Еремей 30:15 - Коми Библия 2023

¹⁵ Мыйла тэ ойзан аслад дойыд вӧсна, бурдлытӧм висьӧмыд вӧсна? Тэ вывті уна лёксӧ вӧчин, тэнад мыжъясыд лыдтӧм-тшӧттӧмӧсь, та вӧсна Ме вӧчи тэныд тадзисӧ.

Еремей 30:15 Iomraidhean Croise

Ездра 9:13

Ми ёна сьӧкыдалім лёк уджъясным да ыджыд мыжным вӧсна. Но Тэ, миян Енмӧй, чорыда мыждӧм пыдди бурсьӧлӧмтчин миян дінӧ да мездін тайӧ коляс войтырсӧ.

Иов 34:29

Енмыс кӧ чӧв ланьтас, коді вермас мыжавны Сійӧс? Енмыс кӧ вевттяс чужӧмбансӧ, коді вермас аддзыны Сійӧс? Сійӧ ыджыдалӧ войтыр вылын и торъя морт вылын,

Иов 34:6

ме пӧ збыльсӧ висьтала, но менӧ лыддьӧны пӧръясьысьӧн, менам пӧ абу мыжыс, но дойӧй менам оз бурд.

Исай 1:6

Юрсянь кок пыдӧсӧдзныд абу дзониныс: гӧгӧр дой, лӧзӧдӧм да орзьӧм. Найӧс абу весалӧма, абу кӧрталӧма, абу мавтӧма выйӧн.

Исай 5:2

Сійӧ потшис йӧрсӧ, весаліс мусӧ изъясысь да пуктіс сэтчӧ медбур виноград пуяс. Йӧр шӧрас лэптіс башня, вӧчис виноград пычкан гу да кутіс виччысьны вотӧс кисьмӧмсӧ. Но чӧскыд вотӧс пыдди воис курыд вотӧс.

Еремей 11:13

Мыйта Иуда муын карыс, сы мында Иуда войтырлӧн и енмыс. Мыйта Ерусалимын уличыс, сы мында жӧ висьпуктанін сувтӧдісны олысьясыс, медым сотны висьяс зывӧк Вааллы.

Еремей 15:18

Мыйла менам сьӧлӧмӧй пыр висьӧ, мыйла оз бурд менам дойӧй? Тэ лоин меным косьмӧм ва петанінӧн, мый ылӧдлӧ юны кӧсйысьӧс.

Еремей 2:19

Тэнад лёк вӧчӧмыд мыждас тэнӧ асьтӧ, Менӧ эновтӧмысь тэнӧ лоӧ чирыштӧма. Сідзкӧ, тӧд да гӧгӧрво, кутшӧм курыд шог тэнӧ суас сыысь, мый тэ эновтін Господьӧс, ассьыд Ентӧ, мый тэ пытшкын Меысь полӧмыс абу, – висьталӧ Ыджыдыс, Господь Саваоф.

Еремей 30:12

Господь тадзи висьталӧ: – Тэнад дойыд оз бурд, тэ чорыда доймалӧмыд.

Еремей 30:14

Став тэнад ёртъясыд вунӧдісны тэнӧ, найӧ оз тӧждысьны тэ вӧсна. Вӧрӧг моз Ме пасьварті тэнӧ, чорыда мыжді тэнӧ уна лёк вӧчӧмсьыд, лыдтӧм-тшӧттӧм мыжъяссьыд.

Еремей 30:16

Но тэнӧ бырӧдысьясӧс лоӧ бырӧдӧма, тэнӧ дзескӧдысьясӧс лоӧ нуӧдӧма пленӧ, тэнсьыд мырддялысьяслысь лоӧ мырддьӧма, тэнӧ куштысьясӧс Ме кушта.

Еремей 30:17

Ме сета тэныд бурдӧмсӧ, Ме бурдӧда тэнсьыд дойястӧ, – висьталӧ Господь. – Тэнӧ шулісны эновтӧмаӧн, Сионӧн, код вӧсна некод оз тӧждысь.

Еремей 46:11

Египет ныв, мун Галаадӧ, вай сэтысь бурдӧдчан вый. Но весьшӧрӧ тэ дасьтан бурдӧдчанторъяс, тэнад дойыд оз бурд.

Еремей 6:13

Ичӧтсянь гырысьӧдз – ставныс ылӧдлӧмӧн озырмӧдчӧны, пророкъяс и попъяс – ставныс пӧръясьӧны.

Бӧрданкыв 1:5

Дзескӧдысьяс ыджыдалӧны Сион вылын, мустӧмтысьяс гажаа олӧны. Сионлӧн уна мыж вӧсна Господь ыстіс сылы шог. Сылысь челядьсӧ нуӧдісны пленӧ, дзескӧдысьяс вӧтлісны найӧс водзвыланыс.

Бӧрданкыв 2:13

Мый меным шуны тэныд, Ерусалим нылӧй, мыйӧн ӧткодявны тэнӧ? Кодкӧд ӧткодявны тэнӧ, Сион нылӧй, медым бурӧдны тэнӧ? Тэнад дойыд саридз кодь ыджыд – коді вермас бурдӧдны тэнӧ?

Бӧрданкыв 3:39

Мыйла нӧ, сідзкӧ, элясьӧ ловъя мортыс? Сійӧ ӧд сьӧкыдалӧ аслас мыж вӧсна.

Бӧрданкыв 4:13

Тайӧ лои пророкъяслӧн мыж вӧсна, попъяслӧн лёк вӧчӧм вӧсна, ӧд Ерусалим карын найӧ кисьтісны веськыда олысьяслысь вирсӧ.

Микей 1:9

Самариялӧн дойыс бурдлытӧм, сійӧ вуджас Иуда муӧдз, менам войтырлӧн дзиръяӧдз, воас Ерусалим карӧдз.

Микей 7:9

Ме мыжа Господь водзын, та вӧсна меным колӧ нуны Сылысь скӧрлунсӧ, кытчӧдз Сійӧ оз видлав менсьым мыжӧс да оз бурсьӧлӧмтчы ме дінӧ. Сэки Сійӧ петкӧдас менӧ югыдас, и ме аддза Сылысь веськыдлунсӧ.

Наум 3:19

Тэнсьыд дойястӧ некод оз бурдӧд, найӧ ёна висьӧны. Тэ йылысь юӧрсӧ кылысьяс кутасны клопайтны, ӧд унаӧн тӧдлісны тэнсьыд куслытӧм скӧрлунтӧ.