ಪ್ರಕಟನೆ 20:2 - ಕೊಡವ ಬೈಬಲ್

² ಪಿಶಾಚೀಂದ್ ಕಾಕುವ ಸೈತಾನನಾಯಿತ್ಂಜ ಪಳೆಯ ಪಾಂಬಾಯಿತುಳ್ಳ ಘಟಸರ್ಪತ್‍ನ ಪುಡ್‌ಚಿತ್, ಆಯಿರ ಕಾಲಕ್ ಅದ್‍ನ ಕೆಟ್ಟಿ ಬೆಚ್ಚತ್.

ಪ್ರಕಟನೆ 20:2 Iomraidhean Croise

ಆದ್ಯತ್‌ರ ಪುಸ್ತಕ 3:1

ಯೆಹೋವನಾನ ದೇವ ಸೃಷ್ಟಿ ಮಾಡ್‌ನ ಎಲ್ಲಾ ಕಾಡ್‌ ಪ್ರಾಣಿಯಕಿಂಜ ಪಾಂಬ್ ತಂತ್‌ರ ಬುದ್ದಿ ಉಳ್ಳದಾಯಿತ್‌ಂಜತ್. ಅದ್‌ ಪೊಣ್ಣಾಳ್‌ರ ಪಕ್ಕ ಬಂದಿತ್: ಈ ತೋಟತ್‌ರ ಮರತ್‌ರ ಪಣ್ಣ್‌ಲ್‌ ಒಂದ್‌ ಸಹ ನಿಂಗ ತಿಂಬಕ್ಕಾಗಾಂದ್‌ ದೇವ ನೇರಾಯಿತು ಎಣ್ಣ್‌ಚಾಂದ್‌ ಕ್‍ೕಟತ್.

ಆದ್ಯತ್‌ರ ಪುಸ್ತಕ 3:15

ನೀಕು ಪೊಣ್ಣಾಳ್‌ಕು, ನೀಡ ಸಂತಾನಕು ಪೊಣ್ಣಾಳ್‌ರ ಸಂತಾನಕು ಪಗೆತನ ಉಂಟ್ ಮಾಡ್‌ವಿ. ಅಂವೊ ನೀಡ ಮಂಡೆನ ಜಜ್ಜ್‌ವ, ನೀನ್‌ ಅಂವೊಂಡ ಕಾಲ್‌ರ ಮುಡಿನ ಕಡಿಪಿಯಾಂದ್‌ ದೇವ ಎಣ್ಣ್‌ಚಿ.

ಮತ್ತಾಯ 19:29

ಇದ್‍ಲ್ಲತೆ, ನಾಕಾಯಿತ್ ನಿಂಗಡ ಅಪ್ಪವ್ವನ, ನಿಂಗಡ ಅಣ್ಣತಮ್ಮಣಂಗಳ ಅಕ್ಕತಂಗೆಯಳ, ನಿಂಗಡ ಮನೆನ, ನಿಂಗಡ ತೋಟ ಬೇಲ್‍ನ ಬುಟ್ಟಿತ್ ಬಂದಯಿಂಗಕ್ ನೂರ್ ಪಾಲ್ ಜಾಸ್ತಿ ಕ್‍ಟ್ಟ್‌ವ ಪಿಂಞ ನಿತ್ಯ ಜೀವತ್‍ಲ್ ಪೋಪಕ್ ಹಕ್ಕ್‌ದಾರಂಗಳಾಯಿತ್ ಇಪ್ಪಿರ.

ಮತ್ತಾಯ 8:29

ಅಯಿಂಗ ದಂಡಾಳು ಯೇಸುನ ಕಂಡಿತ್: ದೇವಡ ಮೋಂವೊನೇ ನೀಕ್ ನಂಗಡಗುಂಡ್ ಎಂತ ಆಂಡು? ದೇವ ಬೆಚ್ಚಿತುಳ್ಳ ಸಮಯಕಿಂಜಿ ಮಿಂಞ, ನಂಗಕ್ ಕಷ್ಟ ತಪ್ಪಕಾಯಿತ್ ಬಂದಿಯಾಂದ್ ಕೂತ್ ಕೊಡ್‍ತತ್.

ಮಾರ್ಕ 4:15

ಚೆನ್ನ ಜನ ಬಟ್ಟೇಲ್ ಬುದ್ದ ಕುರುರನೆಕೆ, ದೇವಡ ವಾಕ್ಯತ್‍ನ ಕ್‍ೕಪ ಆಚೇಂಗಿ ಸೈತಾನ ಬಂದಿತ್ ಅದ್‍ನ ಎಡ್‌ತ್‌ರ್‌ವ.

ಮಾರ್ಕ 5:7

ಅಂವೊ ಜೋರಾಯಿತ್ ಕೂತ್ ಕೊಡ್‌ತಂಡ್: ದೇವಾದಿ ದೇವಡ ಮೋಂವೊನಾನ ಯೇಸುವೇ, ನನ್ನಗುಂಡ್ ನೀಕ್ ಎಂತಾಂಡು, ನಾಕ್ ದಯಬೆಚ್ಚಿತ್ ಶಿಕ್ಷೆ ತರತೇಂದ್ ದೇವಡ ಮೇಲೆ ಆಣೇಂದ್ ಎಣ್ಣ್‌ಚಿ.

ಯೋಹಾನ 12:31

ದೇವ ಈ ಲೋಕಕ್ ನ್ಯಾಯತೀರ್ಪ್ ಮಾಡ್‌ವ ಸಮಯ ಇಕ್ಕಲೆ ಬಾತ್. ಈ ಲೋಕತ್‍ರ ಅದಿಪತಿನ ಇಕ್ಕಲೆ ದೇವ ಪೊರಮೆ ಚಾಡಿರ್‍ವ.

ಯೋಹಾನ 16:11

ಈ ಲೋಕಕ್ ನ್ಯಾಯತೀರ್ಪ್ ಕಂಡಿತವಾಯಿತ್ ಬಪ್ಪಾಂದ್ ಕಾಟಿತಪ್ಪ. ಎನ್ನಂಗೆಣ್ಣ್‌ಚೇಂಗಿ, ಈ ಲೋಕತ್‍ರ ಅದಿಕಾರಿನ ದೇವ ಇಕ್ಕಲೆ ನ್ಯಾಯತೀರ್ಪ್ ಮಾಡಿಯತ್.

ರೋಮ್ 16:20

ಸಮಾದಾನತ್‍ರ ದೇವ ಬೆರಿಯ ಸೈತಾನನ ನಿಂಗಡ ಕಾಲ್‍ರ ಅಡಿಲ್ ಜಜ್ಜಿರ್‌ವ. ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ ನಿಂಗಡ ಕೂಡೆ ಇಕ್ಕಡ್. ಆಮೆನ್.

ಇಬ್ರಿಯ 2:14

ಆನಗುಂಡ್, ಮಕ್ಕ ಚೋರೆ ಪಿಂಞ ತಡಿ ಉಳ್ಳಂಗಾಯಿತ್ ಇಪ್ಪಕ ಅಂವೊನು ಸಹ, ಚೋರೆ ಪಿಂಞ ತಡಿ ಉಳ್ಳ ಮನುಷ್ಯನಾಯಿತ್ ಆಚಿ; ಚಾವ್‍ರ ಅದಿಕಾರಿಯಾಯಿತುಳ್ಳ ಸೈತಾನನ ತಾಂಡ ಚಾವ್‍ರಗುಂಡೇ ನಾಶ ಮಾಡ್‍ಚಿ.

1 ಪೇತ್ರ 5:8

ತನ್ನಡಕ್ಕ ಉಳ್ಳಯಿಂಗಳಾಯಿತ್, ಎಚ್ಚರತ್ ಇಪ್ಪಯಿಂಗಳಾಯಿತ್ ಇರಿ. ನಿಂಗಡ ವಿರೋದಿಯಾನ ಸೈತಾನ, ಕೂತ್ ಕೊಡ್‍ಪ ಸಿಂಹತ್‍ರನೆಕೆ ದಾರ್‌ನ ಮುಗ್ಗಂಡೂಂದ್ ಸುತ್ತಿಯಂಡ್ ನೋಟಿಯಂಡುಂಡ್.

2 ಪೇತ್ರ 2:4

ಪಾಪ ಮಾಡ್‍ನ ಪರಲೋಕತ್‍ಲ್ ಇಂಜ ದೂತಂಗಳ ಸಹ ದೇವ ಬುಟ್ಟಿತ್‌ಲ್ಲೆ, ಅಯಿಂಗಳ ನರಕಕ್ ಅಯಿಚಿತ್, ಇರ್‌ಟಾನ ಕುಂಡ್‍ಲ್ ತಳ್ಳಿತ್ ನ್ಯಾಯತೀರ್ಪ್ ಕೊಡ್‍ಪಕಾಯಿತ್ ಬೆಚ್ಚಿತುಂಡ್.

ಯೂದ ಒಳ್‍ದ್‍ನ ಕಾಗದ 1:6

ಅಯಿಂಗಯಿಂಗಡ ಅದಿಕಾರತ್‍ರ ಸ್ತಾನತ್‍ನ ಕಾಪಾಡತೆ, ಅಯಿಂಗಕ್ ದೇವ ತಂದ ಜಾಗತ್‍ನ ಬುಟ್ಟಿತ್ ಪೋನ ಪರಲೋಕತ್‍ಲ್ ಇಂಜ ಚೆನ್ನ ದೂತಂಗಳ, ಅಂವೊ ಮಹಾ ದಿವಸತ್‍ರ ತೀರ್ಪ್‌ಕಾಯಿತ್ ಅಯಿಂಗಳ ನಿತ್ಯ ಸರ್ಪಣಿಲ್ ಕೆಟ್ಟಿತ್ ಇರ್‌ಟ್‌ಲ್ ಬೆಚ್ಚಿತ್ ಉಂಡ್.

ಪ್ರಕಟನೆ 12:13

ಘಟಸರ್ಪ ಬೂಮಿಕ್ ಬುದ್ದತ್‍ೕಂದ್ ಗೊತ್ತಾನಗುಂಡ್, ಆ ಕ್‍ಣ್ಣ ಕುಂಞಿನ ಪೆತ್ತ ಪೊಣ್ಣಾಳ್‍ನ ಹಿಂಸೆಪಡ್‍ತ್‌ವಕ್ ಸುರು ಮಾಡ್‍ಚಿ.

ಪ್ರಕಟನೆ 12:15

ಆ ಪಾಂಬ್ ಆ ಪೊಣ್ಣಾಳ್‍ನ ಜಲಪ್ರಳಯ ಒಕ್ಕಿಯಂಡ್ ಪೋಂಡೂಂದ್ ತಾಂಡ ಬಾಯಿಂಜ ನೀರ್‌ರ ಪೊಳೆರನೆಕೆ ಬೂಕಿತ್ ಬುಟ್ಟತ್.

ಪ್ರಕಟನೆ 12:17

ಅಕ್ಕ, ಆ ಘಟಸರ್ಪಕ್ ಆ ಪೊಣ್ಣಾಳ್‍ರ ಮೇಲೆ ಬಾರಿ ಚೆಡಿ ಬಂದಿತ್, ದೇವಡ ಆಜ್ಞೆಕ್ ತಗ್ಗಿತ್ ನಡ್‍ಪಯಿಂಗಳು, ಯೇಸು ಕ್ರಿಸ್ತಂಡ ಸಾಕ್ಷಿ ಉಳ್ಳಯಿಂಗಳು ಆನ ಅವಡ ಸಂತಾನಕಾರಂಗಳಾನ ಬೋರೆಯಿಂಗಡ ಕೂಡೆ ಯುದ್ದ ಮಾಡ್‌ವಕ್ ಪೋಚಿ.

ಪ್ರಕಟನೆ 12:3

ಅಕ್ಕ, ಬಾನತ್‍ಲ್ ಇಂಞೊರ್ ಗುರ್‍ತ್‍ನ ಕಾಂಬಕಾಚಿ; ಅದ್ ಚೋಂದಿತ್ ಇಂಜ ಬಲ್ಯ ಘಟಸರ್ಪವಾಯಿತ್ಂಜತ್. ಅದ್ಂಗ್ ಏಳ್ ಮಂಡೆ, ಪತ್ತ್ ಕೊಂಬ್ ಪಿಂಞ ಅದ್ಂಡ ಮಂಡೆರ ಮೇಲೆ ಏಳ್ ಕಿರೀಟ ಇಂಜತ್.

ಪ್ರಕಟನೆ 12:4

ಆಂಡ ಬಾಲ್ ಬಾನತ್‍ಲ್ ಉಳ್ಳ ನಕ್ಷತ್ರತ್‌ಲ್ ಮೂಂದ್‍ಲ್ ಒರ್ ಬಾಗತ್‍ನ ಬಲ್‍ಚಿತ್ ಬೂಮಿಕ್ ಇಟ್ಟತ್; ಪೆರುವಕ್ ಉಳ್ಳ ಆ ಪೊಣ್ಣಾಳ್, ಪೆರುವ ಆ ಗಳಿಗೆಲೇ ಆ ಕುಂಞಿನ ಮುಗ್ಗ್‌ವಕ್ ಈ ಘಟಸರ್ಪ ಪೊಣ್ಣಾಳ್‍ರ ಮಿಂಞತ್ ನಿಂದಂಡಿಂಜತ್.

ಪ್ರಕಟನೆ 12:9

ಬೂಲೋಕತ್‍ನ ಎಲ್ಲಾ ಮೋಸ ಮಾಡಿಯಂಡಿಂಜ, ಪಿಶಾಚೀಂದೂ ಸೈತಾನಾಂದೂ ಎಣ್ಣಿಯಂಡಿಂಜ ಪಳೆಯ ಘಟಸರ್ಪತ್‍ನ ಬೂಮಿಕ್ ಬೂವನೆಕೆ ದೂಡ್‍ಚಿ. ಅದ್ಂಡಕೂಡೆ ಇಂಜ ದೂತಂಗಳ ಸಹ ಬೂಮಿಕ್ ದೂಡಿರ್‌ತ್.

ಪ್ರಕಟನೆ 13:2

ನಾನ್ ಕಂಡ ಮೃಗ ಚಿರತೆರನೆಕೆ ಇಂಜತ್; ಅದ್ಂಡ ಕಾಲ್ ಕರಡಿರ ಕಾಲ್‍ರನೆಕೆ ಇಂಜತ್, ಅದ್ಂಡ ಬಾಯಿ ಸಿಂಹತ್‍ರ ಬಾಯಿರನೆಕೆ ಇಂಜತ್; ಅದ್ಂಗ್ ಘಟಸರ್ಪ ತಾಂಡ ಶಕ್ತಿನ, ಸಿಂಹಾಸನತ್‍ನ ಪಿಂಞ ಮಾಹಾ ಅದಿಕಾರತ್‍ನ ಕೊಡ್‍ತತ್.

ಪ್ರಕಟನೆ 13:4

ಆ ಮೃಗಕ್ ಇನ್ನತಾನ ಅದಿಕಾರತ್‍ನ ಕೊಡ್‍ತ ಘಟಸರ್ಪತ್‍ನ ಆರಾದನೆ ಮಾಡ್‍ಚಿ. ಅದಲ್ಲತೆ: ಆ ಮೃಗಕ್ ತಕ್ಕ ಸಮವಾಯಿತ್ ದಾರ್ ಉಂಡ್? ಅದ್ಂಡಕೂಡೆ ಯುದ್ದ ಮಾಡ್‌ವಕ್ ದಾರ್‌ಕ್ ಆಪಾಂದ್ ಎಣ್ಣಿಯಂಡ್ ಮೃಗತ್‍ನ ಸಹ ಆರಾದನೆ ಮಾಡ್‍ಚಿ.

ಪ್ರಕಟನೆ 20:10

ಇದ್‍ಲ್ಲತೆ, ಅಯಿಂಗಳ ಮರ್‍ಳ್ ಮಾಡ್‍ನ ಸೈತಾನನ, ಮೃಗತ್‍ನ, ಕಳ್ಳ ಪ್ರವಾದಿನ ಪ್ರವಾದಿ ಬೆಚ್ಚಿತ್ಂಜ ತಿತ್ತ್ ಕತ್ತಿಯಂಡ್ ಉಳ್ಳ ಗಂಧಕತ್‍ರ ಕಡಲ್‍ಲ್ ಇಟ್ಟಿರುವ. ಅಯಿಂಗ ಅಲ್ಲಿ ಪೋಲ್ ಬಯಿಟಾಯಿತ್ ಎಕ್ಕಾಲು ಹಿಂಸೆ ಪಟ್ಟಂಡಿಪ್ಪ.

ಪ್ರಕಟನೆ 20:7

ಆ ಆಯಿರ ಕಾಲ ನೆರವೇರುವಕ, ಸೈತಾನ ತಾಂಡ ಕೆಟ್ಟ್‌ಯಿಂಜ ಬುಡ್‍ಗಡೆ ಆಪ.

ಪ್ರಕಟನೆ 9:11

ಅಯಿಂಗಕ್ ಒರ್ ರಾಜ ಇಂಜತ್, ಅಂವೊ ಪಾತಾಳತ್‍ರ ದೂತ; ಇಬ್ರಿಯ ಬಾಷೆಲ್ ಅಬದ್ದೋನಾಂದೂ, ಗ್ರೀಕ್ ಬಾಷೆಲ್ ಅಪೊಲ್ಲುವೋನಾಂದೂ ಅಂವೊಂಗ್ ಪೆದ ಉಂಡ್.