Еремей 34:16 - Коми Библия 2023

¹⁶ Но сэсся ті вежинныд ассьыныд шуӧмнытӧ да янӧдінныд Менсьым нимӧс – ті бӧр бергӧдінныд ассьыныд кесйӧгъяснытӧ, кодъясӧс налӧн кӧсйӧм серти лэдзинныд вӧля вылӧ. Кесйӧгъясӧс моз ті бара уджӧданныд найӧс.

Еремей 34:16 Iomraidhean Croise

Петӧм 20:7

Аслад Господь Енлысь нимсӧ весьшӧрӧ эн шуав, ӧд Господь оз коль мыждытӧг сійӧс, коді весьшӧрӧ шуалӧ Сылысь нимсӧ.

Еремей 34:11

Но бӧрынджык найӧ вежисны шуӧмнысӧ, бӧр бергӧдісны ассьыныс кесйӧгъяснысӧ, кодъясӧс водзынджык лэдзисны вӧля вылӧ, да уджӧдісны найӧс кесйӧгӧс моз.

Езекиль 13:22

Ылӧдлӧмнаныд ті шогӧдінныд веськыда олысьясӧс, кодъясӧс Ме эг кӧсйы шогӧдны. Ті ышӧданныд-ёнмӧданныд лёк вӧчысьясӧс, и найӧ оз бергӧдчыны лёк туйсьыныс, медым ловйӧн кольны.

Езекиль 18:24

Веськыда олысь кӧ кежас аслас веськыдлунысь да лёк вӧчысь моз пондас вӧчны зывӧксӧ, кутас-ӧ сійӧ овны? Сылысь веськыд уджъяссӧ лоӧ вунӧдӧма. Менӧ эновтӧм да мыж вӧчӧм вӧснаыс сійӧ кулас.

Езекиль 20:39

Господь Ыджыдыс тадзи висьталӧ: Израиль войтыр, ті кӧ онӧ кӧсйӧй Менсьым кывзысьны, мунӧй асланыд идолъяс дінӧ да юрбитӧй налы. Менсьым вежа нимӧс ті онӧ нин пежалӧй асланыд идолъясӧн да налы вайӧм козинъясӧн.

Езекиль 3:20

Веськыда олысь кӧ кежас веськыдлунысь да кутас вӧчны лёксӧ, сэки Ме потшӧсала сылысь туйсӧ, и сійӧ крукасяс да кулас. Тэ кӧ он ӧлӧд сійӧс, сійӧ аслас мыж вӧсна кулас, и сылысь веськыдлуна олӧмсӧ лоӧ вунӧдӧма. Сылӧн вирысь Ме водзӧс перъя тэнсьыд.

Езекиль 39:7

Аслам Израиль войтыр пӧвстын Ме восьта Ассьым вежа нимӧс и водзӧ ог лэдз янӧдны сійӧс. Сэки войтыръяс тӧдмаласны, мый Ме – Господь, Израильлӧн вежа Ен.

Левит 19:12

Менам нимӧн пӧръясьӧмӧн энӧ сетӧй кывнытӧ, медым энӧ янӧдӧй Менсьым нимӧс. Ме – Господь, тіян Енныд.

Малакий 1:12

А ті янӧданныд Менсьым нимӧс, кор нинӧмӧ пуктанныд Господьлысь пызансӧ, вись пыдди ваянныд сэтчӧ шогмытӧм сёян.

Малакий 1:7

Ті ваянныд Менам висьпуктанін вылӧ пеж нянь. Ті юаланныд: «Мыйӧн ми увтыртам Тэнӧ?» Ті нинӧмӧ пуктанныд Господьлысь висьпуктанінсӧ.

Ӧксыяслӧн 1 небӧг 15:11

«Ме чорыда жалита, мый пукті Саулӧс ӧксыӧ. Сійӧ бергӧдчис Меысь да эз вӧч Менам тшӧктӧм серти». Самуил шогӧ усис. Войбыд сійӧ кевмысис Господьлы.