Yoelĩ 2:13 - AMASAKO ABOYTRTRE WA NYAMUHANGA AWAKAHULAWA MO BIBLIA

¹³ Mũsatangaye emitima yenyũ, sĩmũsatangaye esyongimba syenyũ, mubindukire Omwami Mukulu Nyamuhanga wenyũ; kusangwa iye ni wʼeriganyira nʼowʼolukogo, isialihitana lũba, ĩnĩoswĩre omo bubuya bʼolwanzo, iniakayibindula siakole nabi.

Yoelĩ 2:13 Iomraidhean Croise

Enzũko 37:29

Neryo Rũbenĩ mwasuba oko buhya obo, nĩkwa Yosefũ isiali omo buhya. Neryo mwatulanga esyongimba siwe.

Enzũko 37:34

Neryo Yakobo mwatulanga esyongimba siwe, mwahĩra omulemba gʼomo mbindi yiwe, mwalira mugala wuwe ebiro bingi.

2 Samwelĩ 1:11

Neryo Dawĩdĩ mwawata omo ngimba siwe, mwatulangasyo; nʼabalume bosĩ ababya haguma naye mobayira batya.

1 Abami 21:27

Neryo omugulu Ahabũ owa ebĩnywa ebyo, mwasatangya esyongimba siwe, mwambala emisarandwe oko mubiri wuwe, mwatsira akalyo mwagotsera nʼemisarandwe, mwagenda nʼobũlĩge.

2 Abami 22:11

Neryo omwami abere abĩowa ebĩnywa byʼekitabu ekyo kyʼemigambo, mwasatangya esyongimba siwe.

2 Abami 22:19

kusangwa omutima wawe abya molo, kandi mowayĩkehĩrye embere syʼOmwami Mukulu omugulu gowa ebyo nabũga busana na hano, na busana nʼesyondũlanĩ syaho, ngoko hasyabya kĩma, nʼeritakira, kandi wabĩrĩsatangya esyongimba syawe, nʼeririra embere syage; Omwami Mukulu ati, Namakowa.

2 Abami 5:7

Neryo omwami wʼeĨsraelĩ abere abisoma ebarua, mwasatangya esyongimba siwe, ati, Ĩngye indi Nyamuhanga kwehĩ erĩĩta nʼerĩsũbya engebe, kyaleka omundu oyũ inianyitumira omundu erĩmũlamya kwʼebihaga biwe kwehĩ? Nĩkwa ngababwira, muminye, mulangire ngoko akanyisonda kʼomwaga.

2 Abami 6:30

Neryo omugulu omwami owa ebĩnywa byʼomũkalĩ, mwayitulangirako esyongimba siwe, nĩkwa abya iniakalaba endata oko lũhĩmbo; neryo abandu mobasamalira, neryo lebaya, iniabiriambala emisarandwe omwisi oko mubiri wuwe.

2 Emyatsi yʼEmigulu 6:27

neryo omo lubula, wowe, ubuyire amalolo wʼabagombe bawe, nʼawʼabandu bawe Abaĩsraelĩ, omugulu ũkakangĩrĩrayabo enzira yowene eyo bangalolamo; ũwĩsaye embũla oko kihugo kyawe ekyo wabiriha abandu bawe mo ndagano.

Nehemĩa 9:17

Mobagana erihulikirira, kandi mobatetibuka emĩbĩrĩ yʼeriswekera yawe eyo wakola omo katĩkatĩ kabo, nĩkwa mobakala, nʼomwʼihona lyabo mobayĩhĩrĩra omukulu bati basube omo bukobe bwabo eMĩsĩrĩ. Nĩkwa uwe uli Nyamuhanga wʼeribuyira, owʼeriganyira nʼowʼolukogo, sulihitana lũba, uwite obubuya bwʼolwanzo lunene, kandi mutetasĩganĩabo.

Yobũ 1:20

Neryo Yobũ mwahangana, mwasatya ekanzu yiwe, mwasĩsa omutwe wuwe, mwawa ahisi oko kitaka, mwaramya.

Esyonyimbo 103:8

Omwami Mukulu ni wʼeriganyira nʼowʼolwanzo, Sialihitana lũba, kandi ni wʼolwanzo olutyusa.

Esyonyimbo 106:45

Busana nʼomwatsi wabo mwibuka erilaga liwe, Mwasuba oko mutima wuwe, busana nʼolwanzo luwe lunene.

Esyonyimbo 34:18

Omwami Mukulu ali hakũhĩ nʼabʼemitima ĩbũnangĩkĩre, Akalamaya abatawite amaha.

Esyonyimbo 51:17

Amahere wage, Nyamuhanga, nĩ kĩrĩmũ ekĩkowa; Uwe Nyamuhanga, siwendigana omutima owakowa nʼowʼerikenga.

Esyonyimbo 86:15

Nĩkwa uwe Mukama, uli Nyamuhanga wʼeriganyira, nʼowʼolwanzo. Sulihitana lũba, uli wʼobwenge ebiro byosĩ, Suliregula.

Esyonyimbo 86:5

Uwe Mukama, uli mubuya, kandi ukabwira, Woswĩre mwʼolwanzo olutyusa busana nʼabosĩ abakakulakira.

Ĩsaya 57:15

Kusangwa Oyuli wʼendata nʼoyũyĩsũmbĩre, oyukakota kera na kera, erĩna liwe lĩbũyĩrĩre, yũkabũga ati, Nyĩkere ahʼendata nʼahabũyĩrĩre, kandi nyĩkere haguma nʼoyuli nʼekĩrĩmũ kyolo-kyolo nʼerĩyĩkehya, nyitoke erĩsũbya ekĩrĩmũ kyʼerĩyĩkehya nʼerĩsũbya omutima wʼoyũkwĩre obũlĩge.

Ĩsaya 58:5

Ko ni ʼtsira akalyo ngʼeritsira eryo nabiriyisoga kwehĩ? Ekiro busana nʼomundu erĩyĩkehya kwehĩ? Nĩ ũnamya omutwe wuwe ngʼerĩsesa, kutse erisanza emisarandwe nʼerĩbũ ngʼengyingo kwehĩ? Mwasyahula erĩ mwʼitsira akalyo, nʼekiro kyʼerĩsĩmwa nʼOmwami Mukulu kwehĩ?

Ĩsaya 66:2

Kusangwa ebyala byage byo byakola ebĩ byosĩ, nʼebindu ebĩ byosĩ mobyabyaho bitya, Omwami Mukulu atya. Nĩkwa nasyasamalira omundu oyũkayĩkehaya nʼowʼekĩrĩmũ kihehere, nʼoyukatitimana busana nʼekĩnywa kyage.

Yeremĩa 36:7

Kwamũhwa erisaba lyabo lyasyahĩka embere syʼOmwami Mukulu, nʼobuli mundu iniabindula omutima erireka enzira nyibi yiwe, kusangwa erihitana nʼeriagalirwa nĩ rĩnene kutsibu, eryo Mwami Mukulu abĩrĩbũga busana nʼabandu aba.

Yeremĩa 41:5

neryo mohahĩka bandu makũmĩ munani bakalũa eSekemũ, nʼeSĩlo nʼeSamarĩa, ĩbabĩrĩsĩsa esyonderũ syabo nʼesyongimba sĩsatĩkĩre, ibabiriyibandanga, ibanawite omo byala byabo amahere wʼeyĩsyano nʼobukwa, eriretabyo oko nyũmba yʼOmwami Mukulu.

Yeremĩa 42:10

Mwamĩkala omo kihugo kino, neryo nasyabahĩmba, butsira erĩbahĩmbũla, kandi nasyabahanda butsira eribakunungula, kusangwa nasyayĩkakĩrya busana nʼerĩkwa eryo nabiribakolera.

Ezekĩelĩ 9:4

Neryo Omwami Mukulu mwamubwira ati, Ulabe omo mũyĩ, Ulabe omo Yerũsalema, ũhĩre ekiminyikalo omo syombũmo syʼabandu abakahumulikana nʼerĩsĩmba busana nʼesyonye syosĩ esikakolawa omo katĩkatĩ kago.

Hosea 14:1

Uwe Ĩsraelĩ, usube oko Mwami Mukulu Nyamuhanga wawe; kusangwa wabiriwa busana nʼebibi byawe.

Yona 3:9

Nindi wasĩ Nyamuhanga ngʼanganabinduka nʼeriyisubako, nʼerireka erihitana liwe lĩkalĩre, itutahera kwehĩ?

Yona 4:2

Neryo mwasaba Omwami Mukulu, ati, Ngakusaba uwe Mwami Mukulu, ekĩ si kyo nabũga, omugulu nabya inyikine omo kihugo kyʼewetu? Neryo, busana nʼeritindakola ekĩ monatibita eTarsisi, kusangwa nabya nyasĩ kʼuli Nyamuhanga. Owʼeriganyira, ko goswĩre nʼolukogo, isulihitana lũba, iguli wʼerisasira lingi, igukayisubako busana nʼobũhasya.

Mĩka 7:18

Nindi yo Nyamuhanga nga we, oyukabuyira ebibi, nʼerikiruka okwʼihona lyʼamasĩgalira wʼabandu buwe kwehĩ? Sialibika erihitana liwe kera na kera, kusangwa akatsemera obubuya bʼolwanzo.

Nahũmũ 1:3

Omwami Mukulu syalihitana lũba; ni wʼobũtokĩ bunene; Omwami Mukulu sĩendĩsyalekeranĩa eritindasuyira abʼomusango. Omwami Mukulu awite enzira yiwe omo kanyabungu nʼomo mutunzi, nʼebĩtũ nĩ lũtũtũ lwʼebisando biwe.

Emiganzo 14:18

Omwami Mukulu sialihitana lũba, kandi oswĩre nʼeriganyira, akabuyira ebibi nʼamalolo; kandi sĩendĩsyabalya nʼahake oyuli kʼomusango, erĩtũhũlya ebibi byʼabotata oko bana erĩhĩka oko ndengo syʼakasatu nʼesyʼakani.

AbanyaRoma 2:4

Kutse ukapona obubuya buwe bunene, nʼerisasira liwe, nʼeririndirira liwe kwehĩ? Sĩwasĩ ngoko bubuya bwa Nyamuhanga bũkakũkolaya okwʼibindula omutima nʼerireka ebibi kwehĩ?

AbanyaEfeso 2:4

Nĩkwa Nyamuhanga awite eriganyira ĩnene, nʼolwanzo luwe busana netu ni lunene.

1 Timoteo 4:8

Erĩyĩkala-kalya lyʼomubiri liwite omugaso muke, nĩkwa erĩyĩkala-kalya lyʼomutima omwʼikenga lya Nyamuhanga, liwite omugaso busana nʼemyatsi yosĩ, kusangwa likalaga engebe busana na lino, kandi busana nʼengebe eyikandisyasa.