Эсфир 5:2 - Коми Библия 2023

² Ӧксы нюжӧдіс Эсфирлань зарни бедьсӧ, мый киас кутіс. Эсфир матыстчис да инмӧдчыліс бедь помас. [Ӧксы инмӧдліс бедьсӧ Эсфирлы сьыліас, окыштіс сійӧс да шуис: «Висьтав, мый тэкӧд?» Эсфир шуис: «Ыджыдӧй, кор ме видзӧдлі тэ вылӧ, тэ вӧлін Ен андел кодь. Тэнад дзирдалӧмысь полӧмӧйла ме шӧйӧвоши. Ыджыдӧй, тэ шензьӧдана! Тэнад чужӧм вылын тыдалӧ ыджыд буралӧм». Сёрнитігкостіыс Эсфир лигышмуніс да усис. Ӧксы шӧйӧвошис. Ӧксылӧн кесъялысьяс ставныс пондісны отсавны Эсфирлы.]

Эсфир 5:2 Iomraidhean Croise

Олӧм 32:28

Мӧдыс шуис: «Ӧнісянь тэнад нимыд оз ло Яков, а Израиль, ӧд тэ вермасин Енкӧд да йӧзкӧд, и вермин».

Неемий 1:11

Кевма Тэныд, Господьӧй, копырт пельтӧ Аслад кесйӧглань! Кыв менсьым да став Аслад кесйӧглысь кевмӧмсӧ, ӧд ми кӧсъям вежавидзны Тэысь. Талун отсав меным, Аслад кесйӧглы, сійӧн, мый ӧксы лоас бур сьӧлӧма ме дінӧ». Сійӧ кадас ме вӧлі ӧксылӧн вина кисьталысьӧн.

Эсфир 2:9

Эсфир дінӧ Гегай вӧлі бур сьӧлӧма. Сійӧ дзик пыр сетіс Эсфирлы чӧскыд дука мавтасъяс да сёян-юан. Ӧксы керкаысь Гегай вайӧдіс Эсфирлы сизим бӧрйӧм кесйӧг аньӧс да овмӧдіс найӧс Эсфиркӧд аньяслӧн керкаӧ, сэтчӧс медбур жыръясӧ.

Эсфир 4:11

«Ставныс, кодъяс кесъялӧны ӧксылы, да став войтырыс, кодъяс олӧны сылӧн муын, тӧдӧны, мый быдӧнӧс, айуловӧс и аньӧс, коді кортӧг пырас ӧксы дінӧ пытшкӧс йӧрас, виччысьӧ кулӧм. Но ӧксы кӧ нюжӧдас пырысьлань зарни бедьсӧ, сійӧ ловйӧн коляс. А менӧ ӧксы комын лун нин эз корлы ас дінас».

Эсфир 8:4

Ӧксы нюжӧдіс зарни бедьсӧ Эсфирлань. Эсфир чеччис да сувтіс ӧксы водзӧ.

Псалтыр 116:1

Ошкӧй Господьӧс, войтыръяс, ыдждӧдлӧй Сійӧс, став мувывса йӧз!

Шусьӧгъяс 21:1

Ӧксылӧн сьӧлӧмыс Господь киын визувтысь ва кодь, Господь веськӧдӧ сійӧс, кытчӧ кӧсйӧ.

Ап. уджъяс 10:4

Повзьӧмпырысь андел вылӧ видзӧдлӧмӧн Корнилий шуис: «Мый, Ыджыдӧй?» Андел шуис сылы: «Енмыс кылӧма тэнсьыд кевмысьӧмтӧ да аддзӧма гӧльяслы отсасьӧмтӧ.

Ап. уджъяс 7:10

да дорйис сійӧс быд сьӧкыдыс дырйи. Енмыс сетіс Ӧсиплы ыджыд мывкыдлун, та вӧсна сійӧ сьӧлӧм вылас воис фараонлы, египетса ӧксылы. Фараон весиг пуктіс сійӧс веськӧдлыны Египетӧн да аслас став овмӧсӧн.