ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 1:2 - ಕೊಡವ ಬೈಬಲ್

² ನಂಗಡ ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ, ಕರುಣೆ ಪಿಂಞ ಸಮಾದಾನ ಕ್‍ಟ್ಟಡ್.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 1:2 Iomraidhean Croise

ಮತ್ತಾಯ 25:34

ಅಕ್ಕ ರಾಜ ತಾಂಡ ಬಲ್‌ತೆ ಬರಿಲ್ ಉಳ್ಳ ಜನಳ ನೋಟಿತ್: ನಾಡ ಅಪ್ಪಂಡ ಆಶೀರ್ವಾದ ಪಡ್ಂದಯಿಂಗಳೇ ಬಾರಿ, ಈ ಲೋಕ ಸೃಷ್ಟಿ ಆಪಕ್ ಮಿಂಞ ತಯಾರ್ ಮಾಡ್‍ನ ನಿಂಗಡ ರಾಜ್ಯತ್‍ನ ಎಡ್‌ತೊಳಿ.

ಮತ್ತಾಯ 25:46

ಅಕ್ಕ ಈಂಗ ನಿತ್ಯ ಶಿಕ್ಷೆಕು, ನೀತಿವಂತಯಿಂಗ ನಿತ್ಯ ಜೀವಕು ಪೋಪ.

ಮಾರ್ಕ 10:17

ಯೇಸು ಅಲ್ಲಿಂಜ ಪೋಪಕ್ ಪೊರಟತ್. ಪೋಯಂಡಿಪ್ಪಕ ಒರ್ ಮನುಷ್ಯ ಓಡಿ ಬಂದಿತ್ ಅಂವೊಂಡ ಮಿಂಞಕ್ ಮೊಣಕಾಲ್ ಇಟ್ಟಿತ್; ನಲ್ಲ ಉಪಾದ್ಯನೇ, ನಿತ್ಯ ಜೀವ ಕ್‍ಟ್ಟ್‌ವಕ್ ನಾನ್ ಎಂತ ಮಾಡಂಡೂಂದ್ ಕ್‍ೕಟತ್.

ಮಾರ್ಕ 10:30

ಈ ಬದ್‌ಕ್‌ಲೇ, ದೇವಡ ವಿಷಯಕಾಯಿತ್ ಕಷ್ಟತ್‍ರ ಕೂಡೆ ಅಂವೊಂಗ್ ನೂರ್‌ರಚ್ಚಕ್ ಜಾಸ್ತಿ ಮನೆಮಠ, ಅಣ್ಣತಮ್ಮಣಂಗ, ಅಕ್ಕತಂಗೆಯ, ಅಪ್ಪವ್ವ, ಮಕ್ಕ, ತೋಟ ಬೇಲ್ ಎಲ್ಲಾ ಕ್‍ಟ್ಟುವ ಪಿಂಞ ಮಿಂಞತ್‍ರ ಲೋಕತ್‍ಲ್ ನಿತ್ಯ ಜೀವವು ಕ್‍ಟ್ಟ್‌ವಾಂದ್ ಎಣ್ಣ್‌ಚಿ.

ಯೋಹಾನ 10:28

ನಾನ್ ಅಯಿಂಗಕ್ ನಿತ್ಯ ಜೀವತ್‍ನ ತಪ್ಪಿ; ಅಯಿಂಗ ನಾಶ ಆಪದೇ ಇಲ್ಲೆ, ನಾಡ ಕೈಯಿಂಜ ದಾರ್ ಒಬ್ಬಂಗು ಅಯಿಂಗಳ ಬಲ್‍ಚಿತ್ ಎಡ್‌ತವಕ್ ಕಯ್ಯುಲೆ.

ಯೋಹಾನ 17:2

ನೀನ್ ಅಂವೊಂಗ್ ಎಲ್ಲಾ ಜನಡಮೇಲೆ ಅದಿಕಾರ ಕೊಡ್‍ತಿತುಳ್ಳಿಯ. ನೀಡ ಮೋಂವೊಂಗ್ ನೀನ್ ಕೊಡ್‍ತಿತುಳ್ಳ ಎಲ್ಲಾರ್‌ಕು ಅಂವೊ ನಿತ್ಯ ಜೀವತ್‍ನ ತಪ್ಪ.

ಯೋಹಾನ 17:24

ಅಪ್ಪಾ! ಲೋಕತ್‍ನ ಸೃಷ್ಟಿ ಮಾಡ್‌ವಕ್ ಮಿಂಞಲೇ ನೀನ್ ನಾಡಲ್ಲಿ ಪ್ರೀತಿಯಾಯಿತ್ ಇಂಜಗುಂಡ್, ನೀನ್ ನಾಕ್ ತಂದ ನಾಡ ಮಹಿಮೆನ, ನೀನ್ ನಾಕ್ ಕೊಡ್‍ತಯಿಂಗ ಕಾಂಬನೆಕೆ, ನಾನ್ ಎಲ್ಲಿ ಇಪ್ಪಿ, ಅಲ್ಲಿ ಅಯಿಂಗಳು ಇಪ್ಪಕ್ ನಾನ್ ಕುಶೀಲ್ ಉಳ್ಳ.

ಯೋಹಾನ 5:39

ನಿಂಗ ದೇವಡ ವಾಕ್ಯತ್‍ನ ಚಾಯಿ ಪಡಿಚಿತ್ ನೋಟಿ; ಅದ್‍ನಗುಂಡ್ ನಿಂಗಕ್ ನಿತ್ಯ ಜೀವ ಉಂಡ್‍ೕಂದ್ ನಿಂಗ ಗೇನಮಾಡಿಯಂಡುಳ್ಳಿರಲ್ಲ! ಅದೇ ನಾಡ ವಿಷಯತ್ ಸಾಕ್ಷಿ ಕೊಡ್‍ತಂಡುಂಡ್.

ಯೋಹಾನ 6:54

ನಾಡ ತಡೀನ ಉಂಡಿತ್, ನಾಡ ಚೋರೆನ ಕುಡಿಪಯಿಂಗಕ್ ನಿತ್ಯ ಜೀವ ಉಂಡ್; ಅಯಿಂಗಳ ನಾನ್ ಆಕೀರ್ ದಿವಸತ್‍ಲ್ ಎಪ್ಪುವಿ.

ಯೋಹಾನ 6:68

ಅಕ್ಕ ಸೀಮೋನ ಪೇತ್ರ: ಒಡೆಯನೇ, ನಿನ್ನ ಬುಟ್ಟಿತ್ ನಂಗ ದಾಡ ಪಕ್ಕ ಪೋಪೊ? ನೀಡ ಪಕ್ಕ ನಿತ್ಯ ಜೀವತ್‍ರ ವಾಕ್ಯ ಉಂಡಲ್ಲಾ?

ಅಪೊಸ್ತಲ 15:18

ಈ ಬೂಲೋಕ ಸೃಷ್ಟಿ ಆಪಕ್ ಮಿಂಞಲೇ, ಎಲ್ಲಾ ಎನ್ನನೆ ಆಪಾಂದ್ ಗೊತ್ತುಳ್ಳ ದೇವ ಇನ್ನನೆ ಎಣ್ಣ್‌ಚೀಂದ್ ಒಳ್‍ದಿ ಬೆಚ್ಚಿತುಂಡ್.

ರೋಮ್ 1:2

ದೇವಡ ಈ ನಲ್ಲ ಸುದ್ದಿ ದೇವಡ ಪ್ರವಾದಿಯಂಗಡ ಮೂಲಕ ಪಂಡೇ ವಾಗ್ದಾನ ಮಾಡಿತ್, ಪವಿತ್ರ ವಾಕ್ಯತ್‍ಲ್ ಒಳ್‍ದಿ ಬೆಚ್ಚಿತ್ಂಜತ್.

ರೋಮ್ 16:25

ನಾಡ ದೇವಡ ನಲ್ಲ ಸುದ್ದಿ ಎಣ್ಣುವನೆಕೆ, ನಿಂಗಳ ಸ್ತಿರಪಡ್‌ತ್‍ವಕ್ ಶಕ್ತಿ ಉಳ್ಳಂವೊನಾಯಿತ್ತುಳ್ಳ ದೇವಕ್ ಎಲ್ಲಾ ಮಹಿಮೆಯು ಇರಡ್. ಯೇಸು ಕ್ರಿಸ್ತಂಡ ಈ ವಿಷಯತ್‍ರ ಮೂಲಕ ಯೆಹೂದ್ಯಂಗಲ್ಲತಯಿಂಗಕ್, ಪಂಡಿಂಜೇ ಗುಟ್ಟಾಯಿತ್ ಬೆಚ್ಚಿತ್ಂಜ ಮರ್ಮ, ಪ್ರಕಟನೆ ಆಚಿ.

ರೋಮ್ 2:7

ಎಲ್ಲಾನ ತಾಳ್ಮೆಲ್ ಸಹಿಸಿಯಂಡ್, ನಲ್ಲ ಕೆಲಸ ಮಾಡಿಯಂಡ್ ಮಹಿಮೆನ, ಗನತ್‍ನ ಪಿಂಞ ಪಾಳಾಯಿ ಪೋಕತದ್‍ನ ತ್‍ೕಡಿಯಂಡುಳ್ಳಯಿಂಗಕ್ ದೇವ ನಿತ್ಯ ಜೀವ ತಪ್ಪ.

ರೋಮ್ 5:2

ಇಕ್ಕ ನಂಗ ಸ್ತಿರವಾಯಿತ್ ನಿಂದಂಡುಳ್ಳ ಈ ಕೃಪೇರ ಒಳ್‍ಕ್ ಪೋಪಕುಳ್ಳ ಬಟ್ಟೇನ ನಂಬಿಕೇರ ಮೂಲ ಪಡ್ಂದಿತ್, ದೇವಡ ಮಹಿಮೆಲ್ ನಂಗ ಪಾಲ್‍ದಾರಂಗಳಾಪಾಂದ್ ಉಳ್ಳ ನಿರಿಕ್ಷೇಲ್ ಹೊಗಳಿಯಂಡುಂಡ್.

ರೋಮ್ 5:21

ಆನಗುಂಡ್, ಪಾಪತ್‍ರ ಮೇಲೆ ಚಾವ್‍ಕ್ ಜಯ ಕ್‍ಟ್ಟ್‌ನನೆಕೆ, ದೇವಡ ಕೃಪೆಯು ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಮೂಲಕ ನಿತ್ಯ ಜೀವತ್‍ನ ತಂದಿತ್, ನೀತಿರಗುಂಡ್ ಜಯ ಕ್‍ಟ್ಟ್‌ವನೆಕೆ ಮಾಡ್‍ಚಿ.

ರೋಮ್ 5:4

ನಂಗಕ್ ಬಪ್ಪ ಕಷ್ಟತ್‍ಲ್ ಸಹ ನಂಗ ಹೊಗಳಿಯಂಡುಂಡ್.

ರೋಮ್ 6:23

ಪಾಪತ್‍ರ ಸಂಬಳ ಚಾವ್; ದೇವಡ ಇನಾಮ್ ನಂಗಡ ಒಡೆಯನಾನ ಯೇಸು ಕ್ರಿಸ್ತನಗುಂಡ್ ಕ್‍ಟ್ಟ್‌ವ ನಿತ್ಯ ಜೀವ.

ಕೊಲೊಸ್ಸೆ 1:27

ಯೆಹೂದ್ಯಂಗಲ್ಲತ ಜನಕಾಯಿತ್ ಅಂವೊ ಬೆಚ್ಚಿತುಳ್ಳ ಈ ಐಶ್ವರ್ಯವಾನ ಮಹಿಮೇರ ಗುಟ್ಟ್‌ನ, ದೇವ ತಾಂಡ ಮಕ್ಕಕ್ ಕಾಂಬ್‍ಚಿಡಂಡೂಂದ್ ಉಳ್ಳದೇ ಅಂವೊಂಡ ಚಿತ್ತ. ಆ ಗುಟ್ಟ್ ಎಂತ ಎಣ್ಣ್‌ಚೇಂಗಿ, ಕ್ರಿಸ್ತ ನಿಂಡಗಲ್ಲಿ ಉಂಡ್, ಅದ್ ಮಹಿಮೇರೆ ನಿರೀಕ್ಷೆಯೇ.

1 ಥೆಸಲೊನೀಕ 2:15

ಅಲ್ಲಿಯತ್‍ರ ಯೆಹೂದ್ಯಂಗ, ಒಡೆಯನಾನ ಯೇಸುನ ಪಿಂಞ ಪ್ರವಾದಿಯಳ ಕೊಂದಯಿಂಗ. ಇಕ್ಕ ನಂಗಕ್ ಹಿಂಸೆ ಕೊಡ್‌ತಂಡ್, ದೇವಕ್ ಕುಶಿಯಿಲ್ಲತಯಿಂಗಳಾಯಿತ್ ಉಂಡ್. ಜನಳ ಅಯಿಂಗ ದ್ವೇಶ ಮಾಡಿಯಂಡುಂಡ್.

1 ಥೆಸಲೊನೀಕ 5:8

ಆಚೇಂಗಿ, ನಂಗ ಪೋಲ್‍ಕ್ ಕೂಡ್‍ನಯಿಂಗ. ಆನಗುಂಡ್ ಎಚ್ಚರತ್‍ಲ್ ಬದ್‌ಕಿತ್, ಎದೆತಟ್ಟೆರನೆಕೆ ಉಳ್ಳ ನಂಬಿಕೆ ಪಿಂಞ ಪ್ರೀತಿನ ಎದೇಲ್ ಇಟ್ಟಂಡ್, ಇರ್‍ಂಬ್ ತೊಪ್ಪಿರನೆಕೆ ಉಳ್ಳ ರಕ್ಷಣೆರ ನಿರಿಕ್ಷೇನ ಮಂಡೆಕ್ ಇಟ್ಟಂಡ್ ಇರಂಡು.

1 ತಿಮೊಥೆಯ 6:12

ನಂಬಿಕೇರ ನಲ್ಲ ಪೋರಾಟತ್‍ನ ಪೋರಾಡ್, ನಿತ್ಯ ಜೀವತ್‍ನ ಗಟ್ಟಿಯಾಯಿತ್ ಪುಡ್‌ಚ; ಇದ್ಂಗಾಯಿತ್ ದೇವ ನಿನ್ನ ಕಾಕಿತುಂಡ್; ಅಕ್ಕ, ನೀನ್ ದುಂಬ ಜನಡ ಮಿಂಞತ್‍ಲ್ ನೀಡ ನಂಬಿಕೇರ ವಿಷಯತ್ ನೇರಾನ ಸಾಕ್ಷಿ ಕೊಡ್‍ತಿತುಳ್ಳಿಯ.

1 ತಿಮೊಥೆಯ 6:19

ಇನ್ನನೆ ಮಾಡ್‍ಚೇಂಗಿ, ಬಪ್ಪಕುಳ್ಳ ಯುಗಕಾಯಿತ್ ಅಯಿಂಗಡ ಬಂಡಾರತ್‌ಲ್ ಕೂಟಿ ಬೆಪ್ಪನೆಕೆ ಚಾಯಿ ಅಡಿಪಾಯ ಇಡ್‌ವ. ಅಕ್ಕ ಅಯಿಂಗ ಸತ್ಯವಾನ ಬದ್‍ಕ್‍ನ ಅನುಬವಿಚಿಡುವಾಂದ್ ನೀನ್ ಅಯಿಂಗಕ್ ಎಣ್ಣಿ ಕೊಡ್.

2 ತಿಮೊಥೆಯ 1:1

ಯೇಸು ಕ್ರಿಸ್ತಂಡ ಮೇಲೆ ಉಳ್ಳ ನಂಬಿಕೇರಗುಂಡ್, ವಾಗ್ದಾನ ಮಾಡಿತುಳ್ಳ ಯೇಸು ಕ್ರಿಸ್ತಂಡಲ್ಲಿ ಉಳ್ಳ ಜೀವತ್‍ರ ವಿಷಯತ್‍ನ ಬೋರೆಯಿಂಗಕ್ ಎಣ್ಣ್‌ವಕ್, ಯೇಸು ಕ್ರಿಸ್ತಂಡ ಚಿತ್ತತ್‍ರನೆಕೆ ಅಪೊಸ್ತಲನಾಯಿತುಳ್ಳ ಪೌಲನಾನ ನಾನ್,

2 ತಿಮೊಥೆಯ 1:9

ಎನ್ನಂಗೆಣ್ಣ್‌ಚೇಂಗಿ ದೇವ ನಂಗಳ ರಕ್ಷಣೆ ಮಾಡಿತ್, ಪವಿತ್ರವಾನ ಬದ್‍ಕ್ ಬಾಳ್‌ವಕ್ ನಂಗಳ ಕಾಕಿತುಂಡ್. ನಂಗಕ್ ಇದ್ ಕ್‍ಟ್ಟ್‌ವಕ್ ಒರ್ ಯೊಗ್ಯತೆಯು ಇಲ್ಲೆ. ಆಚೇಂಗಿ, ಕಾಲ ಸುರ್ ಆಪಕ್ ಮಿಂಞಲೇ, ಈ ಕೃಪೆ ಯೇಸು ಕ್ರಿಸ್ತನಗುಂಡ್ ನಂಗಕ್ ಕ್‍ಟ್ಟಂಡೂಂದ್ ದೇವಡ ಚಿತ್ತವಾಯಿತ್ಂಜತ್.

2 ತಿಮೊಥೆಯ 2:10

ಆಂಗಾಯಿತ್ ಗೊತ್ತ್ ಮಾಡಿತುಳ್ಳಯಿಂಗಕ್ ಯೇಸು ಕ್ರಿಸ್ತಂಡಿಂಜ ಕ್‍ಟ್ಟ್‌ವ ರಕ್ಷಣೆ ನಿತ್ಯ ಮಹಿಮೆಲ್ ಅಯಿಂಗಕ್ ಸಹ ಕ್‍ಟ್ಟ್‌ವನೆಕೆ ನಾನ್ ಎಲ್ಲಾನ ಅಯಿಂಗಕಾಯಿತ್ ಸಹಿಸಿಯಂಡುಂಡ್.

2 ತಿಮೊಥೆಯ 2:13

ಅಂವೊಂಗ್ ನಂಗ ನಂಬಿಕಸ್ತನಾಯಿತ್‌ಲ್ಲೇಂಗಿಯೂ ಅಂವೊ ನಂಬಿಕಸ್ತನಾಯಿತಿಪ್ಪ. ಎನ್ನಂಗೆಣ್ಣ್‌ಚೇಂಗಿ ಅಂವೊ ತಾಂಡ ಗುಣಕ್ ವಿರೋದವಾಯಿತ್ ಮಾಡ್‌ವಕ್ ಕಯ್ಯುಲೆ.

2 ತಿಮೊಥೆಯ 2:15

ನೀ ಞಾಣಪಡುವಕ್ ಅವಸ್ಯ ಇಲ್ಲತ ಸೇವಕನಾಯಿತ್, ದೇವಡ ಸತ್ಯ ವಾಕ್ಯತ್‍ನ ಏದ್ ತಪ್ಪಿಲ್ಲತೆ, ನೇರಾಯಿತ್ ಬೋದನೆ ಮಾಡ್‌ವಂವೊನಾಯಿತ್, ದೇವಡ ಮಿಂಞತ್ ನೀನ್ ಯೋಗ್ಯನಾಯಿತ್ ನಿಪ್ಪಕ್ ಜಾಗ್ರತೆಲ್ ಇರ್.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 2:13

ಅನ್ನನೆ ಇಪ್ಪಕ, ನಂಗಡ ರಕ್ಷಕನಾನ ಯೇಸು ಕ್ರಿಸ್ತ ಎಣ್ಣುವ ಬಲ್ಯ ದೇವಡ ಮಹಿಮೆಲ್ ಬಪ್ಪ ಆ ಕುಶೀರ ದಿನಕಾಯಿತ್, ನಂಗ ಬಾರಿ ಕುಶೀಲ್, ಮಹಿಮೇರ ನಿರಿಕ್ಷೇಲ್ ಪಾರಕಾತಂಡ್ ಉಂಡ್.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 2:7

ನೀನ್ ನಲ್ಲದ್ ಮಾಡಿತ್, ಎಲ್ಲಾ ವಿಷಯತ್‍ಲ್ ಉದಾರಣೆಯಾಯಿತ್ ಅಯಿಂಗಕ್ ಇರಂಡು. ನೀನ್ ಬೋದನೆ ಮಾಡ್‌ವಕ ನೇರಾನ ಸತ್ಯವಾನ ಬೋದನೆನ ನೇರಾನಂವೊನಾಯಿತ್, ಗೌರವತ್‍ಲ್ ಮಾಡ್‌ವಂವೊನಾಯಿತ್ ಇರಂಡು.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 3:7

ಆನಗುಂಡ್, ಅಂವೊಂಡ ಕೃಪೇರಗುಂಡ್ ನಂಗಳ ನೀತಿವಂತಯಿಂಗಳಾಯಿತ್ ಮಾಡಿತ್, ನಿತ್ಯ ಜೀವತ್‍ರ ಹಕ್ಕ್‌ದಾರಂಗಳಾಯಿತುಂಡ್‍ೕಂದ್ ಎಣ್ಣುವ ನಂಬಿಕೇನ ನಂಗಕ್ ತಂದಿತುಂಡ್.

1 ಯೋಹಾನ 2:25

ಈ ಐಕ್ಯವೇ ಕ್ರಿಸ್ತ ನಿಂಗಕ್ ತಪ್ಪೀಂದ್ ವಾಗ್ದಾನ ಮಾಡ್‍ನ ನಿತ್ಯ ಜೀವ.

1 ಯೋಹಾನ 5:20

ದೇವಡ ಮೋಂವೊ ಬಂತ್ ನೇರಾನ ದೇವ ದಾರ್‍ೕಂದ್ ನಂಗಕ್ ಗೊತ್ತಾಪನೆಕೆ ಅರ್ಥ ಮಾಡಿತಾತ್. ಇಕ್ಕ ನಂಗ ಅಂವೊಂಡ ಮೋಂವೊಂಡ ಕೂಡೆ ಐಕ್ಯತ್‍ಲ್ ಬದ್‍ಕಿಯಂಡುಳ್ಳಗುಂಡ್, ನಂಗೆಲ್ಲಾ ನಿತ್ಯ ಜೀವವಾಯಿತುಳ್ಳ ನೇರಾನ ದೇವಡ ಐಕ್ಯತ್‍ಲ್ ಬದ್‍ಕಿಯಂಡುಂಡ್.

ಯೂದ ಒಳ್‍ದ್‍ನ ಕಾಗದ 1:21

ದೇವಡ ಪ್ರೀತಿಯಿಂಜ ನಿಂಗಳ ಕಾಪಾಡಿಯಂಡ್, ನಿತ್ಯ ಜೀವಕ್ ನಿಂಗಳ ಕೊಂಡ್ ಬಪ್ಪಕಾಯಿತ್, ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಕರುಣೆಕ್ ಪಾರಕಾತಂಡಿರಿ.

ಪ್ರಕಟನೆ 13:8

ಈ ಲೋಕತ್‍ರ ಸುರುಯಿಂಜ, ಮಿಂಞಲೇ ಬಲಿಯಾಯಿತ್ ಇಂಜ ಕೊರಿಕುಟ್ಟಿಯಾನವೊಂಡ ಜೀವತ್‍ರ ಪುಸ್ತಕತ್‍ಲ್ ಪೆದ ಒಳ್‌ದಿತಿಲ್ಲತ ಎಲ್ಲಾರು ಆ ಮೃಗತ್‍ನ ಆರಾದನೆ ಮಾಡ್‌ವ.

ಪ್ರಕಟನೆ 17:8

ನೀನ್ ಕಂಡ ಮೃಗ ಮಿಂಞ ಇಂಜತ್, ಇಕ್ಕ ಇಲ್ಲೆ, ಅದ್ ಪಾತಾಳತ್ಂಜ ಕೊಡಿಕ್ ಪತ್ತಿತ್ ಬಂದಿತ್ ನಾಶ ಆಪ. ಲೋಕ ಸೃಷ್ಟಿ ಆನ ಕಾಲತ್ಂಜ ಜೀವ ಪುಸ್ತಕತ್‍ಲ್ ಪೆದ ಒಳ್‍ದತೆ ಬೂಮಿಲ್ ವಾಸ ಮಾಡಿಯಂಡ್ ಉಳ್ಳ ಜನ, ಮಿಂಞ ಇಂಜದು, ಇಕ್ಕ ಇಲ್ಲತೆ ಪೋನದು, ಇಂಞು ಮಿಂಞಕ್ ಇಪ್ಪ ಮೃಗತ್‍ನ ನೋಟಿತ್ ಆಶ್ಚರ್ಯಪಡುವ.