Apocalipsis 8:7 - Kulina New Testament Brazil

⁷ Nezape Deocca zozosse memeuarricca taidecca rrori rrori nanarra passo ccara torrani, zippo rradarini touemene carrimehe quissa inaronarraro. Narrarorrine nami arobeni dirri tezape aua mota dirri, ppatanicca, mina naqui nemanehe dirri tarizarraro. (Arobenipe cariua attiza: tercera parte, quenarrari.)

Culina Mádija

⁷ Nadsapi Diocca dodosse tahidecca jei jei nanaja passo ccara tojani, dsippo jadarini tohuemene quejemehe quissa inaronajaro. Najarojine nami arobeni diji tadsapi ahua mota diji, dsero nemanehe diji taridsajaro. (Arobenipi caria attidsa: tercera parte, quinajari.)

Apocalipsis 8:7 Iomraidhean Croise

Satiacocca 1:11

Marri ppocoraza mina qqueze nezape moueni catorra tani. Minacca biquehepe amossissi tani. Narrarossa narraroa madirra zepedeni sseqquiri narraripa denima carrimanauiuarrine zepedeni ihirrimana naraha amossiuarrauitoui.

1 Pedoro 1:24

Narraro uima Deo Atti dozo nanizape arrima nani: —Madirra bazimacca madiepe pina minassa narraro. Madirracca biquehe naqui pina aua mouecca biquehessa narraro. Minape amazati qqueze neza rrica tani. Moue naco amazati qqueze naza catorraha rrica taui. Madirra naco pina narraro uimassa quenarrari. Madimanazanapo-rraraui. Cacotazapa rricauitoui.

Apocalipsis 12:4

Nazapa daragao imehibotepa amouadeni mota (Cariua attizapa: tercera parte, quenarrari) poua zoporiza rrazirema rroue inaronabaqquizapa namiuarri ua inaronabaqquirrari. Nazapa daragao imehibote amonerre izoni comarraro tazarranima uarrari. Erredeni tossonazapa amazati rripauiuarrine narrorarrari.

Apocalipsis 16:2

Nazapa Deocca zozosse taidecca toccarrari, pocca tasacca namiuarri sso inaronarraro. Nazapa namiuarri madirra bazima bani siri rrizabote rranoma rrauirizarrari poua corime nauatouiza: —Ia cacauade −quequenanarraridenipa rroro rrazizi comene dacorauicca inauanemanarrari.

Apocalipsis 16:21

Nezape memeuarricca passo ccara torrani pina sibassa narraro naqui catorraronarraro. Bedeni rrerani, pina 40 quilossa narraro. Narrarope madirraza catorraririzarraro. Nazapa Deoza tatamasso quenarrari, narraro narrizoue pouadeniza oppina teza.

Apocalipsis 6:8

Nanarra cavaro uesseui qquenaui qqui onarrari. Ideza uittarirrari onipa Zoqquehe. Poua nattiuarri ouaha ccarronarraripa zoqquemana-porrarideni corime cacauade. Narrarideni pamahaza dacorehe da iquenarraro. Madirra zama nemaneheza madimanarrarideni mota inarrizobaqqui-manauiuarrine. (Narrari mota cariua attizape: quarta parte, quenarrari.) Rricauiuarrinepa rrazireza rrica, pemiza rrica, zamacomaza rrica, bani uadi tarrarirrine rrica nauitoui.

Apocalipsis 7:1

Narraro rriquezape Deocca zozosse tabaqqui memeuarri 4 quenaha nami rricaqquiniuarri uaueri narizaui qqui onabaqquide. Ouahapa marri ccarronauiuarri ua, ouahapa marri toccauiuarri ua, ouahapa arobeniuarri ua, ouahapa arobeni onihiuarri ua narizemanade. Narraridenipa rrorrode 4 nehe ecossemanarraro, namiza rrappo-ppo canariza-rreraniuarrine. Ueni imehi naco rrene toraui nauiuarrine, aua eppe naco rrene toraui nauiuarrine.

Apocalipsis 9:15

Nazapa Deocca zozosse tabaqqui memeuarricca 4 quenarrarideni tappa inabaqquirrari. Madirra mota inarricarize-manauiuarrine rraui torrarrari. Pouadenipa narraro uimaza zepedeni irririze-manauiuarrinepa narroremanaporrari. Arra pouadeni zepe irriuiuarrinecca marri, uada, abazico, uarrano bacco taza zepedeni irrimanarrari.

Apocalipsis 9:18

Arra cavaro arraridenicca 3 naha qquenarrari comenerrine madirra mota cacotarizarrari. Narrarope zippo rrororoni, zippo esseni, enxofre marro uaidira tarrari comenerrine.

Apocalipsis 9:4

Pouadeni zossede attipa: —Minape tinarrizomana-rrerarri, moro tarizauicca tinarrizomana-rrararro, aua appani naqui tinarrizorizemana-rrerarri. Naraha madirra uassarideniza Deocca nanarrano cappiremanarraridenira tinarrizoriza-baqquimanarro.