Олӧм 41:42 - Коми Библия 2023

⁴² Фараон пӧрччис ассьыс чунькытшсӧ да чунькытшӧдіс Ӧсипӧс. Сэсся сетіс сылы шабді паськӧм, сьыліас ӧшӧдіс зарни сикӧтш.

Олӧм 41:42 Iomraidhean Croise

Олӧм 38:18

Иуда юаліс: «Мый тэныд сетны водзӧсӧн?» Ань шуис: «Ассьыд печатьтӧ, мый кӧв йылын, да ассьыд бедьтӧ, мый киад». Иуда сетіс да узис анькӧд, и ань кынӧмасис.

Олӧм 41:43

Фараон торйӧдіс Ӧсиплы ыджыд чина мортӧс новлӧдлан тарантас. Тшӧктіс, мед Ӧсиплӧн мунігас водзвылас горзасны: «Копыртчылӧй!» Тадзи фараон сувтӧдіс сійӧс веськӧдлыны став Египетӧн.

Эсфир 10:3

Иудей Мардокей вӧлі Артаксеркс ӧксы бӧрся медыджыд морт. Иудейяс пӧвстын Мардокей вӧлі пыдди пуктана да радейтана, ӧд сійӧ кӧсйис сӧмын бурсӧ аслас войтырлы да тӧждысис на вӧсна. [Мардокейлӧн висьталӧм: «Ставыс тайӧ вӧлі Енсянь. Тайӧ лоӧмторъяс йылысь вӧтӧй ставнас иніс, и ме ог вунӧд сійӧс. Ичӧт ва петанін лои юӧн. Вӧлі югыд, вӧлі шонді да уна ва. Юыс вӧлі Эсфир, кодӧс ӧксы босьтіс гӧтырӧ да пуктіс ӧксы-аньӧ. Кык гундырыс – тайӧ ме да Аман. Войтыръяс чукӧртчисны бырӧдны иудейясӧс, но менам Израиль войтырӧй шыасис Ен дінӧ да мездмис. Господь мездіс Ассьыс войтырсӧ, видзис миянӧс став лёксьыс. Енмыс петкӧдліс индысьпасъяс да вӧчис ыджыд шензьӧданаторъяс – татшӧмыс некор эз вӧвлы мукӧд войтыръяс пӧвстын. Енмыс лӧсьӧдіс Аслас войтырлы ӧтитор, мукӧд войтыръяслы – мӧдтор, тадзи Аманлысь пудъясьӧмсӧ бергӧдіс мӧдарӧ. Воис кад инны пудъясьӧмыслы, воис лун мыждыны Енлы войтыръясӧс. Енмыс эз вунӧд Ассьыс войтырсӧ, веськыда вӧчис Аслас бӧрйӧм войтырлы. Та вӧсна быд во нэмъяс чӧж адар тӧлысь дас нёльӧд да дас витӧд лунъясӧ Енлӧн Израиль войтыр мед чукӧртчас Ен водзӧ да гажӧдчас нимкодясьӧмӧн». Птоломейлӧн да Клеопатралӧн нёльӧд ӧксыалан воӧ Досифей да сылӧн Птоломей пиыс вайӧмаӧсь пурим йылысь тайӧ гижӧдсӧ Александрия карӧ. Шуӧны, мый Досифейыс вӧлӧма попӧн да левитӧн. Гижӧдсӧ вуджӧдіс Птоломейлӧн Лисимах пиыс, коді оліс Ерусалимын.]

Эсфир 3:10

Сэки ӧксы пӧрччис ассьыс чунькытшсӧ да сетіс сійӧс Агагсянь чужысь Аммедатлӧн Аман пилы, медым вынсьӧдны иудейясӧс бырӧдӧм йылысь тшӧктӧмсӧ.

Эсфир 3:12

Медводдза тӧлысьлӧн дас коймӧд лунӧ чукӧртісны ӧксылысь гижалысьясӧс. Аманлысь тшӧктӧмсӧ найӧ гижисны ӧксылӧн сатрапъяслы, [Индиясянь Эфиопияӧдз сё кызь сизим] ӧксыув муын юралысьяслы да войтыръяслӧн веськӧдлысьяслы. Гижӧдсӧ дасьтісны ӧксыув муясын олысьяслӧн шыпасъясӧн да быд войтырлӧн чужан кыв вылын. Сійӧс вӧлі гижӧма Артаксеркс ӧксы нимсянь да вынсьӧдӧма ӧксылӧн чунькытш пасӧн.

Эсфир 8:10

Мардокей гижис Артаксеркс ӧксы нимсянь, вынсьӧдіс гижӧдсӧ ӧксылӧн чунькытшнас да ыстіс сійӧс верзьӧмаяскӧд ӧксылӧн медбур вӧвъяс вылын.

Эсфир 8:15

Кор Мардокей петіс ӧксы дінысь, сы вылын вӧлі ӧксылӧн еджыд да гӧрдовлӧз рӧма паськӧм, вӧсни шабдіысь пемыдгӧрд кышан, юр вылас ыджыд зарни юркытш. Суза карын олысьяс гажӧдчисны да нимкодясисны.

Эсфир 8:2

Ӧксы пӧрччис чунькытшсӧ, мый бӧр босьтіс Аманлысь, да сетіс сійӧс Мардокейлы. А Эсфир пуктіс Мардокейӧс веськӧдлыны Аман овмӧсӧн.

Эсфир 8:8

Ті асьныд гижӧй иудейяс йылысь тшӧктӧм, кутшӧм тіянлы колӧ. Гижӧй сійӧс ӧксы нимсянь да ӧксылӧн чунькытшнас пуктӧй вынсьӧдана пас. Ӧксы нимсянь гижӧм да ӧксы чунькытшӧн вынсьӧдӧм гижӧдсӧ некод вежны оз вермы».

Псалтыр 73:6

Черъясӧн да пыридзьясӧн найӧ жуглісны крамысь став серпасалӧмторсӧ.

Шусьӧгъяс 1:9

Налӧн велӧдӧмыс – тэнад юр вылӧ пуктӧм мича юркытш кодь, сьылітӧ мичмӧдысь сикӧтш кодь.

Шусьӧгъяс 31:22

Ачыс шебрасъяс вурӧ, шабді дӧраысь да пемыдгӧрд вурунысь паськӧмсӧ лӧсьӧдӧ.

Шусьӧгъяс 31:24

Бур гӧтыр вурӧ да вузалӧ дӧрӧмъяс, ханаанса вузасьысьяслы вайӧ вӧньяс.

Сьылан 1:10

Ми вӧчам тэныд зарни сикӧтш, эзысь чиръясӧн сійӧс мичмӧдам. (Ныв:)

Сьылан 4:9

Тэ пӧлӧнитін менсьым сьӧлӧмӧс, чоюкӧй-гӧтырпуӧй, гусялін аслад ӧтчыд видзӧдлӧмӧн, аслад сикӧтш молльӧн.

Исай 3:23

Чӧскыд дук пыдди на дорысь кутас ӧвтны лёк дукӧн, вӧнь пыдди налы лоӧ гез, читкыля юрси пыдди – куш плеш, мича паськӧм пыдди – шогалан паськӧм, мичлун пыдди – юръяндзим.

Еремей 52:33

Еконей пӧрччис дзескыдінын пукалан паськӧмсӧ да пасьталіс мӧд паськӧм. Сійӧ кадсяньыс да олӧм помӧдзыс Еконей сёйис-юис вавилонса ӧксылӧн пызан сайын.

Езекиль 27:7

Тэнсьыд тӧвдӧратӧ вурӧма серлӧдлӧм дӧраысь, Египетысь вайӧм шабді дӧраысь, сійӧ – тэнад пасыд. Гӧрдовлӧз да пемыдгӧрд дӧраяс вайисны Элиша ді вылысь, наысь вӧчисны тэныд вевттьӧд-лэбувъяс.

Даниил 5:16

Но тэ йылысь ме кывлі, мый тэ верман гӧгӧрвоӧдны вӧтъяс да сьӧкыдлунъяс дырйи разьны гӧрӧдъяс. Тэ кӧ верман лыддьыны тайӧ гижӧмасӧ да гӧгӧрвоӧдны сійӧс, тэнӧ пасьтӧдасны пемыдгӧрд паськӧмӧ, сьыліад ӧшӧдасны зарни чеп, и тэ лоан менам муын чин серти коймӧд юралысьӧн».

Даниил 5:29

Та бӧрти Валтасарлӧн тшӧктӧм серти Даниилӧс пасьтӧдісны пемыдгӧрд паськӧмӧ, сьыліас ӧшӧдісны зарни чеп да юӧртісны, мый сійӧ лоӧ тайӧ муас чин серти коймӧд юралысьӧн.

Даниил 5:7

Ӧксы гораа горӧдіс, медым вайӧдісны сы дінӧ кимӧститчысьясӧс, калдеяса мывкыд йӧзӧс да пемӧс мускӧн тунасьысьясӧс. Сійӧ шуис вавилонса тӧдысь-туналысьяслы: «Коді лыддяс да гӧгӧрвоӧдас стенмӧ гижӧмасӧ, сійӧс пасьтӧдасны пемыдгӧрд паськӧмӧ, сьыліас ӧшӧдасны зарни чеп, и сійӧ лоӧ менам муын чин серти коймӧд юралысьӧн».

Лука 15:22

Батьыс тшӧктас кесйӧгъясыслы: ”Вайӧй медбур паськӧмсӧ да пасьтӧдӧй менсьым пиӧс, чунькытшӧдӧй да кӧмӧдӧй сійӧс.

Ӧксыяслӧн 1 небӧг 18:4

Ионафан пӧрччис кышансӧ да сетіс сійӧс Давидлы. Сетіс тшӧтш мукӧд тышкасян паськӧмсӧ, ассьыс шыпуртсӧ, ньӧввужсӧ да коскытшсӧ.