara canehe denima denima tizanapomananicca uima naqui imittani.

1 Timoti 1:5

Rrehe Timoti, tiaza dozo onarrarope Deoza toquerrenarrarideni bazima uatideni cauanerara canarizauiuarrine. Narraro touati uanehepe ibodi bicaqquiri naza, ibodi uima bicani touira ineza Deoza parrissehera rrehe inanissa tezape eti cauanerara canarizaniuarrine, onarraro.

1 Pedoro 1:22

Rridapana tiadenipe Deocca uima parrisseheccaza iboraqquiri tiquenarrarorrine tibodideni touissorizarraro. Nema nezape Zesoza rrehe quenarrari timecotedeni toquerrenarrarideniza parrissehera touati uaneheza tetideni uanaqquiri narri. Naraha tettidenizara tetideni uanaqquiri nani orrari-rrerarri. Tetideni cauanari canaza timecotedeni tezerre acco acco titicanarizera narri, onarraro.

1 Zouao 4:16

Deopa iaza uati cauanari canaui nauatoqquiri inarraro. Narraroza parrissa inarraro. Deopa touati uanehe rrinede. Touati uanehema imadirrarope Deoza imadirraro. Deo naco iaza madirizarrari.