Ebreodenidsa 1:3 - Kulina New Testament Brazil

³ Rrehe, narrari Deo Bedirrinena Imehi Deocca dacorehe, deni torrehe, canauatori canehe iaza auato tarraro. Pouapa pina Imehi Deossa narrari. Nauato tarrari. Bica tarrari. Meme, nami, bazima anirizarraricca poua atti dacorarraroza: —Anizanapona −naza pouarrine anizanaporrari. Nazama itoui zoqqueuiuarrine ibora tazapa poua emenerrine ibodicca uimasiri sse narizaza ibodi touissorraro. Zotode Deorrine deni torrazapa memeuarri toccamacossaniza Deo Bicabote uinori nauatoniuarri uittarirrari.

Culina Mádija

³ Jehe, najari Dio Bedijinena Imehi Diocca dacorehe, deni tojehe, canahatori canehe iadsa ahuato tajaro. Pohuapa pina Imehi Diossa najari. Nahato tajari. Bica tajari. Meme, nami, huapima aniridsajaricca pohua atti dacorajarodsa: —Anidsanapona −nadsa pohuajine anidsanapojari. Nadsama itohui dsoqquehijine ibora tadsapa pohua emenejine ibodicca imasiri sse naridsadsa ibodi tohuirejaro. Dsotode Diojine deni tojadsapa memehuaji toccamacossanidsa Dio Bicabote inori nahatonihuaji huittarijari.

Ebreodenidsa 1:3 Iomraidhean Croise

Mateo 22:24

—Mamaride, Moizecca marinarrazape arrima nani: “Maqquiderrepa amonerre carriraha erredeni rriraha zoqquezapa pocca amonerrepe poua imecotena icarrina, naui erredeni carrizapa pocca ato zoqquerraricca erredenissa nauiuarrine” nade Deo Atti Moizerrine dozo naniza.

Maraco 16:19

Nazapa ia Zozossede Zeso poua uatimadedeniza uati taha rricazapa memeuarri Deo poua iaccamacossanirrari. Deopa Zeso deni inanazapa Poua uinori nauatoniuarri inauittarirrari, madirra ihicazossebaqqui nauiuarrine.

Huano 1:14

Deo Attiraha assire torrazapa Zeso iaza madirrariparra. Pocca nauatonirripe bicabote deni torrani qqui inade. Nazama pocca nauatouepe orrariana nauato tarrari. Abi Deo Bedina orrariui. Pouapa uati uana taza ia todinibaqquirrari. Pouapa parrissehe rrinede.

Huano 1:29

Nani Betaniaza imadiccazape narraro uada ssiuarraza Zouao Zeso ccarronaui qqui taza iaza uati tarraride: —Qqui tiquenarro! Arrarraripa Deocca danirri madirra bazimaza! Pouapa Deocca Eueue Bedi bicabote Deoza da da inarrarissa narrari. Niza zoqquezapa pouana madirra bazimacca uimasiri inanamossinitoui −nade.

Huano 1:4

Nazama Zeso pouapa camittehe rrinede. Narraricca camittehena madirraza ssiuarrani torrarizarraro.

Tahimarideni 2:33

Abi Deo Pouarrinea toccamacossanirrariparra. Narraria Deorrine Zeso Cristo deni inanazapa poua attiza madirra bazima iboraqquiri nauiuarrinepa Deo Poua uinori nauatoniuarri inauittarirrariparra. Deopa pina poua uati taporrarissa narraro Poua Corime Zesoza da inarrarope manaco madirraza da inarizauiuarrine. Nazapa Zeso Deo Corime iauarri zosse inaronarrari. Narrarirrinena arri mouini oppina tehe pina rrorrode dacorarrarossa narraro timittemanarraro. Pina rrororonissa narraro naqui qqui tiquenarraroparri. Poua Corimerrinea arri touatti onihiza uati uati ineza timittemanarraroparripa.

Tahimarideni 7:56

—Qqui! Memeuarri touabani qqui tiquenarri! Madirra Bedi poua Imehi Deo uinori nauatoniuarri uaui qqui onaui −narrari Estevao.

Romanodenidsa 1:16

Ouape Zeso Cristo tauimari icassiuaueraniuarrinecca ouacomeraniuarrinepe ocappina-rrerarraro. Ouape nauato onani: Zeso Cristo tauimaripa Deocca dacorehe madirra tocassiuauerauiuarrine, onarraro. Taidepe zodeodeniza, zotodepa zodeo querrena-rrararrarideniza naco Zeso Cristo tauimari dacorarraro. Bazima narraroza rrehe quenazapa tocassiuauerauiuarrine.

Romanodenidsa 8:34

Nerrecorrarina Deo icatterriza-baqquirrarideniza: —Narrizoueuarri ocasserani auemanauitoui −nauiuarrine parrirerrari? Ssamo taui. Zeso Cristopa itoui parrissa zoqquerrari. Narrarina parrissa nauatonirrari. Toccamacossanizapa Imehi Deo uinori nauatoniuarri uittarirrari. Nauiuarri uittariza Imehiza uati uati nanarra narrari, ia touacaua-baqquiuiuarrine.

2 Corintodeniza 4:4

Narrarideni Zesoza rrehe quena-rrararraripa arrirraro zamacca zozossede Tocorime-Tamine bodideni ecossabaqqui-zanaporrari. Nama quenazapa Zeso Cristo tauimari icassiuaueraniuarrinecca bodideniza tossiuarra-rrerarraro. Cristo bicabote, ssiuarra taui, Imehi Deossa narrari tauimari mari mari inarraro mittemana-rrararrari.

Corosadeniza 3:1

Arri tiadenipe Cristoza rrehe tiquenapozama ticcadeni uimabote tinebomanezape pina Cristo zoqqueza nauatonirrarissa tiquenarraroparri. Cristo poua tezerre tinauatonimanezape memeuarri arri Cristocca uima touira tiquenarri. Naui memeuarripa Cristo Imehi Deo uinori nauatoniuarri uittarirrari, Poua tezerre zozossesse narrari.

Titodsa 2:14

Zesopa itoui uati uana taza poua ccaccorarrari. Uaidirehe bazima inanarizehe imadiporaha ia todinibaqquiuiuarrine zoqquerrari. Pocca iquerrenani orrari naniuarrine ia tonauissobaqquirrariparra. Pocca iquerrenarrarope uima bicani tonanade dameraqquiri inaniuarrine.

Ebreodenidsa 1:13

Deopa pocca zozosse tabaqquideni orrariaza naco: —Deni tirrani −narrarittaco? Noueraui. Naraha Poua Bedizana Atti arrama narrari: —Ouinori nauatoniuarri tittarirri. Oua tezerrepe touatti dacorarraro ticarrirri. Nizaranibote tia uadidedenipa arramani onanabaqquiuitoui. Poccadeni dacorehepe onarricanitoui −naui nade Deo.

Ebreodenidsa 10:12

Naraha Zeso Cristo uimasiri manaconi da inarrarope orrarirraro. Narrarope parrirenissa tehe nema zanaponitoui. Naui zotodepa Zeso Imehi Deo madiuiuarri toccamacossaniza deni torrehe carrirrarirrine Deo Poua uinori nauatoniuarri uittarirrari.

Ebreodenidsa 12:2

Poua tezerremara tocattaza parra rroppa tariui nazapa rricaqquiniuarri bacco tarrari. Ia naqui Zeso touira icattomama canana. Pouapa icca rrehenirri rrinede. Pouapa taide Deoza: —Rrehe Abi, Tettissa tinananiuarrine tiparrireni −naporrari. Pouarrine icca rrehenirri parrirenissa tarraro. Zesopa Imehiuarri toccamacossanizapa uatizehe imeni carriuitoui nauato taporrari. Narrarorrine aua porimacossaniza zoqquehe inauanarraro. Arri aua porimacossaniza izoqqueniuarrinepe oppina taraha pouapa cappina-rraraza poua ccaccorarraride. Nazapa parrissa nauatoniza Imehiuarri toccamacossanizapa madirra cacauade torrauiuarrine Deo Poua uinoriuarri uittarirrari.

Ebreodenidsa 4:14

Deo Bedi Zesopa Imehi madiuiuarri toccamacossanizapa rridapana memeuarri madirrari. Pouapa icca uima Imehi Deoza uauati toqquimade deni torrauicca. Ouaha pina pouassa narrari noueraui. Pouazara parrissa ineza pouatoui dameraqquiri izanapona.

Ebreodenidsa 7:27

Pouapa pina Deoza dada toqquimade deni toquerrenauiccassa narrararrari. Narraridenipa uada uarrirriraza bani bedi inanazoqque-manaza Deoza da da ihiqquimemana narrari. Taidepe poccadeni uimasiri manaconina da da iquequenanaporraro. Zotodena madirra bazimacca uimasiri manaconi da da iquenanarraro. Naraha Zesopa nama narraraui. Pouapa uada orrarieza madirra bazimacca uimasiri manaconi da inarrarope poua ccaccoraza aua porimacossaniza inanazoqque-manarrari. Pocca danirripe orrarirraro. Onihi nema napoma-rreranitoui. Poua emene icca uimasiri manaconi torrarrarope parrirenissa zanaporraro.

Ebreodenidsa 8:1

Uima onihi onihi tiadeniza uati oneraha uima bicani deni torraniccape arrima narraro: Icca danirri Deoza dada toqquimade, icca uima uauati toqquimade deni torrauicca icarrini. Narraripa Zeso. Deorrine bazimaza deni torrazapa memeuarri madirrari. Deo Bicabote uinori nauatoniuarri uittarirrari.

Ebreodenidsa 9:16

Nazama Zeso zoqquerrarirrine Deocca biquehe iaza torrarrarope pina madirra zoqqueza poua zepetarri bedideniza torrarrarocca uimassa narraro. Arra madirra zepe sse tarraripa zoqque-rraraccazama uima inanarroraporraro. Poua zepetarripe bedideniza torraniuarrinecca uima papeoza dozo inarraro. (Cariuacca oninipe: testamento.) Naraha zepe sse tarrari madiccazapa narraro uima pina ponimassa narraro. Zoqquezana parrissa torrarraro. Nazana bedideniza poua zepetarri torrarraro.

Ebreodenidsa 9:26

Rridacca uarrano uarrirriraza poua emene toccaniuarrine poua ccaccaccora narronazapa zama nauatoponizama zoqquehe tonauanarronanarra. Naraha rridapana zama rricanicca uada touarrireza iaza ccaronarrari. Zoqqueheuarrine poua ccaccoraui orrariui, icca uimasiricca dacorehe inarricaniuarrine. Nama naui orrari nazapa paparra. Nama napoma-rrarauitoui.

1 Pedoro 1:21

Pouapa tibodideni acco canaza Deoza rrehe tiquenarraro. Deorrine Zeso Cristo nauatonizapa Deo pocca deni torrehe, pocca dacorehe pouaza inanarraro. —Ia naqui ia tonauatonibaqquiuitoui −tiquenezape Deo Pouaza parrissa tiquenanissa tarraro.

1 Pedoro 3:22

Zeso Cristo nauatonizapa memeuarri toccamacossanirrari. Bazimaza deni torrazapa Deo uinori nauatoniuarri uittarirrari. Nauiza uittarizapa Deocca zozosse tabaqqui memeuarriccaza zosse zosse narrari. Auatoraqquiri narrarideni deni torrehe carrimana, dacorehe carrimana naraha narrarideniza naco Zeso Cristo zosse zosse narrari.

2 Pedoro 1:16

Arri ia tiadeni maridepe ia Zozossede Zeso Cristocca dacorehe tauimarini, poua ccaronapomauiuarrine tauimari naqui tiadeni mari icanabaqquirraro. Narraro marinarrape ponima maizehecca uima inauatomanarrarossa nerrerani. Ia Zozossedecca deni torrehe parrissa inoccoza qqui inarrarora tiadeniza ecomerarraro.

2 Pedoro 1:17

Iape Abi Deo Poua Bedi Zeso deni inanaui qqui inade. Deo pocca deni torrehe, pocca biquehe Poua Bediza inanezape Poua Atti arrama narraride: —Arrarraripa occa erredeni. Pouaza ouati uana tarraro. Pouaza ouatizeri narraro −narraride Deo.

1 Zouao 1:7

Naraha ssiuarraniza rrauirrarizezape pina Deo ssiuarra taha madirrarissa inaniuarrine. Nezape imecotedeni tezerre irrariqquirraroparri. Deo Bedi Zeso Cristo emene naqui icca uimasiri bazima inanamossi-zanaporraroparri.

1 Zouao 3:5

Naraha tiadenipe nauatoqquiri tiquenani: Arra Zeso Cristopa icca uimasiri inarricaniuarrine namiuarri ccaronarrari. Pouapa uimasiri cappirarra narrari.

Jodacca 1:25

Nema nezape ia Tonassiuauade Deoza etizena. Deopa orrariui. Nazama aniporrari. Ouaha noueraui. Ia Zozossede Zeso Cristorrine icassiuauerarraroparri. Deo Pouaza: —Icca Tamine bicabote deni tirrani, daco tirrirani −inarraro. —Bazima Zossede tirrarraro. Tiape taidezama nema tarronarraroa rridapana nema tani parri nani. Nema tizanaponitoui −inarraro Deoza. Parrissa nema nana. Peperri.

Apocalipsis 3:21

Ouape uimasiriza deni orrarrarorrine occa Abi zosse zosse nauiuarri ouittarirraro. Tiadeni naqui uimasiriza deni tiquerrenezape niza zotode oua zosse zosse onaniuarri tiadeniza: “Rrassi tinarirri” onanitoui.

Apocalipsis 4:11

—Ia Zozossede icca Deo, Tiaza etizeni bica tani. Tiana zama bazimaza carririzarraripa tinauatorizarrari. Tia touini teza tirrine bazima nauatorizarrari. Narrarorrine madirra bazima tiaza: “Bica tinani, deni tirrani” quenauiuarrine bica tani, inarraro −quenade.