Epesodeniza 2:12 - Kulina New Testament Brazil

¹² Zeso Cristo rrirehe timadimanaccade. Tiadenipe Izarraeo potemaui zodeodeniza ticarrimemana-rreraccade. Deopa pouadeni tezerrera rrehe canireporraride. Pouadenizara uima bicani onihi onihi uati taporrari. —Tiadenira onassiuauabaqquinitoui −napoui nade Abi Deo. Naraha tiadenizapa nama narrararrari. Arrirraro namiza timadimanaporaha ponima Deo rrirehe timadimanezape: —Izoqqueza icassiuaueranitoui −tiquenerreraccade.

Culina Mádija

¹² Jesocristo jirehe timadimanaccade. Tiadenipi Isaraeri potemahi jodiodenidsa tiquejemamana-jeraccade. Diopa pohuadeni tedsejera jehe canirepojaride. Pohuadenidsara ima bicani onihi onihi huati tapojari. —Tiadenira onassiajabaqquinitohui −napohui nade Abi Dio. Naraha tiadenidsapa nama najarajari. Ajijaro namidsa timadimanaporaha ponima Dio jirehe timadimanadsapi: —Idsoqquedsa icassiejeranitohui −tiquinejeraccade.

Epesodeniza 2:12 Iomraidhean Croise

Roca 1:72

Deopa icca idideniza uati uana tarrari. Pouadeni tezerre rrehe canirerraricca uima uati rrama-rrararrari. Inaparrirenissa tanitoui.

Huano 10:16

Eueue ouahadeni naco uapi taha ocarrini. Arra tazaricca rraraui. Narrarideni naco ouaccani-baqquiuiuarrine. Pouadenipa ouattiza iboraqquiri naui. Nazapa cacauade orrariazana queriqquiuiuarrine. Nazapa orrariqquimanauitoui −nade Zeso. (Poua atti nama narraripa madirra zodeo querrena-rrararrarideni naco pouaza toquerrenauiuarrine.)

Huano 15:5

—Nazama ouape uva ede orrani. Tiadenipe uva inine tiquerrenani. Ouaza timadimananissa tezape tiadeniza omadinitoui. Nazama tiadenipe pina uva inine cacabonorride rarrarissa tiquenarraro. Rridacca tiadeniza omadi-rrerezape uima bicani tinanemana-rreranitouiraha.

Huano 4:22

—Samaritano tiadenipe Deoza tetetizemana naraha, narraro uimape ssamoqquiri tiquenani. Naraha zodeodeni iana parrissa Deoza ehetize narraro. Ia zodeodeniza tossiuauehe ccarronaporrarona madirra bazimaza torraribaqquirraro.

Tahimarideni 2:39

Pina Deo Poua uati taporrarissa narraro: “Ocorime tiadeniza da onarizaniuarrine” napoui nade. Nazapa tiadeniza, ticcadeni erredeniza, tipotemanideniza naco Poua Corime da inarizauitoui. Arra zama uarri tanicca madirizemanarrarideniza naco Poua Corime da inarizauitoui. Ia Zozossede Deo uaua inabaqquirraridenizana Poua Corime da inarizauitoui −narrari Pedoro.

Tahimarideni 28:20

Narraro timittemananiuarrine oneza titouideni uaua onarrarode. Rraho, pouadeni qqui onabaqquizapa pouadeniza uati onaniuarrine, onade. Arri tiadenipe rridapanana cadeiaza oua rrore iquenani qqui tiquenarraro. Ia Izarraeodenipe ia Idinide toui inarrorani. Narrariza rrehe onezape oua dama iquenarrarode −nade Paoro.

Tahimarideni 3:25

Nazama tiadenipe narrarideni potemaui tiquerrenani. Poccadeni dozonirri arri Deo uati taporraricca uima bicani rridapana tiadeniza torrarraro. Deopa idideni tezerre rrehe canireporrari naqui tiadeniza torrarraroparri. Arra idi Abarahaoza Deo Attipa: “Tipotemani zotodecca naco pouarrine arrirraro zamacca madirra bazimaza uatizeheri torrarizanitoui” napoui nade Deo.

Romanodenidsa 9:8

Narraro uima imittarrarope: Abarahao potemaui bazimapa Deocca madirra toquerrena-rraraui. Arra Deo uati taza tossonarrari potemauizana: —Occa madirra −narrari.

Carasiadeniza 4:8

Rrehe, taide Deoza ssamoqquiri tiquenapozape tiadeni cacauade pouamaccazara: —Ia cacauade −titiquenapo narraro. Narrari tiadeni cacauade maizeheccaza tiquerrenapoccade.

Epesodeniza 2:19

Zodeo tiquerrena-rrerarraro tiadenipe pina zama onihicca madirrassa, pina zama cappiremanarraridenissa tiquenaporaha rridapanape Zeso Cristoza parrissa tiquenezape Deocca madirra tezerre tiadeni naqui pocca ozacca madirra tiquerrenani. Tiadeni naqui Deoza: —Abi −tiquenani.

Epesodeniza 4:18

Bodideni zizi tarrarorrine mittemana-rraraui. Deo Atti ssamoqquiri nazapa Deocca madie bicaniza uatizemana-rrararrari. Bodideniza iboue dacorarraro.

Corosadeniza 1:21

Taidepe Deoza rrizaqquiri tiquenaccade. Tibodideniza Deoza nacasseraqquiri tiquenaccade. Uaidirehe tinanemanarrarorrine Deocca uadi uadi tiquerrenaccade.

Corosadeniza 1:27

Deo Poua touini naza pouadeniza auato inanarrarope zodeo querrena-rrararrarideni naco pocca danirri bicani carrimanauitoui. Narraro uimape narroraporaha Deorrine auato terreraccade. Arri Deocca uima bicanipe Poua Bedi Zeso Cristo tibodideniza torrarizarrariparra. Narrarirrinena niza tinauatonimanezape bica taniza timadimananitoui. Deocca deni torrehe naqui tiadeniza torranitoui.

Corosadeniza 1:5

Nema tiquenarrarope itezerremacca uima bicani iaza torranitoui nauatoqquiri tiquenarraro. Arri: —Iape memeuarri imadinitoui −tiquenarrarorrinea Deocca toquerrenarrarideniza tetideni uanaqquiri narraroparri. Parrissehecca uima arri Zeso Cristo tauimari icassiuaueraniuarrinecca tiadeni mari tocanabaqquipozama Zeso Cristopa memeuarri pocca madirraza uima bicani inanarrorarraro timittemanarraroparri. Nezape narraro uimatoui timadimanarraro.

1 Tesaronicadeniza 4:13

Imecotedeni, ssamoqquiri tiquenerreraniuarrine ticcadeni madirra zozoqquemana narraricca uima tiadeniza dozo inarraro. Arra madirra Zeso Cristoza ssamoqquiri narraridenipa poccadeni madirra zoqqueza orri orri quenazapa: —Icca madirra qqui inimani-rrarapazarra? −quequenanarrari. Naraha tiadenipe pina pouadenissa tiquenerreraniuarrine Zeso Cristocca madirra zozoqquemana narraridenicca uima timittemanarri.

1 Tesaronicadeniza 4:5

Nema tiquenezape pina arra Deoza ssamoqquiri narraridenissa tiquenerreraniuarrine. Pouadenipa Deoza ssamoqquiri naza pouama touini quenaza uananeheza carri carri cacana narrari.

2 Tesaronicadeniza 2:16

Nazama arra ia Zozossede Zeso Cristo, Abi Deo tezerre iaza uatideni uanana tarrari. Pouadeni pamaha bicaqquiri naza ibodi acco acco totocanabaqquimana zanaporrariparra. Pouadenirrine itezerremacca uima bicani iaza torraniuarrine nauatoqquiri inehe imadirraroparri.

1 Timoti 1:1

Nirra Timoti? Ouape Paoro tiaza occa uima dozo onarraro. Zeso Cristocca zozosse orrani. Deo Atti mari ocanabaqquirizauiuarrinepa Abi Deo, Poua Bedi Zeso Cristo tezerre oua zosse iquenarraro. Ia Tonassiuauade, Poua Bedi Zeso Cristopa itoui ccanipomauiuarrine pouatoui imadirraro. Rrehe Timoti, Zeso Cristoza rrehe tezape parrissa pina occa erredenissa tarraro. Nezape icca Abi Deo, ia Zozossede Zeso Cristo tezerre tiaza uima bicani inanemanana. Poccadeni touati uanehema tia acco icanemanana. Poccadeni rronehe naqui tiaza torrana, onarraro.

Ebreodenidsa 11:34

Ouahadenipa zippo rrororoni ppocoreraha pouadeniza pina ouirrarossa neza imedeni quemana-rrararrari Ouahadeni naco rrazirecca massitoza zoqquemana-uitouiraha zori tocanirerrari. Ouahadenipa torraparimanaraha Deorrine todacoremani-manarrari. Todacoremanaza rrazire inanemanezape pouadeni uauadidedeniza deni toquerrenarrari.

Ebreodenidsa 6:18

Rrehe, Deo iaza uati tazapa: —Tiadeniza arrima onananitoui −nazapa pocca uatinarra cacarriqquimeraniuarrine ssamo tani. Poua Atti: —Oua onima uati onarraro, omaize-rrerani −naza naco cacarriqquimeraniuarrine ssamo tani. Deopa maizera taui. Pouana ia touacaua-baqquiuiuarrine touini inezape Pouaza iquerrenarraro. Parrissehera uati tarraricca uima imittezape etizerraro. Poua uati taporraricca iaza parrissa torraniuarrine touini imadirraro.

Ebreodenidsa 8:6

Deopa Poua Bedi Zesozana cacauehe denima bica tanicca da inarraro. Arrirraro namiza Deocca zossenirri taidecca ecauemanarrarope arrimani. Narraro Deocca zossenirri taideccaza madirra: —Rrehe, iboraqquiri inana −quenazapa pouadeniza uima bicani torraniuarrine Deo uati taporaha narraro naqui arrimani torrarraro. Deo tezerre rrehe icanireniuarrinecca uima zati Zesorrine torrarrarope uima denima bica tanicca iaza anirraro. Pocca rrehe canirenirri zati denima bica tarrarope Deo Poua uati taporraricca denima bica tarrarorrine. Narraroa arri Zeso Cristo icca danirri Deoza dada toqquimade, icca uima uauati toqquimade deni torrauiccapa icca uima Deoza parrirenissa taniuarrine ia tonaparrire-baqquiuissa tauitoui.

1 Pedoro 1:21

Pouapa tibodideni acco canaza Deoza rrehe tiquenarraro. Deorrine Zeso Cristo nauatonizapa Deo pocca deni torrehe, pocca dacorehe pouaza inanarraro. —Ia naqui ia tonauatonibaqquiuitoui −tiquenezape Deo Pouaza parrissa tiquenanissa tarraro.

1 Pedoro 1:3

Deopa ia Zozossede Zeso Cristocca Abi. Pouaza etizeza ettipe: —Abi Deo bica tinani, deni tirrani! −inana, onarraro. Pouapa itoui uati cauanari canaza Pouarrine ibodi zati torrarraro. Pina issonapomarrarossa inarraro. Zeso Cristo zoqqueza nauatonirrarirrine ettipe: —Ia naqui izoqqueraha inauatoniza imadipomanitouiua −inarraro.

1 Pedoro 3:15

Pina tibodideniza arrima tiquenarri: —Zeso Cristo, tiape oua Zozossede. Tiazara ibora ozanaponiuarrine −titiquena nana. Madirra tiadeniza attideni: —Timadinissa tezape nerrecora ticarriniuarrine touini timadirraro? –quenazapa pouadeniza tecomeremananiuarrine tibodideniza narrorapozape pouadeniza tetecomeremana narri, onarraro.

1 Zouao 3:3

Nazama arra madirra attideni: —Zeso auatoni-pomazapa pina pouassa inanitoui −quequenanarraripa pouadeni cacauemanauissa tarrari, bodideni uissoqquiri nauiuarrine. Pina Zeso poua uimasiri cappira, bodi uisso tarrarissa quenauiuarrine.