HOSEA 6:1 - Ka Baibala Hemolele

¹ ¶ “Inā kākou e hoʻi hou aku iā Iēhova; No ka mea, ua haehae mai kēlā, a e hoʻōla mai ia iā kākou; Ua hahau mai ia, a e hoʻōla mai nō ʻo ia iā kākou.

HOSEA 6:1 Iomraidhean Croise

KA BUKE ʻALUA O KA ʻOIHANA ALIʻI 30:6

A laila, hele akula ka poʻe kūkini me nā palapala a ke aliʻi, a me kona poʻe aliʻi ma ʻIseraʻela a pau a me Iuda, e ʻōlelo ana e like me ke kauoha a ke aliʻi, “E nā mamo a ʻIseraʻela, e huli mai iā Iēhova ke Akua o ʻAberahama, a me ʻIsaʻaka, a me ʻIseraʻela, a e huli mai nō kēlā i ke koena, i ka poʻe o ʻoukou i pakele, mai ka lima mai, o nā aliʻi o ʻAsuria.

KA BUKE NO IOBA 16:9

“Ke haehae mai nei kona huhū, a ua inaina mai ia iaʻu; Ke nau mai nei ia iaʻu me kona mau niho; ʻO kuʻu ʻenemi, ke hoʻokala nei ia i kona mau maka ma luna oʻu.

KA BUKE NO IOBA 22:23

“Inā e hoʻi hou ʻoe i ka Mea Mana, e kūkulu ʻia ʻoe, E hoʻomamao loa aku ʻoe i ka hewa mai kou mau halelewa aku.

KA BUKE NO IOBA 34:29

“A hāʻawi mai ia i ka maha, ʻo wai hoʻi ke hoʻopilikia mai? A hūnā ʻo ia i kona maka, ʻo wai ke ʻike aku iā ia? Pēlā nō ka lāhui kanaka a me ke kanaka hoʻokahi.

KA BUKE NO IOBA 5:18

“No ka mea, ke hōʻeha mai nei ia, a e lapaʻau mai hoʻi; Ke hahau mai nei ʻo ia, a e hoʻōla mai hoʻi kona mau lima.

KA BUKE O NĀ HALELŪ 30:7

E Iēhova, ma kou lokomaikaʻi, ua hoʻokūpaʻa ʻoe i kuʻu mauna; Hūnā akula ʻoe i kou maka, pilikia ihola au.

KA BUKE O NĀ HALELŪ 6:2

E aloha mai ʻoe iaʻu, e Iēhova; no ka mea, ua nāwaliwali au; E Iēhova, e lapaʻau mai ʻoe iaʻu; no ka mea, ua haʻalulu koʻu mau iwi.

KA BUKE O NĀ HALELŪ 71:20

E ka Mea i hōʻike iho nei iaʻu i ka pilikia ʻana he nui wale, E hoʻoikaika hou mai nō ʻoe iaʻu, A e hoʻopuka iaʻu mai loko o nā wahi hohonu o ka honua.

KE KAHUNA 3:3

He wā e pepehi ai, A he wā hoʻi e hoʻōla ai; He wā e wāwahi ai, A he wā hoʻi e kūkulu iho ai;

KA WĀNANA A ʻISAIA 17:7

Ia lā lā, e hilinaʻi aku nō ke kanaka ma ka Mea nāna i hana, E kau nō kona mau maka ma luna o ka Mea Hemolele o kā ʻIseraʻela.

KA WĀNANA A ʻISAIA 2:3

A e nui loa nā kānaka e hele me ka ʻōlelo, “E hele mai e piʻi kākou i ka mauna o Iēhova, I ka hale hoʻi o ke Akua o Iakoba; Nāna nō e aʻo mai iā kākou i kona mau ʻaoʻao, I hele ai kākou ma kona mau alanui.” No ka mea, mai Ziona aku e laha aku ai ke kānāwai, A ʻo ka ʻōlelo a Iēhova hoʻi, mai Ierusalema aku.

KA WĀNANA A ʻISAIA 30:22

E hoʻohaumia nō hoʻi ʻoukou i ke poʻi kālā o ko ʻoukou mau kiʻi i kālai ʻia, a me ka wahi gula o kou mau kiʻi hoʻoheheʻe ʻia; e kiola ana ʻoukou ia, e like me ka welu peʻa, a e ʻōlelo ana nō ʻoe iā ia, “Hele pēlā!”

KA WĀNANA A ʻISAIA 30:26

A e like auaneʻi ka mālamalama o ka mahina, me ka mālamalama o ka lā, a e pāhiku nō ka mālamalama o ka lā, e like me ka mālamalama o nā lā ʻehiku, i ka lā e wahī ai ʻo Iēhova i ka ʻeha o kona poʻe kānaka, a hoʻōla hoʻi i ka ʻeha o ko lākou hahau ʻia.

KA WĀNANA A ʻISAIA 55:7

E haʻalele ke kanaka hewa i kona ʻaoʻao, A me ke kanaka lawehala, i kona mau manaʻo; A e hoʻi mai hoʻi ʻo ia i o Iēhova lā, a e lokomaikaʻi nō ʻo ia iā ia, A i ko kākou Akua hoʻi; no ka mea, e kala nui loa auaneʻi ʻo ia.

KA WĀNANA A IEREMIA 3:22

“E hoʻi mai ʻoukou, e nā keiki hoʻi hope, A e hoʻōla nō wau i ko ʻoukou hoʻi hope ʻana.” Aia hoʻi, ke hele mai nei mākou i ou lā; No ka mea, ʻo ʻoe nō ʻo Iēhova, ʻo ko mākou Akua.

KA WĀNANA A IEREMIA 30:12

¶ “No ka mea, ke ʻōlelo mai nei ʻo Iēhova penei, ‘He mea ola ʻole kou palapū, Ua nui loa hoʻi kou ʻeha.

KA WĀNANA A IEREMIA 30:17

‘No ka mea, e hoʻihoʻi aku au i ke ola iā ʻoe, A e hoʻōla nō wau iā ʻoe i kou mau ʻeha,’ wahi a Iēhova; ‘No ka mea, kapa aku lākou iā ʻoe, he kuewa, “ʻO Ziona hoʻi kēia, Ka mea ʻimi ʻole ʻia e kekahi.”’

KA WĀNANA A IEREMIA 33:5

‘Ke hele mai nei lākou e kaua me ko Kaledea, he mea naʻe ia e hoʻopiha ai iā lākou i nā kupapaʻu o nā kānaka, ka poʻe aʻu i luku ai i koʻu huhū, a i koʻu ukiuki, a ua hūnā hoʻi au i koʻu maka mai kēia kūlanakauhale aku, no ka hewa a pau o lākou.

KA WĀNANA A IEREMIA 33:6

‘Aia hoʻi, e lawe mai nō au i ona lā i ka wahī, a me ka mea e ola ai, a e hoʻōla nō wau iā lākou, a e hōʻike aku au iā lākou i ka maluhia nui, me ka ʻoiaʻiʻo.

KA WĀNANA A IEREMIA 50:4

“Ia mau lā, a i kēlā manawa,” wahi a Iēhova, “e hele mai nō nā mamo a ʻIseraʻela, ʻo lākou a me nā mamo a Iuda pū, e hele nō lākou, a e uē iho i ko lākou hele ʻana; a e ʻimi iā Iēhova i ko lākou Akua.

KA WĀNANA A IEREMIA 50:5

“E nīnau nō lākou i ke ala e hiki aku ai i Ziona, me nā maka o lākou e huli ana i laila, i ka ʻī ʻana iho, ‘ʻEā, e hoʻopili kākou iā kākou iho iā Iēhova ma ka berita mau loa nalowale ʻole i ka poina.’

KE KANIKAU A IEREMIA 3:11

Ua kāpae ʻo ia i koʻu mau ʻaoʻao, ua haehae mai iaʻu; Ua hoʻolilo mai ʻo ia iaʻu i mehameha.

HOSEA 11:10

Ma muli o Iēhova lākou e hele ai; E uō ana nō ia e like me ka liona; A i ka wā e uō ai ʻo ia, a laila e haʻalulu nā keiki mai ke komohana mai.

HOSEA 12:6

No laila, e huli ʻoe i kou Akua; E mālama i ke aloha, a me ka ʻōlelo hoʻopono, A e hilinaʻi mau ma luna o kou Akua.

HOSEA 14:1

¶ E kā ʻIseraʻela, e huli mai ʻoe iā Iēhova kou Akua; No ka mea, ua hāʻule ʻoe ma kou hewa iho.

HOSEA 14:4

¶ A e kala aku au i ko lākou kipi ʻana, E aloha wale aku hoʻi au iā lākou; No ka mea, ua huli aʻe kuʻu inaina mai ona aku lā.

HOSEA 3:5

Ma hope iho e huli mai nā mamo a ʻIseraʻela, a ʻimi iā Iēhova ko lākou Akua, a me Dāvida ko lākou aliʻi; a e makaʻu lākou iā Iēhova, a me kona lokomaikaʻi i nā lā ma hope.

KA BUKE ʻAKOLU A MOSE, I KAPA ʻIA ʻOIHANA KAHUNA 14:48

¶ “A inā e komo ke kahuna, a e nānā aku ia mea, aia hoʻi, ʻaʻole i pālahalaha ka maʻi ʻino ma loko o ka hale ma hope iho o ka hamo ʻia ʻana o ka hale; a laila e ʻōlelo ke kahuna pule he maʻemaʻe ka hale; no ka mea, ua ola ka maʻi ʻino.

ZEPANIA 2:1

¶ E hoʻāʻo iā ʻoukou iho, a e hoʻāʻo ʻia hoʻi, E ka lāhui kanaka hilahila ʻole;

KA BUKE ʻALIMA A MOSE, I KAPA ʻIA KĀNĀWAI LUA 32:39

‘E nānā ʻoukou ʻānō, ʻo wau, ʻo wau nō ia, ʻAʻohe akua ʻē aʻe, ʻo wau wale nō; ʻO wau ke pepehi, ʻo wau ke hoʻōla; ʻO wau ke hoʻoʻeha, ʻo wau ke hoʻōla; ʻAʻohe mea nāna e hoʻopakele aʻe mai kuʻu lima aku.

KA BUKE MUA A SAMUʻELA 2:6

“Na Iēhova ka pepehi a me ka hoʻōla; Nāna i hoʻohaʻahaʻa i lalo i ka hale lua, a nāna nō i hoʻāla hou mai.

KA BUKE MUA A SAMUʻELA 7:3

¶ ʻŌlelo akula ʻo Samuʻela i ko ka hale a pau o kā ʻIseraʻela, ʻī akula, “Inā e hoʻi hou ʻoukou iā Iēhova me ko ʻoukou naʻau a pau, e hoʻolei aku ʻoukou i nā akua ʻē, a me ʻAsetarota, mai o ʻoukou aku, a e hoʻomākaukau i ko ʻoukou naʻau no Iēhova, a e mālama ʻoukou iā ia wale nō; a e hoʻopakele mai ʻo ia iā ʻoukou mai ka lima mai o ko Pilisetia.”