ಪ್ರಕಟನೆ 7:9 - ಕೊಡವ ಬೈಬಲ್

⁹ ಇದಾನ ಪಿಂಞ ನಾನ್ ನೋಟ್‍ವಕ, ದಾರೂ ಲೆಕ್ಕ ಎಡ್‍ಪಕ್ ಕಯ್ಯತನೆಕೆ ಇಂಜ ಸಂಖ್ಯೆತ್‍ರ ಜನ ಸಿಂಹಾಸನತ್‍ರ ಎದ್‍ಕೆ ಪಿಂಞ ಕೊರಿಕುಟ್ಟಿರ ಮಿಂಞತ್ ನಿಂದಂಡಿಂಜತ್. ಈಂಗೆಲ್ಲಾರು, ಎಲ್ಲಾ ಜಾತಿಯಿಂಜ, ಎಲ್ಲಾ ಕುಲತ್ಂಜ, ಎಲ್ಲಾ ಜನತ್‍ಂಜ, ಎಲ್ಲಾ ತಕ್ಕ್‌ಯಿಂಜ ಬಂದಯಿಂಗಳಾಯಿತ್ಂಜತ್. ಅಯಿಂಗ ಎಲ್ಲಾರು ಬೊಳ್‍ತ ಬಟ್ಟೇನ ಇಟ್ಟಂಡ್, ಕೈಯಿಲ್ ಖರ್ಜೂರ ಮರತ್‍ರ ಕೊಂಬ್‍ನ ಪುಡ್‍ಚಂಡ್ ನಿಂದತ್.

ಪ್ರಕಟನೆ 7:9 Iomraidhean Croise

ಆದ್ಯತ್‌ರ ಪುಸ್ತಕ 13:16

ನೀಡ ಸಂತಾನತ್‌ನ ಬೂಮಿರ ದೂಳ್‌ರಚ್ಚಕ್‌ ಬಲ್ಯದ್‌ ಮಾಡುವಿ. ಒಬ್ಬಂಗ್‌ ಬೂಮಿರ ದೂಳ್‌ನ ಲೆಕ್ಕ ಮಾಡುವಕ್‌ ಕಯ್ಯುವದಾಚೇಂಗಿ, ನೀಡ ಸಂತಾನತ್‌ನ ಸಹ ಲೆಕ್ಕ ಮಾಡುವಕ್‌ ಕಯ್ಯು.

ಆದ್ಯತ್‌ರ ಪುಸ್ತಕ 49:10

ಸಮಾದಾನತ್‌ರ ಆಳುವಿಕೆ ತಪ್ಪಂವೊ ಬಪ್ಪಕತ್ತನೆ, ರಾಜ ಅದಿಕಾರ ಯೆಹೂದನ ಬುಟ್ಟಿತ್‌ ಪೋಪದು ಇಲ್ಲೆ, ಆಳ್‌ವಿಕೆರೆ ಕೋಲ್‌ ಅಂವೊಂಡ ಕಾಲ್‌ನ ಬುಟ್ಟಿತ್‌ ಪೋಪದು ಇಲ್ಲೆ. ದುಂಬ ಜನಾಂಗ ಅಂವೊಂಗ್‌ ಬಗ್ಗಿತ್‌ ನಡ್‌ಪ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 12:1

ಅಕ್ಕ, ಆಯಿರಾಯಿರ ಜನ ಬಂದಿತ್ ಒಬ್ಬಂಡ ಮೇಲೆ ಇಂಞೊಬ್ಬ ಚೌಟಿಯಂಡ್ ಇಪ್ಪಕ ಯೇಸು ಆದ್ಯವಾಯಿತ್ ಅಂವೊಂಡ ಶಿಷ್ಯಂಗಕ್ ಫರಿಸಾಯಂಗಡ ಈಸ್ಟ್‌ರನೆಕೆ ಉಳ್ಳ ಕಪಟ ಬೋದನೆರ ವಿಷಯತ್ ಎಚ್ಚರತ್‍ಲ್ ಇರೀಂದ್ ಎಣ್ಣ್‌ಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 21:36

ಆನಗುಂಡ್, ಇನ್ನನೆ ನಡ್‍ಪಕುಳ್ಳ ಕಾರ್ಯತ್ಂಜ ನಿಂಗಳ ಕಾಪಾಡ್‌ವಕಾಯಿತ್ ಎಕ್ಕಾಲು ತಯಾರಾಯಿತ್ ಎಲ್ಲಾ ಸಮಯತ್‍ಲ್ ಪ್ರಾರ್ಥನೆ ಮಾಡಿಯಂಡ್ ಇರಂಡು. ಅಕ್ಕ ಮನುಷ್ಯಕುಮಾರಂಡ ಮಿಂಞ ಯೋಗ್ಯತೆ ಉಳ್ಳಯಿಂಗಳಾಯಿತ್ ನಿಪ್ಪಕ್ ಕಯ್ಯು.

ಯೋಹಾನ 12:13

ಆನಗುಂಡ್, ಅಯಿಂಗ ಎಲ್ಲಾರು ಖರ್ಜೂರ ಪಣ್ಣ್ ಮರತ್‍ರ ಕೊಂಬ್‍ನ ಎಡ್‍ತಂಡ್ ಯೇಸುನ ಕಾಂಬಕಾಯಿತ್ ಪಟ್ಟಣತ್‍ರ ಪೊರಮೆ ಪೋಚಿ. ಪಿಂಞ ಅಯಿಂಗ: ಹೊಸನ್ನ! ಒಡೆಯನಾನ ದೇವಡ ಪೆದತ್‍ಲ್ ಬಂದಂಡುಳ್ಳ ರಾಜ ಆಶೀರ್ವಾದ ಪಡ್ಂದಂವೊ. ಇಸ್ರಾಯೇಲ್ ಜನತ್‍ರ ರಾಜ ಆಶೀರ್ವಾದ ಪಡ್ಂದವೋಂದ್ ಜನಯೆಲ್ಲಾ ಜೋರಾಯಿತ್ ಕೂತ್ ಕೊಡ್‍ತಂಡಿಂಜತ್.

ರೋಮ್ 11:25

ನಾಡ ಅಣ್ಣತಮ್ಮಣಂಗಳೇ, ನಿಂಗಕ್ ನಿಂಗಳೇ ಬುದ್ದಿವಂತಯಿಂಗಾಂದ್ ಗೇನಮಾಡತನೆಕೆ, ನಾನ್ ನಿಂಗಕ್ ಒರ್ ಗುಟ್ಟ್‌ನ ಎಣ್ಣಿ ತಪ್ಪಿ. ಅದ್ ಎಂತ ಎಣ್ಣ್‌ಚೇಂಗಿ, ಯೆಹೂದ್ಯಂಗಲ್ಲತಯಿಂಗಡ ರಕ್ಷಣೆರ ಲೆಕ್ಕ ಪೂರ್ತಿ ಆಪಕತ್ತನೆ, ಇಸ್ರಾಯೇಲ್‍ರ ಒರ್ ಗುಂಪ್ ಕಠಿಣ ಮನಸ್ಸಾಯಿತೇ ಇಪ್ಪ.

ಎಫೆಸ 6:13

ಆನಗುಂಡ್ ಕೆಟ್ಟ ದಿವಸತ್‍ಲ್ ನಿಂಗ ಅಯಿಂಗಕ್ ಎದ್‍ರ್ ನಿಪ್ಪಕ, ಎಲ್ಲಾನ ಪೂರ್ತಿ ಮಾಡ್‍ನಯಿಂಗಳಾಯಿತ್ ನಿಪ್ಪಕ್ ಶಕ್ತಿ ಉಳ್ಳಯಿಂಗಳಾಯಿತ್ ಇಪ್ಪನೆಕೆ ದೇವಡ ಸರ್ವ ಆಯುದತ್‍ನ ಇಟ್ಟೊಳಿ.

ಇಬ್ರಿಯ 11:12

ಆನಗುಂಡ್, ತಡೀಲ್ ಇಂಞು ಮಿಂಞಕ್ ಒಂದು ಮಾಡ್‌ವಕ್ ಕಯ್ಯತ, ತಡಿ ಚತ್ತ್ ಪೋಚೀಂದ್ ಎಣ್ಣುವಕಾಪ ಒಬ್ಬನಗುಂಡ್, ಎಣ್ಣ್‌ವಕಯ್ಯತ ಬಾನತ್ ಮೀನ್‍ರನೆಕೆಯು, ಕಡಕರೆಲ್ ಲೆಕ್ಕ ಮಾಡ್‌ವಕ್ ಕಯ್ಯತ ಮಣತ್‍ರನೆಕೆಯು ದುಂಬ ಜನ ಪುಟ್ಟ್‌ಚಿ.

ಇಬ್ರಿಯ 12:22

ಆಚೇಂಗಿ ನಿಂಗ, ಚೀಯೋನ್‌ ಕುಂದ್‍ಕು, ಜೀವವಾಯಿತುಳ್ಳ ದೇವಡ ಪಟ್ಟಣವಾನ ಪರಲೋಕತ್‍ರ ಯೆರೂಸಲೇಮ್‍ಕು, ಕುಶೀಲ್ ದುಂಬ್‍ನ ಆಯಿರ ಆಯಿರ ದೂತಂಗಡ ಪಕ್ಕವು ಬಂದಿತುಳ್ಳರ.

ಪ್ರಕಟನೆ 11:15

ಏಳನೆ ದೇವದೂತ ವಾಲಗತ್‍ರ ಕೊಂಬ್‍ನ ಊದ್‍ವಕಾಪಕ: ಲೋಕತ್‍ರ ರಾಜ್ಯಂಗ ನಂಗಡ ಒಡೆಯಂಗು, ಅಂವೊಂಡ ಕ್ರಿಸ್ತಂಡ ರಾಜ್ಯವಾಯಿತು ಆಚಿ. ಅಂವೊ ಕಾಲಕಾಲಕು ರಾಜನಾಯಿತ್ ರಾಜ್ಯಬಾರ ಮಾಡ್‌ವಾಂದ್ ಪರಲೋಕತ್ಂಜ ಒರ್ ಬಲ್ಯ ಸದ್ದ್ ಕ್‍ೕಟತ್.

ಪ್ರಕಟನೆ 22:3

ಇಂಞು ಮಿಂಞಕ್ ಒರ್ ಶಾಪವು ಇಪ್ಪುಲೆ. ದೇವಡ ಸಿಂಹಾಸನ ಪಿಂಞ ಕೊರಿಕುಟ್ಟಿಯಾನವೊಂಡ ಸಿಂಹಾಸನ ಅಲ್ಲಿ ಇಪ್ಪ. ಅಂವೊಂಡ ಸೇವಕಂಗ ಅಂವೊಂಗ್ ಸೇವೆ ಮಾಡಿತ್,

ಪ್ರಕಟನೆ 3:18

ನೀನ್ ಐಶ್ವರ್ಯವಂತನಾಪಕ್, ತಿತ್ತ್‌ಲ್ ಇಟ್ಟಿತ್ ಎಡ್‌ತ ಪೊನ್ನ್‌ನ ಪಿಂಞ ನೀಡ ಅವಮಾನವಾಯಿತುಳ್ಳ ಬೆತ್ತಲೇನ ಮುಚ್ಚ್‌ವಕ್ ಬೊಳ್‍ತ ಬಟ್ಟೇನ ನಾಡ ಕೈಯಿಂಜ ಕ್ರಯಕ್ ಎಡ್‌ತ ಪಿಂಞ ನೀಡ ಕಣ್ಣ್ ಕಾಂಬನೆಕೆ, ಕಣ್ಣ್‌ಕ್ ಮದ್ದ್ ಇಡ್‍ೕಂದ್ ನಾನ್ ನೀಕ್ ಬುದ್ದಿ ಎಣ್ಣ್‌ವಿ.

ಪ್ರಕಟನೆ 4:4

ಆ ಸಿಂಹಾಸನತ್‍ರ ಸುತ್ತ್‌ಲ್ ಇರುವತ ನಾಲ್ ಸಿಂಹಾಸನ ಇಂಜತ್. ಇರುವತ ನಾಲ್ ಪೆರಿಯಯಿಂಗ ಬೊಳ್‍ತ ಬಟ್ಟೆ ಇಟ್ಟಂಡ್, ಅಯಿಂಗಡ ಮಂಡೆಲ್ ಪೊನ್ನ್‌ರ ಕಿರೀಟ ಇಟ್ಟಿತ್ ಆ ಸಿಂಹಾಸನತ್‍ಲ್ ಅಳ್‌ತಂಡಿಪ್ಪದ್‍ನ ಕಂಡಿಯೆ.

ಪ್ರಕಟನೆ 5:11

ಇಂಞು ಮಿಂಞಕ್ ನಾನ್ ನೋಟ್‍ವಕ: ಸಿಂಹಾಸನತ್‍ರ, ನಾಲ್ ಜೀವ ಪ್ರಾಣಿಯಳ ಪಿಂಞ ಪೆರಿಯಯಿಂಗಳ ಸುತ್ತ್‌ಲ್ ದುಂಬಿತ್ಂಜ ಬಲ್ಯ ಗುಂಪ್‍ರ ದೂತಂಗಡ ಸದ್ದ್ ನಾಕ್ ಕ್‍ೕಟತ್. ಅಯಿಂಗಡ ಲೆಕ್ಕ ಕೋಟಿಕೋಟಿಯಾಯಿತ್‌ಂಜತ್.

ಪ್ರಕಟನೆ 5:9

ನೀನ್ ಈ ಪುಸ್ತಕತ್‍ನ ಎಡ್‍ಪಕು, ಅದ್ಂಡ ಮುದ್ರೆಯಳ ಪೊಳಿಪಕು ಯೋಗ್ಯನಾಯಿತುಳ್ಳಿಯ; ಎನ್ನಂಗೆಣ್ಣ್‌ಚೇಂಗಿ, ನೀನ್ ಮಿಂಞಲೇ ಬಲಿಯಾಯಿತ್, ಎಲ್ಲಾ ಕುಲತ್ಂಜ, ಎಲ್ಲಾ ತಕ್ಕ್‌ಯಿಂಜ, ಎಲ್ಲಾ ಜನತ್‍ಂಜ, ಎಲ್ಲಾ ಜಾತಿಯಿಂಜ ಜನಳ ದೇವಕಾಯಿತ್ ನೀಡ ಚೋರೆನಗುಂಡ್ ಬುಡ್‍ಗಡೆ ಮಾಡಿತ್,

ಪ್ರಕಟನೆ 6:11

ಅಕ್ಕ, ಅಯಿಂಗ ಒಬ್ಬೊಬ್ಬಂಗಕು ಬೊಳ್‍ತ ಉದ್ದವಾನ ಬಟ್ಟೇನ ಕೊಡ್‍ತತ್. ಅದಲ್ಲತೆ, ಅಯಿಂಗಡನೆಕೆ, ಕೊಲೆ ಆಪಕುಳ್ಳ ತಂಗಡ ಕೂಟ್ ಸೇವಕಂಗಳಾನ ಅಯಿಂಗಡ ಅಣ್ಣತಮ್ಮಣಂಗಡ ಲೆಕ್ಕ ಪೂರ್ತಿ ಆಪಕತ್ತನೆ, ಇಂಞು ಚೆನ್ನ ಕಾಲ ಆರಾಮ್‍ಲ್ ಇಕ್ಕಂಡೂಂದ್ ಅಯಿಂಗಕ್ ಎಣ್ಣಿಯತ್.

ಪ್ರಕಟನೆ 7:8

ಜೆಬುಲೋನಂಡ ಕುಲತ್‍ಲ್ 12,000, ಯೋಸೇಫಂಡ ಕುಲತ್‍ಲ್ 12,000, ಬೆನ್ಯಾಮೀನಂಡ ಕುಲತ್‍ಲ್ 12,000.