ʻO KA ʻEPISETOLE MUA A PAULO KA LUNAʻŌLELO I KO TESALONIKE 4:16 - Ka Baibala Hemolele

¹⁶ No ka mea, e iho ʻiʻo mai nō ka Haku mai ka lani mai, me ka hoʻōho, a me ka leo o ka luna ʻānela, a me ka pū a ke Akua; a ʻo ka poʻe make i loko o Kristo ke ala ʻē mai.

ʻO KA ʻEPISETOLE MUA A PAULO KA LUNAʻŌLELO I KO TESALONIKE 4:16 Iomraidhean Croise

KA BUKE O NĀ HALELŪ 47:1

¶ E paʻipaʻi i ko ʻoukou mau lima, e nā lāhui kanaka a pau; E hoʻōho i ke Akua me ka leo ʻoliʻoli.

KA BUKE O NĀ HALELŪ 47:5

¶ Ua piʻi aʻe nei ke Akua me ka hoʻōho, ʻO Iēhova me ke kani ʻana o ka pū.

KA BUKE ʻALUA A MOSE, I KAPA ʻIA PUKA ʻANA 19:16

¶ A i ke kakahiaka o ke kolu o ka lā, he hekili, a he uila, a he ao polohiwa ma ka mauna, a he leo no ka pū e kani ikaika loa ana; haʻalulu ihola nā kānaka a pau ma ko lākou wahi i hoʻomoana ai.

KA BUKE ʻALUA A MOSE, I KAPA ʻIA PUKA ʻANA 20:18

¶ ʻIke akula nā kānaka a pau i ke hekili, a me ka uila, a me ke kani ʻana o ka pū, a me ka mauna e uahi ana; a ʻike akula nā kānaka, weliweli ihola; neʻeneʻe akula, a kū ma kahi mamao aku.

KA WĀNANA A ʻISAIA 27:13

A hiki aku ia lā, e puhi ʻia ka pū nui, a e hele mai ka poʻe ʻaneʻane make ma ka ʻāina ʻo ʻAsuria, a ʻo ka poʻe i puehu ʻia ma ka ʻāina ʻo ʻAigupita, a e hoʻomana lākou iā Iēhova, ma ka mauna hoʻāno ma Ierusalema.

IOʻELA 2:11

A e hoʻopuka mai ʻo Iēhova i kona leo i mua o kona kaua; No ka mea, ua nui loa kona wahi i hoʻomoana ai; No ka mea, ua ikaika ka mea nāna e hoʻokō i kāna ʻōlelo; No ka mea, ua nui ka lā o Iēhova, a me ka weliweli nui; A ʻo wai lā ke hoʻomanawanui ia mea?

ZEKARIA 4:7

‘He aha ʻoe, e ka mauna nui? I mua o Zerubabela, he pāpū; a e lawe mai auaneʻi ʻo ia i ka pōhaku kumu, me ka hoʻokani ʻoliʻoli ʻana, “He aloha! He aloha iā ia!”’”

ZEKARIA 9:14

A e ʻikea auaneʻi ʻo Iēhova ma luna o lākou, A e lele aku kona pua e like me ka uila; A e hoʻokani ʻo Iēhova ka Haku i ka pū, A e hele aku nō ia i loko o nā makani ʻino o ke kūkulu hema.

ZEKARIA 9:9

E hauʻoli nui, e ke kaikamahine o Ziona, E hoʻōho ʻoliʻoli, e ke kaikamahine o Ierusalema; Aia hoʻi, e hele mai ana kou aliʻi i ou lā; He hoʻopono, a he hoʻōla nō kona; He akahai nō, a e noho ana ma luna o ka hoki, ʻo ke keiki hoʻi a ka hoki.

KA BUKE ʻAHĀ A MOSE, I KAPA ʻIA NĀ HELU 23:21

“ʻAʻole ia i ʻike i ka hewa i loko o kā Iakoba, ʻAʻole hoʻi ʻo ia i ʻike i ke kekeʻe i loko o kā ʻIseraʻela. Me ia nō ʻo Iēhova ʻo kona Akua, I waena hoʻi o lākou ka hoʻōho aliʻi.

KA ʻEUANELIO I KĀKAU ʻIA AI E MATAIO 16:27

“E hele mai nō ke Keiki a ke Kanaka i loko o ka nani o kona Makua me kona poʻe ʻānela; a laila ‹e uku aku ia i kēlā kanaka i kēia kanaka e like me kāna hana ʻana›.

KA ʻEUANELIO I KĀKAU ʻIA AI E MATAIO 16:28

“He ʻoiaʻiʻo kaʻu e ʻōlelo aku nei iā ʻoukou, ʻo kekahi poʻe e kū mai nei, ʻaʻole lākou e hoʻāʻo ʻē i ka make, a ʻike lākou i ke Keiki a ke Kanaka e hele mai ana i kona aupuni.”

KA ʻEUANELIO I KĀKAU ʻIA AI E MATAIO 25:31

¶ “Aia hiki mai ke Keiki a ke Kanaka me kona nani, a ʻo nā ʻānela a pau pū me ia; a laila, e noho ihola ma luna o kona noho aliʻi nani.

KA ʻEUANELIO I KĀKAU ʻIA AI E MATAIO 26:64

ʻŌlelo akula ʻo Iesū, “ʻO ia kāu i ʻōlelo mai. A ke ʻōlelo aku nei hoʻi au iā ʻoukou, ma hope aku nei, e ʻike nō ʻoukou i «ke Keiki a ke Kanaka e noho ana ma ka lima ʻākau o ka Mea Mana, a e hele mai ana ma luna o nā ao o ka lani».”

NĀ ʻOIHANA A KA POʻE LUNAʻŌLELO 1:11

ʻĪ maila hoʻi lāua, “E nā kānaka o Galilaia, no ke aha lā ʻoukou e kū nei e nānā aku ana i ka lani? ʻO Iesū nei, ka mea i lawe ʻia aku nei i ka lani, mai o ʻoukou aku nei, pēlā nō ia e hoʻi hou mai ai e like me kā ʻoukou ʻike ʻana aku iā ia e piʻi ana i ka lani.”

ʻO KA ʻEPISETOLE MUA A PAULO KA LUNAʻŌLELO I KO KORINETO 15:18

A laila, ua make ka poʻe i moe i loko o Kristo.

ʻO KA ʻEPISETOLE MUA A PAULO KA LUNAʻŌLELO I KO KORINETO 15:20

¶ Akā, ua ala ʻiʻo nō ʻo Kristo, mai ka make mai, a ua lilo ʻo ia i hua mua o ka poʻe i moe.

ʻO KA ʻEPISETOLE MUA A PAULO KA LUNAʻŌLELO I KO KORINETO 15:23

ʻO kēlā mea kēia mea, ma kona wā pono; ʻo Kristo ka hua mua; a laila, ʻo ko Kristo poʻe, i kona wā e hiki mai ai.

ʻO KA ʻEPISETOLE MUA A PAULO KA LUNAʻŌLELO I KO TESALONIKE 1:10

a e kali hoʻi i kāna Keiki, mai ka lani mai, āna i hoʻāla mai ai, mai ka make mai, iā Iesū, nāna kākou e hoʻopakele i ka inaina e kau mai ana.

ʻO KA ʻEPISETOLE MUA A PAULO KA LUNAʻŌLELO I KO TESALONIKE 3:11

¶ Na ke Akua ko kākou Makua, a me ko kākou Haku na Iesū Kristo mākou e alakaʻi pono aku i o ʻoukou lā.

ʻO KA ʻEPISETOLE LUA A PAULO KA LUNAʻŌLELO I KO TESALONIKE 1:7

a iā ʻoukou hoʻi ka poʻe i hoʻopōʻino ʻia, i ka hoʻomaha pū me mākou, i ka wā e hōʻike ʻia mai ai ʻo ka Haku ʻo Iesū, mai ka lani mai, me kona poʻe ʻānela mana,

ʻO KA ʻEPISETOLE LUA A PAULO KA LUNAʻŌLELO I KO TESALONIKE 2:1

¶ Ke nonoi aku nei mākou iā ʻoukou, e nā hoahānau, no ka hiki ʻana mai o ko kākou Haku ʻo Iesū Kristo, a me ko kākou ʻākoakoa ʻana aku i ona lā;

ʻO KA ʻEPISETOLE HOʻOLAHA ʻALUA A PETERO 3:10

Akā, e hiki mai auaneʻi ka lā o ka Haku, me he ʻaihue lā i ka pō; a laila e lilo nō ka lani me ka halulu nui, a e wela hoʻi nā kumu mua, a heheʻe wale, a e pau nō ka honua nei i ke ahi, a me nā mea a pau i hana ʻia ma luna iho.

ʻO KA ʻEPISETOLE HOʻOLAHA A IUDA 1:9

Akā hoʻi, ʻo Mikaʻela ka luna ʻānela, i kona wā i hakakā ai me ka diabolō me ka hoʻopaʻapaʻa ʻana aku no ke kino o Mose, ʻaʻole ia i ʻaʻa e hāʻiliʻili aku iā ia, akā, i ʻōlelo wale nō ia, “E pāpā mai ka Haku iā ʻoe!”

KA HŌʻIKE ʻANA A IOANE KA HAIPULE 1:10

A i ka lā o ka Haku, hihiʻo nō wau i ka ʻUhane, a lohe ihola i ka leo nui ma hope oʻu, e like me ko ka pū puhi,

KA HŌʻIKE ʻANA A IOANE KA HAIPULE 1:7

«Aia hoʻi ke hele maila ia me nā ao»; a e ʻike aku nā maka a pau iā ia, a ʻo ka poʻe hoʻi nāna ia i ʻō aku; a iā ia nō e uē ai nā ʻohana a pau o ka honua. ʻO ia, ʻĀmene.

KA HŌʻIKE ʻANA A IOANE KA HAIPULE 14:13

¶ Lohe akula au i ka leo, mai ka lani mai, ʻī maila, “E palapala ʻoe, ‘Pōmaikaʻi ka poʻe make, ke make i loko o ka Haku, ma kēia hope aku!’” “He ʻoiaʻiʻo,” wahi a ka ʻUhane, “i hoʻomaha lākou i ko lākou luhi; a ke hahai nei nō hoʻi kā lākou mau hana me lākou.”

KA HŌʻIKE ʻANA A IOANE KA HAIPULE 8:13

¶ Nānā akula au, a lohe akula i kekahi ʻānela e lele ana ma waena o ka lani, e hea ana me ka leo nui, “Auē, auē, auē, i ka poʻe e noho lā ma ka honua, no nā kani ʻana i koe o ka pū o nā ʻānela ʻekolu i mākaukau e hoʻokani mai!”

KA HŌʻIKE ʻANA A IOANE KA HAIPULE 8:2

A ʻike akula au i nā ʻānela ʻehiku, ka poʻe i kū i mua o ke Akua; a ua hāʻawi ʻia mai iā lākou ʻehiku pū puhi.