MIKA 4:1 - Ka Baibala Hemolele

¹ ¶ A i nā lā ma hope e hoʻokūpaʻa ʻia ka mauna o ka hale o Iēhova, ma luna o nā mauna, A e hoʻokiʻekiʻe ʻia ʻo ia ma luna o nā puʻu; a e holo nā kānaka i ona lā.

MIKA 4:1 Iomraidhean Croise

KA BUKE MUA A MOSE, I KAPA ʻIA KINOHI 49:1

¶ Kāhea akula ʻo Iakoba i kāna mau keiki kāne, ʻī akula, “E hōʻuluʻulu mai iā ʻoukou iho i haʻi aku ai au iā ʻoukou i nā mea e hiki mai ana i o ʻoukou lā i nā lā ma hope.

KA BUKE MUA A MOSE, I KAPA ʻIA KINOHI 49:10

“ʻAʻole e lilo aku ke koʻokoʻo aliʻi mai o Iuda aku, ʻAʻole hoʻi ka mea wehewehe kānāwai mai waena aku o kona mau wāwae, A hiki mai ai ʻo Silo; A iā ia ke ʻākoakoa ʻana aʻe o nā kānaka.

KA BUKE O NĀ HALELŪ 110:3

E ʻae ʻoluʻolu mai nō kou poʻe kānaka ke hiki ka lā o kou ikaika, Me ka mea nani hoʻāno, Mai ka ʻōpū mai o ka wanaʻao, Iā ʻoe ka hau o kou poʻe ʻōpiopio.

KA BUKE O NĀ HALELŪ 22:27

E hoʻomanaʻo iho, a e huli mai nō iā Iēhova, nā welelau a pau o ka honua; E pau nō nā ʻohana o nā lāhui kanaka i ka hoʻomana i mua ou;

KA BUKE O NĀ HALELŪ 48:1

¶ He nui nō Iēhova, e hoʻomaikaʻi nui ʻia aku, I loko o ke kūlanakauhale o ko kākou Akua i kona mauna hoʻāno.

KA BUKE O NĀ HALELŪ 86:9

E hele mai nō ko nā ʻāina a pau āu i hana ai, A e kūlou hoʻomana i mua o kou alo, e ka Haku, A e hoʻonani aku i kou inoa.

KA WĀNANA A ʻISAIA 27:13

A hiki aku ia lā, e puhi ʻia ka pū nui, a e hele mai ka poʻe ʻaneʻane make ma ka ʻāina ʻo ʻAsuria, a ʻo ka poʻe i puehu ʻia ma ka ʻāina ʻo ʻAigupita, a e hoʻomana lākou iā Iēhova, ma ka mauna hoʻāno ma Ierusalema.

KA WĀNANA A ʻISAIA 43:6

“E ʻōlelo aku nō au i ke kūkulu ʻākau, ‘E hāʻawi mai’; A i ke kūkulu hema hoʻi, ‘Mai ʻauʻa ʻoe’; E kaʻi mai i kaʻu mau keiki kāne, mai kahi lōʻihi mai, A me kaʻu mau kaikamāhine, mai nā kihi o ka honua;

KA WĀNANA A ʻISAIA 49:6

ʻĪ maila ia, “He mea ʻuʻuku ia e lilo ʻoe i Kauā naʻu, E hoʻokū mai i nā ʻohana o kā Iakoba, A e hoʻihoʻi i ka poʻe i mālama ʻia o kā ʻIseraʻela; E hāʻawi nō hoʻi au iā ʻoe i mālamalama no ko nā ʻāina ʻē, I lilo ʻoe i mea hoʻōla aku noʻu, ma nā kūkulu o ka honua.”

KA WĀNANA A ʻISAIA 54:2

“A hoʻākea i kahi o kou halelewa, E hoʻopālahalaha hoʻi lākou i nā pākū o kou wahi e noho ai; Mai ʻauʻa, e hoʻolōʻihi i kou mau kaula, E hoʻopaʻa loa hoʻi i kou mau mākia;

KA WĀNANA A ʻISAIA 56:7

“ʻO lākou nō kaʻu e lawe ai i koʻu mauna hoʻāno, A e hoʻohauʻoli au iā lākou ma loko o koʻu hale pule; E maliu ʻia ko lākou mōhai kuni, a me ko lākou ʻālana ma luna o koʻu kuahu; No ka mea, e kapa ʻia koʻu hale, He hale pule no nā lāhui kanaka a pau.”

KA WĀNANA A IEREMIA 16:19

¶ E Iēhova, koʻu ikaika, koʻu pā kaua hoʻi, A me koʻu puʻuhonua i ka lā o ka pōpilikia, E hele mai nō ko nā ʻāina ʻē i ou lā, Mai nā kūkulu o ka honua mai, a e ʻōlelo mai, “He ʻoiaʻiʻo, ua ili mai nō ka hoʻopunipuni i ko mākou poʻe mākua, A me ka lapuwale, a me nā mea waiwai ʻole.”

KA WĀNANA A IEREMIA 26:18

“I nā lā o Hezekia, ke aliʻi o kā Iuda, ʻo Mika, no Moraseta, wānana maila ia, a ʻōlelo maila i nā kānaka a pau o kā Iuda, ʻī maila, ‘Ke ʻī mai nei ʻo Iēhova o nā kaua penei, “E mahi ʻia nō ʻo Ziona me he mahina ʻai lā, A e lilo nō ʻo Ierusalema i mau puʻu, A ʻo ka mauna hoʻi o ka hale, E like me nā wahi kiʻekiʻe o ka ulu lāʻau.”’

KA WĀNANA A IEREMIA 3:17

“Ia manawa, e kapa nō lākou iā Ierusalema, ʻo ‘Ka Noho Aliʻi o Iēhova’; a e hoʻākoakoa ʻia mai ko nā ʻāina a pau i mua ona, i ka inoa ʻo Iēhova i Ierusalema; ʻaʻole hoʻi lākou e hele hou ma muli o ka paʻakikī o ka naʻau hewa.

KA WĀNANA A IEREMIA 31:12

“A e hele mai nō lākou a e ʻoli ma kahi kiʻekiʻe o Ziona, A holo pū nō lākou i ka maikaʻi o Iēhova, No ka huapalaoa, a no ka waina, a no ka ʻaila, A no nā keiki o nā hipa, a me nā bipi; A e like auaneʻi ko lākou ʻuhane me ka mahina ʻai i maʻū; ʻAʻole loa lākou e kaumaha hou aku.

KA WĀNANA A IEREMIA 48:47

“Akā, e hoʻihoʻi nō wau i ke pio ʻana o Moaba, Ke hiki i nā lā ma hope,” wahi a Iēhova. ʻO ia nō ka hoʻopaʻi ʻia ʻana o Moaba.

KA WĀNANA A ʻEZEKIʻELA 38:16

“A e piʻi kūʻē mai ʻoe i kuʻu poʻe kānaka ʻIseraʻela, e like me ke ao e uhi mai ka ʻāina; a e hiki nō ia i nā lā ma hope, a e lawe mai au iā ʻoe e kūʻē i kuʻu ʻāina, i ʻike mai nā lāhui kanaka iaʻu i koʻu wā e hoʻāno ʻia ai ma ou lā, e Goga, i mua o ko lākou mau maka.”

KA WĀNANA A ʻEZEKIʻELA 40:2

Ma loko o nā hihiʻo o ke Akua i lawe mai ai ʻo ia iaʻu i loko o ka ʻāina o kā ʻIseraʻela, a hoʻonoho iho iaʻu ma luna o kekahi mauna kiʻekiʻe loa, ma laila he mea me he kūlanakauhale lā i hana ʻia ke ʻano, ma ke kūkulu hema.

KA WĀNANA A ʻEZEKIʻELA 43:12

“Eia ke kānāwai o ka hale; ma ka piko o ka mauna, e hoʻāno loa kona palena a puni. ʻEā, ʻo ia ke kānāwai o ka hale.

KA BUKE NO DANIʻELA 10:14

“ʻĀnō, ua hele mai nei au e hoʻākāka i ʻike ʻoe i nā mea e hiki mai ana i kou poʻe kānaka i nā lā ma hope; no ka mea, ua nui nā lā i koe o ua hihiʻo lā.”

KA BUKE NO DANIʻELA 2:28

“Akā, aia ma ka lani ke Akua, ka Mea e hōʻike mai i nā mea i ʻike ʻole ʻia; ʻo ia ka Mea e hōʻike mai i ke aliʻi, iā Nebukaneza i nā mea e hiki mai ana i nā lā ma hope. ʻO kāu moeʻuhane, a me ka liʻa o kou poʻo ma kou wahi moe, penei nō ia.

KA BUKE NO DANIʻELA 2:35

“A laila, ua okaoka loa ihola ka hao, a me ka pālolo, a me ke keleawe, ke kālā, a me ke gula; a ua lilo lākou me he ʻōpala lā ma ke kahua hehi o ke kau; a ua puhi ʻia hoʻi e ka makani, ʻaʻole wahi i loaʻa no lākou; akā, ʻo ua pōhaku lā i kuʻi i ke kiʻi, ua lilo ia i mauna nui a piha ka honua iā ia.

KA BUKE NO DANIʻELA 2:44

“Ma nā lā o kēia poʻe aliʻi, e kūkulu mai ai ke Akua o ka lani i aupuni mau loa, ʻaʻole hoʻi e hoʻohiolo ʻia ia aupuni; ʻaʻole naʻe ia e lilo no ka lāhui kanaka ʻē; akā, iā ia nō e weluwelu liʻiliʻi auaneʻi a okaoka loa kēia mau aupuni a pau, a e mau loa aku ana nō ia.

KA BUKE NO DANIʻELA 7:14

“A ua hāʻawi ʻia mai nona ke aliʻi ʻana, A me ka nani, a me ke aupuni, I hoʻokauā nāna nā lāhui kanaka, A me ko nā ʻāina, a me nā ʻōlelo ʻē. ʻO kona aliʻi ʻana ua mau loa ia, ʻAʻole ia e pau, A ʻo kona aupuni, ʻAʻole ia e auhulihia.

KA BUKE NO DANIʻELA 7:18

‘Akā, ʻo nā haipule o ka Mea Kiʻekiʻe Loa, e lilo iā lākou ke aupuni; a iā lākou no ke aupuni ia ao aku, ia ao aku, a mau loa aku nō.’

KA BUKE NO DANIʻELA 7:22

a hiki maila ka Makamua o nā Lā, a hāʻawi ʻia mai i ka poʻe haipule o ka Mea Kiʻekiʻe ka hoʻopaʻi ʻana; a ua hiki mai ka manawa e lilo ai ke aupuni i ka poʻe haipule.

KA BUKE NO DANIʻELA 7:27

‘Akā, ʻo ke aupuni, a me ke aliʻi ʻana, a ʻo ka nani o ke aupuni ma lalo iho o nā lani a puni, e hāʻawi ʻia mai i nā kānaka haipule o ka Mea Kiʻekiʻe, ʻo kona aupuni he aupuni mau loa ia; a ʻo nā aliʻi a pau, e hoʻokauā aku, a e mālama aku nō hoʻi iā ia.’

HOSEA 3:5

Ma hope iho e huli mai nā mamo a ʻIseraʻela, a ʻimi iā Iēhova ko lākou Akua, a me Dāvida ko lākou aliʻi; a e makaʻu lākou iā Iēhova, a me kona lokomaikaʻi i nā lā ma hope.

MIKA 3:12

No laila, no ʻoukou E hoʻōʻō palau ʻia ʻo Ziona me he kīhāpai lā, A e lilo ʻo Ierusalema i mau puʻu, A ʻo ka mauna o ka hale e like me nā wahi kiʻekiʻe o ka ulu lāʻau.

ZEKARIA 14:10

E hoʻololi ʻia ka ʻāina a pau a like me ka pāpū mai o Geba aku a hiki i Rimona ma ke kūkulu hema o Ierusalema; e hoʻokiʻekiʻe ʻia aʻe ia, a e hoʻonoho paʻa ia ma kona wahi, mai ka ʻĪpuka o Beniamina a hiki i kahi o ka Puka Mua, a i ka Puka Kihi; a mai ka Hale Kiaʻi o Hananela a hiki i nā lua waina o ke aliʻi.

ZEKARIA 2:11

“Ia lā hoʻi, he nui nā lāhui kanaka e hui aku iā lākou iho me Iēhova, a e lilo lākou i kānaka noʻu, a e noho nō wau i waena pū o ʻoukou; a e ʻike auaneʻi ʻoukou na Iēhova o nā kaua wau i hoʻouna mai i ou lā.

ZEKARIA 8:3

“Ke ʻōlelo mai nei Iēhova penei, ‘Ua hoʻi mai nei au i Ziona, a e noho auaneʻi au i waena o Ierusalema; a e kapa ʻia ʻo Ierusalema, he Kūlanakauhale no ka ʻOiaʻiʻo, a ʻo ka mauna o Iēhova o nā kaua, he Mauna Hoʻāno.

MALAKI 1:11

“No ka mea, mai ka hikina o ka lā a hiki i ke komohana, e nui auaneʻi kuʻu inoa i waena o nā lāhui kanaka; a ma nā wahi a pau loa e kuni ʻia ai ka mea ʻala no kuʻu inoa, a me ka mōhai maʻemaʻe; no ka mea, e nui auaneʻi kuʻu inoa i waena o nā lāhui kanaka,” wahi a Iēhova o nā kaua.

NĀ ʻOIHANA A KA POʻE LUNAʻŌLELO 2:17

‘«I nā lā ma hope»,’ wahi a ke Akua, ‘E ninini iho au i koʻu ʻUhane ma luna o nā kānaka a pau; A e wānana aʻe kā ʻoukou poʻe keiki kāne, a me kā ʻoukou mau kaikamāhine, A e ʻike ko ʻoukou poʻe kānaka hou i nā hihiʻo, A e moe nō ko ʻoukou poʻe ʻelemākule i nā moeʻuhane.

ʻO KA ʻEPISETOLE A PAULO KA LUNAʻŌLELO I KO HEBERA 1:2

ʻo ia kai ʻōlelo hou mai iā kākou i kēia mau lā muli iho nei ma ke Keiki, ka Mea i hoʻolilo ʻia e ia i Haku no nā mea a pau, ma ona lā hoʻi ia i hana ai i ka lani a me ka honua.

ʻO KA ʻEPISETOLE HOʻOLAHA ʻALUA A PETERO 3:3

E ʻike mua ʻoukou i kēia; i nā lā ma hope, e hiki mai ana nō ka poʻe hoʻowahāwahā, hilahila ʻole, a e hele ana nō hoʻi lākou ma muli o ko lākou kuko iho,

KA HŌʻIKE ʻANA A IOANE KA HAIPULE 11:15

¶ Puhi aʻela ka ʻānela ʻahiku; a nui loa ihola nā leo ma ka lani, e ʻī mai ana, “Ua lilo ke aupuni o ke ao nei no ko kākou Haku, a no kona Kristo; a ʻo ia ke Aliʻi e mau loa ana i ke ao pau ʻole.”

KA HŌʻIKE ʻANA A IOANE KA HAIPULE 15:4

“ʻO wai ka mea e makaʻu ʻole iā ʻoe, e ka Haku, a e hoʻonani ʻole i kou inoa? No ka mea, ʻo ʻoe wale nō ka hemolele; «A e hele mai nō hoʻi ko nā ʻāina a pau, a e kukuli hoʻomaikaʻi i mua ou; No ka mea, ua maopopo ka pono o kou hoʻopaʻi ʻana».”

KA HŌʻIKE ʻANA A IOANE KA HAIPULE 20:4

¶ A ʻike akula au i nā noho aliʻi, a noho lākou ma luna iho, a ua hāʻawi ʻia na lākou e hoʻopaʻi aku. A ʻike akula au i nā ʻuhane o ka poʻe i ʻoki ʻia ko lākou poʻo no ka hōʻike ʻana iā Iesū, a no ka ʻōlelo a ke Akua, a me ka poʻe i hoʻomana ʻole i ka holoholona a me kona kiʻi, ʻaʻole hoʻi i loaʻa kona hōʻailona ma ko lākou lae, ʻaʻole hoʻi ma ko lākou lima; ola pū lākou me Kristo a hoʻomalu pū me ia i nā makahiki hoʻokahi tausani.