Ebreodenidsa 2:9 - Kulina New Testament Brazil

⁹ Narrari madirra orraria deni torrarraripa Zeso. Pouana deni torraporaha Deorrine arramani torraccarrari. Pouapa Deo Bediraha pina madirrassa naha torrazapa Deo pocca zozosse tabaqqui memeuarriccana deni toquerrenaccarrari. Nazama Deo iaza uati cauanari canaza Poua Bedi Zeso zoqqueuiuarrine eccorarrari, bazima pouaza rrehe inarraro ia tonassiuauabaqquiuiuarrine. Zesopa zoqquehe inauaneza rridapanapa Deorrine deni torrarrari. Bazima pouaza iboraqquiri inaniuarrine Deo pocca deni torrehe, pocca biquehe pouaza inanarraro. Rrehe, narrari Zeso poua tauimari rridapana iaza auato tani, onarraro.

Culina Mádija

⁹ Najari madija ojaria deni tojajaripa Jeso. Pohuana deni tojaporaha Diojine ajamani tojaccajari. Pohuapa Dio Bediraha pina madijassa naha tojadsapa Dio pocca dodosse tabaqqui memehuajiccana deni toquejenaccajari. Nadsama Dio iadsa huati cahanari canadsa Pohua Bedi Jeso dsoqquehijine eccorajari, huapima pohuadsa jehe inajaro ia tonassiajabaqquihijine. Jesopa dsoqquehe inahanadsa jidapapa Diojine deni tojajari. Huapima pohuadsa iboraqquiri inanijine Dio pocca deni tojehe, pocca biquehe pohuadsa inanajaro. Jehe, najari Jeso pohua tahimari jidapana iadsa ahuato tani, onajaro.

Ebreodenidsa 2:9 Iomraidhean Croise

Mateo 16:28

Ouape parrissehera tiadeniza uati onarraro: Arriza tidomodeni uarraro motadenipe tizoqquemana-rreraccazama arrirraro titezerremadenicca uima qqui tiquenanitoui. Narraroa arri oua Madirra Bedi orrarraroa nizaranibote madirra ouacauabaqquiuiuarrine occa deni torrehema occaronapomanitoui, onarraro −nade Zeso.

Mateo 6:28

—Nazama uima onihi naqui: Nerrecotoui etero ticarriquemanani noppineni ticappinemanarraro? Narrarotoui tibodideni uauatomacca nerrerarri. Rrari, qqui tiquenanarra aua moue ppata tarizarrari. Aua mouepa tarabaiera, uepe picocora, etero ssequiquira taraha ppata tarizazapa pina etero bicani oro tozimemanarrarissa narrari.

Maraco 9:1

Zesopa pouaza queriqquimanarrarideniza denima uati tarrari: —Ouape parrissehera tiadeniza uati onarraro. Arriza tidomodeni uarraro motadenipe tizoqquemane-rreraccazama Deocca cacauehe dacorehema ccarronani qqui tiquenanitoui −naui nade.

Roca 9:27

Naraha ouape parrissehera tiadeniza uati onarraro. Arriza tidomodeni uarraro motadenipe tizoqquemane-rreraqquezama Deocca cacauehe qqui tiquenanitoui −narrari Zeso.

Huano 1:29

Nani Betaniaza imadiccazape narraro uada ssiuarraza Zouao Zeso ccarronaui qqui taza iaza uati tarraride: —Qqui tiquenarro! Arrarraripa Deocca danirri madirra bazimaza! Pouapa Deocca Eueue Bedi bicabote Deoza da da inarrarissa narrari. Niza zoqquezapa pouana madirra bazimacca uimasiri inanamossinitoui −nade.

Huano 10:17

—Oua ouaccoreza ozoqqueraha occa camittehe ouaza torrapomanitoui. Narraro uima onananiuarrine ibora onezape occa Abipa ouaza uati uana tarrari −nade.

Huano 12:32

Naraha niza madirrarrine que onezana madirra bazimapa ouazana toquerrenauitoui −nade Zeso.

Huano 3:16

—Deopa madirraza uati cauanari canaui. Poua Bedi orrari naraha da inazapa bazima pouaza parrissa quenarraridenipa tocassiuauerauiuarrine. Camittehe rriquerreranicca naco carrimana-zanapouiuarrine.

Huano 8:51

Nazama ouape parrissehera tiadeniza uati onarraro: Ouattiza iboraqquiri tiquenezape parri tirricarini nerreranitoui −nade Zeso.

Huano 8:52

Nazapa manaco zodeodeni uati toquenade: —Rridapanape nauatoqquiri inani tocorime siri ticarrirraro. Abarahaopa maittaccazama zoqquepoui. Deo Atti cacomeraqquiri narrarideni naco rricarizaui. Naraha tia tettipe: “Ouattiza iboraqquiri tiquenezape parri tirricarini nerreranitoui” taua.

Tahimarideni 2:33

Abi Deo Pouarrinea toccamacossanirrariparra. Narraria Deorrine Zeso Cristo deni inanazapa poua attiza madirra bazima iboraqquiri nauiuarrinepa Deo Poua uinori nauatoniuarri inauittarirrariparra. Deopa pina poua uati taporrarissa narraro Poua Corime Zesoza da inarrarope manaco madirraza da inarizauiuarrine. Nazapa Zeso Deo Corime iauarri zosse inaronarrari. Narrarirrinena arri mouini oppina tehe pina rrorrode dacorarrarossa narraro timittemanarraro. Pina rrororonissa narraro naqui qqui tiquenarraroparri. Poua Corimerrinea arri touatti onihiza uati uati ineza timittemanarraroparripa.

Tahimarideni 3:13

—Icca Abi Deopa, icca idideni Abarahao, poua bedi Izaqui, poua bedi Zaca quenarraridenicca Deo. Pouarrine isso siri tobicazapa Poua Bedi Zeso deni inanarrariparra. Narrari Zesoa tirrinedeni tozepe torrarraride. Tamine Pirato attipa: “Zeso tappa onaza toccaniuiuarrine” naraha tiadenipe tettarromanaza: “Aua porimacossaniza zoqquena zoqquena!” tiqueneza zoqquerraride −narrari Pedoro.

Romanodenidsa 5:18

Adaocca uimasirirrine madirra uapimaza narrizoue torrarraro. Narrarossa narraro Zeso Cristocca uima bicanirrine madirra narrizoueza zori tocanirerrari.

Romanodenidsa 5:8

Naraha Deo iaza uati cauanari canaui nauatoqquiri inaniuarrinepe uimasiri sseqquiri ineraha Cristopa itoui poua ccaccorarrari.

Romanodenidsa 8:3

Narraro uima bicanipe Deorrinena iaza torrarraro. Moizecca marinarrarrine rrerani. Moizecca marinarrape ecauanissa taniuarrine iparrire-rrerani. Madirra iape ibodiza uaidirehe touini inehe imadirraro. Narraroza Deopa: —Uaidira tani. Narrarorrine narrizoue ticarrimananitoui −nanarra narrari. Naraha narraro uimasiri tomossiniuarrinepe Deo Poua Bedi zosse inaronarrari. Pina madirra essire icarrirrarossa naha carrizapa poua assirezana icca uimasiri manaconi Deorrine ssonarirraro.

Romanodenidsa 8:32

Deopa pocca erredeni Zeso iaza eccocco-rrararrari. Icassiuaueraniuarrine eccoraza zoqquerrari. Pocca erredeni iaza da inazapa pocca biquehe onihi onihi iaza eccoccopazerre? Nouerani. Bazima iaza da inarizanitoui.

2 Corintodeniza 5:15

Cristopa bazima itoui zoqquerrari. Nazapa pouarrine madie zati carrimanarraridenipa pouadeni touini quenauicca toui madimana-rraraui. Cristo poua touini nauicca touira madimanarrari. Pouapa pouadenitoui zoqque, nauatoni narrari.

2 Corintodeniza 5:21

Cristopa uimasiri inana-rrereraha icca uimasirirrinena Cristopa uimasiri ponissa naza Deocca uadie pouaza ssonarirraro. Deo nama narraria ia Cristoza irrariqquirraro icca uima Pouaza parrirenissa taniuarrine.

Carasiadeniza 4:4

Naraha Deo pocca erredeni Zeso Cristo madirra iassa naha zosse inaronauiuarrinecca uada bacco teza amonerreza tossonarrari. Moizecca marinarraza ibora tauiuarrine tossonarraride.

1 Timoti 2:6

Zeso Cristopa zoqqueuiuarrine poua ccaccoraza icca uimasiri manaconi zoqquerrari. Narraro uima madirra bazima mittarizemanauiuarrine Deorrine auato inaneza parrissa torrarraro, arri Deorrine narroraponicca uada bacco teza, onarraro.

Ebreodenidsa 1:9

Uima bicani, parrirenissa tanicca touinira tarraro. Uima uaidira taniccaza nacassera tinarraro. Nema tarrarope Ouape ticca Abi Deo tia ocatterrizarraro, tamine tirraniuarrine. Titessedeniza tia deni onanarraro. Tiazara uatizehe deni torranicca onanarraro −naui nade Deo.

Ebreodenidsa 10:5

Nama nazapa Cristo namiuarri madide ccaronabote naza Imehi Deoza uati tarrari: —Rrehe Abi, Tiape madirradenicca uimasiri manaconi bani bedi emene da da ihiqquimemana nauiuarrine touini terrerarraro. Rrirripa bicaui da da ihiqquimemana nauiuarrine naco touini terrerarraro. Bani bedi bicaui siba ua tamaroniza botta botta quenauiuarrine naco touini terrerarraro. Danirri onihi onihi uimasiri manaconi torraniuarrine carri taraha narraro naqui touini terrerarraro. Nouerarraro. Naraha poccadeni uimasiri manaconi orraniuarrine oua pina pouadeni assiredenissa tinanarrarode.

Ebreodenidsa 11:5

Maittaccazama Enoqui naco Deoza rrehe nauissa tazapa uatia-rrararrari. Camitta taha Deo iaccamacossanirrari. Nazapa arrirraro namiza assire bacco torarraro. Poua tauimari Deo Atti dozo naniza dozo naporrarope Enoqui Deoza ibora taza pouarrine Deo uauatize nazapa Deo poua iaccamacossanirrari quenaui nade.

Ebreodenidsa 12:2

Poua tezerremara tocattaza parra rroppa tariui nazapa rricaqquiniuarri bacco tarrari. Ia naqui Zeso touira icattomama canana. Pouapa icca rrehenirri rrinede. Pouapa taide Deoza: —Rrehe Abi, Tettissa tinananiuarrine tiparrireni −naporrari. Pouarrine icca rrehenirri parrirenissa tarraro. Zesopa Imehiuarri toccamacossanizapa uatizehe imeni carriuitoui nauato taporrari. Narrarorrine aua porimacossaniza zoqquehe inauanarraro. Arri aua porimacossaniza izoqqueniuarrinepe oppina taraha pouapa cappina-rraraza poua ccaccorarraride. Nazapa parrissa nauatoniza Imehiuarri toccamacossanizapa madirra cacauade torrauiuarrine Deo Poua uinoriuarri uittarirrari.

Ebreodenidsa 2:7

Tirrinepa ticca zozosse tabaqqui memeuarricca deni toquerrenaccaui. Ia madirrape ia arrimani tinanabaqquiccarraro. Naraha zotodepe ia deni tinanabaqquinitoui. Ticca deni torrehe, ticca biquehe iaza tinanarizanitoui.

Ebreodenidsa 7:25

Nama nazapa pouaza rrehe inezape pouarrine Deoza iarriressirraro. Icassiuauera-zanaponiuarrine naqui pouana parrireui. Pouana madizanaporrari. Itoui Deoza uati uati zanapouitoui, ia acco tocanabaqquiuiuarrine.

Ebreodenidsa 8:3

Nazapa arrirraro namicca Deoza dada toqquimade deni torrauicca bazimapa Deo pouadeni icatterrizabaqquirrari, Deo tazariuarri zepedeni ihirrimana nauiuarrine. Arra Deoza dada toqquimade deni torrauiccapa madirra Deoza uatizemanaza poccadeni da naqquinarra Deoza da da ihiqquimemana narraro. Madirradenicca uimasiri manaconi bani bedi naco da da ihiqquimemana narrari. Nazapa icca danirri dada toqquimade deni torrauicca Zeso naco icca uimasiri manaconi Deoza da inaniuarrine carrirrari.

1 Pedoro 1:21

Pouapa tibodideni acco canaza Deoza rrehe tiquenarraro. Deorrine Zeso Cristo nauatonizapa Deo pocca deni torrehe, pocca dacorehe pouaza inanarraro. —Ia naqui ia tonauatonibaqquiuitoui −tiquenezape Deo Pouaza parrissa tiquenanissa tarraro.

1 Zouao 2:2

Arra Zeso Cristo itoui poua ccaccoraza zoqquerraripa icca uaidirehe inanamossiza Deoza ibicaniuarrine. Icca uimasiri manaconi torrarraripa ia motta orrari inanicca manaconi torra-rraraui. Madirra zama bazima madirizemanarraridenicca uimasiri manaconi torrarrari pouapa.

Apocalipsis 19:12

Poua nocco zibehi tarraro. Pina zippo rrororonissa narraro. Poua tatizapa tamine tatidenicca uapi taha tassaqquiza uittarirrari. Poua oni dozo nani carriraha poua motta nauato taui orrari narrari.

Apocalipsis 5:9

Pouadenipa arrie zati rriri icanemanezape arrama quenarrari: —Tiana bicabote deni tirrani orrari tarraro. Papeo pico naqquini tidirraro bica tani. Nepi tamaroni 7 nehe carriraha titaboni uarrine bica tani. Tiana tia inanazoqque-maneza temene toccarraroza Deoza toquerrenauiuarrine mitta tinabaqquirraride. Arra madirra zama onihi onihiza madirizemanarrarideni mota, touatti onihi onihi carririzemanarrarideni mota, uapideni onihi onihi carririzemanarrarideni mota tirrine Deoza toquerrenarizarrari.