Еремей 39:4 - Коми Библия 2023

⁴ Найӧс аддзигӧн иудаса Седекей ӧксы да сылӧн тышкайӧзыс пышйисны. Войнас найӧ петісны карсьыс дзиръяӧд, мый вӧлі кыкпӧвста стенмас ӧксылӧн сад дорын. Седекей ӧксы аслас йӧзкӧд мӧдӧдчис Йӧрдан ковтыслань.

Еремей 39:4 Iomraidhean Croise

2 Каднебӧг 32:5

Езекей повтӧг босьтчис уджӧ. Сійӧ выльысь кыпӧдіс жугалӧм карса стен, сувтӧдіс стен вылӧ башняяс, карса стен ортсыладорас кыпӧдіс мӧд стен. Сійӧ зумыдмӧдіс Милло, Давид карлысь юкӧнсӧ. Сійӧ вӧчӧдіс уна сайӧд да шы.

Исай 22:11

Кык стен костӧ ті вӧчинныд ва видзанін, медым чукӧртны сэтчӧ важ йӧртӧдысь васӧ. Но ті энӧ кыпӧдӧй синнытӧ Сы вылӧ, коді вӧчӧ тайӧс, энӧ видзӧдӧй Сы вылӧ, коді водзысяньыс вӧлі мӧвпыштӧма та йылысь.

Исай 22:3

Тэнад веськӧдлысьясыд ӧтвылысь пышйисны ньӧвъясысь, но найӧс кутісны. Найӧ ылӧдз пышйисны, но найӧс аддзисны да кӧртавлісны.

Исай 29:2

Ме дзескӧда Ариэл карӧс, сэні лоӧ бӧрдӧм да шогсьӧм, сійӧ збыльысь лоӧ Менам висьпуктанінӧн.

Еремей 32:4

Иудаса Седекей ӧксы оз мын калдеяса тышкайӧзлӧн киысь. Сійӧс збыльысь лоӧ сетӧма вавилонса ӧксы киӧ. Сылы ковмас аддзысьны да сёрнитны вавилонса ӧксыкӧд.

Еремей 32:5

Навукодоносор нуӧдас Седекейӧс Вавилонӧ. Седекей лоӧ сэні сэтчӧдз, кытчӧдз Ме ог бурсьӧлӧмтчы сы дінӧ, – висьталӧ Господь. – Ті кутанныд тышкасьны калдеяса тышкайӧзкӧд, но онӧ вермӧй найӧс”».

Езекиль 12:12

Накӧд тшӧтш юралысьныс босьтас нопсӧ пельпом вылас да петас карсьыс рытъя пемыднас. Карса стенмас сылы вӧчасны петан розь. Сійӧ тупкас чужӧмсӧ, медым оз аддзы мусӧ.

Езекиль 12:4

Луннас налӧн син водзын петкӧд кӧлуйтӧ, кутшӧмӧс босьтӧны пленӧ мунігӧн. А рытнас налӧн син водзын пленӧ босьтӧмаяс моз ачыд пет.

Левит 26:17

Ме тіянлы паныд сувта. Вӧрӧгныд вермас тіянӧс, мустӧмтысьныд кутас ыджыдавны тіян вылын. Ті котӧрӧн пышъянныд, кӧть вӧтӧдысьыс оз ло.

Левит 26:36

Тіян пӧвстысь ловйӧн кольӧмаяс кутасны овны вӧрӧглӧн муын. Сэні Ме тіян сьӧлӧмӧ пукта полӧм. Коръяслӧн кышакылӧмысь ті пышъянныд шыпуртысь моз да усянныд, кӧть вӧтӧдысьыс оз ло.

Амос 2:14

Тэрыба котралысь оз вермы пышйыны, вына морт эбӧссӧ воштӧ, повтӧм морт оз вермы мездыны асьсӧ.

Индӧд 28:25

Господь сетас вӧрӧгныдлы вермыны тіянӧс. Налы паныд ті мунанныд ӧти туйӧд, а пышъянныд наысь сизимлаӧд. Став войтыръяс повзясны сыысь, мый лоӧ тіянкӧд.