Ebreodenidsa 13:4 - Kulina New Testament Brazil

⁴ Carricarricca uimape Deoza bica tani. Nema nezape maqquiderredeni amonerre ticarrimanezape tecarrirenissa tarri. Amonerredeni maqquiderre ticarrimanazapa tecarrirenissa tarri. Nebouepe poni. Maqquiderredeni, amonerre ticarrimanezape ponira tinarrarimanarri. Amonerredeni, maqquiderre ticarrimanazapa pouara tinarrarimanarro. Narraro marinarra tecauemane-rrerezape uananehe tinanemanarraro. Uananehepe maqquiderre amonerre carriraha amonerre onihi arra arrape poni. Amonerre maqquiderre carriraha maqquiderre ouaha narra narrape poni. Tabiradeni naco pouama arra arra canarizerarraripa poni. Uananehe onihi, onihi naqui tinebomanarri. Niza zotode Deo madirra bazimacca uima cattemade torrazapa uananehe carrimanarrarideniza: —Ticcadeni uima uaidira tani −naza inarrizobaqquiuitoui.

Culina Mádija

⁴ Cajicajicca imapi Diodsa bica tani. Nema nadsapi maqquidejedeni amoneje ticajimanadsapi tecajirenissa taji. Amonejedeni maqquideje ticajimanadsapa tecajirenissa taji. Nebohuepi poni. Maqquidejedeni, amoneje ticajimanadsapi ponira tinajarimanaji. Amonejedeni, maqquideje ticajimanadsapa pohuara tinajarimanajo. Najaro marinaja tecahuamana-jeradsapi huananehe tinanamanajaro. Huananehepi maqquideje amoneje cajiraha amoneje onihi aja ajapi poni. Amoneje maqquideje cajiraha maqquideje ohuaha naja najapi poni. Tabiradeni naco pohuama aja aja canaridserajaripa poni. Huananehe onihi, onihi naqui tinebomanaji. Nidsa dsotode Dio madija huapimacca ima cattemade tojadsapa huananehe cajimanajaridenidsa: —Ticcadeni ima tabaccora tani −nadsa inajidsobaqquihitohui.

Ebreodenidsa 13:4 Iomraidhean Croise

1 Corintodeniza 6:18

Uananehe tinanemana-rreraniuarrine tiarrimanani narri! Madirra uimasiri onihi onihi inanemanarrarope pouadeni assireza uaidirehe inanemana-rrerani. Naraha uananehe inanemanarrarona pouadeni assireza uimasiri inanemanarraro. Pouadeni assire inauaidiremanarraro.

1 Corintodeniza 6:9

Tiadenipe arrirraro uima ssamoqquiri tiquenaccaqui? Uaidirehe inanemanarrarodenipa Deocca cacaueheuarri toquerrena-rrarauitoui. Parri, madirra tiadeni tocamaizabaqqui-manarana. —Uimasiri inanani oppinera tani −quequenanaraha parrissa tiquenerrerarri. Arra Deocca cacaueheuarri madimana-rrarauiuarrinepa uapi tarrari. Pouadenipa uananehecca dameraqquiri narrarideni, siba nauatoniza uauatizemana narrarideni, maqquiderre madirra ouahacca amonerre arradedeni, amonerre maqqui carriraha maqquiderre ouaha nanarradedeni, maqquiderre pouadeni tesse zoto arradedeni naco Deocca cacaueheuarri madimana-rrarauitoui.

1 Corintodeniza 7:38

Maqquiderre amonerre carriza bica tani. Carri-rraraza naco denima bica tani, onarraro.

1 Corintodeniza 9:5

Nazama amonerre Deoza parrissa narraro ocarriza naqui poni tazarrani Deo Atti maride icadarizani bica taqui? Bica tani. Pina imecotedeni ouaha Zeso Cristocca zozosse tabaqquissa, ia Zozossedecca imecote Pedorossa onani naqui bica teraha.

2 Corintodeniza 5:10

Niza zotode Cristo poua baccouarri bazima idomo uezape icca uima cattemade torrauitoui. Nazana ia essirema imadiza uima inanarrarocca bazima Cristo nattome inanitoui. Uima bicani inanarraro manaconi, uaidirehe inanarraro manaconi naqui bazima iaza inananitoui.

Carasiadeniza 5:19

Ia bazima nauatoqquiri inani: Madirra pouadeni bodiza uaidirehe touini quenazapa Deo nacassera tauicca inanemana tani. Pina pocca amonerre rrereraha touini damera tarrari, ponicca maqqui rrararaha toui damera tarraro, poua tesse tezerre, poni tassani tazarrani uananehe oppina tanicca inanemanarraro, uima uaidira tanicca tonanade damera tarrari. Narraro uima uapimaza Deo nacassera tarrari.

Carasiadeniza 5:21

Denimapa zepe sse tarraricca acconi uadirrari, nocco rrano tarrari, uaqquira taha ccarizarrari. Nema nanicca uima bazimape uaidira tarraro Deoza. Naraha tiadeniza parri, onarraro. Naniuarri omadiza tiadeni mari ocanabaqquiporrarossa narraro tiadeniza dozo onapomarraro: Deo nacassa tauicca uaidirehe inanemanarrarodenipa niza Zeso Cristo ccanipomaza Deocca cacaueheuarri toquerrena-rrarauitoui.

Epesodeniza 5:5

Arrirraro uima nauatoqquiri tiquenani: Uananehe inanemanarrarodeni, uaidirehe oppina tanicca inanemanarrarodeni bazimapa Cristo, Imehi Deo tezerre poccadeni cacaueheza bacco toquena-rrarauitoui. Denima touini quenarrarideni naco pina ziniro touini, pina tozepetarri toui quenarrari, narrarideni bazimapa Cristo, Imehi Deo tezerre poccadeni cacaueheza bacco toquena-rrarauitoui. Nama quenarraridenipa pina siba nauatoniza uatizemanarrarissa quenarrari. Namicca touinira uatideni uanaqquiri narrari. Deoza uatideni uanaqquiri narrararrari.

1 Tesaronicadeniza 4:6

Timecote Zeso Cristoza rrehe narraricca amonerre, amonerre onihi naqui tirremana terrerarri. Timecotecca amonerre tirrezape pina timecoteza nanarrizo tarrarossa narraro. Neza tiadeniza uati inapode: —Parri, nema narraro uimape oppina tani −ihinanapode. Nema narraro uima tinanemanezape manaco Deo tiadeni tonarrizo-baqquiuitoui.

1 Timoti 3:12

Nazama Zesoza rrehe quenarrarideni cacauade birri accodedeni naco poccadeni amonerre ohorrariri nanina bica tani. Nezape pouadeniza uananehe tauimarini noueraniuarrine. Poccadeni erredenideni, poccadeni ozacca cacauade nauatoqquiri nana.

1 Timoti 3:2

Nama nazapa Zesoza rrehe quenarrarideni cacauadecca madie arrima nanina bica tani: Pouapa madiuissa tazapa madirra ouaha attidenipa: —Pocca uima uaidira tani −quena-rrarauiuarrine. Pocca amonerre naqui orrarini carriuiuarrine. Uananehema madi-rrarauiuarrine. Nazama uarrirriraza poua bodi uatouissa tana. Uimasiri inana-rreraniuarrine poua cacauade nauato, madide naco nauato tazapa pouaza madirra ouaha attidenipa: —Pouapa bica taui, uima cappiraui −quequenanauiuarrine. Pouaza madirra bacco narronaza pouaza zamatapa da inauiuarrine, pocca ozaza uadauiuarrine naco bodi nanarrorapo nana. Deo Atti maride naco nauato tana.

1 Timoti 3:4

Pouapa pocca ozacca madirra cacauade nauato tana. Poua attiza pocca erredenideni naco iboraqquiri nauiuarrine. Pocca erredenidenipa poua noppine cappinaqquiri naza madimanauissa tauiuarrine.

1 Timoti 4:3

Arrina mamaizadedenicca marinarrape: —Carricarripe poni −quequenanarrari. —Rrirripa naco motapa oppina taui, tirripemana terrerarri −quequenanarrari. Naraha narraro marinarrape parrissa rrerani, uaidira tani. Zamatapa, bani bazimapa Deo inauatorizarrari. Zeso Cristoza rrehe inarrarope Deocca parrissehe nauatoqquiri inarraro. Nazapa iaza rrirripa oppina tauicca noueraui. Deoza ettipe: —Rrehe, peperri Abi Deo, ticca danirri irripauiuarrine bica taui −inezape bazima irripani bica tani.

1 Timoti 5:14

Narraro noppineni ouattipe: Amonerre zouato amonerre tobaccopero denipe maqquiderre carrimanapomaniuarrine bica tani. Erredeni naco carrimanapomaniuarrine bica tani. Ponidenicca oza naqui ecauemananiuarrine bica tani. Ponidenicca madie bica tezape iaza nacassaqquiri narraridenipa Zeso Cristoza iquerrenarrarodeniza uima inassonarimananiuarrine ssamo tani.

Titodsa 1:6

Nazama Zesoza rrehe quenarrarideni cacauade torrauiuarrinepa bica tarrarira ticatterrizarro. Naui madirra ouaha attideni pouaza: —Pocca uima uaidira tani −quena-rrarauiuarrine. Amonerre orrarini carrirrarina ticatterrizarro. Arra madirra poua bedideni Zesoza rrehe quenarrarira ticatterrizarro. Madirra ouahadeni poua bedideniza: —Pouama madimanarrari, iboqquiri naui –quena-rrarauiuarrine. Arra madirra bedideni madimanauissa tarrarira ticatterrizarro.

Ebreodenidsa 12:16

Arra maqquiderre amonerre uananehe carrimanarrarideni naco tiadeniza carrimemana-rrarana. Madirra Deo noppine cappinemana-rraraza Deocca zossenirri ponima inanemana tani. Narrarideni naco tiadeniza carrimemana-rrarana. Pina maittaccazama Esao Deocca zossenirri ecaua-rreraza ponima inanarrarossa quenazapa bica terrerani. Esaopa taide tossonaporrari. Nama nazapa imehi zoqqueza zepetarripe pouazana torraniuarrineraha Esao pemiuissa taza rrirripa manaco poua ouahaza da inarraro.

Apocalipsis 22:15

Naraha arra madirra Zeso Cristoza parrissa quena-rrararrarideni, zoppinerre doriza dameraqquiri narrarideni, uananeheza dameraqquiri narrarideni, irrinedeni auemanarrarideni, siba nauatoniza uauatizemana narrarideni, maizeheza dameraqquiri narrarideni, poua tesse mamaizadedeni, narrarideni bazimapa Deocca oza pananiza rraui torrezima-rrarauitoui.