Apocalipsis 20:12 - Kulina New Testament Brazil

^12-13 Ocattoma cananerre zoqquemana-porrarideni Deo tezerrema domodeni uarrari. Nauiuarripa deni toquerrenarrarideni domo ua, cappiremanarrarideni domo ua narrari. Arra passoza rre tocanirerrarideni, zamaza rricarrarideni, zoqquemana-porrarideni bazima Deocca uiuittari bicabote tazarranima domodeni uarrari. Nazapa zoqquemana-porraridenicca uima papeoza dozo naporraro itaborizarraro. Arri pouadenirrine uima bicani inanarizemanarraro, uima uaidira tanicca inanarizemanarraro naqui papeoza dozo narizarraroza uima cattemade torrarrari. Nezape pina pouadeni uima inanarizemanarrarossa nehe manaconi pouadeniza inanarraro. Papeo onihi naqui itaborraro. Narraro papeope madirra camittehe carrimana-zanapouiuarrinecca.

Culina Mádija

^12-13 Ocattoma cananaja dsoqquemana-pojarideni Dio tedsejema domodeni huajari. Nahihuajipa deni toquejenajarideni domo hua, cappiramanajarideni domo hua najari. Aja passodsa je tocanirejarideni, dsamadsa jicajarideni, dsoqquemana-pojarideni huapima Diocca huihuittari bicabote tadsajanima domodeni huajari. Nadsapa dsoqquemana-pojaridenicca ima papeodsa dsodo napojaro itaboridsajaro. Aji pohuadenijine ima bicani inanaridsamanajaro, ima tabaccora tanicca inanaridsamanajaro naqui papeodsa dsodo naridsajarodsa ima cattemade tojajari. Nadsapi pina pohuadeni ima inanaridsamanajarossa nehe manaconi pohuadenidsa inanajaro. Papeo onihi naqui itabojaro. Najaro papeopi madija camittehe cajimana-dsanapohuijinecca.

Apocalipsis 20:12 Iomraidhean Croise

Mateo 11:22

—Naraha arri Corasinauarri timadimanarraro tiadeniza, Besaidauarri timadimanarraro tiadeniza naqui ouattipe: Niza madirra bazimacca uima cattemaniuarrinecca uada bacco teza Deo Poua baccouarri tidomodeni uezape Tirouarri madimanarrarideniza Deo pocca narrizoue arrimani torranitoui. Sidouarri madimanarrarideniza naco arrimani torranitoui. Neraha tiadenizana Deo pocca narrizoue denima oppina tanitoui −nade Zeso.

Mateo 16:27

Neraha ouape Madirra Bedi orrarraroa nizaranibote Abi Deo ssiuerrenema pocca zozosse tabaqqui memeuarricca tezerre occaronapomanitoui. Nazapa madirra madiuissa tarrari pocca madie tonanabicaza Deoza zepe irrirraripa niza pouaza denima bica tanicca da onanitoui. Madirra ouaza damera tarrararrari Deoza bazira tehe zepe irrirraripa bica tanicca bazira tehe pouaza da onanitoui. Naraha madirra uima bica tarraroza zepe irrirrarazapa occa danirri cappirauitoui. Madirra uima uaidira tarraroza zepe irrirraripa occa narrizoue carriuitoui.

Roca 10:20

Naraha tocorime siri, mona, dori tettideniza iboraqquiri naza tetizemaneraha narraro uimape arrimani. Uima denima bica taniccape arrima nani: Occa madirra tiquerrenezape tiadeni onipe memeuarri Deocca papeoza dozo narizani. Narraro uimazana denima tetizemanarri, onarraro −narrari Zeso.

Tahimarideni 24:15

Ouape arri touini omadirrarope pina ouimecote zodeodeni touini madimanarrarissa narraro. Narraro arri rricarraridenipa Deorrine niza nauatonimanauitoui, ihinanarraroparri. Bicaqquiri narrarideni rricarrari naco nauatonimanauitoui. Uaidiraqquiri narrarideni rricarrari naco nauatonimanauitoui, ihinanarraroparri.

Romanodenidsa 2:6

Niza Deopa bazimaza poccadeni uima manaconi pouadeniza da inanitoui.

1 Corintodeniza 4:5

Nema narraroa ia Zozossede ccanipoma-rraraccazapa tiadenipe madirracca uima nattome tiquenerrerarri. Titessedeniza: —Tirrinedeni uaidira tani −tiquenerrerarri. Niza ia Zozossede ccanipomazana poua ssiuerreneza uima bazima auatoma-rizanitoui. Arri ia bazima ibodicca uima ecomarraro pouarrine auatoma, ibodiza touini inarrarocca auatoma narizanitoui. Nazapa bica inanarraroccaza Deopa iaza: —Tirrinedeni bica tani −nauitoui.

2 Corintodeniza 5:10

Niza zotode Cristo poua baccouarri bazima idomo uezape icca uima cattemade torrauitoui. Nazana ia essirema imadiza uima inanarrarocca bazima Cristo nattome inanitoui. Uima bicani inanarraro manaconi, uaidirehe inanarraro manaconi naqui bazima iaza inananitoui.

Piripodeniza 4:3

Nazama otesse Deo Atti maride titezerre ihicabera narraroza dozo onarraro. Ebodia, Sitique ponideni acco ticanabaqquirri, queberanissa taniuarrine. Zeso Cristo tauimari icassiuaueraniuarrinecca maride occarizazape ponideni pamehe ouinoriza zapanideni irririzemanarraro. Otesse Cremente, otesse ouahadeni ineza Deo Atti maride iquerrenezape ponideni naqui oua acco icanemanade. Pouadeni oni bazimape camittehe carrimana-zanapouiuarrinecca papeoza dozo nani anini.

Apocalipsis 11:18

Nezape zama onihi onihi narizarrarocca madirra tiaza uadimanarrari. Naraha rridapanana ticca uadie torrarizaniuarrinecca uada bacco tani. Nazapa rriquemanaporraridenicca uima pouadeniza uati tinezape poccadeni uimasiri manaconi pouadeniza narrizoue tinassonari-rizanitoui. Naraha ticca zozosse Tetti cacomeraqquiri narraridenizape manaconi bicabote da tinarizanitoui. Tiaza toquerrenarrari bazimaza naqui da tinarizanitoui. Narraro manaconi bicabote da tinarizarrarope arramani toquerrenarrarideniza, deni toquerrenarrarideniza arra bazima tinoppine cappinemanaza Tettiza iboraqquiri narrarideniza tinanarizanitoui. Rridapana naqui arrirraro zama inauaidirarize-manarrarodenicca uaidirehe manaconipe pouadeni tinarricauitoui −quenarrari cacauade 24 quenarrarideni.

Apocalipsis 13:8

Arrirraro namiza madirizemanarrarideni camittehe carrimana-zanapouiuarrinecca papeoza onideni dozo nani nouerarraripa bani siri rrizabotezara uatizerize-manarrari. Narraro papeo dozo nanipe zama nauatoponizama Eueue Bedi Zeso pouana ecauarraro. Pouana camittehe issiuauanicca icarririzaniuarrine zoqquerrari.

Apocalipsis 17:8

—Arra bani siri qqui tinarraripa taide madiporaha rridapanapa pocca uima rricani. Naraha pouapa niza nami odini uarri taniccaza qquenaui orrariuitoui. Qquenaui nattipa coriza imeni rrororo cananiuarri poua zoqqueuicca uima inauana-zanaponitoui. Nazapa arrirraro zamacca madirra taide zama nauatoponizama camittehe carrimana-zanapouiuarrinecca papeoza onideni nouerarrarideni bani siri qqui toquenazapa bodideni uarro quenauitoui. Narrari bani siripa madiporrari, rridapanapa madi-rraraui, niza zotode canarroranipomaza madirra inarraborreribaqquiuitoui −narrari Deocca zozosse ouaza.

Apocalipsis 19:5

Nazapa Deocca uiuittari bicabote cauittariniuarri touatti omittarrarope arrima narraro: —Bazima Pouaza zozosse tiquerrenarraro icca Deoza rriri rriri tiquenarri. Bazima Pouaza tizepedeni irrirraro, Poua noppine cappinaqquiri tiquenarraro, arri deni tiquerrenarrarodeni, arrimani tiquerrenarrarodeni naqui Deoza rriri rriri tiquenarri −narrari.

Apocalipsis 20:11

Nazapa qqui onanarra pocca uiuittari bicabote mopo tocanarraroza Deo uittariui qqui onarrari. Nauiza uittariza poua tezerremape meme touatora-ra amossi, nami touatora-ra amossi nezape nouerade.

Apocalipsis 21:27

Narraro oza pananiuarripe Deo nacassera tauicca noueranitoui. Madirra uimasiri totonanadedenipa rrauizima-rrarauitoui. Madirra mamaizadedeni naco rrauizima-rrarauitoui. Arra Eueue Bedicca papeo camittehe carrimana-zanapouiuarrineccaza onideni dozo narizarraridenira rrauizimaui orrariuitoui.

Apocalipsis 22:12

Ia Zozossede Zeso attipa: —Rrehe, occanibote nani. Uima bicani inanarize-manarrarodenipa narrarossa nehe pouadeniza da onarizanitoui. Naraha uima uaidira tanicca inanarize-manarrarodenipa narrarossa nehe pouadeniza da onarizanitoui.

Apocalipsis 3:5

Occa dacorehema timadimaneza uimasiriza deni tiquerrenezape niza zotode etero moponi tezarizemananitoui. Deocca papeo camittehe carrimana-zanapouiuarrineccaza tiadeni oni dozo nani sse onarize-rreranitoui. Niza occa Abi pocca zozosse tabaqquideni tezerre baccodeniuarri tidomo ueza: “Arrarraridenipa occa madirra” onanitoui.