Apocalipsis 14:13 - Kulina New Testament Brazil

¹³ Nazapa memeuarri atti omittarraro. Ouaza arrama narrari: —Arrirraro uima bicani dozo tarri −narrari. —Arri rridapanaccazama ia Zozossede Zeso Cristoza toquerrenarrarideni rriquemanapozapa pouadeniza uima bicani torranitoui −narrari. Nazapa Deo Corime attipa: —Rrehe, narrarideni torricazapa rrassi quenauitoui. Narro tanicca zepedeni ihirrimana narraro rricani. Arra Deoza zepedeni irrimanaza pouadenirrine uima bicani torrarraroma memeuarri rraui torramacossauitoui −narrari.

Culina Mádija

¹³ Nadsapa memehuaji atti omittajaro. Ohuadsa ajama najari: —Ajijaro ima bicani dsodo taji −najari. —Aji jidapanaccadsama ia Medsede Jesocristodsa toquejenajarideni jicamanapodsapa pohuadenidsa ima bicani tojanitohui −najari. Nadsapa Dio Corime attipa: —Jehe, najarideni tojicadsapa jassi quinahitohui. Najo tanicca dsepedeni ihijimana najaro jicani. Aja Diodsa dsepedeni ijimanadsa pohuadenijine ima bicani tojajaroma memehuaji jai tojamacossahitohui −najari.

Apocalipsis 14:13 Iomraidhean Croise

Mateo 3:17

Nazapa memeuarri atti mittaronarrari: —Arrarraripa occa Erredeni. Pouaza ouati uana tarraro. Pocca uima bica tarrarorrine ouatizerraro −narrari Deo.

Roca 16:25

Naraha Abarahao pouaza uati tarrari: “Neppe, teti uatomarri. Taide namiuarri timadiponipe bicani tepode. Naraha Razaropa ocassereheza madipode. Rridapanape Razaroza uima bicani torrarraro. Naraha tiape ocasserani tinauanarraro” narrari Abarahao zepe sseboteza.

Roca 16:9

—Tiadeniza uati onarraro: Arrirraro namicca ticarrimanarraroccaza madirra acco ticanabaqquimanarro. Nema tiquenezape titessedeni touapiuitoui. Niza zotode Deo madiuiuarricca mamadi rriquerreraniccaza timadimanezape ticcadeni accorehe manaconipe Deo pocca biquehena tiadeniza inanarizanitoui.

Romanodenidsa 14:8

Imadiccazape ia Zozossede inauatizeuiuarrine imadirraro. Izoqqueza naqui pouaza imadiniuarrine. Nema narraroa arri imadiza, izoqqueza ia Zozossedecca iquerrenarraroparri.

1 Corintodeniza 15:18

Rridacca narraro uima parrissa torrezape arra Zeso Cristoza rrehe quenarrari rricaporraridenipa parra amossiuarrariui nanarra.

1 Corintodeniza 15:20

Naraha Cristopa parrissa nauatonirrari. Pouapa pina uizarracca zamatapa taidecca bite quenaporrarissa narrari. Cristo taide nauatoniporrarirrine madirra bazima naco zotode nauatonirize-manauitoui.

1 Corintodeniza 15:58

Rrehe ouimecotedeni, tiadeniza ouati uana tani. Uima nema nezape dacoco tirrireza nema tizanapomanarri. Ia Zozossede Deo pocca zossenirriza tizepedeni irrimanezape denima, denima tidameremanani narri. Arrirraro uimape nauatoqquiri tiquenani: Ia Zozossede Deoza tizepedeni irrirrarope ponima rrerani. Pouarrine tiadeniza uima bicani torranitoui.

2 Corintodeniza 5:8

Narrarotoui etizezape icappine-rrerarraro. Arrirraro essire ineboniuarrine touini inani, ia Zozossede Deouarri iccaniuarrine. Ia Zozossede Deouarri imadi-zanaponiuarrinena iaza denima bica tarraro.

Piripodeniza 2:17

Zeso Cristoza rrehe tiquenarraro ticcadeni madie Deoza teccoremanarraroparri. Narraroa ticcadeni da inaqquinarra Deoza da tiquenarrarossa narraroparri. Deoza tizepedeni ihirrimana narraro naqui Deoza teteccoremana narraroparri. Nazama oua naqui Zeso Cristo tauimari ouacomera-rizarraro acconi oua inanazoqque-manaza ozoqqueni bica tani. Occa madiepe pina occa danirri Deoza dada onarrarossa narraro. Nazama ticcadeni danirri Deoza denima parrirenissa taniuarrinepe occa danirri, ticcadeni tazarrani carrimezape ouatizeni. Occa uatizehe tiadeniza torrezape bazima etizenitoui.

1 Tesaronicadeniza 4:14

Arra Zeso zoqqueraha nauatonirrariza parrissa inezape nauatoto inarraro. Narraria arra Zesoza parrissa quenarrari zoqquemanarrarideni naco pina Zeso Deo inauatonirrarissa quenauitoui.

1 Tesaronicadeniza 4:16

Rrehe, ia Zozossede Zeso Cristopa ccaronauiuarrinepa taide memeuarri atti moui taha uaua naui imittanitoui. Deocca zozosse tabaqquidenicca tamine naco uaua naui atti imittanitoui. Deocca rrorroza rrori rrori naui naco imittanitoui. Nazana Zeso Cristo memeuarri ccaronazapa pouaza parrissa quenaporrari rricaporrarideni taide nauatonimanauitoui.

1 Tesaronicadeniza 5:10

Zeso Cristo itoui poua ccaccoraza zoqquerrari. Nama narraripa camitta inaccaza, izoqqueza naqui pouaza imadinitoui.

1 Timoti 5:24

Arrirraro uima teti rrima terrerarri: Madirra motadenipa uimasiri inanemanezape Deocca narrizoueuarri bacco toquena-rraraccazama poccadeni uimasiri ia bazima nauatoqquiri inaponi. Naraha motadenipa auatoraniza uimasiri inanemanezape bazima ssamoqquiri inaccani. Naraha niza Deo Poua baccouarri bazima idomo uezana auatoraniza uima inanemanarrarocca Deorrine auato tanitoui.

1 Timoti 5:25

Narrarossa narraroa uima bicanicca naqui auatoniza inanemanezape bazima qqui toquenaui. Naraha uima bicanicca auatoraniza inanemanezape nizaranibote narraro naqui Deorrine auato tanitoui.

Apocalipsis 1:11

Atti arrama narrari: —Arrirraro bazima tiaza noue onarrarope papeoza dozo tarri. Arri zama Asiauarricca Zeso Cristoza quequeriqquimana naui 7 narizarraroza uima zosse tinarizaniuarrine. Oza panani Epesouarri, Esmirnauarri, Peocamouarri, Tiatirauarri, Saradisiouarri, Piradeopiauarri, Laodiseauarri zosse tinarizarri −nade atti moui taza.

Apocalipsis 10:4

Ttottorode attini rriquezape attinideni dozo onanitouiraha memeuarricca atti omittarraro. Arrama narrari: —Ttottorode attini timittarrarope tia motta tibodiza tecauarri. Dozo terrerarri −narrari.

Apocalipsis 11:15

Deocca zozosse tabaqqui memeuarricca 7 nauicca rrori rrori nanarra memeuarri attideni mouiqquiri naha uati uati toquenarrari: —Rridapanape zama bazima ia Zozossede Deocca cacauehe torra, Cristo-Mesiacca cacauehe torra narraro. Pouadenina zossede nama zanapomanauitoui −quenarrari.

Apocalipsis 11:19

Nazama memeuarricca Deoza dada toqquimacca totoqquezima touabarraro. Narraro bodizape Moizecca madirra Deo Poua tezerre rrehe canirerraricca bau cauato narraro. Nezape ssiueue canarizarraro, mouini imeni tomouirizarraro. Ttottorode ttororo canarizarraro, nami naqui zaroro narraro. Passo ccara torrani naqui rrazirema catorrarizarraro.

Apocalipsis 16:17

Nazapa Deocca zozosse 7 quenarrari rricarinicca pocca tasacca rrappopponiuarri sso inarraro. Nezape memeuarricca Deoza dada toqquimauarri atti moui auatorraro. Naui Deocca uiuittari bicabote cauittariniuarri poua atti moui tehe qquenarrarope: —Rridapanape rricani! −narrari.

Apocalipsis 19:9

Nazapa Deocca zozosse ouaza uati tarrari: —Dozo tarri: Eueue Bedi Zesopa pocca madirraza uaua narrari, pocca uenauenacca rripaqquieza rraui torrezimauiuarrine. Rraui torrezimarraridenipa uatizehe imeni carrimanauitoui −narrari. Nazapa denima uati tarrari: —Arri uati uati onarrarope Deo Atti parrissehecca −narrari.

Apocalipsis 2:1

Zeso Cristo ouaza uati zanaporrari: —Epesouarri otauimariza quequeriqquimana narrari cacauadeza dozo tarri −nade. —Ouape ozepe nauatoniccaza amouadeni 7 canaha ocarrirraro. Rrorrororo pinine orocca 7 naha cacaueri narizarrari qquide naqui occarizarraro, naui tarri, onarraro.

Apocalipsis 2:7

—Deo Corimepa otauimariza quequeriqquimana narrarideniza uati uati tarrari. Arri bazima titiqueriqquiriza naniuarri teribodeni ticarrimanezape Poua Atti timittemananissa tarri, onarraro. Arri occa dacorehema timadimaneza ouaza rrehe tiquenarraro tinebomane-rrerezape niza Deocca zama bicaniuarri aua bono camittehecca tirripemananiuarrine tiadeniza da onarizauitohui −nade Zeso.

Apocalipsis 20:6

Madirra nauatonimana-porrarideniza Deocca biquehe torrarraro. Pouadeni bodi ssiuarraqquiri, uissoqquiri narrari. Zoqquehe zotodecca pouadeniza noueranitoui. (Narrarope narrizoue rriquerreranicca tonauanemanazanapo-rrarauitoui.) Nazapa Deoza, Cristoza zepedeni irrimanauitoui. Deoza uauati toqquimade toquerrena, dada toqquimade toquerrena nauitoui. Uarrano 1.000 naha Cristo tezerre zama uapima zossede toquerrenarizauitoui.

Apocalipsis 21:5

Nazapa arra Deni torrauicca uiuittariza uittari canarrari Attipa: —Ouape bazima zati onanarizaui −nade. Poua Atti onihi naqui: —Arrirraro uima dozo tarri. Arrirraro uimape parrissa. Uimape pina arrirrarossa nehe torranitoui −nade.

Apocalipsis 22:17

—Nirra, ticcarronarri −quenaui Deo Corime, Eueue Bedicca amonerre tazarrani. (Narraro amonerrecca uimape Zeso Cristoza ihiqueriqqui narrarocca uima.) Madirra arrirraro uima mittemanarrarideni naco: —Rrehe, ticcarronarri −quenana. Passotoui bacco rrocorrari zede touini nazapa ccarronana, passo camittehecca manaconi rrirehe ze nauiuarrine.

Apocalipsis 6:11

Nazapa etero moponi uezemanauiuarrine pouadeniza da inarizarraro. Poua Attipa: —Rrassi tiquenaccarri. Timecotedeni pina tiadenissa quenarrari Zeso Cristocca zossenirriza zepedeni irrimanaccarrari. Niza pina tiadeni tirricaporrarossa quenaccauitoui. Narraridenitoui bazira tehe timadimanaccarri −nade Deo.