1 Timoti 4:8 - Kulina New Testament Brazil

⁸ Arrana madirra tarabaiade damera tazapa poua assire todacora, poua birri todacora, poua isso naco todacora taui. Ccanarrabote zorrode naco parrireuitoui. Narrarossa narraro uima denima bica tarrarope Deoza damera ineza Pouaza icca rrehenirri todacoraniuarrine. Narraroa icca madie arrirraro namiza bica taniuarrine. Niza memeuarri Deoza imadiza naqui icca madie denima bica taniuarrine.

Culina Mádija

⁸ Ajana madija tarabaidsade dissera tadsapa pohua assire todacora, pohua biji todacora, pohua isso naco todacora tahi. Ccanajabote dsojode naco pajirahitohui. Najarossa najaro ima denima bica tajaropi Diodsa dissera inadsa Pohuadsa icca jeheniji todacoranijine. Najaroa icca madie ajijaro namidsa bica tanijine. Nidsa memehuaji Diodsa imadidsa naqui icca madie denima bica tanijine.

1 Timoti 4:8 Iomraidhean Croise

Mateo 12:32

—Arri oua Madirra Bedi orrarraroza madirra atti atti quenaza oua itamassomaneraha niza zotode: “Icca uima inebona” quenazapa poccadeni uimasiri, poccadeni tamassohe Deoza ecomeremaneza Deopa poccadeni uimasiri peperri inananitoui. Naraha Deo Corime itamassomanaza pouarrine torrarraroza maizehe uaua quenaza naco Deopa pouadeni atti uati rrama-rrarauitoui. Rridapana imadiccazama poccadeni uimasiri peperri inana-rreranitoui. Niza zotode Deo pocca cacauehe torreza naqui peperri inana-rreranitoui, onarraro −nade Zeso.

Mateo 19:29

—Nazama tiadenipe occa madirra tiquerrenarrarorrinea ticcadeni oza tiquenebomana, timecotedeni tinebobaqquimana, ticcadeni abi, ami tinebobaqquimana, ticcadeni erredeni tinebobaqquimana, ticcadeni zama tinebomana nezape niza zotode arri bazima tineborize-manarrarossa nehe Deo tiadeniza manaco da inarizazapa denima ticarrimananitoui. Tetizemaneri nanitoui, camittehe rriquerreranicca naqui ticarrimananitoui −nade Zeso.

Mateo 6:33

Deocca cacauehecca uimaza tibodideni uatomarizaniuarrine Deotouira tatarizemana narri. Deo Poua nacassa tauiccazara tetetizemana narri, onarraro. Nema tiquenezana Deorrine ticappiremananicca tiadeniza inanarizanitoui, onarraro −naui nade Zeso.

Maraco 10:30

Nazapa niza zotode bazima poua ineborizarrarossa nehe Deo pouaza da inarizazapa carripomauitoui. Rridapana arrirraro namiza poua madiccaza uemani carriuitoui. Pouaza pina pocca oza touapirrarossa nanitoui. Poua imecotedeni naco touapirizauitoui, pouaza pocca amissa narraro carririzanitoui. Erredeni ouahadeni pina pocca erredeni toquerrenarrarissa narizauitoui. Zama naqui pina pocca zamassa narraro pouaza torrarizanitoui. Naraha otauimari pouaza torrarrarorrine pouaza narrizoue ssonarinitoui. Nema nanitouiraha niza zama zati torrezape camittehe rriquerreraniccaza madi-zanapouitoui. Parrissa −naui nade Zeso.

Roca 5:38

Nazama uva pperrene zatipa bani etero ssequi naui zatizara sso sso totoza narrari −narrari Zeso. (Arra poua atti nama narraripa madirra bodi zati torrazana Zesocca marinarra zati ecauaniuarrine parrireui, narrari.)

Romanodenidsa 8:28

Icca madiezape uima onihi onihi narizarraro. Uima ocassera tanicca naqui iaza bacco bacco narraro. Naraha Deo Pouarrine uima bazima iaza torrarrarocca tassaqquizape iaza uima bicani torraniuarrine nauatoqquiri inarraro. Arra Pouaza uatideni uanaqquiri narrarideni bazimaza nema inananitoui. Narrarideniza uaua narrari, pina Poua bodi: —Arrima onanana −naporrarissa inanarraro.

1 Corintodeniza 3:22

Oua Paoro, Aporo, Pedoro inarrarope ticcadeni iquerrenarraro. Arrirraro zama bazimacca tiadeniza torrarraro. Camittehe, zoqquehe, rridapanacca uima, niza zotodecca uima naqui narraro bazimape ticcadeni.

1 Corintodeniza 8:8

Nazama icca uima Deoza bica taniuarrinepe irriparrarocca uimarrine rrerani. Bani irripaza ibica-rrerani. Bani irripa-rraraza naco iaidira-rrerani.

1 Timoti 4:7

Naraha arrirraro namicca uima, touatti ponimacca Deo Attissa nerrerarraro timittezape: —Rrehe parrissa –terrerana. Deo Attissa tinananiuarrinepe Pouatouira tibodi uauato nana, Pouazara ibora tinaniuarrine, onarraro.

1 Timoti 6:3

Arra madirra marinarra onihi mari mari narraripa ia Zozossede Zeso Cristo tauimari parrisseheccassa nerrerarraro mari mari nazapa pocca marinarrape maizehecca. Arri Deoza imadinissa taniuarrinecca marinarrassa nerrerarraro mari mari naza naco pocca marinarrape maizehecca.

1 Timoti 6:5

Pouadenipa cauadirere cacana narrari. Uadierrine bodideni tossamomanarrari. Deocca parrissehe pouadeniza touatorarrarossa narraro. Pouadeni bodi naco: —Deoza iquerrenezape izepe sseqquiri nanitoui −quenaraha narrarope parrissa rrerani.

1 Timoti 6:6

Deoza iquerrenezape manaconi bicani icarrini. Naraha narraro manaconipe pina ziniro imenissa, tozepetarrissa nerrerani. Narraroa arri Deotouira damera inezape pocca danirri uemerre uemerrererre naraha narraroza etizeza: —Rrehe, peperri, bica tani −inarraro.

2 Timoti 3:5

Inoccoza qqui inabaqquizapa pina Deoza dameraqquiri narrarissa quenaraha Deocca dacorehe ettarromanani poccadeni madieza auato tanitoui. Nezape narrarideniza tiarrini narri, onarraro.

Titodsa 3:8

Nazama Tito, arri tiaza uima dozo onarrarope parrissa. Arrirraro uimaza Deoza rrehe quenarrarideni maride damera tinarri, onarraro. Naui uima bicaniza zepedeni irririzemanaza madirra naco acco icanarizabaqqui-manauiuarrine. Narraro uimape bica tani. Narraro uimazana madirra bazima tobicarizemanauiuarrine.

Ebreodenidsa 13:9

Nezape marinarra pina Zeso tauimarissa nerreranicca timittemanezape narraroza parrissa tiquenerrerarri. Marinarra rriza tanicca aniza naqui: —Imittana −tiquenerrerarri. Tibodideni Deoza rrehe tiquenani todacorani naniuarrinepe Deo iaza uati cauanari canaui tauimarina parri. Narrarona ibodi tobicaniuarrine parrireni. Naraha marinarra onihi pina: —Arrarrari rrirripapa tirripemana terrerarri, oppina taui −quequenanarraricca marinarrape tibodideni tobicaniuarrine parrire-rrerani.

1 Zouao 2:25

Rrehe, narrarope Zeso Cristo toccamacossani-rraraccazama iaza uati taporraride: —Ouaza tiquerrenezape camittehe rriquerreranicca ticarrimana-zanaponitoui −nade iaza.

Apocalipsis 3:12

Occa dacorehema timadimaneza, uimasiriza deni tiquerrenezape niza zotode occa Abi Deo madiuiuarri timadimananitoui. Orrine tiadenipe pina memeuarricca Pouaza dada toqquimacca oza pininissa tiquenaniuarrine. Nanizape rraui tirrena-rreranitoui. Occa Abi Deo oni tiadeniza dozo, Poua madiuiuarricca oza panani onini naqui dozo onarizanitoui. Narraro oza panani oninipe Zerozare zati. Narrarope occa Abi Deorrine memeuarricca namiuarri bacco naronanitoui. Oua oni zati naqui tiadeniza dozo onarizanitoui.

Apocalipsis 3:21

Ouape uimasiriza deni orrarrarorrine occa Abi zosse zosse nauiuarri ouittarirraro. Tiadeni naqui uimasiriza deni tiquerrenezape niza zotode oua zosse zosse onaniuarri tiadeniza: “Rrassi tinarirri” onanitoui.