ಪ್ರಕಟನೆ 16:5 - ಕೊಡವ ಬೈಬಲ್

⁵ ಅಲ್ಲಿಂಜ ನೀರ್‌ರ ದೂತ: ಇಪ್ಪಂವೊನು, ಇಂಜಂವೊನು ಪವಿತ್ರವಾಯಿತುಳ್ಳ ದೇವನೇ, ಇನ್ನನೆ ನ್ಯಾಯತೀರ್ಪ್ ಕೊಡ್‍ಪಕ್ ನೀನ್ ನೀತಿವಂತಂವೊನಾಯಿತುಳ್ಳಿಯ.

ಪ್ರಕಟನೆ 16:5 Iomraidhean Croise

ಆದ್ಯತ್‌ರ ಪುಸ್ತಕ 18:25

ನೀನ್‌ ನೇರಾಯಿತು ದುಷ್ಟಂಗಡ ಕೂಡೆ ನೀತಿವಂತಯಿಂಗಳ ನಾಶ ಮಾಡುಲೆ. ನೀನ್‌ ಎನ್ನನೆ ದುಷ್ಟಂಗಳ ಪಿಂಞ ನೀತಿವಂತಯಿಂಗಳ ಒರೇ ಲೆಕ್ಕತ್‌ ನೋಟ್‌ವಕಯ್ಯು. ನೀನ್‌ ನೇರಾಯಿತು ಅನ್ನನೆ ಮಾಡುಲೆ! ಬೂಮಿರ ನ್ಯಾಯಾದಿಪತಿ ನ್ಯಾಯವಾನದ್‌ನೇ ಮಾಡುವಲ್ಲಾಂದ್‌ ಎಣ್ಣ್‌ಚಿ.

ಯೋಹಾನ 17:25

ನೀತಿವಂತ ಅಪ್ಪನೇ! ಈ ಲೋಕತ್‍ರ ಜನಕ್ ನೀನ್ ದಾರ್‍ೕಂದ್ ಗೊತ್ತ್‌ಲ್ಲೆ, ಆಚೇಂಗಿ ನಾಕ್ ನಿನ್ನ ಗೊತ್ತುಂಡ್; ನೀನ್ ನನ್ನ ಅಯಿಚದ್ ಈಂಗಕೂ ಗೊತ್ತುಂಡ್.

ರೋಮ್ 2:5

ಆಚೇಂಗಿ, ನಿಂಗಡ ಕಠಿಣ ಹೃದಯತ್‍ರಗುಂಡ್ ಪಿಂಞ ವಾಸಿ ಆಕತ ಹೃದಯತ್‍ರಗುಂಡ್, ನೀತಿಯುಳ್ಳ ತೀರ್ಪ್ ತಪ್ಪ ದೇವಡ ಬಲ್ಯ ಚೆಡಿರ ದಿವಸತ್‍ಲ್, ನಿಂಗ ನಿಂಗಕಾಯಿತ್ ದೇವಡ ಬಲ್ಯ ಚೆಡಿನ ಕೂಟಿ ಬೆಚ್ಚಂಡುಳ್ಳಿರಲ್ಲ?

ರೋಮ್ 3:5

ನಂಗಡ ಅನೀತಿ ದೇವಡ ನೀತಿನ ಕಾಟ್‍ಚೇಂಗಿ, ನಂಗ ಎಂತ ಎಣ್ಣುವಕ್ ಕಯ್ಯು? ಶಿಕ್ಷೆ ತಪ್ಪ ದೇವ ಅನೀತಿವಂತಂವೊನ? (ನಾನ್ ಇದ್‍ನ, ಮನುಷ್ಯ ರೀತಿಲ್ ತಕ್ಕ್ ಪರ್ಂದಂಡುಳ್ಳ).

ಪ್ರಕಟನೆ 1:4

ಆಸ್ಯ ಪ್ರಾಂತ್ಯತ್‍ಲ್ ಉಳ್ಳ ಏಳ್ ಸಬೇಕ್ ಯೋಹಾನ ಒಳ್‍ದ್‍ವದ್ ಎಂತ ಎಣ್ಣ್‌ಚೇಂಗಿ: ಇಕ್ಕ ಇಪ್ಪಂವೊನು, ಮಿಂಞ ಇಂಜಂವೊನು, ಮಿಂಞಕ್ ಬಪ್ಪಕುಳ್ಳಂವೊನು ಆಯಿತುಳ್ಳ ಯೇಸು ಕ್ರಿಸ್ತಂಡ ಕೃಪೆ ಪಿಂಞ ಸಮಾದಾನ ನಿಂಗಕ್ ಕ್‍ಟ್ಟಡ್. ಯೇಸು ತಾಂಡ ಸಿಂಹಾಸನತ್‍ರ ಮಿಂಞತ್‌ ವಾಸ ಮಾಡಿಯಂಡುಳ್ಳ ಏಳ್ ಆತ್ಮತ್‍ರಗುಂಡ್,

ಪ್ರಕಟನೆ 1:8

ನಾನ್ ಅಲ್ಫಾವು ಓಮೆಗಾವು, ಆದ್ಯವು ಆಕೀರು, ಇಕ್ಕ ಇಪ್ಪಂವೊನು, ಮಿಂಞ ಇಂಜಂವೊನು, ಮಿಂಞಕ್ ಬಪ್ಪಕುಳ್ಳಂವೊನು ಸರ್ವ ಶಕ್ತಿವಂತಂವೊನು ಆಯಿತುಳ್ಳ ಒಡೆಯನಾನ ದೇವ ಎಣ್ಣಿಯಂಡ್ ಉಳ್ಳ.

ಪ್ರಕಟನೆ 11:17

ಇಕ್ಕ ಇಪ್ಪಂವೊನೂ, ಮಿಂಞ ಇಂಜಂವೊನು ಸರ್ವ ಶಕ್ತಿವಂತಂವೊನು ಆಯಿತುಳ್ಳ, ಒಡೆಯನಾನ ದೇವನೇ, ನಿನ್ನ ನಂಗ ಆರಾದನೆ ಮಾಡ್‌ವ. ನೀನ್ ಬಲ್ಯ ಶಕ್ತಿರಗುಂಡ್ ರಾಜ್ಯಬಾರ ಮಾಡ್‌ವ ರಾಜನಾಯಿತುಳ್ಳಿಯ.

ಪ್ರಕಟನೆ 16:4

ಮೂಂದನೆ ದೂತ ತಾಂಡ ಪಾತ್ರತ್‍ಲ್ ಉಳ್ಳದ್‍ನ ಪೊಳೆಕ್ ಪಿಂಞ ನೀರ್‌ರ ಬುಗ್ಗೆಕ್ ಬೂಕ್‍ಚಿ. ಅಕ್ಕ ಅದ್ ಚೋರೆಯಾಯಿತ್ ಬದ್‍ಲ್ ಆಚಿ.

ಪ್ರಕಟನೆ 16:7

ಬಲಿಪೀಠತ್‍ಲ್ ಇಂಜ ಬೋರೆ ಒಬ್ಬ: ಅಕ್ಕು, ಸರ್ವ ಶಕ್ತಿವಂತಂವೊನಾಯಿತುಳ್ಳ ದೇವಾದಿ ದೇವನೇ, ನೀಡ ನ್ಯಾಯತೀರ್ಪ್ ಸತ್ಯವು ನೀತಿವಂತದೂಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್.

ಪ್ರಕಟನೆ 19:2

ತಾಂಡ ವ್ಯಬಿಚಾರತ್‍ರಗುಂಡ್ ಬೂಮಿನ ಪಾಳ್ ಮಾಡ್‍ನ, ಮಹಾ ವ್ಯಬಿಚಾರಿಕ್ ದೇವ ಶಿಕ್ಷೆ ಕೊಡ್‍ತತ್. ಅಂವೊಂಡ ಸೇವಕಂಗಡ ಚೋರೆಕಾಯಿತ್ ಅವಡ ಪಕ್ಕ ಅಂವೊ ಬದ್‍ಲ್ ಮಾಡ್‍ನಗುಂಡ್, ಅಂವೊಂಡ ನ್ಯಾಯತೀರ್ಪ್ ಸತ್ಯವಾನದು ನೀತಿಯುಳ್ಳದಾಯಿತು ಉಂಡ್.

ಪ್ರಕಟನೆ 4:8

ಆ ನಾಲ್ ಜೀವ ಪ್ರಾಣಿಯ ಒಂದೊಂದಂಗು ಆರ್ ಆರ್ ರೆಕ್ಕೆ ಇಂಜತ್. ರೆಕ್ಕೆರ ಸುತ್ತ್‌ಲ್ ಪಿಂಞ ಒಳ್‍ಕ್ ಕಣ್ಣ್ ದುಂಬಿತ್ಂಜತ್. ಆ ಜೀವ ಪ್ರಾಣಿಯ: ಇಂಜಂವೊನು, ಇಪ್ಪಂವೊನು ಬಪ್ಪಂವೊನು ಆಯಿತುಳ್ಳ ಸರ್ವ ಶಕ್ತಿ ಉಳ್ಳ ದೇವನಾನ ಒಡೆಯ, ಪವಿತ್ರವಾನಂವೊ, ಪವಿತ್ರವಾನಂವೊ, ಪವಿತ್ರವಾನಂವೋಂದ್ ಎಡೆಬುಡತೆ ಬಯಿಟ್ ಪೋಲು ಎಣ್ಣಿಯಂಡೇ ಇಂಜತ್.

ಪ್ರಕಟನೆ 6:10

ಅಯಿಂಗ ಬಲ್ಯ ಸದ್ದ್‌ಲ್: ಪವಿತ್ರವಾನ ಸತ್ಯವಂತ ಸರ್ವ ಶಕ್ತಿಯುಳ್ಳ ಒಡೆಯನೇ, ಬೂಮಿಲ್ ವಾಸ ಮಾಡಿಯಂಡುಳ್ಳ ಅಯಿಂಗಡಲ್ಲಿ, ನಂಗಡ ಚೋರೆರ ವಿಷಯತ್ ಎಚ್ಚಕ್ ಕಾಲ ನ್ಯಾಯತೀರ್ಪ್ ಮಾಡತೆ, ನಂಗಳ ಕೊಲೆ ಮಾಡ್‍ನಯಿಂಗಕ್ ಬದ್‍ಲ್ ಶಿಕ್ಷೆ ಕೊಡ್‍ಕತೆ ಇಪ್ಪಿಯಾಂದ್ ಕೂತ್ ಕೊಡ್‍ತತ್.