MIKA 2:1 - Ka Baibala Hemolele

¹ ¶ Auē ka poʻe e noʻonoʻo ana i ka ʻino, A e ʻimi ana i ka hewa, ma luna o ko lākou wahi moe! I ka mālamalama o ke ao, hana lākou ia mea; No ka mea, ma ka ikaika o ko lākou lima e hiki ai ia.

MIKA 2:1 Iomraidhean Croise

KA BUKE MUA A MOSE, I KAPA ʻIA KINOHI 31:29

“E hiki nō i kuʻu lima ke hana aku iā ʻoe i ke ʻino; akā, ʻo ke Akua o kou makua kāne i ʻōlelo mai iaʻu i ka pō nei, i ka ʻī ʻana, ‘E ao ʻoe, mai ʻōlelo aku ʻoe iā Iakoba i ka mea aloha, ʻaʻole hoʻi ka mea hōʻino.’

KA BUKE MUA NO NĀ ALIʻI 21:7

ʻĪ akula hoʻi ʻo Iezebela kāna wahine iā ia, “Ke hoʻomalu nei anei ʻoe i ke aupuni o kā ʻIseraʻela? E ala aʻe a e ʻai i ka berena, e ʻoliʻoli kou naʻau, naʻu nō e hāʻawi i ka māla waina o Nabota no Iezereʻela iā ʻoe.”

KA BUKE NO ʻESETERA 3:8

ʻĪ akula ʻo Hamana i ke aliʻi, iā ʻAhasuero, “He lāhui kanaka i puehu ʻia a heleleʻi i waena o nā kānaka, ma nā ʻāina a pau o kou aupuni; ʻokoʻa ʻo ko lākou kānāwai i ko nā kānaka ʻē a pau, ʻaʻole hoʻi lākou i mālama i nā kānāwai o ke aliʻi. ʻAʻole he mea pono no ke aliʻi ke hoʻomalu iā lākou.

KA BUKE NO ʻESETERA 5:14

A laila, ʻōlelo maila iā ia ʻo Zeresa kāna wahine, a me kona poʻe makamaka a pau, “E hana ʻia he ʻolokeʻa, i kanalima kūbita ke kiʻekiʻe; a ʻapōpō, e ʻōlelo aku ʻoe i ke aliʻi, i lī ʻia ʻo Moredekai ma luna o laila. A laila, e hele ʻoliʻoli ʻoe i ka ʻaha inu me ke aliʻi.” Ua maikaʻi ia i ka manaʻo o Hamana, a hana ihola ʻo ia i ke ʻolokeʻa.

KA BUKE NO ʻESETERA 9:25

a hele akula ʻo ʻEsetera i mua i ke alo o ke aliʻi, kauoha aʻela ia ma nā palapala, e hoʻihoʻi ʻia ma luna o kona poʻo iho ka manaʻo hewa āna i manaʻo ai i nā Iudaio, a e lī ʻia hoʻi ʻo ia a me kāna mau keiki kāne ma luna o ke ʻolokeʻa.

KA BUKE NO IOBA 15:35

“Hāpai lākou, he kolohe, a hānau mai, he hewa; A noʻonoʻo ko lākou ʻōpū i ka wahaheʻe.”

KA BUKE NO IOBA 24:14

“I ka mālamalama ala mai ka pepehi kanaka, A pepehi aku i ka poʻe ʻilihune a me ka poʻe nele, A i ka pō ua like ia me ka ʻaihue.

KA BUKE O NĀ HALELŪ 36:4

Kūkākūkā ʻo ia i ka hewa ma luna o kona wahi moe; Ke kū nei nō hoʻi ia ma ka ʻaoʻao pono ʻole; ʻAʻole ia i hoʻowahāwahā i ka hewa.

KA BUKE O NĀ HALELŪ 36:5

¶ ʻO kou aloha, e Iēhova, aia nō i ka lani; A ʻo kou ʻoiaʻiʻo, e hiki aku nō ia i ke ao.

KA BUKE O NĀ HALELŪ 58:3

Ua ʻaeʻa wale ka poʻe hewa mai ka ʻōpū mai; Ua ʻauana lākou mai ka hānau ʻana, e ʻōlelo wahaheʻe ana.

NĀ ʻŌLELO AKAMAI A SOLOMONA 12:2

ʻO ka mea maikaʻi, e loaʻa iā ia ka lokomaikaʻi no Iēhova mai; A e hoʻohewa mai ʻo ia i ke kanaka hoʻopunipuni.

NĀ ʻŌLELO AKAMAI A SOLOMONA 14:22

ʻAʻole anei he lalau wale ko ka poʻe ʻimi hewa? He aloha a he ʻoiaʻiʻo na ka poʻe ʻimi maikaʻi.

NĀ ʻŌLELO AKAMAI A SOLOMONA 3:27

¶ Mai ʻauʻa ʻoe i ka maikaʻi i ka mea e pono ai ia, Ke hiki i kou lima ke hana aku.

NĀ ʻŌLELO AKAMAI A SOLOMONA 4:16

No ka mea, ʻaʻole o lākou hiamoe, ke hana hewa ʻole aku; Ua lele hoʻi ka hiamoe, ke hoʻohina ʻole ʻia kekahi e lākou.

KA WĀNANA A ʻISAIA 29:20

No ka mea, ua oki loa ka mea ʻoʻoleʻa, Ua pau hoʻi ka mea hoʻowahāwahā, Ua luku ʻia ka poʻe a pau i makaʻala i ka hewa;

KA WĀNANA A ʻISAIA 3:14

E hele mai ana nō ʻo Iēhova e hoʻopaʻi, I nā lunakahiko o kona poʻe kānaka, a me ko lākou poʻe aliʻi. “Ua hoʻopau ʻoukou i nā pā waina; Aia hoʻi ma ko ʻoukou hale ka waiwai kāʻili wale ʻia o ka poʻe hune.

KA WĀNANA A ʻISAIA 32:7

He hewa nā mea hana o ka mea ʻālunu; ʻImi nō ʻo ia i nā manaʻo hewa, E hoʻokaumaha i ka poʻe pōʻino i nā ʻōlelo wahaheʻe, I ka poʻe pōpilikia hoʻi e ʻōlelo ana ma ka pololei.

KA WĀNANA A ʻISAIA 5:8

¶ Auē ka poʻe i hoʻopili i kekahi hale i kekahi hale, A me ka poʻe i hui i kekahi mahina ʻai i kekahi mahina ʻai, A koe ʻole kahi kaʻawale, I noho ʻo ʻoukou wale nō i waenakonu o ka ʻāina!

KA WĀNANA A ʻISAIA 59:3

No ka mea, ua paumāʻele ko ʻoukou mau lima i ke koko, A me ko ʻoukou manamana lima i ka hewa; Ua ʻōlelo nō ko ʻoukou mau lehelehe i ka wahaheʻe, A ua ʻōlelo ko ʻoukou alelo i ka hewa.

KA WĀNANA A IEREMIA 18:18

¶ A laila, ʻōlelo maila lākou, “E hele mai, e ʻimi hala kākou no Ieremia; no ka mea, ʻaʻole e hāʻule ke kānāwai i ke kahuna, ʻaʻole hoʻi ka manaʻo akamai i ka poʻe akamai, a me ka ʻōlelo hoʻi i ke kāula. E hele mai, e hahau kākou iā ia i ke alelo; mai hoʻolohe kākou i kekahi o kāna mau ʻōlelo.”

KA WĀNANA A ʻEZEKIʻELA 11:2

A laila ʻōlelo maila ʻo ia iaʻu, “E ke keiki a ke kanaka, eia nā kānaka i kūkākūkā i ka mea ʻino, a hāʻawi hoʻi i ka ʻōlelo aʻo hewa i loko o kēia kūlanakauhale;

KA WĀNANA A ʻEZEKIʻELA 33:26

“Ke kū nei ʻoukou ma luna o kā ʻoukou pahi kaua, ke hana nei ʻoukou i ka mea inaina ʻia; ke hoʻohaumia nei ʻoukou, kēlā kanaka kēia kanaka, i ka wahine a kona hoalauna; e loaʻa anei iā ʻoukou ka ʻāina?”’

KA WĀNANA A ʻEZEKIʻELA 38:10

¶ ‘Ke ʻī mai nei Iēhova ka Haku, penei, “Ia lā nō e hiki nō, a e kupu kekahi mau mea ma loko o kou naʻau, a e noʻonoʻo nō ʻoe i ka manaʻo ʻino.

KA WĀNANA A ʻEZEKIʻELA 46:18

“A ʻaʻole e lawe ka mōʻī i kauwahi o kā kānaka hoʻoilina ma ka hoʻoluhi hewa, e kipaku aku ai iā lākou mai ko lākou hoʻoilina aʻe; akā, e hāʻawi ʻo ia i hoʻoilina no kāna mau keiki no loko o kona hoʻoilina iho, i ʻole e hele liʻiliʻi aʻe koʻu poʻe kānaka mai ko lākou hoʻoilina aʻe.”’”

MIKA 6:12

“No ka mea, ua piha kona poʻe kānaka waiwai i ka hana ʻino, A ua ʻōlelo wahaheʻe kona poʻe kānaka, A ua hoʻopunipuni ko lākou alelo ma ko lākou waha.

NAHUMA 1:11

Ua puka mai ka mea mai ou mai lā E manaʻo hewa ana iā Iēhova; He kākāʻōlelo hewa.

ZEKARIA 7:10

‘Mai hana ʻino i ka wahine kāne make, ʻaʻole hoʻi i ke keiki makua ʻole, ʻaʻole i ka malihini, ʻaʻole hoʻi i ka ʻilihune, ʻaʻole hoʻi e manaʻo ʻino aku ka naʻau o kekahi i kona hoahānau.’

KA ʻEUANELIO I KĀKAU ʻIA AI E MAREKO 15:1

¶ A kakahiaka aʻela, kūkākūkā koke ihola nā kāhuna nui, a me nā lunakahiko, a me nā kākau ʻōlelo, a me ka ʻaha luna kānāwai a pau, a nakinaki akula iā Iesū, a kaʻi aʻela, a hāʻawi akula iā Pilato.

KA ʻEUANELIO I KĀKAU ʻIA AI E LUKA 20:19

¶ A ʻimi ihola ka poʻe kāhuna nui, a me ka poʻe kākau ʻōlelo e kau nā lima ma luna ona ia manawa; akā, ua makaʻu lākou i kānaka; no ka mea, ua ʻike lākou, ua ʻōlelo mai ʻo ia i kēia ʻōlelo nane no lākou.

KA ʻEUANELIO I KĀKAU ʻIA AI E IOANE 19:11

ʻŌlelo maila ʻo Iesū, “ʻAʻohe ou mana iki e kūʻē iaʻu, ke ʻole i hāʻawi ʻia mai ia nou mai luna mai; no ia mea, ua ʻoi aku ka hewa o ka mea nāna au i hāʻawi aku iā ʻoe.”

NĀ ʻOIHANA A KA POʻE LUNAʻŌLELO 23:12

¶ A wanaʻao, ʻōhumu kuʻikahi maila kekahi poʻe Iudaio e hoʻohālua iā ia, hoʻohiki aʻela, ʻaʻole loa lākou e ʻai, ʻaʻole hoʻi e inu, a pepehi lākou iā Paulo.

NĀ ʻOIHANA A KA POʻE LUNAʻŌLELO 23:15

“No ia mea, ʻānō, e nonoi aku ʻoukou me ka ʻAha Luna Kānāwai i ka luna tausani, e kaʻi mai ia i o ʻoukou nei, i ka lā ʻapōpō, me he mea lā e nīnau hou aku i mea e akāka ai nona: a ʻo mākou nei, ua mākaukau mākou e pepehi iā ia i ka wā ʻaʻole ia e hiki kokoke mai.”

ʻO KA ʻEPISETOLE A PAULO KA LUNAʻŌLELO I KO ROMA 1:30

he poʻe ʻaki, he poʻe ʻōlelo hoʻohewa wale, he poʻe inaina i ke Akua, he poʻe kūamuamu, he haʻaheo, he haʻanui, he poʻe ʻimi i nā mea ʻino, he poʻe mālama ʻole i nā mākua,

KA BUKE ʻALIMA A MOSE, I KAPA ʻIA KĀNĀWAI LUA 28:32

“A e hāʻawi ʻia aku kāu mau keiki kāne a me kāu mau kaikamāhine i nā kānaka ʻē, a e haʻehaʻe wale nā maka ou i ka nānā aku, a e hoʻopau ʻia no lākou, a pau ka lā, ʻaʻohe ikaika i loko o kou lima.