ರೋಮ್ 3:4 - ಕೊಡವ ಬೈಬಲ್

⁴ ಅನ್ನನೆ ಆಪುಲೆ. ನೀನ್ ಎಣ್ಣುವದ್ ಸತ್ಯಾಂದ್ ಎಲ್ಲಾರ್‌ಕು ಗೊತ್ತಾಂಡು, ಪಿಂಞ ನೀಡ ನ್ಯಾಯತ್‍ನ ವಿಚಾರಣೆ ಮಾಡ್‌ವಕ ನೀಕ್ ಜಯ ಕ್‍ಟ್ಟಂಡೂಂದ್ ಒಳ್‍ದಿತುಳ್ಳನೆಕೆ, ದೇವ ಮಾತ್ರ ಸತ್ಯವಂತಂವೊ, ಮನುಷ್ಯಂಗೆಲ್ಲಾ ಪೊಟ್ಟ್ ಪರಿಯುವಯಿಂಗಾಂದ್ ಆಚಿ.

ರೋಮ್ 3:4 Iomraidhean Croise

ಮತ್ತಾಯ 11:19

ಮನುಷ್ಯಕುಮಾರ ತಿಂದಂಡ್ ಕುಡಿಚಂಡಿಂಜತ್, ಅದ್ಂಗ್ ಅಯಿಂಗ: ಅಂವೊ ತೀನಿಮಾರಿಯು, ಕುಡ್‌ಕನು, ಕಂದಾಯ ಎಡ್‌ಪಯಿಂಗಡ ಪಿಂಞ ಸಮಾಜ ಪಾಪಿಯಂಗಾಂದ್ ಎಣ್ಣುವ ಜನಡ ಸ್ನೇಹಿತಾಂದ್ ಎಣ್ಣ್‌ಚಿ. ಆಚೇಂಗಿ, ದೇವಡ ಜ್ಞಾನ, ಅಂವೊನ ನಂಬುವಯಿಂಗ ಮಾಡ್‌ವ ಕ್ರಿಯೆರ ಮೂಲಕ ಸತ್ಯವಾಪಾಂದ್ ಯೇಸು ಎಣ್ಣ್‌ಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 20:16

ಅಂವೊ ಅಯಿಂಗಳ ಕೊಂದ್‍ರ್‍ವಂಜಿ ಬೋರೆ ವಾರಕಾರಂಗಕ್ ತೋಟತ್‍ನ ಕೊಡ್‍ಪಾಂದ್ ಯೇಸು ಎಣ್ಣ್‌ಚಿ. ಜನ ಈ ತಕ್ಕ್‌ನ ಕ್‍ೕಪದು: ಆಚೇಂಗಿ, ಅನ್ನನೆ ಆಕತೆ ಇರಡ್‍ೕಂದ್ ಎಣ್ಣ್‌ಚಿ.

ಯೋಹಾನ 3:33

ಅಂವೊಂಡ ಸಾಕ್ಷಿನ ತಕ್ಕಾರ ಮಾಡ್‌ವಂವೊ, ದೇವ ಎಣ್ಣ್‌ನದ್ ಸತ್ಯಾಂದ್ ಉಳ್ಳ ವಿಷಯತ್‍ನ ಮುದ್ರೆ ಇಟ್ಟಿತ್ ದೃಡಪಡ್‌ತಿಯಂಡುಂಡ್.

ರೋಮ್ 11:1

ಆನಗುಂಡ್, ದೇವ ತಾಂಡ ಜನತ್‍ನ ತಿರಸ್ಕಾರ ಮಾಡ್‍ಚಾಂದ್ ಕ್‍ೕಪಿ. ಅನ್ನನೆ ಮಾಡುಲೆ. ನಾನ್ ಸಹ ಅಬ್ರಹಾಮಂಡ ಸಂತಾನತ್‍ಲ್ ಬೆನ್ಯಾಮೀನಂಡ ಕುಲತ್‍ಲ್ ಪುಟ್ಟ್‌ನ ಇಸ್ರಾಯೇಲ.

ರೋಮ್ 11:11

ಅಕ್ಕ ನಾನ್ ಇನ್ನನೆ ಕ್‍ೕಪಿ: ಅಯಿಂಗ ಬುದ್ದ್ ಪೋಪಕಾಯಿತಾ ಮೀರ್‌ಚಿ? ಅನ್ನನೆ ಅಲ್ಲ, ಅಯಿಂಗ ಮೀರ್‌ನಗುಂಡ್ ಯೆಹೂದ್ಯ ಅಲ್ಲತಯಿಂಗಕ್ ರಕ್ಷಣೆ ಕ್‍ಟ್ಟ್‌ಚಿ, ಅನ್ನನೆ ಅಯಿಂಗಕ್ ಒಟ್ಟೆಕಿಚ್ಚ್ ಬರಂಡೂಂದ್ ಇನ್ನನೆ ಮಾಡ್‍ಚಿ.

ರೋಮ್ 3:31

ಅನ್ನನೆ ಆಚೇಂಗಿ, ನಂಬಿಕೇರಗುಂಡ್ ನ್ಯಾಯಪ್ರಮಾಣತ್‍ನ ನಂಗ ಅಲ್ಲಗೆಳೆಯುವದಾ? ಅನ್ನನೆ ಅಲ್ಲ, ನ್ಯಾಯಪ್ರಮಾಣತ್‍ನ ನಂಗ ಸ್ತಿರಪಡ್‌ತಿಯಂಡುಂಡ್.

ರೋಮ್ 6:15

ಆನಗುಂಡ್ ಎಂತ? ನಂಗ ನ್ಯಾಯಪ್ರಮಾಣತ್‍ರ ಅಡಿಕ್ ಬರತೆ, ಕೃಪೇರ ಅಡಿಕ್ ಬಂದಗುಂಡ್ ಪಾಪ ಮಾಡಂಡುವ? ಮಾಡ್‌ವಕ್ಕಾಗ.

ರೋಮ್ 6:2

ಅನ್ನನೆ ಇಲ್ಲೆ! ಪಾಪಕ್ ಚತ್ತ್ ಪೋಯಿತುಳ್ಳ ನಂಗ, ಇಂಞು ಅದ್‍ಲ್ ಎನ್ನನೆ ಬದ್‍ಕ್‌ವಕಾಪ?

ರೋಮ್ 7:13

ಅನ್ನನೆ ಆಚೇಂಗಿ, ನಲ್ಲದಾಯಿತುಳ್ಳ ನ್ಯಾಯಪ್ರಮಾಣ, ನಾಡ ಚಾವ್‍ಕ್ ಕಾರಣ ಆಚೀಂದ್ ಎಣ್ಣುವಕ್ ಕಯ್ಯುವ? ಅನ್ನನೆ ಅಲ್ಲ, ಪಾಪವೇ ನಾಡ ಚಾವ್‍ಕ್ ಕಾರಣ ಆಚಿ; ಪಾಪ ನ್ಯಾಯಪ್ರಮಾಣತ್‍ರಗುಂಡ್ ಇಂಞು ದುಂಬ ಪಾಪವಾಯಿತ್ ಪಿಂಞ ನಲ್ಲದ್‍ನಗುಂಡ್ ನಾಕ್ ಚಾವ್ ಕೊಂಡ್ ಬಾತ್. ಆನಗುಂಡ್, ನ್ಯಾಯಪ್ರಮಾಣತ್‍ರ ಮೂಲಕ ಪಾಪ ಎಚ್ಚಕ್ ಕ್ರೂರವಾನ ಪಾಪಾಂದ್ ನಂಗ ಕಾಂಬಕ್ ಆಚಿ.

ರೋಮ್ 7:7

ಆನಗುಂಡ್ ನಂಗ ಎಂತ ಎಣ್ಣಡ್? ನ್ಯಾಯಪ್ರಮಾಣ ಪಾಪವಾ? ಅನ್ನನೆ ಅಲ್ಲ, ಪಾಪ ಎಂತ್‍ೕಂದ್ ನ್ಯಾಯಪ್ರಮಾಣತ್‍ರಗುಂಡ್ ನಾಕ್ ಗೊತ್ತಾಚಲ್ಲ? ಇಲ್ಲತಪೋಚೇಂಗಿ ಎನ್ನನೆ ಗೊತ್ತಾಪಕಿಂಜತ್? ಬೋರೆಯಿಂಗಡ ವಸ್ತುರ ಮೇಲೆ ಆಸೆ ಪಡ್‌ವಕ್ಕಾಗಾಂದ್ ನ್ಯಾಯಪ್ರಮಾಣ ನಾಕ್ ಎಣ್ಣತೆ ಪೋಚೇಂಗಿ, ಬೋರೆಯಿಂಗಡ ವಸ್ತುರ ಮೇಲೆ ಆಸೆ ಪಡ್‍ವದ್ ಪಾಪಾಂದ್ ನಾಕ್ ಗೊತ್ತಿಲ್ಲತೆ ಪೋಪ ಅಲ್ಲ?

ರೋಮ್ 9:14

ಅಕ್ಕ, ನಂಗಕ್ ಎಂತ ಎಣ್ಣುವಕ್ ಕಯ್ಯು? ದೇವಡ ಪಕ್ಕ ಅನೀತಿ ಉಂಡ್‍ೕಂದ್ ಎಣ್ಣ್‌ವದಾ? ಅನ್ನನೆ ಇಲ್ಲವೇ ಇಲ್ಲೆ.

1 ಕೊರಿಂಥ 6:15

ನಿಂಗಡ ತಡಿ ಕ್ರಿಸ್ತಂಡ ತಡೀರ ಬಾಗವಾಯಿತುಂಡ್‍ೕಂದ್ ನಿಂಗಕ್ ಗೊತ್ತ್‌ಲ್ಲೆಯಾ? ಅಕ್ಕ ನಾನ್, ಅದ್‍ನ ಎಡ್‍ತಂಡ್ ಪೋಯಿತ್ ವ್ಯಬಿಚಾರಿಯಡ ತಡಿಕ್ ಬಾಗವಾಯಿತ್ ಕೂಟ್‍ವಕಯ್ಯುವ? ಕಯ್ಯುಲೆ!

2 ಕೊರಿಂಥ 1:18

ನಾನ್ ನಿಂಗಕ್ ಎಣ್ಣ್‌ನ ತಕ್ಕ್ ಒರ್ ಕುರಿ ಅಕ್ಕೂಂದು ಇಂಞೊರ್ ಕುರಿ ಇಲ್ಲೇಂದು ಇಂಜಿತ್‌ಲ್ಲೆ, ಅದ್ಂಗ್ ಸತ್ಯವಂತ ದೇವ ಸಾಕ್ಷಿಯಾಯಿತುಂಡ್.

ಗಲಾತ್ಯ 2:17

ಆಚೇಂಗಿ, ಕ್ರಿಸ್ತಂಡ ಮೇಲೆ ನಂಬಿಕೆ ಬೆಚ್ಚಿತ್, ನೀತಿವಂತಯಿಂಗಳಾಯಿತ್ ಇಪ್ಪಕ್ ಪ್ರಯತ್ನಪಡ್‍ವಕ ಇಂಞು ನಂಗಡಲ್ಲಿ ಪಾಪ ಇಂಜತೇಂಗಿ, ನಂಗ ಪಾಪಿಯಾಯಿತ್‌ಪ್ಪಕ್ ಕ್ರಿಸ್ತ ಕಾರಣವಾಯಿತ್ ಇಪ್ಪಕ್ ಕಯ್ಯುವ? ಅನ್ನನೆ ಆಪದೇ ಇಲ್ಲೆ.

ಗಲಾತ್ಯ 2:21

ನಾನ್ ದೇವಡ ಕೃಪೇನ ಮುಂಡತೆ ಪಾಳ್ ಮಾಡಿಯಂಡಿಪಂವೊ ಅಲ್ಲ; ಎನ್ನಂಗೆಣ್ಣ್‌ಚೇಂಗಿ, ಯೆಹೂದ್ಯಂಗಡ ನ್ಯಾಯಪ್ರಮಾಣತ್‍ರ ಪ್ರಕಾರ ನಡ್‍ಪದಿಂಜ ನಂಗ ನೀತಿವಂತಯಿಂಗಳಾಪದಾಚೇಂಗಿ, ಕ್ರಿಸ್ತ ಚತ್ತಾಂಗ್ ಅರ್ಥ ಇಲ್ಲೆ.

ಗಲಾತ್ಯ 6:14

ಆಚೇಂಗಿ, ನಾಕ್ ಕ್ರಿಸ್ತಂಡ ಶಿಲುಬೇರ ವಿಷಯತ್‍ನ ಬುಟ್ಟಿತ್ ಬೋರೆ ಏದ್ ವಿಷಯತ್‍ಲು ಹೊಗಳಿಚಿಡುವದ್ ಬೋಂಡ; ಈ ಲೋಕ ಅಂವೊನಗುಂಡ್ ನಾಕಾಯಿತ್ ಶಿಲುಬೇಲ್ ಉಂಡ್, ನಾನ್ ಸಹ ಈ ಲೋಕತ್‍ರ ಆಸೆಕೆಲ್ಲಾ ನನ್ನ ಶಿಲುಬೇಕ್ ಇಟ್ಟಿಯೆ.

1 ತಿಮೊಥೆಯ 3:16

ಏದ್ ಅನುಮಾನವು ಇಲ್ಲತನೆಕೆ, ನಂಗಕ್ ಕಾಂಬ್‍ಚಿಟ್ಟಿತುಳ್ಳ ಸತ್ಯತ್‍ರ ಗುಟ್ಟ್ ದುಂಬ ಬಲ್ಯದ್. ಅದ್ ಎಂತ ಎಣ್ಣ್‌ಚೇಂಗಿ: ಕ್ರಿಸ್ತ, ತಡೀಲ್ ಪುಟ್ಟ್‌ಚಿ. ಪವಿತ್ರಾತ್ಮ ಅಂವೊನ ನೀತಿ ಉಳ್ಳಂವೋಂದ್ ಎಣ್ಣ್‌ಚಿ. ದೇವದೂತಂಗ ಅಂವೊನ ಕಂಡತ್. ಅನ್ಯ ಜನ ಅಂವೊಂಡ ವಿಷಯತ್‍ನ ಕ್‍ೕಟತ್. ಲೋಕತ್‍ರ ಜನ ಅಂವೊನ ನಂಬ್‍ಚಿ. ಮಹಿಮೆಲ್ ಪರಲೋಕಕ್ ಪೋಚಿ.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 1:2

ನಂಗಡ ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ, ಕರುಣೆ ಪಿಂಞ ಸಮಾದಾನ ಕ್‍ಟ್ಟಡ್.

ಇಬ್ರಿಯ 6:18

ಆನಗುಂಡ್ ದೇವ ತಾಂಡ ವಾಗ್ದಾನತ್‍ನ ಪಿಂಞ ಆಣೆನ ನಂಗಕ್ ತಂದಿತುಂಡ್. ಈ ದಂಡ್ ವಿಷಯವು ಎಕ್ಕಾಲು ಬದ್‍ಲ್ ಆಪುಲೆ. ಅಂವೊ ಇನ್ನನೆ ಎನ್ನಂಗ್ ಮಾಡ್‍ಚೇಂಗಿ, ದೇವ ಪೊಟ್ಟ್ ಪರಿವಕ್ ಸಾದ್ಯತೆ ಇಲ್ಲೆ. ಆನಗುಂಡ್ ನಂಗಡ ಮಿಂಞಕ್ ಬೆಚ್ಚಿತುಳ್ಳ ನಿರಿಕ್ಷೇನ ಗಟ್ಟಿಯಾಯಿತ್ ಪುಡ್‌ಚಿತ್, ಬಚಾವಾಪಕ್ ಅಂವೊಂಡ ಪಕ್ಕ ಓಡಿ ಬಂದ ನಂಗಕ್ ದುಂಬ ನಿಶ್ಚಯ ಉಂಡ್.

1 ಯೋಹಾನ 5:10

ಆನಗುಂಡ್ ದೇವಡ ಮೋಂವೊಂಡಲ್ಲಿ ನಂಬಿಕೆ ಇಟ್ಟಿತುಳ್ಳಯಿಂಗಡ ಹೃದಯತ್‍ಲ್ ಈ ಸಾಕ್ಷಿ ಉಂಡ್. ಆಚೇಂಗಿ ದಾರೆಲ್ಲಾ ದೇವನ ನಂಬುಲೆಯೋ ಅಯಿಂಗ ಅಂವೊನ ಪೊಟ್ಟ್‌ಮಾರಿಯಾಯಿತ್ ಮಾಡಿಯಂಡುಂಡ್. ಎನ್ನನೆ ಎಣ್ಣ್‌ಚೇಂಗಿ ದೇವ ತಾಂಡ ಮೋಂವೊಂಡ ವಿಷಯತ್‍ಲ್ ಎಣ್ಣ್‌ನ ಸಾಕ್ಷಿನ ಅಯಿಂಗ ನಂಬಿತ್‌ಲ್ಲೆ.

1 ಯೋಹಾನ 5:20

ದೇವಡ ಮೋಂವೊ ಬಂತ್ ನೇರಾನ ದೇವ ದಾರ್‍ೕಂದ್ ನಂಗಕ್ ಗೊತ್ತಾಪನೆಕೆ ಅರ್ಥ ಮಾಡಿತಾತ್. ಇಕ್ಕ ನಂಗ ಅಂವೊಂಡ ಮೋಂವೊಂಡ ಕೂಡೆ ಐಕ್ಯತ್‍ಲ್ ಬದ್‍ಕಿಯಂಡುಳ್ಳಗುಂಡ್, ನಂಗೆಲ್ಲಾ ನಿತ್ಯ ಜೀವವಾಯಿತುಳ್ಳ ನೇರಾನ ದೇವಡ ಐಕ್ಯತ್‍ಲ್ ಬದ್‍ಕಿಯಂಡುಂಡ್.

ಪ್ರಕಟನೆ 3:7

ಫಿಲದೆಲ್ಫಿಯ ಪಟ್ಟಣತ್‍ಲ್ ಉಳ್ಳ ಸಬೆರ ದೂತಂಗ್ ಒಳ್‍ದ್‍ವಕುಳ್ಳದ್ ಎಂತ ಎಣ್ಣ್‌ಚೇಂಗಿ: ಪವಿತ್ರವಾನಂವೊನು, ನೇರಾನಂವೊನು, ದಾವೀದಂಡ ಬೀತ್‍ಕೈ ಉಳ್ಳಂವೊನು, ಏದು ಒರ್ ಮನುಷ್ಯನು ಮುಚ್ಚ್‌ವಕ್ ಕಯ್ಯತನೆಕೆ ತೊರ್‌ಪಂವೊನು, ಏದು ಒರ್ ಮನುಷ್ಯನು ತೊರ್‌ಪಕ್ ಕಯ್ಯತನೆಕೆ ಬೀಗ ಇಡ್‌ವಂವೊನು ಎಣ್ಣಿಯಂಡುಳ್ಳ.