MIKA 7:18 - Ka Baibala Hemolele

¹⁸ ʻO wai lā ke Akua e like me ʻoe, e kala ana i ka hewa, A e māʻalo aʻe ana i ka hala o ke koena o kona hoʻoilina? ʻAʻole ia e hoʻomau loa aku i kona inaina; No ka mea, ke makemake nei nō ia i ke aloha.

MIKA 7:18 Iomraidhean Croise

KA BUKE MUA A MOSE, I KAPA ʻIA KINOHI 4:7

“A i hana pono ʻoe, ʻaʻole anei ʻoe e maliu ʻia aku? A i ʻole ʻoe e hana i ka pono, ke waiho la ka mōhai hala ma ka puka. A iā ʻoe nō ko ia lā makemake, a e aliʻi iho ʻoe ma luna ona.”

KA BUKE MUA NO NĀ ALIʻI 8:23

ʻĪ akula ʻo ia, “E Iēhova ke Akua o kā ʻIseraʻela, ʻaʻohe Akua ma ka lani i luna, ʻaʻole hoʻi ma ka honua i lalo nei, e like me ʻoe ka Mea nāna e mālama mai i ka berita a me ke aloha me kāu mau kauā ka poʻe e hele ana ma kou alo me ko lākou naʻau a pau.

KA BUKE ʻALUA O KA ʻOIHANA ALIʻI 30:9

“No ka mea, i ko ʻoukou huli ʻana iā Iēhova, e loaʻa ke aloha ʻia mai i ko ʻoukou poʻe hoahānau, a me kā ʻoukou poʻe kamaliʻi i mua o ka poʻe i lawe pio aku iā lākou, a e hoʻi hou lākou i kēia ʻāina; no ka mea, ua ahonui, a ua lokomaikaʻi ʻo Iēhova ko ʻoukou Akua, ʻaʻole e hāliu kona maka mai o ʻoukou aku, ke huli ʻoukou iā ia.”

KA BUKE ʻALUA O KA ʻOIHANA ALIʻI 6:21

“E hoʻolohe mai i ka pule a kāu kauā, a me kou poʻe kānaka o kā ʻIseraʻela, ka mea a lākou i noi aku ai ma kēia wahi. E maliu mai ʻoe, mai kou wahi e noho ai, mai ka lani mai, e hoʻolohe mai, a e kala mai hoʻi.

KA BUKE A NEHEMIA 9:17

“Hōʻole aku lākou, ʻaʻole e hoʻolohe, ʻAʻole hoʻi lākou i hoʻomanaʻo i kāu mau hana kupanaha Āu i hana ai me lākou. Hōʻoʻoleʻa nō lākou i ko lākou ʻāʻī, A i ko lākou kipi ʻana, Koho ihola lākou i luna, I hoʻi aku ai lākou ma ko lākou hoʻokauā ʻana. Akā, ʻo ʻoe ke Akua, E kala ana i ka hala, He ʻoluʻolu a me ka lokomaikaʻi, He ahonui a me ke aloha nui, No laila, ʻaʻole ʻoe i haʻalele iā lākou.

KA BUKE O NĀ HALELŪ 103:13

Me ka makua e aloha ana i kāna keiki, Pēlā nō ʻo Iēhova e aloha ai i ka poʻe e makaʻu aku iā ia.

KA BUKE O NĀ HALELŪ 130:4

Akā, ma ou lā ke kala ʻana o ka hala, I makaʻu ʻia aku ai ʻoe.

KA BUKE O NĀ HALELŪ 35:10

E ʻōlelo aku nō hoʻi kaʻu mau iwi a pau, “E Iēhova, ʻo wai lā ka mea like me ʻoe? Ka Mea i hoʻopakele i ka mea haʻahaʻa i ka mea i ʻoi ka ikaika i kona, ʻO ia hoʻi, ʻo ka mea ʻilihune me ka nele i ka mea hao wale iā ia?”

KA BUKE O NĀ HALELŪ 65:3

Lanakila mai nā hewa ma luna oʻu; A ʻo ko mākou mau lawehala ʻana, ʻo kāu ia e hoʻopau ai.

KA BUKE O NĀ HALELŪ 65:4

Pōmaikaʻi ke kanaka āu i koho mai ai, A e hoʻokokoke ai hoʻi, i noho ia ma kou mau pā hale; E māʻona auaneʻi mākou i ka pono o kou hale, ʻo kou luakini hoʻāno.

KA BUKE O NĀ HALELŪ 71:19

He kiʻekiʻe loa kou pono, e ke Akua, Ka Mea i hana i nā mea nui; E ke Akua, ʻo wai lā ka mea like me ʻoe?

KA BUKE O NĀ HALELŪ 86:15

Akā, ʻo ʻoe nō ke Akua aloha, a me ka lokomaikaʻi, e ka Haku, E hoʻokaʻulua ana i ka huhū, A ua nui hoʻi ka lokomaikaʻi, a me ka ʻoiaʻiʻo.

KA BUKE O NĀ HALELŪ 86:5

A; no ka mea hoʻi, ua maikaʻi ʻoe, e ka Haku, a ua maliu koke mai hoʻi; Manomano kou lokomaikaʻi i ka poʻe a pau i hea aku iā ʻoe.

KA BUKE O NĀ HALELŪ 89:6

No ka mea, ʻo wai lā ka mea ma ke aouli e kū like me Iēhova? I waena hoʻi o nā keiki a ka poʻe kiʻekiʻe, e hoʻohālike ʻia me Iēhova?

KA BUKE O NĀ HALELŪ 89:8

E Iēhova, ke Akua o nā kaua, ʻO wai lā kekahi Iēhova e like me ʻoe? Me kou ʻoiaʻiʻo hoʻi e hoʻopuni ana iā ʻoe?

KA BUKE ʻALUA A MOSE, I KAPA ʻIA PUKA ʻANA 15:11

“ʻO wai ka mea i waena o ka poʻe ikaika e like me ʻoe, e Iēhova? ʻO wai kou mea like, ma ka nani o ka hemolele, He mea weliweli ka hoʻomana aku, ua hana ʻoe i nā mea kupanaha?

KA BUKE ʻALUA A MOSE, I KAPA ʻIA PUKA ʻANA 34:9

ʻĪ akula ia, “A inā i loaʻa iaʻu ka lokomaikaʻi ʻia mai i mua ou, e ka Haku ē, ke nonoi aku nei au e hele pū aku koʻu Haku me mākou; (he poʻe kānaka ʻāʻī ʻoʻoleʻa naʻe kēia); a e kala mai ʻoe i ko mākou hala me ko mākou hewa, a e lawe ʻoe iā mākou i hoʻoilina nou.”

KA WĀNANA A ʻISAIA 1:18

¶ “E hele mai hoʻi, e kīkē kākou,” wahi a Iēhova; “Inā paha i like ko ʻoukou hewa me nā kapa ʻula, E keʻokeʻo auaneʻi ia me he hau lā; Inā paha i ʻula loa e like me ka mea ʻulaʻula, E like auaneʻi ia me he hulu hipa lā.

KA WĀNANA A ʻISAIA 33:24

ʻAʻole e ʻōlelo ka mea e noho ana, “Ua maʻi au”; ʻO nā kānaka e noho ana ma loko, Ua kala ʻia ko lākou hewa.

KA WĀNANA A ʻISAIA 38:17

“Aia hoʻi, ua hoʻololi mai ʻo ia i koʻu kaumaha loa i ʻoluʻolu, Aloha mai nō ʻoe, a hoʻopakele mai iaʻu, mai ka lua mai o ka make; No ka mea, ua kiola aku ʻoe i koʻu hewa a pau ma hope o kou kua.

KA WĀNANA A ʻISAIA 40:18

¶ Me wai ʻoukou e hoʻohālike ai i ke Akua? He aha ka mea like, e hoʻohālike ai ʻoukou me ia?

KA WĀNANA A ʻISAIA 40:25

“Me wai lā hoʻi ʻoukou e hoʻohālike ai iaʻu? A e like au me wai?” wahi a ka Mea Hemolele.

KA WĀNANA A ʻISAIA 43:25

¶ “ʻO wau, ʻo wau nō ka mea nāna e holoi i kou mau hewa, noʻu iho; ʻAʻole hoʻi au e hoʻomanaʻo i kou mau hala.

KA WĀNANA A ʻISAIA 44:22

“E hoʻopau nō wau i kou hewa e like me ke ao ʻeleʻele, A me kou hala hoʻi, me he ʻohu lā; E hoʻi mai ʻoe iaʻu; no ka mea, ua hoʻōla pānaʻi aku au iā ʻoe.”

KA WĀNANA A ʻISAIA 55:7

E haʻalele ke kanaka hewa i kona ʻaoʻao, A me ke kanaka lawehala, i kona mau manaʻo; A e hoʻi mai hoʻi ʻo ia i o Iēhova lā, a e lokomaikaʻi nō ʻo ia iā ia, A i ko kākou Akua hoʻi; no ka mea, e kala nui loa auaneʻi ʻo ia.

KA WĀNANA A ʻISAIA 57:10

“I ka lōʻihi o kou hele ʻana, ua māloʻeloʻe ʻoe, ʻAʻole naʻe ʻoe i ʻōlelo, ‘Ua makehewa.’ Ua loaʻa iā ʻoe ke ola ʻana o kou lima, No laila, ʻaʻole ʻoe i paupauaho.

KA WĀNANA A ʻISAIA 57:16

“No ka mea, ʻaʻole au e paio mau loa, ʻAʻole hoʻi au e huhū aku i nā manawa a pau; O maʻule i mua oʻu ka naʻau, A me nā ʻuhane aʻu i hana ai.

KA WĀNANA A ʻISAIA 62:5

No ka mea, e like me ka mare ʻana o ke kanaka ʻōpiopio i ka wahine puʻupaʻa, Pēlā nō e mare ai kāu mau keiki kāne iā ʻoe. E like hoʻi me ka ʻoliʻoli ʻana o ke kāne mare i ka wahine i mare hou ʻia, Pēlā nō e ʻoliʻoli ai kou Akua iā ʻoe.

KA WĀNANA A ʻISAIA 64:9

Mai ukiuki nui mai ʻoe, e Iēhova, Mai hoʻomanaʻo mau loa hoʻi i ka hewa; Aia hoʻi, ke nonoi aku nei mākou iā ʻoe, e nānā mai, ʻO mākou nō a pau kou poʻe kānaka.

KA WĀNANA A ʻISAIA 65:19

“A e ʻoliʻoli nō wau iā Ierusalema, A e hauʻoli hoʻi i koʻu poʻe kānaka; ʻAʻole e lohe hou ʻia ma loko ona, ka leo o ka uē ʻana, A me ka leo o ke kūmākena.

KA WĀNANA A IEREMIA 3:12

“Ō hele, e kala aku i kēia mau ʻōlelo ma ke kūkulu ʻākau, a e ʻī aku, ‘E hoʻi mai, e kā ʻIseraʻela hoʻi hope,’ wahi a Iēhova; ‘ʻAʻole hoʻi au e hoʻokau aku i koʻu ukiuki ma luna o ʻoukou; No ka mea, ua lokomaikaʻi au,’ wahi a Iēhova, ʻAʻole hoʻi au e hoʻomauhala mau loa.

KA WĀNANA A IEREMIA 3:5

‘E hoʻomau hala mau loa anei ʻo ia? E hoʻomauhala anei ʻo ia, a hiki i ka hopena?’ Aia hoʻi, ua ʻōlelo ʻoe a ua hana hoʻi ʻoe i nā mea hewa, Me kou ikaika a pau.”

KA WĀNANA A IEREMIA 31:20

“ʻO ʻEperaima anei kaʻu keiki aloha? He keiki anei ia e ʻoliʻoli ai? No ka mea, mai ka wā mai o kaʻu ʻōlelo kūʻē ʻana iā ia, He ʻoiaʻiʻo, ke hoʻomanaʻo mau nei au iā ia; No laila, e haʻehaʻe nei koʻu ʻōpū nona; He ʻoiaʻiʻo nō e lokomaikaʻi aku nō wau iā ia, wahi a Iēhova.

KA WĀNANA A IEREMIA 31:34

“ʻAʻole lākou e aʻo hou aku ʻo kēlā mea kēia mea i kona hoalauna, a ʻo kēlā mea kēia mea i kona hoahānau, e ʻōlelo ana, ‘E ʻike iā Iēhova’; no ka mea, e ʻike auaneʻi lākou a pau iaʻu, mai ka mea liʻiliʻi loa o lākou a hiki i ko lākou mea nui loa,” wahi a Iēhova; “no ka mea, e kala aku auaneʻi au i ko lākou hala, ʻaʻole hoʻi au e hoʻomanaʻo hou aku i ko lākou hewa.”

KA WĀNANA A IEREMIA 32:41

“E ʻoliʻoli nō wau iā lākou, e hana maikaʻi iā lākou, a e hoʻonoho paʻa iā lākou ma kēia ʻāina, me koʻu naʻau a pau, a me koʻu ʻuhane a pau.

KA WĀNANA A IEREMIA 33:8

‘A e hoʻomaʻemaʻe au iā lākou i ko lākou hewa a pau a lākou i hana hewa mai ai iaʻu; a e kala nō hoʻi au i ko lākou hala a pau a lākou i lawehala ai, a kipi mai hoʻi iaʻu.

KA WĀNANA A IEREMIA 38:8

A laila, hele aʻela ʻo ʻEbede-Meleka mai loko aku o ka hale o ke aliʻi, a ʻōlelo aʻela i ke aliʻi, ʻī aʻela,

KA WĀNANA A IEREMIA 50:20

‘A ia mau lā, a i kēlā manawa,’ wahi a Iēhova, ‘e ʻimi wale ʻia ka hewa o kā ʻIseraʻela, ʻaʻohe hewa; no ka mea, e kala aku au i ko ka poʻe aʻu e hoʻokoe ai.’

KA WĀNANA A IEREMIA 9:24

akā, ʻo ka mea kaena, e kaena ʻo ia i kēia, i kona hoʻomaopopo ʻana, a i kona ʻike ʻana iaʻu, ʻo wau nō ʻo Iēhova, ka mea hana aku i ka lokomaikaʻi, a me ka hoʻopono, a me ka maikaʻi ma ka honua; no ka mea, ke leʻaleʻa nei au ia mau mea,” wahi a Iēhova.

KA WĀNANA A ʻEZEKIʻELA 18:23

“He ʻoluʻolu iki anei koʻu ke make ka lawehala,” wahi a Iēhova ka Haku; “ʻaʻole hoʻi e huli mai ia mai kona mau ʻaoʻao, a ola ia?

KA WĀNANA A ʻEZEKIʻELA 33:11

“E ʻōlelo aku iā lākou, ‘Ma koʻu ola ʻana,’ wahi a Iēhova ka Haku, ‘ʻaʻohe oʻu ʻoluʻolu i ka make ʻana o ka mea hewa; akā hoʻi, e huli mai ka mea hewa, mai kona ʻaoʻao mai, a e ola ia; e huli mai, e huli mai ʻoukou mai ko ʻoukou mau ʻaoʻao hewa mai; no ke aha lā ʻoukou e make ai, e ka ʻohana a ʻIseraʻela?’

KA WĀNANA A ʻEZEKIʻELA 33:16

“ʻAʻole loa ka hewa āna i hana ai e haʻi ʻia aku iā ia; ua hana ʻo ia i ka mea pono a me ka pololei, e ola ʻiʻo nō ia.

KA BUKE NO DANIʻELA 9:9

“I ka Haku ko mākou Akua ke aloha, a me ke kala i nā hala; ua kipi aku nō naʻe mākou iā ia;

HOSEA 14:2

E lawe me ʻoukou i nā ʻōlelo, a e huli ʻoukou iā Iēhova; E ʻī aku iā ia, “E lawe aku ʻoe i nā hewa a pau, A e ʻae lokomaikaʻi mai, A e hoʻihoʻi aku mākou i nā mōhai o ko mākou lehelehe.

HOSEA 14:5

E like auaneʻi au me ka hau i kā ʻIseraʻela; E pua auaneʻi ʻo ia e like me ka līlia, A e kolo leʻa kona mau aʻa e like me Lebanona.

IOʻELA 2:32

“A ʻo ka mea e kāhea aku i ka inoa ʻo Iēhova, e hoʻopakele ʻia ʻo ia; No ka mea, ma ka Mauna Ziona, a ma Ierusalema, ka mea hoʻopakele, e like me kā Iēhova i ʻōlelo mai ai, A ma waena o ka poʻe i koe a Iēhova e kāhea aku ai.

ʻAMOSA 1:11

¶ Ke ʻōlelo mai nei ʻo Iēhova, penei: “No nā hala ʻekolu o kā ʻEdoma, a me ka hā, ʻaʻole au e hoʻololi aʻe i kona hoʻopaʻi ʻia: No ka mea, ua hahai aku ia i kona hoahānau me ka pahi kaua, A ua haʻalele aku i kona aloha, A ua haehae mau loa kona inaina, A ua hoʻomau loa ia i kona huhū.

ʻAMOSA 7:8

A ʻī maila ʻo Iēhova iaʻu, “E ʻAmosa, he aha lā kāu e ʻike nei?” A ʻī akula au, “He mea hoʻokūpono.” A laila, ʻī maila ʻo Iēhova, “Aia hoʻi, e hoʻonoho aku au i ka mea hoʻokūpono I waena o kuʻu poʻe kānaka o kā ʻIseraʻela; ʻAʻole au i hele hou aʻe mai o lākou aku.

ʻAMOSA 8:2

A ʻī maila ia, “He aha kāu e ʻike nei, e ʻAmosa?” ʻĪ akula au, “He hīnaʻi hua oʻo.” A laila, ʻī maila ʻo Iēhova iaʻu, “Ua hiki mai ka hope ma luna o kuʻu poʻe kānaka o kā ʻIseraʻela; ʻaʻole au e hele hou aʻe mai o lākou aku.

IONA 4:2

A pule akula nō ia iā Iēhova, ʻī akula, “Ke noi aku nei au iā ʻoe, e Iēhova, ʻaʻole anei kēia kuʻu ʻōlelo, i kuʻu noho ʻana ma koʻu ʻāina? No laila i holo aku ai au ma mua i Taresisa; no ka mea, ua ʻike nō au he Akua ahonui ʻoe, a me ke aloha, e hākālia ana i ka huhū, a he lokomaikaʻi nui, a me ka haʻalele i ka manaʻo hoʻopaʻi.

MIKA 2:12

¶ “E hoʻākoakoa ʻiʻo ana au i kāu a pau, e Iakoba; E hōʻuluʻulu ʻiʻo ana au i ke koena o kā ʻIseraʻela; E hui pū aku au iā lākou e like me nā hipa a Bozera, E like me ka poʻe hipa i waenakonu o ko lākou pā hipa; E piʻoloke nui lākou no ka nui o nā kānaka.

MIKA 4:7

“A e hoʻolilo au i ka mea ʻoʻopa i koena, A i ka mea i hoʻokuke lōʻihi ʻia aku, i lāhui kanaka ikaika; A e noho aliʻi ʻo Iēhova ma luna o lākou ma ka mauna ʻo Ziona, Mai ia manawa aku, a i ka wā mau loa aku nō.

MIKA 5:3

No ia hoʻi, e hoʻolilo aku ʻo ia iā lākou, A hiki i ka manawa e hānau ai ka mea e hānau ana; A laila hoʻi, e hoʻi hou mai ke koena o kona mau hoahānau I nā mamo a ʻIseraʻela.

MIKA 7:14

¶ E hānai ʻoe i kou poʻe kānaka me kou koʻokoʻo, Ka poʻe o kou hoʻoilina, Ka poʻe e noho mehameha ana ma ka ulu lāʻau, I waena o Karemela; E ʻai lākou ma Basana, a ma Gileada, E like me ka manawa kahiko.

ZEPANIA 3:17

“ʻO Iēhova ʻo kou Akua i waena ou, He mana kona, e hoʻōla mai ana ʻo ia; E ʻoliʻoli auaneʻi ʻo ia nou me ka hauʻoli, E noho mālie ʻo ia i kona aloha, E hauʻoli ʻo ia nou me ka mele ʻana.

KA BUKE ʻAHĀ A MOSE, I KAPA ʻIA NĀ HELU 23:21

“ʻAʻole ia i ʻike i ka hewa i loko o kā Iakoba, ʻAʻole hoʻi ʻo ia i ʻike i ke kekeʻe i loko o kā ʻIseraʻela. Me ia nō ʻo Iēhova ʻo kona Akua, I waena hoʻi o lākou ka hoʻōho aliʻi.

KA ʻEUANELIO I KĀKAU ʻIA AI E LUKA 15:32

‘He mea pono nō kākou e ʻahaʻaina ʻoliʻoli a me ka hauʻoli; no ka mea, ʻo kou kaikaina nei, ua make nō ia, a ua ola hou mai nei; nalowale akula ia, a ua loaʻa mai nei.’”

KA ʻEUANELIO I KĀKAU ʻIA AI E LUKA 24:47

a e haʻi ʻia aku hoʻi ka mihi a me ke kala ʻana i ka hala ma kona inoa ma waena o nā lāhui kanaka a pau, e hoʻomaka ana ma Ierusalema.

ʻO KA ʻEPISETOLE A PAULO KA LUNAʻŌLELO I KO ROMA 11:4

A pehea mai kā ke Akua ʻōlelo iā ia? “«Ua hoʻāna ʻē au» noʻu «i ʻehiku tausani kānaka ʻaʻole i kukuli iho iā Baʻala».”

KA BUKE ʻALIMA A MOSE, I KAPA ʻIA KĀNĀWAI LUA 33:26

¶ “ʻAʻohe mea like me ke Akua o Iesuruna, E holo ana nō ia ma luna o ka lani e kōkua iā ʻoe, A ma luna o ke ao me kona nani nui.

ʻO KA ʻEPISETOLE HOʻOLAHA A IAKOBO 2:13

ʻO ka mea i hana me ke aloha ʻole aku, e hoʻāhewa ʻia auaneʻi ʻo ia me ke aloha ʻole ʻia mai; ʻaʻole makaʻu ka lokomaikaʻi i ka hoʻohewa ʻia.

KA BUKE NO NĀ LUNA KĀNĀWAI 10:16

Kiola akula lākou i nā akua ʻē, mai o lākou aku, a mālama ihola iā Iēhova; a menemene ihola kona ʻuhane, no ke kaumaha nui o kā ʻIseraʻela.