2 Timoti 4:8 - Kulina New Testament Brazil

⁸ Nazama pina rrorroppade taide bacco nauarranipoza manaconi bicabote pouaza da iquenarrarissa narraro naqui Deo pocca danirri bicani ouaza da inanitoui. Narraro danirripe Deoza bicaqquiri narrarideniza torranitoui. Niza ia Zozossede Zeso Cristopa uima cattemade parrireuissa tarrari poua baccouarri idomo uezape Deo pocca danirri ouaza da inanitoui. Ouaza da inarrarope ouaza orrari-rreranitoui. Pouaza uatideni uanaqquiri narrari, poua ccaniuitouira narroremanarrarideni bazimaza da inarizanitoui.

Culina Mádija

⁸ Nadsama pina jojoppade tahide bacco nahuajanipodsa manaconi bicabote pohuadsa da quinajarissa najaro naqui Dio pocca daniji bicani ohuadsa da inanitohui. Najaro danijipi Diodsa bicaqquiri najaridenidsa tojanitohui. Nidsa ia Medsede ima cattemade pajirahissa tajari pohua baccohuaji idomo huadsapi Dio pocca daniji ohuadsa da inanitohui. Ohuadsa da inajaropi ohuadsa ojari-jeranitohui. Pohuadsa huatideni huanaqquiri najari, pohua ccanihitohuira najoramanajarideni huapimadsa da inaridsanitohui.

2 Timoti 4:8 Iomraidhean Croise

Mateo 24:36

—Occaronapomanicca uada, marri naco madirra bazima ssamoqquiri naui. Deocca zozosse tabaqqui memeuarricca naco ssamoqquiri naui. Deo Bedi oua naqui narraro uima ssamo onani. Naraha Abi Deo Pouana nauato taui orrariui −nade.

Mateo 7:22

Nazapa niza madirra bazimacca uima Deo icattemaniuarrinecca uada bacco tezape ouattiza iboqquiri narrarideni ouaza arrama quenauitoui: “Oua Zozossede, ticca uima bazimape ohouacomerariza naderra. Tia oni ua oneza naqui madirra bodidenicca tocorimedeni zosse zosse ohoninebaqqui naderra. Tia oni ua oneza naqui qqui toquenapo-rrararraricca ocanauatori canani uapi taderra” quenauitoui. Naraha narraridenipa Deocca cacaueheuarri rraui torrezima-rrarauitoui, onarraro.

Roca 10:12

Arrina, niza zama rriqueza Deopa zama bazima uima manaconi uati tazapa narraro oza pananicca madirra occa marinarra mittade nacasseraqquiri nazapa narrizoue imeniza madimanauitoui. Arrina, maittaccazama oza panani Sodomacca madirrapa uimasiri sseqquiri nazapa manaco Deorrine rricarizaporrari. Naraha pouadenipa niza zama rriquezape poccadeni uimasiri manaconipa narrizoue oppina tarraro pouadeniza torranitoui. Neraha occa marinarra mittade nacasseraqquiri narraridenizana narrizoue denima oppina tanicca torranitoui, onarraro −narrari Zeso.

Romanodenidsa 2:5

Naraha tiadenipe Deoza iboqquiri tiquenarraro. Tibodideni cacarriqquimeraniuarrine nacasseraqquiri tiquenezape ticcadeni uimasiri manaconi narrizoue onihi onihi nehe tinauanemanarraro. Niza zotode Deocca uadie torraniuarrinecca uada bacco tezape tiadeniza narrizoue ssonarinitoui. Deo Poua tezerrema tidomo ueza Deo ticcadeni uima manaconi inaparrirenissa tani auato inananitoui.

Romanodenidsa 8:23

Iape Deo Corime icarriraha arrirraro namiza nauatorizarrarideni tezerre ocasserani eccani. Arri Deo Poua Corime iaza da inarrarope niza zotode uima bicani icarriniuarrine nauatoqquiri inani. Naraha narraro uima bicanitoui imadizape icca orriema imadiccarraro. Niza zotode narraro uima bicani iaza torrezape Deo Pouarrine pocca erredeni iquerrenarrarope bazimaza auato tanitoui. Pouarrine naco essire cacarriqquimerezape zati torranitoui.

1 Corintodeniza 2:9

Naraha arri Deo Atti dozo naporrarozape arrima narraro: —Deo inanarroraporrarope pina arra qqui toquenapo-rrararraricca, mittemanapo-rrararraricca, bodideni uatouiuarrine ssamoqquiri naporraricca narraro uima bicani bazima Pouaza uatideni uanaqquiri narrarideniza inanarroraporraro −nani nade Deo Atti dozo naniza.

1 Corintodeniza 3:13

Naraha niza madirra uapimacca uima cattemaniuarrinecca uada bacco tezape Deopa zippo rrororoniza madirra bazimacca tozepe irrie nattome ippinitoui. Narraro rrororonirrine madirracca uima bica tarrarocca, uaidira tarrarocca, ponimacca naqui Pouaza auato tanitoui.

1 Corintodeniza 9:25

Arra madirra ittometoui taide narroremanapozapa pouadeni nattome quenaporrari. Pouadeni assire dacoraqquiri nauiuarrine uaidira tanicca inebomaneza pouadeni cacauemanauissa tarrari. Nama quenarraripa ittomeza deni toquerrenauiuarrine touini quenarrari. Naraha deni torrarrariza totaticca bebe appani couanira da iquenarraro. Narrarope rricaca taniccaraha iape Deocca danirri rricaquera tanicca icarriniuarrine dameraqquiri inarraro.

2 Corintodeniza 5:2

Naraha arrirraro namicca essire rricaca taniccape ocassera tarrarorrine orriema imadirraro. Essire memeuarriccana touini inarraro.

Piripodeniza 3:11

Zeso Cristozara damera ozanapona onarrarope niza Deorrine Zeso Cristoza toquerrenarrarideni nauatonimanazapa oua naqui pouadenizama onauatoniniuarrine, onarraro.

Corosadeniza 1:5

Nema tiquenarrarope itezerremacca uima bicani iaza torranitoui nauatoqquiri tiquenarraro. Arri: —Iape memeuarri imadinitoui −tiquenarrarorrinea Deocca toquerrenarrarideniza tetideni uanaqquiri narraroparri. Parrissehecca uima arri Zeso Cristo tauimari icassiuaueraniuarrinecca tiadeni mari tocanabaqquipozama Zeso Cristopa memeuarri pocca madirraza uima bicani inanarrorarraro timittemanarraroparri. Nezape narraro uimatoui timadimanarraro.

1 Tesaronicadeniza 1:10

Deo Bedi memeuarri ccaronapomauitoui tinarroremanarraro naqui iaza uati toquenaza imittade. Narraripa Zeso zoqqueraha Imehi Deorrine nauatonirrari. Niza Deocca narrizoue oppina tanicca bacco tezape Zeso pouarrinena zori icanireza icassiuaueranitoui, inarraro.

1 Tesaronicadeniza 5:4

Naraha imecotedeni, tiadenipe ssamoqquiri tiquenerrerani. Ziziniza timadimana-rrerani. Niza ia Zozossede Zeso Cristo ccaniuicca uada bacco tezape pina bobotiderrine oza rrinede uarro narrarissa tiquenerreranitoui.

2 Tesaronicadeniza 2:8

Nazana uimasiri ssebote auatomauitoui. Naraha zotodepa ia Zozossede Zeso Cristorrine rricauitoui. Zeso Cristo poua zibehinema, pocca dacorehema ccaronapomazapa poua arrariza rrappo naza inanazoqqueuitoui.

1 Timoti 6:19

Nema inanemanezape pina manaconi imeni memeuarri inauapimanarrarossa narraro. Narrarope nizaranibote pouadeniza torrezape amossi nerreranitoui. Camittehe rriquerreranicca naqui pouadeniza torranitoui.

2 Timoti 1:10

Pocca touati uanehe iaza auato inananiuarrinepe ia Tonassiuauade Zeso Cristo iauarri zosse inaronarrari. Zeso zoqqueza nauatonizapa parri izoqquerinicca zoqquehe inassamorraro. Poua tauimari icassiuaueraniuarrineccape camittehe rriquerreranicca iaza auato inanarraro.

2 Timoti 1:12

Nema nezape rridapana ocasserehe onauaneraha comehi onehe omadi-rrerani. Arrina, Zeso pouaza rrehe onapozama maizera taui nauato onarraro. Arrirraro uima naqui nauato onani: Arri Zeso Cristo poua tauimari icassiuaueraniuarrinecca ouaza auato inanarrarope tossamo-rreraniuarrine pouana cacauade parrirerrari. Ecauazanapozape poua ccaniuicca uada bacco tanitoui.

2 Timoti 1:18

Nama nazapa obodipe: Nizaranibote Deouarri idomo ueza naqui Deo Onesiporoza uati uana tazapa pouaza camittehe rriquerreranicca inananitoui, onarraro. Tia naqui pocca uima nauato tinani. Pouapa taide oza panani Epesouarri imadiza obirri accode damera tade.

2 Timoti 2:5

Narrarossa narraro Zesocca zozossepa pina madirra ittomeza rroppa tarrarissa nauiuarrine. Ittome cacauade attissa inanaza taide bacco nanipozapa manaconi carrirrari. Naraha ittome cacauade attissa inana-rrerezape manaconi carri-rrararrari.

2 Timoti 4:1

Rrehe Timoti, Zeso Cristo ccanipomaza tamine torrazapa madirra bazima ecauabaqquiuitoui. Nazama camittaqquiri narraridenicca uima icattema, rriquemanaporraridenicca uima icattema nauitoui. Nama nazapa Deo, Zeso Cristo tezerre ouatti nauatoto taza tia ocazosserraro:

Titodsa 2:13

Rrehe, Deocca touati uanehema imadizape Zeso Cristo ccanipomauicca uadatoui imadirraro. Arra icca Deo bicabote ia Tonassiuauade Zeso Cristo ccanipomazapa poua zibehinema pocca deni torrehema auato taha ccanipomauitoui. Narraro parrissa torrezape etizenitoui.

Ebreodenidsa 12:11

Naraha rrouanirri iaza ssonarizape etize-rrerani. Ocassera tani. Naraha icca uaidirehe nebode iattezape icca madie tobicanitoui. Rroneqquiri inehe imadiza uima bicanira inanazanaponiuarrine.

Ebreodenidsa 9:28

Zeso Cristo naco zoqqueui orrarirrari. Uimasiri manaconi poua ccaccorarrari. Pouarrine icca uimasiri rricarizarrarodenipe uapi inani. Niza ccanipomazapa icca uimasiri manaconi zoqquepoma-rrarauitoui. Pouatoui imadirraro ia tonassiuauabaqquiuiuarrinena ccanipomauitoui.

Satiacocca 1:12

Madirrapa uima ocassera tanicca pouaza ssonari, ssonari naraha mouaraza Deocca dacorehema inauanezape Deo pouaza uatizehe da inarraro. Deo pouaza: —Rrehe, tirrine bica tani −nazapa camittehe rriquerreranicca da inanitoui. Narrarope Deo uati taporrari, arra: —Madirra ouaza uatideni uanaqquiri narrarideniza da onanitoui −naporrari.

1 Pedoro 1:4

Narraro touini imadirrarope parrissa iaza torranitoui. Memeuarri Deo Poua madiuizape iaza inananiuarrinecca Pouana ecauarraro. Narraro iaza da inaniuarrinepe bica tanicca ponira. Touaidiraniuarrine ssamo tani, rricaniuarrine naqui ssamo tani.

1 Pedoro 5:4

Nema tiquenezape ia Cacauade deni torrauicca Zeso Cristo ccanipomazapa pocca deni torrehe tiadeniza inanarizanitoui. Narraro pocca danirri bicanipe rriquerreranitoui.

Apocalipsis 1:7

Ticattomama canarri! Zeso Cristo meme essenima ccaronaui qqui tiquenauitoui. Madirra bazima qqui toquenauitoui. Arra Zeso Cristo poua nanazoqquededeni naco qqui toquenauitoui. Zama bazimacca madirrapa pouatoui orri orri quenauitoui. Rrehe, parrissa nema nana.

Apocalipsis 19:11

Nezape qqui onanerre meme touabeza cavaro mopoui auatorrari. Narrari cavaroza uittarirraripa Parrissehe Rrinede. Pouapa maizera tarrari. Zama ecaueza, rrazire inaneza naqui pouarrine parrirenissa tarraro.

Apocalipsis 2:10

Niza otauimari acconi ocasserani temanezape ticappinemana terrerana. Tocorime-Taminerrine tiadeni mota sibera tinehe toponi cocoroza tiquerrenanitoui. Nama nauiuarrinepa tiadeni bazima tiadeni nattome tabaqquiuitoui. Uada 10 nehe pouarrine ocasserani temaneraha otauimaripe tinebomana terrerarri. Dameraqquiri tizanapomanarri. Otauimari tinebomana-rreraza tizoqquemanani bacco tiquenezape tiadeniza occa camittehe rriquerreranicca da onanitoui.

Apocalipsis 22:20

Arrirraro uima bazimape Zeso Cristo uati tarraricca. Iaza poua attipa: —Parrissa, occaniniuarrine uarrira tani −nade. Nezape ia etti: —Parrissa nema nana. Ia Zozossede Zeso ticcanirri −inarraro.

Apocalipsis 4:10

Narraro uati uati totoquena nazapa cacauadedeni 24 quenarrari arra Madizanaporrari tezerrema pouadeni pitoza rrassi taza Pouaza uatizemanarrari. Pouaza uatizemanaza pouadeni taticca oro nauatoni poua uittariui tezerrema ua inaqquimanarrari. Nazapa attideni arrama quenarrari:

Apocalipsis 4:4

Poua uittariuiuarri qqui onezape cacauadedeni 24 quenaha rrassi taririzarrari. Zozossededenicca uiuittari bicaqquiri narraroza rrassi nauarranirrari. Poccadeni etero mopoqquiri narraro. Pouadeni tatiza tamine taticca oro nauatoni uittaririzarraro.