Apocalipsis 2:3 - Kulina New Testament Brazil

³ Otauimari tinebomananiuarrine madirra tiadeni tonarrizo-baqquimanaraha tinebomana-rrerani. Ticcadeni uima occa marinarrassa naniuarrine rraohoraqquiri tiquenarraroparri.

Culina Mádija

³ Otahimari tinebomananijine madija tiadeni tonajidso-baqquimanaraha tinebomana-jerani. Ticcadeni ima occa marinajassa nanijine jahohoraqquiri tiquinajaropaji.

Apocalipsis 2:3 Iomraidhean Croise

Maraco 15:21

Isso teppeppedenipa Zeso iaqquemananarra zama Sirenecca madirra Simaopa uizarrauarri ccaniza isso teppeppedeni bacco irrizemanarrari. Narrari Simaopa Aresadre, Ropodenicca abi. Zeso aua porimacossani zorro ineraha rrao torraza isso teppeppedenipa Simao icazossemanarrari: —Manaco tia arrarraricca aua porimacossani zorro tinarri −quenazapa manaco Simaona zorro inarraro.

Roca 14:27

Madirra ouaza damera tarrarazapa occa madirra torrauiuarrine parrire-rraraui. Occa madirra torrauiuarrinepa otauimarirrine ocasserani inauaneraha nema nehe otauimarizara damera tarrari. Pouaza: “Aua porimacossaniza tia inanazoqquena” quenaza naco poua attipa: “Peperriua ozoqquena. Zeso onebo-rraraui” nazapa narrarina occa madirra torrarrari −narrari Zeso.

Roca 18:1

Zesopa arrirraro namiza imadinicca uimaza pocca zozosse tabaqqui mari icanabaqquirrari. Madirra Deoza uatide dameraqquiri nauiuarrine, —Deopa ouatti mitta-rraraui −quena-rrarauiuarrine uati uati tarrari.

Roca 21:19

Nazama tiadeniza ouattipe: Dacoco tirrirarri! Narraro uadie tinauanemana-zanapozape tiadenina ticassiuaueranitoui −narrari Zeso.

Roca 5:5

Nazapa Simao Zesoza uati tarrari: —Ia Maride, iape zome inassiuarreraha aba icarri nerrerani −narrari. —Neraha ia ticazossebaqquizape icca tarrapa coro icazippana −narrari Simao.

Roca 8:15

Naraha madirra ouaha bodidenicca uimape pina arri nami bica tarrarocca uimassa narraro. Deo Atti mittemanazapa rrehe quenauissa tarrari. Pouadeni bodipa parrissehe touini quenarrari, bodideni bicaqquiri narrari. Deo Atti pouadeni bodiza ecauemana-zanaporraro. Poccadeni rrehenirri napizape pina arra zamatapa nocco nami bicaniza moro tauissa tazapa bono carrirrari. Nazama pouadenipa Deo Attiza dameraqquiri naza ocasserani auemanaza naco nama naha Deo Attizara rrehe zanapomanarrari. Pouadenipa madirra ouaha acco acco ihicanabaqquimana nazapa narrarideni naco Deocca erredeni toquerrenarrari −narrari Zeso atti.

Huano 15:21

Rrehe occa tiquerrenarrarorrine rridacca uati onaporraro bazima tiadeniza nama quenauitoui. Occa Abi oua Cazossedeza noccodeni rrizaqquiri naza nama quenarrari.

Romanodenidsa 12:12

Arri titezerremadenicca uima bicanitoui timadimanezape uatizehema timadimanarri. Ocasserani temaneza naqui mouaraza tinauanemanarri. Deoza uatide naqui tinebomana-rrerarri.

Romanodenidsa 16:12

Tripenaza, Triposaza nirra onarraro. Ponideni pamehepe ia Zozossedeza zapanideni irrimanarraro. Persidaza naqui nirra onarraro. Poniza ouati uana tani. Poni naqui ia Zozossedeza zapani irrirraro.

Romanodenidsa 2:7

Madirra uima bicani inanemanarrarodenizapa Deo pocca camittehe rriquerreranicca da inarizanitoui. Pouadenipa Deocca deni torrehetoui madimanarrari. Pouadeniza Deoa: —Occa erredenideni, bicaqquiri tiquenani −nauiuarrine touini quenarrari. Camittehe rriquerreranicca touini naco madimanarrari.

Romanodenidsa 8:25

Naraha arri touini imadirraro qqui inerreraccazape mouaraza narrarotoui imadirraro.

1 Corintodeniza 13:7

Touati uanehe icarrizape itesserrine bica terrereraha nema nehe pouaza eti uana tarraro. —Itessepa bica taui, maizera taui, madiuissa taui −inarraro. Pouarrine bica terrerani qqui ineza naqui: —Niza pocca madie tobicanitoui −inarraro. Pouarrine ocasserani eza naqui mouaraza inauananiuarrine iparrireni.

1 Corintodeniza 16:16

Nazama tiadenipe Estepanadeni attideniza, arra imecotedeni pina Estepanassa quenarrari attideniza naqui iboraqquiri tiquenana, onarraro. Arra imecotedeni acco icanabaqqui-manarrarideni, arra Deo Atti mamaridedeni, narrarideni bazima attideniza naqui iboraqquiri tiquenana.

2 Corintodeniza 10:15

Madirra ouaha zepe irrirrariza ettipe: —Irrine bica tani −inerrerani. Poua zepe irriuiuarri izepe irrirrerezape icca uima rrerani. Naraha tiadenizana izepe irrizanaponiuarrine rripapa inani. Ticcadeni rrehenirri napi zanapozape denima tiadeniza izepe irrizanaponiuarrine.

2 Corintodeniza 11:23

—Iape Zeso Cristocca zozosse tabaqqui iquerrenani −quenaraha ouana denima. Arri ouana denima onarrarope pina madirra bodi tossamorrari uati uati tarrarissa onarraro. Pouadenipa Zeso Cristoza zepedeni irrimanaraha ouana denima. Toponi cocoroza naco uezemanaraha ouana denima toponi cocoroza ouezerre narizaponi narraro. Cocossi tonauane-manaraha ouana denima cocossi onauanarizarrarode. Oppinehe onihi, onihirrine ozoqquebote narizade.

2 Corintodeniza 4:1

Nazama Deopa iaza uati uana taza Pouaza izepe irriniuarrine iaza inanarraro. Narrarorrine ehetize nezape: —Peperri, ineboqquina −inerrerani.

2 Corintodeniza 4:16

Narrarorrinea ehetize nezape: —Peperri, ineboqquina −inerrerani. Iape rradaui iquerrenarronarraro. Essire torrapariraha ibodina uarrirriraza todacorani zanaporraro.

2 Corintodeniza 5:9

Nezape essirema imadiqqueza ia Zozossede Deo inauatize-zanapouiuarrine damamera inarraro. Essire ineboza memeuarri imadiza naqui nema izanaponitoui.

2 Corintodeniza 6:5

Cocossirideni inauana, toponi cocoroza ia ua tozimabaqquiza inauana, mouanirri torrarizeza iaza ssonarimanaui inauana, tarabaia narro taniccaza izepe irririzani inauana, zome inocco bissani inauana, pemi naqui inauana narizarraro.

Carasiadeniza 6:2

Timecote ocasserani auazapa acco ticanemanana. Manaco ocasserani temaneza tiadeni acco tocanabaqquiuiuarrine bica tani. Timecotedeni tezerre arriuarri acco, arriuarri acco titicanarizera nezape Zeso Cristocca marinarrassa tinanemananiuarrine, onarraro.

Carasiadeniza 6:9

Nezape uima bicani inana-zanaponiuarrine rrao iquerrena-rrerana. Irrapari-rrerezape niza zotode bono bicaui bite irrizauitoui. Narrari bonopa Deo pocca biquehe iaza inananitoui.

Piripodeniza 2:16

Nani tirrinedenina Zeso Cristo tauimari icassiuaueraniuarrinecca uima auatorizaponi naniuarrine. Naui Cristo ccanipomaza ticcadeni uima nauato onezape ouatizenitoui. Pouama Deo Atti mari ocanarizabaqquide onerreraniuarrine. Zeso Cristoza quequeriqquimana nauiuarri uima cattemade ponima rrao orrade onerreraniuarrine.

Piripodeniza 4:3

Nazama otesse Deo Atti maride titezerre ihicabera narraroza dozo onarraro. Ebodia, Sitique ponideni acco ticanabaqquirri, queberanissa taniuarrine. Zeso Cristo tauimari icassiuaueraniuarrinecca maride occarizazape ponideni pamehe ouinoriza zapanideni irririzemanarraro. Otesse Cremente, otesse ouahadeni ineza Deo Atti maride iquerrenezape ponideni naqui oua acco icanemanade. Pouadeni oni bazimape camittehe carrimana-zanapouiuarrinecca papeoza dozo nani anini.

Corosadeniza 1:11

Deocca dacorehepe deni torranicca. Narraro dacorehema tiadeni tonadacorabaqquiui nauiuarrine ineza Pouaza uati uati ihizanapo narraro. Nani uima ocassera tanicca tiadeniza anizape dacoco tirriraza mouaraza tinauanemananiuarrine.

1 Tesaronicadeniza 1:3

Rrehe, Deoza uatide iquerrenezape ticcadeni uima bicani eti rrima-rrerarraro. Ticcadeni rrehenirri dacorarraroa tizepedeni ihirrimana narraroparri. Deocca zosseheza tizepedeni irrimaneza naqui touati uanehema tizepedeni ihirririzemana narraroparri. Ia Zozossede Zeso Cristocca tossiuauehetoui timadimanezape tiadeniza ocasserani ssonariraha tinauanemananiuarrine dacoraqquiri tiquenarraro.

1 Tesaronicadeniza 2:9

Imecotedeni, tiadenipe izepe irriecca uima tetideni rrima-rrerani. Imadinicca icarriniuarrine izepe irride damamera inezape ssiuarra izepe irri, zome naqui izepe irri narrarode. Nema ineza Deocca uima bicani icassiuaueraniuarrinecca tiadeni mari icanabaqquizape tiadeniza icca madie narro terreraniuarrine ticcadeni zinirotoui, ticcadeni zamatapatoui uati uati inerrerade.

1 Tesaronicadeniza 5:12

Imecotedeni, tiadeniza uati inana. Tiadeni maridedeniza bicaqquiri tiquenarri. Attideniza naqui pina titauaribobo canarri. Tiadeni maridedenipa ia Zozossede Zeso Cristoza tiquerrenarraro cacauade toquerrenazapa zepedeni irrimanauissa tarrari. Timadimananissa taniuarrine tibodideni acco acco totocanabaqquimana narrari.

2 Tesaronicadeniza 3:13

Naraha imecotedeni, tiadenina uima bicani tinanemanarraroza: —Narro tani, onebona −tiquenerrerana.

2 Tesaronicadeniza 3:5

Ia Zozossede tiadeni tonauattabaqquiza Deocca touati uanehe tibodideniza auato taniuarrine touini inarraro. Tiadeniza ocasserani ssonariza mouaraza tinauanemananiuarrine ia Zozossede Zeso Cristo pocca dacorehe tiadeniza inananiuarrine naqui touini inarraro.

2 Tesaronicadeniza 3:8

Ticcadeni zamatapa ihirripa narrari naco manaconi rriraha ihirripa narrarade. Itapari manaconiza mitta inauiuarrine inezape tarabaia inarraro. Arri ssiuarra, zome naqui izepe ihirri narraroparride. Tiadeniza narro terreraniuarrine nema inarrarode.

1 Timoti 4:10

Narrarorrine ocasserani eraha nema nehe dameraqquiri ineza izepe irrirraroparri. Abi Deo camitta tarraripa ia tonassiuauabaqquiuiuarrine touini imadirraro. Pouapa madirra bazima Tonassiuauade. Pouaza rrehe quenarrarideni inassiuauabaqquiuitoui, parrissa.

1 Timoti 5:17

Rrehe Timoti, uima onihi naqui: Zesoza rrehe quenarrarideni cacauadedenipa poccadeni cacacaua tabaqqui ecauabaqqui-manauissa tazapa pouadeniza da da zazanapomana nauiuarrine. Deo Atti maride zepedeni irrimanazapa pouadeniza denima da da zazanapomana nana, onarraro.

Ebreodenidsa 10:36

Dacoco tirrirarri, Deo Poua touini nauiccassa tinanemana-zanaponiuarrine. Ocasserani temanezape nema nehe tinauanemanarri. Nema tiquenezape Deo Poua uati taporraricca uima bicani tiadeniza inananitoui.

Ebreodenidsa 12:1

Rrehe, Deoza rrehe quenaporraridenipa uapi tade. Narraridenipa rricaporaha pina uinoriza domodeni uauarranirrarissa naza poccadeni rrehenirri iaza noue iquenarraro. Nezape ia naqui pouadenissa inananiuarrine arrima inana: Icca rrehenirriza moua moua narrarope inebona. Uimasiri naqui inebona. Arrirraro namiza imadiccazama Deoza rrehe inanissa teza imadi-zanapona. Dacoco irrirana. Pina madirra ittomeza rroppa tarrarissa inana. Uarrirriraza mouaraza itezerremaccauarri iaza aniuiuarriccaza rroppa rroppa inana.

Ebreodenidsa 13:13

Rrari, ia naqui Zeso tezerre oza panani amossiniuarri rrauirrenana. Ia naqui pina poua ocasserani auarrarissa narraro inauanana.

Ebreodenidsa 6:10

Deopa maizera taui. Pocca uimape borocco tani. Ticcadeni uima uati rrama-rrarauitoui. Pouaza tetideni uanaqquiri nani auato tani. Arri pocca touati uanehema timecotedeni Zesoza rrehe quenarrari acco acco titicanabaqquimana narronarraria rridapana arrirraroparri.

Ebreodenidsa 6:12

Timirriremana terrerarri, Deozara dameraqquiri tiquenarri, onarraro. Arra Deoza rrehe quenauissa tarraridenipa mouaraza Poua uati taporrariccatoui madimanarrari. Niza zotode Poua uati taporraricca pouadeniza torraniuarrine nauatoqquiri narrari. Nazama tiadeniza ouattipe: Pina pouadenissa tiquenana, onarraro. Dameraqquiri tiquenezape Deo uati taporraricca tiadeniza torranitoui.

Ebreodenidsa 6:15

Nazapa Abarahao Deo pouaza uati tarraricca toui mouaraza madirrari. Zotode Deo pouaza uati taporrarissa nehe torrarraro.

2 Pedoro 1:6

Tibodideniza touini tiquenanicca uaidireheza poni tiquenaniuarrine ticauatterarri. Uima ocassera taniccaza, uima narro taniccaza tedimane-rrereza mouaraza tonauanade ticauatterarri. Ticcadeni madie Deoza tinanemanezape Poua nacassa tauiccassa tinanemanarri.

Apocalipsis 1:9

Ouape Zouao timecotedeni orrani. Titezerredeni Deocca cacaueheza iquerrenarraro. Madirra Deo Attiza nacasseraqquiri narraripa ia totonarrizo-baqquimana narrari. Naraha Zeso Cristorrinepe uima inauananiuarrine iparrireni. Ouape ueni nocconiza zama uittacossani Patimoza oua inebomanezape pina toponi cocoroza ouezarrarossa narraro. Deo Atti maride orrarizeza, Zeso Cristo tauimari ouaccora-rizezape Pouaza nacasseraqquiri narraridenirrine tozepe orrarraro.

Apocalipsis 3:10

—Tiadeniza uati onaporrarope: “Ocasserani temaneraha mouaraza tinauanemanana” onapode. Nazama ouatti tecauemananissa teza arra zama bazimacca madirra uima ocassera taniccaza nattome onabaqquizapa tiadeni zori onanabaqquinitoui.