ಪ್ರಕಟನೆ 3:10 - ಕೊಡವ ಬೈಬಲ್

¹⁰ ನಾನ್ ಎಣ್ಣ್‌ನ ಆಜ್ಞೇರಗುಂಡ್ ಬಂದ ಕಷ್ಟತ್‍ನ ಪೊರುಮೇಲ್ ಸಹಿಸಿಯಂಡ್ ಕಾಪಾಡಿತುಳ್ಳಿಯ. ಆನಗುಂಡ್, ಈ ಲೋಕತ್‍ಲ್ ವಾಸಮಾಡಿಯಂಡುಳ್ಳಯಿಂಗಳ ಸೋದನೆ ಮಾಡ್‌ವಕಾಯಿತ್ ಈ ಬೂಮಿಲ್ ಎಲ್ಲಾ ಜಾಗತ್‍ಲು ಬಪ್ಪಕುಳ್ಳ ಸೋದನೆರ ಕಾಲತ್‍ಲ್ ನಾನ್ ನಿನ್ನ ಕಾಪಾಡ್‍ವಿ.

ಪ್ರಕಟನೆ 3:10 Iomraidhean Croise

ಮತ್ತಾಯ 24:14

ದೇವಡ ರಾಜ್ಯತ್‍ರ ಈ ನಲ್ಲ ಸುದ್ದಿ ಎಲ್ಲಾ ಜನಕು ಸಾಕ್ಷಿಯಾಯಿತ್ ಪ್ರಚಾರ ಆಯಿತ್‌ಪ್ಪ. ಅಕ್ಕ ಅಂತ್ಯ ಬಪ್ಪ.

ಮತ್ತಾಯ 26:41

ನಿಂಗ ಪರಿಕ್ಷೇಕ್ ಒಳಪಡತನೆಕೆ ಎಚ್ಚರ ಎಡ್‍ತಂಡ್ ಪ್ರಾರ್ಥನೆ ಮಾಡಿ; ಆತ್ಮಕ್ ಕುಶಿ ಉಂಡ್ ಆಚೇಂಗಿ ತಡಿ ತಳ್ಂದಿತ್ ಉಂಡ್‍ೕಂದ್ ಯೇಸು ಎಣ್ಣ್‌ಚಿ.

ಮತ್ತಾಯ 6:13

ನಂಗ ಸೋದನೆಕ್ ಒಳಪಡತನೆಕೆ ನಂಗಳ ಕೕಡ್‌ಂಜ ಕಾಪಾಡ್. ರಾಜ್ಯವು, ಅದಿಕಾರವು, ಮಹಿಮೆಯು ಎಕ್ಕಾಲು ನೀಡದೇ. ಆಮೆನ್.

ಮಾರ್ಕ 14:9

ಬೂಲೋಕತ್‍ಲ್ ಎಲ್ಲೆಲ್ಲಾ ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವ ಅಲ್ಲಿ ಎಲ್ಲಾ ಇವ ಮಾಡ್‌ನದು ಇವಡ ನೆನಪ್‍ಲ್ ಎಣ್ಣುವಾಂದ್ ನಿಂಗಕ್ ನಾನ್ ನೇರಾಯಿತು ಎಣ್ಣುವೀಂದ್ ಎಣ್ಣ್‌ಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 2:1

ಆ ಸಮಯತ್‍ಲ್ ಕೈಸರನಾನ ಔಗುಸ್ತ ರೋಮ್ ದೇಶತ್‍ಲ್ ಜನಸಂಖ್ಯೆ ಕಣಕ್ ಎಡ್‍ಪಕ ಎಲ್ಲಾಡ ಪೆದತ್‍ರ ಲೆಕ್ಕ ಕೊಡ್‍ಪಕ್ ಆಜ್ಞೆ ಮಾಡ್‍ಚಿ.

ಯೋಹಾನ 17:6

ನೀನ್ ಈ ಲೋಕತ್ಂಜ ಗೊತ್ತ್ ಮಾಡಿತ್, ನಾಕ್ ತಂದಯಿಂಗಕ್ ನೀಡ ಪೆದತ್‍ನ ನಾನ್ ಕಾಂಬ್‍ಚಿಟ್ಟಿಯೆ. ಅಯಿಂಗ ನೀಡ ಜನಳಾಯಿತ್ಂಜತ್; ಅಯಿಂಗಳ ನೀನ್ ನಾಕ್ ತಂದಿಯೆ; ಅಯಿಂಗ ನೀಡ ವಾಕ್ಯ ಎಣ್ಣುವನೆಕೆ ಮಾಡ್‍ಚಿ.

ರೋಮ್ 1:8

ಆದ್ಯವಾಯಿತ್, ನಿಂಗ ದೇವಡ ಮೇಲೆ ಬೆಚ್ಚಿತುಳ್ಳ ನಂಬಿಕೆ, ಲೋಕತ್‍ರ ಎಲ್ಲಾ ಜಾಗತ್‍ಲ್ ಗೊತ್ತಾನಗುಂಡ್, ನಿಂಗ ಎಲ್ಲಾರ್‍ಕಾಯಿತ್ ನಾನ್ ಯೇಸು ಕ್ರಿಸ್ತಂಡ ಮೂಲಕ ದೇವಕ್ ವಂದನೆ ಎಣ್ಣ್‌ವಿ.

1 ಕೊರಿಂಥ 10:13

ಎಲ್ಲಾ ಮನುಷ್ಯಂಗಕ್ ಬಪ್ಪ ಸೋದನೆನ ಬುಟ್ಟಿತ್ ಬೋರೆ ಏದ್ ಸೋದನೆಯು ನಿಂಗಕ್ ಬಂದಿತ್ತ್‌ಲ್ಲೆ. ದೇವ ನಂಬಿಕಸ್ತನಾಯಿತುಂಡ್. ನಿಂಗಡ ಶಕ್ತಿಕ್ ಮೀರ್‍ನ ಸೋದನೆಕ್ ನಿಂಗ ಒಳಪಡ್‍ವಕ್ ಅಂವೊ ಬುಡುಲೆ. ಆಚೇಂಗಿ, ಆ ಸೋದನೆಯಿಂಜ ತಪ್ಪ್‌ಚಿಡ್‌ವಕ್ ಬಟ್ಟೆ ಕಾಟಿತಪ್ಪ.

ಎಫೆಸ 6:13

ಆನಗುಂಡ್ ಕೆಟ್ಟ ದಿವಸತ್‍ಲ್ ನಿಂಗ ಅಯಿಂಗಕ್ ಎದ್‍ರ್ ನಿಪ್ಪಕ, ಎಲ್ಲಾನ ಪೂರ್ತಿ ಮಾಡ್‍ನಯಿಂಗಳಾಯಿತ್ ನಿಪ್ಪಕ್ ಶಕ್ತಿ ಉಳ್ಳಯಿಂಗಳಾಯಿತ್ ಇಪ್ಪನೆಕೆ ದೇವಡ ಸರ್ವ ಆಯುದತ್‍ನ ಇಟ್ಟೊಳಿ.

2 ತಿಮೊಥೆಯ 2:12

ನಂಗ ಅಂವೊಂಡ ಕೂಡೆ ಕಷ್ಟಪಟ್ಟತೇಂಗಿ ನಂಗ ಸಹ ಅಂವೊಂಡ ಕೂಡೆ ಆಳು‍ವೆ ಮಾಡ್‌ವ, ನಂಗ ಯೇಸುನ ಗೊತ್ತ್‌ಲ್ಲೇಂದ್ ಎಣ್ಣ್‌ಚೇಂಗಿ ಅಂವೊ ಸಹ ನಂಗಳ ಗೊತ್ತ್‌ಲ್ಲೇಂದ್ ಎಣ್ಣುವ.

ಯಾಕೋಬ 3:12

ನಾಡ ಅಣ್ಣತಮ್ಮಣಂಗಳೇ, ಒರ್ ಅತ್ತಿ ಮರತ್ಂಜ ಆಲಿವ್ ಪಣ್ಣ್ ಬಪ್ಪಕಯ್ಯುವ? ಅಥವ ಒರ್ ದ್ರಾಕ್ಷಿ ಬಳ್ಳಿಯಿಂಜ ಅತ್ತಿಪಣ್ಣ್ ಬಪ್ಪಕಯ್ಯುವ? ಅನ್ನನೆ, ಉಪ್ಪ್ ನೀರ್‌ರ ಜಲತ್‌ಂಜ ಶುದ್ದ ನೀರ್ ಬಪ್ಪುಲೆ.

1 ಪೇತ್ರ 4:12

ನಾಡ ಪ್ರೀತಿರ ಜನಳೇ, ನಿಂಗಕ್ ಎಂತ ಆಯಂಡುಂಡ್‍ೕಂದ್ ಗೇನ ಮಾಡಿಯಂಡ್, ನಿಂಗಡ ಮದ್ಯತ್‍ಲ್ ಆಯಂಡುಳ್ಳ ಕಷ್ಟತ್‍ನ ನೋಟಿತ್, ನಿಂಗ ಬೇಜಾರ್ ಮಾಡತಿ.

2 ಪೇತ್ರ 2:9

ಅನ್ನನೆ ಆಚೇಂಗಿ, ಬಕ್ತಿಯುಳ್ಳಯಿಂಗಳ ಅಯಿಂಗಕ್ ಬಪ್ಪ ಸೋದನೆಯಿಂಜ ಕಾಪಾಡ್‌ವಕು, ಅನೀತಿಯಾನಯಿಂಗಳ ನ್ಯಾಯತೀರ್ಪ್ ನಾಳ್‍ಕತ್ತನೆ ಶಿಕ್ಷೇಲ್ ಬೆಚ್ಚಿತ್‌ಪ್ಪಕು ಒಡೆಯಂಗ್ ಗೊತ್ತುಂಡ್.

ಪ್ರಕಟನೆ 1:9

ನಿಂಗಡ ಅಣ್ಣನು, ಯೇಸುಕಾಯಿತ್ ಬಪ್ಪ ಹಿಂಸೆಕು, ಅಂವೊಂಡ ರಾಜ್ಯಕು, ಅಂವೊಂಡ ಪೊರುಮೆಕು ನಿಂಗಡ ಕೂಡೆ ಪಾಲ್‍ದಾರನಾಯಿತುಳ್ಳ ಯೋಹಾನನಾನ ನಾನ್ ದೇವಡ ವಾಕ್ಯಕಾಯಿತು, ಯೇಸುರ ವಿಷಯತ್ ಸಾಕ್ಷಿಕಾಯಿತು ಪತ್ಮೊಸ್ ಎಣ್ಣುವ ದ್ವೀಪತ್‍ಲ್ ಇಂಜ.

ಪ್ರಕಟನೆ 11:10

ಈ ದಂಡ್ ಪ್ರವಾದಿಯಳು ಬೂಮಿರ ಜನತ್‍ನ ಹಿಂಸೆ ಮಾಡ್‍ನಗುಂಡ್, ಅಯಿಂಗಕಾಯಿತ್ ಬೂಮಿಲ್ ವಾಸ ಮಾಡಿಯಂಡ್ ಉಳ್ಳಯಿಂಗ ದುಂಬ ಕುಶಿಪಟ್ಟಿತ್ ಕೊಂಡಾಡಿತ್ ಒಬ್ಬೊಂಗೊಬ್ಬ ಇನಾಮ್‍ನ ಅಯಿಪ.

ಪ್ರಕಟನೆ 13:10

ದಾರ್ ಜನಳ ಪುಡ್‌ಚಿತ್ ಅಡಿಯಾಳಾಯಿತ್ ಕೊಂಡ್ ಪೋಪ, ಅಯಿಂಗಳ ಸಹ ಅಡಿಯಾಳಾಯಿತ್ ಪುಡ್‍ಚಂಡ್ ಪೋಪ; ಬಾಳ್‌ಯಿಂಜ ಕೊಲ್ಲ್‌ವಂವೊ ಬಾಳ್‍ರಗುಂಡ್ ಚಾವಂಡು. ಇದ್‍ಲ್ ದೇವಡ ಮಕ್ಕಡ ಪೊರುಮೆ ಪಿಂಞ ನಂಬಿಕೆ ಗೊತ್ತಾಪ.

ಪ್ರಕಟನೆ 13:14

ಮಿಂಞತ್‍ರ ಮೃಗತ್‍ರ ಎದ್‍ಕೆ ಗುರ್‌ತ್ ಕಾರ್ಯ ಕಾಂಬ್‍ಚಿಡುವಕ್ ತಾಂಗ್ ಕ್‍ಟ್ಟ್‌ನ ಅದಿಕಾರತ್‍ರಗುಂಡ್, ಬೂಲೋಕತ್‍ಲ್ ಉಳ್ಳ ಜನಳ ಮೋಸ ಮಾಡಿತ್, ಚತ್ತ್ ಪೋಪನೆಕೆ ಗಾಯ ಆಯಿತ್ ವಾಸಿಯಾನ ಮೃಗಕ್ ಒರ್ ವಿಗ್ರಹತ್‍ನ ಮಾಡಂಡೂಂದ್ ಬೂಮಿಲ್ ವಾಸಮಾಡಿಯಂಡುಳ್ಳಯಿಂಗಕ್ ಎಣ್ಣ್‌ಚಿ.

ಪ್ರಕಟನೆ 13:8

ಈ ಲೋಕತ್‍ರ ಸುರುಯಿಂಜ, ಮಿಂಞಲೇ ಬಲಿಯಾಯಿತ್ ಇಂಜ ಕೊರಿಕುಟ್ಟಿಯಾನವೊಂಡ ಜೀವತ್‍ರ ಪುಸ್ತಕತ್‍ಲ್ ಪೆದ ಒಳ್‌ದಿತಿಲ್ಲತ ಎಲ್ಲಾರು ಆ ಮೃಗತ್‍ನ ಆರಾದನೆ ಮಾಡ್‌ವ.

ಪ್ರಕಟನೆ 14:12

ದೇವಡ ಆಜ್ಞೆನ ಪಿಂಞ ಯೇಸುರ ಮೇಲೆ ಉಳ್ಳ ನಂಬಿಕೇನ ಕಾತಂಡ್ ಉಳ್ಳ ದೇವಡ ಮಕ್ಕಡ ಪೊರುಮೆ ಇದ್‍ಲ್ ಗೊತ್ತಾಪಾಂದ್ ಎಣ್ಣ್‌ಚಿ.

ಪ್ರಕಟನೆ 14:6

ಪಿಂಞ ಇಂಞೊರ್ ದೇವದೂತ ಬಾನತ್‍ರ ಮದ್ಯತ್ಂಜ ಪಾರಿತ್ ಬಪ್ಪಾನ ಕಂಡಿಯೆ; ಅಂವೊ ಬೂಮಿಲ್ ವಾಸ ಮಾಡಿಯಂಡುಳ್ಳ ಎಲ್ಲಾ ಜಾತಿಕ್, ಎಲ್ಲಾ ಕುಲಕ್, ಎಲ್ಲಾ ಬಾಷೆ ಪರಿಯುವಯಿಂಗಕ್, ಎಲ್ಲಾ ಜನಕ್ ಅರಿಚಿಡುವಕುಳ್ಳ ದೇವಡ ನಿತ್ಯವಾನ ನಲ್ಲ ಸುದ್ದಿನ ಕೊಂಡ್ ಬಾತ್.

ಪ್ರಕಟನೆ 16:14

ಅಯಿಂಗ ಅದ್ಬುದ ಮಾಡ್‌ವ ಕೂಳಿಯಂಗ; ಬೂಲೋಕತ್‍ಲ್ ಉಳ್ಳ ರಾಜಂಗಡ ಪಕ್ಕ ಪೋಯಿತ್ ಸರ್ವ ಶಕ್ತನಾಯಿತ್ ಉಳ್ಳ ದೇವಡ ಮಹಾ ದಿವಸತ್‍ಲ್ ಆಪ ಯುದ್ದಕ್ ಅಯಿಂಗಳ ಕೂಟ್‍ವಕಾಯಿತ್ ಪೊರಟಿತ್ ಪೋಚಿ.

ಪ್ರಕಟನೆ 17:2

ಅವಡ ಕೂಡೆ ಬೂಮಿರ ರಾಜಂಗ ವೇಶಿತನ ಮಾಡ್‍ಚಿ, ಲೋಕತ್‍ರ ಜನ ಅವಡ ವೇಶಿತನತ್‍ರ ಕಳ್ಳ್‌ನ ಕುಡಿಚಿತ್ ಕಳ್ಳ್‌ರ ಬೋಗತ್‍ಲ್ ಇಪ್ಪನೆಕೆ ಮಾಡ್‍ಚಿ.

ಪ್ರಕಟನೆ 17:8

ನೀನ್ ಕಂಡ ಮೃಗ ಮಿಂಞ ಇಂಜತ್, ಇಕ್ಕ ಇಲ್ಲೆ, ಅದ್ ಪಾತಾಳತ್ಂಜ ಕೊಡಿಕ್ ಪತ್ತಿತ್ ಬಂದಿತ್ ನಾಶ ಆಪ. ಲೋಕ ಸೃಷ್ಟಿ ಆನ ಕಾಲತ್ಂಜ ಜೀವ ಪುಸ್ತಕತ್‍ಲ್ ಪೆದ ಒಳ್‍ದತೆ ಬೂಮಿಲ್ ವಾಸ ಮಾಡಿಯಂಡ್ ಉಳ್ಳ ಜನ, ಮಿಂಞ ಇಂಜದು, ಇಕ್ಕ ಇಲ್ಲತೆ ಪೋನದು, ಇಂಞು ಮಿಂಞಕ್ ಇಪ್ಪ ಮೃಗತ್‍ನ ನೋಟಿತ್ ಆಶ್ಚರ್ಯಪಡುವ.

ಪ್ರಕಟನೆ 2:10

ನೀಕ್ ಬಪ್ಪಕುಳ್ಳ ಕಷ್ಟತ್‍ರ ವಿಷಯತ್ ನೀಕ್ ಏದ್ ಪೋಡಿಯು ಬೋಂಡ; ಇದಾ, ನಿಂಗಳ ಪರೀಕ್ಷೆ ಮಾಡ್‌ವಕಾಯಿತ್ ಸೈತಾನ ನಿಂಗಡಲ್ಲಿ ಚೆನ್ನ ಜನಳ ಜೈಲ್‌ಕ್ ಇಡ್‌ವ, ಪತ್ತ್ ದಿನ ಹಿಂಸೆ ಪಡ್‌ವಿರ. ಆಚೇಂಗಿ ಚಾವಕತ್ತನೆ ನಂಬಿಕಸ್ತಂಗಳಾಯಿತಿರಿ. ಅಕ್ಕ, ಜೀವತ್‍ರ ಕಿರೀಟತ್‍ನ ನೀಕ್ ತಪ್ಪಿ.

ಪ್ರಕಟನೆ 3:8

ನೀಡ ಕ್ರಿಯೆ ನಾಕ್ ಗೊತ್ತುಂಡ್. ಇದಾ, ನಾನ್ ನೀಡ ಮಿಂಞತ್ ದಾರೂ ಮುಚ್ಚ್‌ವಕ್ ಕಯ್ಯತೆ ಒರ್ ತೊರ್‌ಂದ ಪಡಿನ ಬೆಚ್ಚಿತುಳ್ಳ. ಎನ್ನಂಗೆಣ್ಣ್‌ಚೇಂಗಿ, ನೀಕ್ ಚೆನ್ನಂಗೇ ಬಲ ಇಂಜತೇಂಗಿಯು, ನೀನ್ ನಾಡ ತಕ್ಕ್‌ಕ್ ಬಗ್ಗಿತ್, ನನ್ನ ಅಲ್ಲಗೆಳೆಯತೆ ಇಂಜಿಯ.

ಪ್ರಕಟನೆ 6:10

ಅಯಿಂಗ ಬಲ್ಯ ಸದ್ದ್‌ಲ್: ಪವಿತ್ರವಾನ ಸತ್ಯವಂತ ಸರ್ವ ಶಕ್ತಿಯುಳ್ಳ ಒಡೆಯನೇ, ಬೂಮಿಲ್ ವಾಸ ಮಾಡಿಯಂಡುಳ್ಳ ಅಯಿಂಗಡಲ್ಲಿ, ನಂಗಡ ಚೋರೆರ ವಿಷಯತ್ ಎಚ್ಚಕ್ ಕಾಲ ನ್ಯಾಯತೀರ್ಪ್ ಮಾಡತೆ, ನಂಗಳ ಕೊಲೆ ಮಾಡ್‍ನಯಿಂಗಕ್ ಬದ್‍ಲ್ ಶಿಕ್ಷೆ ಕೊಡ್‍ಕತೆ ಇಪ್ಪಿಯಾಂದ್ ಕೂತ್ ಕೊಡ್‍ತತ್.

ಪ್ರಕಟನೆ 8:13

ಪಿಂಞ ಒರ್ ಗರುಡ ಗಾಳಿಲ್ ಪಾರಿಯಂಡ್ ಬಂದಿತ್, ಬಲ್ಯ ಸ್ವರತ್‍ಲ್ ಕೂತ್ ಕೊಡ್‌ತಂಡ್: ಇಂಞು ಮಿಂಞಕ್ ವಾಲಗ ಕೊಂಬ್‍ನ ಊದ್‍ವ ಮೂಂದ್ ದೂತಂಗ ವಾಲಗ ಊದ್‍ವಕಾಪಕ, ಬೂಮಿಲ್ ವಾಸ ಮಾಡಿಯಂಡುಳ್ಳ ಮನುಷ್ಯಂಗಕ್, ಅಯ್ಯೋ! ಅಯ್ಯೋ! ಅಯ್ಯೋಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್.