2 ತಿಮೊಥೆಯ 2:25 - ಕೊಡವ ಬೈಬಲ್

²⁵ ನೀಡ ಬೋದನೆಕ್ ಎದ್‍ರ್ ನಿಪ್ಪಯಿಂಗಕ್ ಸಮಾದಾನತ್‍ಲ್ ಅಯಿಂಗಡ ತಪ್ಪ್‌ನ ಎಣ್ಣಿ ಕೊಡ್‍ಪಂವೊನಾಯಿತಿರಂಡು. ಎನ್ನಂಗೆಣ್ಣ್‌ಚೇಂಗಿ ಒರ್ ಸಮಯ ಅಯಿಂಗ ಪಶ್ಚಾತಾಪ ಪಟ್ಟಿತ್, ಸತ್ಯತ್‍ನ ಅರಿಂಜಂಡ್ ಪುನಃ ದೇವಡ ಪಕ್ಕ ಬಪ್ಪಕ್ ದೇವ ಒರ್ ಸನ್ನಿವೇಶ ಕೊಡ್‍ಪ.

2 ತಿಮೊಥೆಯ 2:25 Iomraidhean Croise

ಮತ್ತಾಯ 11:29

ನಾನ್ ಶಾಂತವು, ತಾಳ್ಮೆ ಮನಸ್ಸು ಉಳ್ಳಂವೊ. ನಾಡ ನೊಗತ್‌ನ ನಿಂಗ ಎಡ್‍ತಂಡ್, ನಾನ್ ಎಣ್ಣುವಾನ ಪಡಿಚೋಳಿ; ಅಕ್ಕ ನಿಂಗಡ ಆತ್ಮಕ್ ಆರಾಮ್ ಕ್‍ಟ್ಟುವ.

ಮತ್ತಾಯ 21:32

ದೀಕ್ಷಾಸ್ನಾನ ತಪ್ಪ ಯೋಹಾನ ನಿಂಗಕ್ ನೀತಿರ ಬಟ್ಟೇನ ಕಾಟ್‍ಚಿ, ನಿಂಗ ಅಂವೊನ ನಂಬಿತ್‌ಲ್ಲೆ. ಆಚೇಂಗಿ, ಕಂದಾಯ ಎಡ್‍ಪಯಿಂಗ, ವೇಶಿಯ ಅಂವೊಂಡ ಬೋದನೆನ ನಂಬ್‍ಚಿ. ಇದ್‍ನೆಲ್ಲಾ ನಿಂಗ ಕಂಡಿತ್ ಉಂಡೇಂಗಿಯು ನಿಂಗ ನಂಬಿತು ಇಲ್ಲೆ ದೇವಡ ಪಕ್ಕ ಪಾಪಕಾಯಿತ್ ಪಶ್ಚಾತಾಪ ಪಟ್ಟಿತ್ ತಿರ್‌ಗಿತು ಇಲ್ಲೆ.

ಮಾರ್ಕ 1:15

ಕಾಲ ಪೂರ್ತಿ ಆಚಿ, ದೇವಡ ರಾಜ್ಯ ಬೆರಿಯ ಬಪ್ಪ. ನಿಂಗಡ ಪಾಪಕಾಯಿತ್ ಪಶ್ಚಾತಾಪ ಪಟ್ಟಿತ್, ದೇವಡ ನಲ್ಲ ಸುದ್ದಿನ ನಂಬೀಂದ್ ಎಣ್ಣ್‌ಚಿ.

ಯೋಹಾನ 5:34

ನಾಕ್ ಮನುಷ್ಯಂಗಡಿಂಜ ಸಾಕ್ಷಿ ಬೋಂಡ. ಆಚೇಂಗಿ, ನಿಂಗಕ್ ರಕ್ಷಣೆ ಕ್‍ಟ್ಟುವಕಾಯಿತೇ ನಾನ್ ಈ ತಕ್ಕ್ ಪರ್ಂದಂಡುಂಡ್.

ಅಪೊಸ್ತಲ 11:18

ಇದ್‍ನೆಲ್ಲ ಅಯಿಂಗ ಕ್‍ೕಪಕ: ಅನ್ನನೆ ಆಚೇಂಗಿ, ದೇವ ಯೆಹೂದ್ಯರಲ್ಲತ ಬೋರೆ ಜಾತಿಯಂಗಕು, ಅಯಿಂಗ ತಂಗಡ ಪಾಪತ್ಂಜ ತಿರ್‌ಗಿತ್, ಯೇಸುನ ನಂಬ್‍ಚೇಂಗಿ, ನಿತ್ಯ ಜೀವತ್‍ನ ಪಡೆಯುವಕ್ ಒರ್ ಅವಕಾಶ ಕೊಡ್‍ತಿತುಂಡ್‍ೕಂದ್ ಎಣ್ಣಿತ್ ಒಂದು ಎಣ್ಣತೆ ದೇವನ ತುದಿಚತ್.

ಅಪೊಸ್ತಲ 2:38

ಪೇತ್ರ ಅಯಿಂಗಕ್: ನಿಂಗಡ ಪಾಪಕ್ ಪರಿಹಾರ ಕ್‍ಟ್ಟ್‌ವಕಾಯಿತ್ ನಿಂಗ ಒಬ್ಬೊಬ್ಬನು ದೇವಡ ಪಕ್ಕ ಪಶ್ಚಾತಾಪ ಪಟ್ಟಿತ್, ಯೇಸುರ ಪೆದತ್‍ಲ್ ದೀಕ್ಷಾಸ್ನಾನ ಎಡ್‌ತೊಳಿ. ಅಕ್ಕ ನಿಂಗ ಪವಿತ್ರಾತ್ಮಂಡ ವರತ್‍ನ ಪಡೆಯುವಿರ.

ಅಪೊಸ್ತಲ 20:21

ಪಾಪತ್‍ನೆಲ್ಲ ಬುಟ್ಟಿತ್ ದೇವಡ ಪಕ್ಕ ಕಂಡಿತವಾಯಿತ್ ತಿರ್‍ಗಂಡೂಂದು, ಒಡೆಯನಾನ ಯೇಸು ಕ್ರಿಸ್ತಂಡ ಮೇಲೆ ನಂಬಿಕೆ ಇಡಂಡೂಂದು, ಯೆಹೂದ್ಯಂಗಕು ಯೆಹೂದ್ಯ ಅಲ್ಲತ ಜನಕು ಸಾಕ್ಷಿಯಾಯಿತ್ ಬೋದನೆ ಮಾಡ್‍ನಂವೊನಾಯಿತ್ಂಜ್.

ಅಪೊಸ್ತಲ 5:21

ಅಪೊಸ್ತಲಂಗ ಅದ್‍ನ ಕ್‍ೕಟಿತ್, ದೇವದೂತ ಎಣ್ಣ್‌ನನೆಕೆ, ಪೊಲಾಕ ನೇರತೆ ದೇವಾಲಯತ್‍ರ ಒಳ್‍ಕ್ ಪೋಯಿತ್ ಜನಕ್ ಬೋದನೆ ಕೊಡ್‍ಪಕ್ ಸುರು ಮಾಡ್‍ಚಿ. ಅಕ್ಕಣೆಕ್, ಮಹಾ ಯಾಜಕನು ಪಿಂಞ ಅಂವೊಂಡ ಕೂಡೆ ಇಂಜಯಿಂಗಳು, ಯೆಹೂದ್ಯಂಗಡ ಆಲೋಚನೆ ಸಬೆರ ಅದಿಕಾರಿಯಂಗಳ ಪಿಂಞ ಇಸ್ರಾಯೇಲ್‍ರ ಪೆರಿಯಯಿಂಗಳ ಕಾಕಿತ್, ಅಪೊಸ್ತಲಂಗಳ ಸೆರೆಮನೆಯಿಂಜ ಕಾಕಿಯಂಡ್ ಬಪ್ಪಕ್ ಎಣ್ಣ್‌ಚಿ.

ಅಪೊಸ್ತಲ 5:31

ಇಸ್ರಾಯೇಲ್‍ರ ಜನ ಪಶ್ಚಾತಾಪ ಪಡ್‍ವಕಾಯಿತ್ ಪಿಂಞ ಅಯಿಂಗಡ ಪಾಪಕ್ ಪರಿಹಾರತ್‍ನ ಕೊಡ್‍ಪಕಾಯಿತ್ ಅಂವೊನ ಅದಿಪತಿಯಾಯಿತು ರಕ್ಷಕನಾಯಿತು ತಾಂಡ ಬಲ್‌ತೆ ಕೈಯಿರಗುಂಡ್ ಕೊಡಿಕ್ ಕೊಂಡ್ ಪೋಚಿ.

ಅಪೊಸ್ತಲ 8:22

ಆನಗುಂಡ್ ಇಕ್ಕ ನೀನ್ ಕ್‍ೕಟದ್‍ನೆಲ್ಲ ಬುಟ್ಟಿತ್ ದೇವಡ ಪಕ್ಕ ಪಶ್ಚಾತಾಪ ಪಟ್ಟಿತ್ ಒಡೆಯಂಡ ಪಕ್ಕ ಪ್ರಾರ್ಥನೆ ಮಾಡ್; ನೀಡ ಹೃದಯತ್‍ರ ಗೇನತ್‍ನ ಅಂವೊ ಮನ್ನಿಚಿಡ್‌ವಕ್ ಆಪ.

ಗಲಾತ್ಯ 6:1

ನಾಡ ಅಣ್ಣತಮ್ಮಣಂಗಳೇ, ದೇವಡ ಮಕ್ಕಡಡೆಲ್ ಒಬ್ಬ ಪಾಪ ಮಾಡ್‍ನದ್ ಗೊತ್ತಾಯಿತ್, ನಿಂಗ ಅಂವೊನ ಪುಡ್‌ಚತೇಂಗಿ, ದೇವಡ ಆತ್ಮತ್‍ನಗುಂಡ್ ನಡ್‍ಪಯಿಂಗಳಾನ ನಿಂಗ, ಶಾಂತ ಗುಣತ್‍ಲ್ ಅಂವೊನ ಚಾಯಿ ಮಾಡಂಡು. ಅದೇ ಸಮಯತ್‍ಲ್ ನಿಂಗ ಸಹ ಅದೇ ಪಾಪತ್‍ಲ್ ಬೂವತನೆಕೆ ಎಚ್ಚರತ್‍ಲ್ ಇರಂಡು.

1 ತಿಮೊಥೆಯ 2:4

ಎಲ್ಲಾ ಜನಕು ರಕ್ಷಣೆ ಕ್‍ಟ್ಟಂಡೂಂದು, ಎಲ್ಲಾರ್‌ಕು ಸತ್ಯ ಗೊತ್ತಾಂಡೂಂದು ಉಳ್ಳದೇ ಅಂವೊಂಡ ಚಿತ್ತವಾಯಿತುಂಡ್.

1 ತಿಮೊಥೆಯ 6:11

ಆಚೇಂಗಿ, ದೇವಡ ಮನುಷ್ಯನಾನ ನೀನ್ ಇದ್‍ನೆಲ್ಲಾ ಬುಟ್ಟಿತ್ ಓಡಿ ಪೋಯಿತ್, ನೀತಿನ, ದೇವಡ ಬಕ್ತಿನ, ನಂಬಿಕೇನ, ಪ್ರೀತಿನ, ತಾಳ್ಮೆನ, ಶಾಂತ ಗುಣತ್‍ನ ಸಂಪಾದನೆ ಮಾಡ್‌ವಕ್ ಪೇಚಾಡ್.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 1:1

ದೇವಡ ಸೇವಕನಾಯಿತು, ಯೇಸು ಕ್ರಿಸ್ತಂಡ ಅಪೊಸ್ತಲನಾಯಿತು ಉಳ್ಳ ಪೌಲನಾನ ನಾನ್, ನಂಗಕುಳ್ಳ ಒರೇ ತರ ನಂಬಿಕೇರೆ ಮೂಲಕ ಕ್ರಿಸ್ತನಗುಂಡ್ ನಾಕ್ ನೇರಾನ ಮೋಂವೊನಾಯಿತ್ ಉಳ್ಳ ತೀತಂಗ್ ಒಳ್‍ದ್‍ವ ಕಾಗದ ಇದ್.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 3:2

ಅಯಿಂಗ ದಾರ್‌ನು ಕೆಟ್ಟಯಿಂಗಾಂದ್ ಎಣ್ಣತೆ, ದಾಡ ಕೂಡೆಯು ಜಗಳ ಮಾಡತೆ, ಎಕ್ಕಾಲು ಬೋರೆಯಿಂಗಡ ವಿಷಯತ್‍ನ ಬಲ್ಯದಾಯಿತ್ ನೋಟ್‌ವಯಿಂಗಳಾತು, ನೇರಾನ ತಾಳ್ಮೆನ ಎಲ್ಲಾ ಜನಕ್ ಕಾಟಂಡೂಂದ್ ಗೇನ ಮಾಡ್‍ಚಿಡ್.

ಯಾಕೋಬ 1:17

ಎಲ್ಲಾ ನಲ್ಲದು ಪಿಂಞ ಪೂರ್ತಿಯಾಯಿತುಳ್ಳ ಏದ್ ಇನಾಮು ಬಾನತ್‌ರ ಬೊಳಿನ ಸೃಷ್ಟಿ ಮಾಡ್‌ನ, ಪರಲೋಕತ್‌ಲ್‌ ಉಳ್ಳ ಅಪ್ಪನಾನ ದೇವಡಯಿಂಜ ಇಳಿಂಜಿ ಬಂದಂಡುಂಡ್. ನಳ ಅಪ್ಪರ ಇಪ್ಪರ ಪೋಪನೆಕೆ ಅಂವೊ ಬದ್‍ಲಾಪುಲೆ.

1 ಪೇತ್ರ 3:15

ಆಚೇಂಗಿ, ಕ್ರಿಸ್ತಂಗ್ ನಿಂಗಡ ಹೃದಯತ್‍ಲ್ ಮರ್ಯಾದೆ ಕೊಡ್‍ಕಂಡು, ಅಂವೊನ ಒಡೆಯನಾಯಿತ್ ಗನಪಡ್‌ತಂಡು. ನಿಂಗಡ ನಿರಿಕ್ಷೇರ ವಿಷಯತ್ ದಾರಾಚೇಂಗಿ ಪ್ರಶ್ನೆ ಇಟ್ಟತೇಂಗಿ, ಅಯಿಂಗ ಎಲ್ಲಾರ್‌ಕು ಉತ್ತರ ಕೊಡ್‍ಪನೆಕೆ, ತಾಯಾರಾಯಿತ್ ಇರಿ. ಆಚೇಂಗಿ ಅದ್‍ನ ಮರ್ಯಾದೆಲ್ ಶಾಂತತ್‍ಲ್ ಮಾಡಂಡು.

1 ಯೋಹಾನ 5:16

ಮರಣತ್‌ರ ಬಟ್ಟೇಲ್ ಕಾಕಿಯಂಡ್ ಪೋಕತ ಪಾಪ ಮಾಡಿಯಂಡುಳ್ಳ ತಾಂಡ ಅಣ್ಣತಮ್ಮಣನ ನಿಂಗ ಕಂಡತೇಂಗಿ, ನಿಂಗ ಅಂವೊಂಗ್ ಜೀವ ತಪ್ಪ ದೇವಡ ಪಕ್ಕ ಅಂವೊಂಗಾಯಿತ್ ಬೋಡಂಡು. ಇದ್ ದಾರ್‌ಕ್ ಎಣ್ಣ್‌ಚೇಂಗಿ, ಮರಣತ್‌ರ ಬಟ್ಟೇಲ್ ಕಾಕಿಯಂಡ್ ಪೋಕತ ಪಾಪ ಮಾಡಿಯಂಡುಳ್ಳ ಅಣ್ಣತಮ್ಮಣನಂಗಕ್. ಆಚೇಂಗಿ ಚಾವ್‍ಕ್ ಕಾರಣವಾನ ಪಾಪವು ಉಂಡ್, ಅದ್ಂಗಾಯಿತ್ ನಿಂಗ ದೇವಡ ಪಕ್ಕ ಪ್ರಾರ್ತಥನೆ ಮಾಡಂಡೂಂದ್ ನಾನ್ ಎಣ್ಣುಲೆ.