Nehemĩa 9:16 - AMASAKO ABOYTRTRE WA NYAMUHANGA AWAKAHULAWA MO BIBLIA

¹⁶ Nĩkwa abotata wetu mobakola ibakayipipa, mobakalya ebĩkya byabo, mobatetowa ebihano byawe.

Nehemĩa 9:16 Iomraidhean Croise

2 Abami 17:14

Nĩkwa, mobagana erĩowa, mobakalya ebĩkya byabo, ngʼebĩkya byʼabotata wabo, abatĩkĩrĩraya Omwami Mukulu Nyamuhanga wabo.

2 Emyatsi yʼEmigulu 29:6

Kusangwa abotata wetu babĩrĩhalya, nʼerikola ebibi omo meso wʼOmwami Mukulu Nyamuhanga wetu, kandi babĩrĩmũsĩganĩa babirikebera ehandi erĩlũa oko herĩĩkala lyʼOmwami Mukulu, nʼerĩmũlolya kwʼemigongo.

2 Emyatsi yʼEmigulu 30:8

Na lino Simubye bʼebĩkya bĩkalĩre, ngoko abotata wenyũ babya; nĩkwa muyihe oko Mwami Mukulu, mwingire ahabũyĩrĩre huwe, aho ahigula busana na kera na kera, mukolere Omwami Mukulu Nyamuhanga wenyũ, erihitana liwe lĩkalĩre litoke erĩbalũako.

2 Emyatsi yʼEmigulu 36:13

Nibya mwahona oko mwami Nebũkadeneza, oyo wamũlahĩrĩsaya uku Nyamuhanga erĩmowa, nĩkwa mwakalya ebĩkya biwe, mwakalya omutima wuwe siabindukire Omwami Mukulu Nyamuhanga wa Ĩsraelĩ.

Nehemĩa 9:10

Kandi mowakangya ebitiko-tiko nʼebyʼeriswekera uku Farao, nʼoko bagombe buwe bosĩ, nʼoko bandu bosĩ bʼekihugo kiwe; kusangwa wabya wasĩ ngoko bakolabo nʼeriyipipa, kandi mowayibanira erĩna, ngoko liri mũnabwĩre.

Nehemĩa 9:29

Kandi mowahanabo, iwatoka erĩsũbyabo kandi oko migambo yawe. Nĩkwa mobakola omwʼĩyĩhamya, mobatahulikirira erihana lyawe, nĩkwa mobakola nabi oko nzwere syawe esyo mundu amakolasyo iniabyaho musyo, mobasumba ebitigo, nʼerĩkalya ebĩkya byabo, mobatanza erĩowa.

Esyonyimbo 106:6

Twabĩrĩhalya, ngoko aboso-kulu wetu bakola; Twabiribya babi nʼabʼebibi.

Esyonyimbo 81:8

Abandu bage, muhulikirire erihana lyage; Uwe Ĩsraelĩ, kumbe mukanyihulikirira!

Erĩlũayo 15:26

Neryo mwabwirabo ati, Mwamahulikirira omulenge wʼOmwami Mukulu Nyamuhanga wenyũ nʼomũhwa, kandi mwamakola ekitunganene omo meso wuwe, nʼeritega amatwĩ oko bihano biwe, nʼeribika emigambo yiwe yosĩ, sindiendĩsyabahĩra kwʼesyondwala nʼenguma, esyo nahĩra oko Banya Mĩsĩrĩ; kusangwa indi Mwami Mukulu oyũkakũlamaya.

Erĩlũayo 32:9

Neryo Omwami Mukulu mwabũga na Musa ati, Namalangira abandu aba, neryo lebaya, ni bandu bʼebĩkya bĩkalĩre;

Emĩsyo 29:1

Oyukakungawa ngendo nyingi ĩnĩakakalaya ebĩkya biwe Asyaherĩbwa lũba isihali bũbalya.

Ĩsaya 48:18

Kumbe wahulikirira ebihano byage! Neryo Obuholo bwawe nga bwabiribya ngʼolũsĩ, nʼeritunganene ryawe ngʼebisunda byʼomo ngetsi.

Ĩsaya 48:4

Kusangwa nyasĩ ngoko Ũkalĩre, nʼebĩkya byawe nĩ mũsĩsa wʼekyuma, nʼembũmo yawe ni mulinga.

Ĩsaya 63:10

Nĩkwa mobahona, mobagalĩranĩa Omũlĩmũ wuwe Abũyĩrĩre. Busana nʼekyo mwabinduka eribya nzĩgũ yabo, kandi mwalwa nabo.

Yeremĩa 19:15

Omwami Mukulu wʼemilondo, Nyamuhanga wa Ĩsraelĩ ati, Lebaya, nasyaletera omũyi oyũ nʼoko hĩyĩ hyosĩ hyago erĩkwa lyosi eryo nabiriahula busana nago, kusangwa babĩrĩkalya ebĩkya byabo sĩbowe ebĩnywa byage.

Yeremĩa 2:31

Uwe kihanda, mowe ekĩnywa kyʼOmwami Mukulu. Nabiribya mbwarara busana na Ĩsraelĩ kwehĩ? Kutse ekihugo kyʼomwĩrĩmya mungi kwehĩ? Busana nakĩ abandu bage bakabũga bati, Tuli nʼobwĩranda bwʼeriganga-ganga. Sĩtwendĩsyaswahĩka ukʼuwe?

Yeremĩa 7:26

Nĩkwa mobatanyowa, kutse eritega okũtũ kwabo, nĩkwa mobakongomĩa engoto yabo. Mobakola ebibi kwilaba abotata wabo.

Ezekĩelĩ 5:6

Nĩkwa abirihona oko bilayiro byage erikola ebibi kwilaba ebihanda, nʼerihona oko migambo yage kwilaba ebihugo ebĩtĩmbĩreko. Kusangwa babirigana ebilayiro byage, kandi emigambo yage sibetakwamayo.

Emibiri 7:51

Ĩnywe muli bandu bakalĩre! Muli batwenge omo mitima yenyũ, nʼamatwĩ wenyũ sĩalĩowa omwatsi wa Nyamuhanga. Kandi mukalwa nʼOmũlĩmũ Abũyĩrĩre ebiro byosĩ. Muli ngʼaboso-kulu wenyũ.

AbanyaRoma 2:5

Nĩkwa busana nʼobutsibu bʼomutima wawe owatebinduka, ukayibikira erihitana oko kiro ekyo kyʼerihitana lya Nyamuhanga nʼeritswera litunganene riwe lyasyabĩsũlwa.

Eryibuka Ebihano 31:27

Kusangwa nyĩnasĩ epono yenyũ, nʼebĩkya byenyũ bitegonda; lebaya, omugulu nyikineho haguma nenyũ mũnabwĩre, mwabiriyisamambula oko Mwami Mukulu; na kwilaba aho si kutsibu enyũma wʼerihola lyage kwehĩ?

Eryibuka Ebihano 32:15

Nĩkwa Yesũrũnĩ mwaneneha, mwalyata omwĩse. Mwabirineneha, mwabiritunahala, mwamatendera; Neryo mwasĩganĩa Nyamuhanga oyo wamũkengeregesanaya, Mwaserembula Erĩbwe ryʼerilama liwe.

Eryibuka Ebihano 5:29

Kumbe bali nʼomutima owali ngʼoyũ omwisi wabo, ibanyubaha, nʼerĩteya ebihano byage ebiro byosĩ omwatsi iniatoka erĩũwana busana nabo nʼabana babo kera na kera!

Eryibuka Ebihano 9:13

Kandi Omwami Mukulu mwambwira ati, Nabirilangira abandu aba ko ni bandu bʼengoto itegonda.

Eryibuka Ebihano 9:27

Wibuke abagombe bawe, Abrahamũ, Ĩsaka, na Yakobo; sulangire oko butsibu bwʼabandu aba, kutse ebibi byabo, kutse amalolo wabo.

Eryibuka Ebihano 9:6

Neryo muminye, Omwami Mukulu, Nyamuhanga wawe, kwʼatebaha ekihugo kibuya ekĩ erĩsĩgalyakyo busana nʼeritunganene ryenyũ; kusangwa muli kihanda kyʼengoto eyitegonda.

AbaEbrania 3:13

Nĩkwa mũsĩkanaye emitima omugulu bukinahulawa mũnabwĩre, hakasyabya omundu muguma omo katĩkatĩ kenyũ akatebĩbwa nʼebibi nʼerĩkalya omutima wuwe.

AbaEbrania 3:15

Ngoko Amasako akabũga ati, Mũnabwĩre mwamowa omulenge wuwe, Sĩmũkalaye emitima yenyũ ngʼomugulu bayisamambula uku Nyamuhanga.