2 ತಿಮೊಥೆಯ 2:14 - ಕೊಡವ ಬೈಬಲ್

¹⁴ ಈ ವಿಷಯತ್‍ನ ಎಕ್ಕಾಲು ಅಯಿಂಗಕ್ ನೀನ್ ಞಾಪಕ ಮಾಡಿಯಂಡಿರ್. ಒಂದಾಂಗು ಪ್ರಯೋಜನವಿಲ್ಲತ ಪಿಂಞ ಕ್‍ೕಪಯಿಂಗಳ ಪಾಳ್ ಮಾಡ್‌ವಂತ ಅರ್ಥ ಇಲ್ಲತ ತಕ್ಕ್‌ಲ್ ಮಾಡ್‌ವ ತರ್ಕತ್‍ನ ಮಾಡತನೆಕೆ, ದೇವಡ ಮಿಂಞತ್ ಅಯಿಂಗಕ್ ಎಚ್ಚರ ಮಾಡ್.

2 ತಿಮೊಥೆಯ 2:14 Iomraidhean Croise

ಮತ್ತಾಯ 16:26

ಒರ್ ಮನುಷ್ಯ ಈ ಲೋಕತ್‍ಲ್ ಉಳ್ಳಾನೆಲ್ಲಾ ತಾಂಗ್ ಸ್ವಂತವಾಯಿತ್ ಮಾಡ್‍ಚೇಂಗಿಯು, ಅಂವೊ ನಾಡ ಶಿಷ್ಯನಾಯಿತ್ ನಾಡ ಬಯ್ಯತ್ ಬರತೆ ಪೋಚೇಂಗಿ, ಅಂವೊಂಗ್ ಎಂತ ಲಾಬ? ಅಂವೊ ನಿತ್ಯ ಜೀವ ಇಲ್ಲತೆ ಚತ್ತ್ ಪೋಪ. ಅನ್ನನೆ ಆಚೇಂಗಿ ಅಂವೊಂಗ್ ನಿತ್ಯ ಜೀವ ಕ್‍ಟ್ಟ್‌ವಕ್ ಒಂದು ಮಾಡ್‌ವಕ್ ಕಯ್ಯುಲೆ.

ಅಪೊಸ್ತಲ 13:10

ಎಲ್ಲಾ ದೋಷವು ಕಪಟತನವು ದುಂಬಿತುಳ್ಳ, ಸೈತಾನಂಡ ಮೋಂವೊನೇ! ದೇವಡ ನೀತಿಕ್ ವಿರೋದವಾಯಿತ್ ನಿಪ್ಪ ಮನುಷ್ಯನೇ, ಒಡೆಯಂಡ ಸರಿಯಾನ ಬಟ್ಟೇನ, ತಿರಿಗ್‍ಚಿಡುವದ್‍ನ ನೀನ್ ನಿಪ್ಪ್‌ಚಿಡುಲೆಯಾ?

ಅಪೊಸ್ತಲ 15:24

ನಂಗ ಅಪ್ಪಣೆ ಕೊಡ್‌ತಿತ್ ಅಯಿಕತ ಚೆನ್ನ ಜನ ನಂಗಡ ಕಡೇಯಿಂಜ ನಿಂಗಡ ಪಕ್ಕ ಬಂದಿತ್, ನಿಂಗಡ ಮನಸ್ಸ್‌ನ ಗಲಿಬಿಲಿ ಮಾಡ್‌ಚೀಂದ್ ನಂಗಕ್ ಗೊತ್ತಾಚಿ.

ರೋಮ್ 14:1

ನಂಬಿಕೇಲ್ ಸ್ತಿರಯಿಲ್ಲತಯಿಂಗಳ ಕೂಟಿಯೊಳಿ; ಆಚೇಂಗಿಯು ಅಯಿಂಗಡ ಅನುಮಾನತ್‍ನ ಕುತ್ತ ಪರಿಯತಿರಿ.

ಗಲಾತ್ಯ 1:7

ಆಚೇಂಗಿ ಇದ್‍ನ ಬುಟ್ಟಿತ್ ಬೋರೆ ನಲ್ಲ ಸುದ್ದಿ ಏದ್ ಉಂಡ್? ಚೆನ್ನ ಜನ, ನಿಂಗಡ ಮನಸ್ಸ್‌ನ ಕಲ್‍ಕಿತ್ ಕ್ರಿಸ್ತಂಡ ನಲ್ಲ ಸುದ್ದಿನ ತಿರ್‌ಕ್‍ವಕ್ ಪ್ರಯತ್ನ ಪಟ್ಟಂಡುಳ್ಳದಲ್ಲತೆ ಬೋರೆ ಒಂದು ಮಾಡಿಯಂಡಿಲ್ಲೆ.

ಎಫೆಸ 4:17

ಆನಗುಂಡ್, ಒಡೆಯಂಡಲ್ಲಿ ನಾನ್ ನಿಂಗಕ್ ಸಾಕ್ಷಿಯಾಯಿತ್ ಎಚ್ಚರ ಮಾಡಿತ್ ಎಣ್ಣುವದ್ ಎಂತ ಎಣ್ಣ್‌ಚೇಂಗಿ, ಯೆಹೂದ್ಯಂಗಲ್ಲತ ಬೋರೆ ಜನ ಪ್ರಯೋಜನ ಇಲ್ಲತ ಗೇನತ್‍ಲ್ ಬದ್‍ಕ್‍ವನೆಕೆ ನಿಂಗ ಇಂಞು ಮಿಂಞಕ್ ಬದ್‍ಕಂಡ.

1 ಥೆಸಲೊನೀಕ 4:1

ನಂಗಡ ಅಣ್ಣತಮ್ಮಣಂಗಳೇ, ಆಕೀರಾಯಿತ್ ನಾನ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ: ದೇವನ ಕುಶಿಪಡ್‌ತ್‌ವಕಾಯಿತ್ ನಿಂಗ ಎನ್ನನೆಯೆಲ್ಲಾ ಬದ್‍ಕಂಡೂಂದ್ ನಂಗ ಎಣ್ಣಿತಂದದ್‍ನ ನಿಂಗ ಸ್ವೀಕಾರ ಮಾಡ್‍ನನೆಕೆ, ಇಂಞು ಅದ್‍ಲ್ ದುಂಬ ಬೊಳಿಯುವಕ್ ಒಡೆಯನಾನ ಯೇಸುರಗುಂಡ್ ನಿಂಗಳ ಬೋಡಿತ್, ನಿಂಗಕ್ ಬುದ್ದಿ ಎಣ್ಣಿಯಂಡ್ ಉಂಡ್.

2 ಥೆಸಲೊನೀಕ 3:6

ನಂಗಡ ಅಣ್ಣತಮ್ಮಣಂಗಳೇ, ಸೋಮಾರಿಯಾಯಿತ್ ಬದ್‍ಕಿಯಂಡ್, ನಂಗ ನಿಂಗಕ್ ಎಣ್ಣ್‌ನ ಪದ್ದತಿರ ಪ್ರಕಾರ ನಡ್‌ಂದಂಡಿಲ್ಲತ ಯೇಸುನ ನಂಬ್‍ನಯಿಂಗಳ ದೂರಮಾಡಿತ್ ಬೆಕ್ಕಂಡೂಂದ್ ಒಡೆಯನಾನ ಯೇಸು ಕ್ರಿಸ್ತ ನಂಗಕ್ ತಂದಿತುಳ್ಳ ಅದಿಕಾರತ್‍ಲ್ ನಂಗ ನಿಂಗಕ್ ಆಜ್ಞೆ ಮಾಡ್‌ವ.

1 ತಿಮೊಥೆಯ 1:4

ಅರ್ಥ ಇಲ್ಲತ ಕಥೇನ ಪರ್ಂದಂಡ್, ಪಂಡತ್‌ರ ಜನಡ ವಿಷಯತ್‍ನ ತಕ್ಕ್ ಪರ್ಂದಂಡ್ ಇಪ್ಪಯಿಂಗಳ ಸಹ ನೀನ್ ಎಚ್ಚರ ಮಾಡ್. ಎನ್ನಂಗೆಣ್ಣ್‌ಚೇಂಗಿ ಈ ತಕ್ಕೆಲ್ಲಾ ವಾದ ಮಾಡ್‌ವಕ್ ಬಟ್ಟೆ ಕೊಡ್‍ಪದ್‍ನ ಬುಟ್ಟಿತ್ ನಂಬಿಕೆಯಿಂಜ ಮಾಡ್‍ವಕ್ಕುಳ್ಳ ದೇವಡ ಕೆಲಸತ್‍ನ ಮಾಡ್‌ವಕ್ ಬಟ್ಟೆ ಕಾಟುಲೆ.

1 ತಿಮೊಥೆಯ 1:6

ಆಚೇಂಗಿ, ಚೆನ್ನ ಜನ ಇದ್‍ಯಿಂಜ ತಪ್ಪಿ ಪೋಯಿತ್ ಅರ್ಥ ಇಲ್ಲತ ತಕ್ಕ್‌ಕ್ ಬಟ್ಟೆ ಕೊಡ್‌ತಿತುಂಡ್.

1 ತಿಮೊಥೆಯ 4:8

ತಡೀರ ವ್ಯಯಾಮ ಮಾಡ್‍ವದ್ ನಲ್ಲದ್, ಆಚೇಂಗಿ ಆತ್ಮೀಯ ವ್ಯಯಾಮ ಎಲ್ಲಾಕಿಂಜ ಮೇಲಾನದ್, ಇಕ್ಕತ್‍ರ ಬದ್‍ಕ್‍ಕ್ ಪಿಂಞ ಬಪ್ಪಕುಳ್ಳ ಬದ್‍ಕ್‍ಕ್ ಅದ್ ಪ್ರಯೋಜನ ಆಪ.

1 ತಿಮೊಥೆಯ 5:21

ನೀನ್ ದಾರ್‌ನು ಮೂಡ್ ನೋಟಿತ್ ನ್ಯಾಯಮಾಡತ, ಪಕ್ಷಪಾತ ಮಾಡತೆ, ನೀನ್ ಇದ್‍ನೆಲ್ಲಾ ಮಾಡಿಯಂಡಿರ್‍ೕಂದ್ ದೇವಡ ಮಿಂಞತ್, ಯೇಸು ಕ್ರಿಸ್ತಂಡ ಪ್ರಸನ್ನತ್‌ಲ್ ಪಿಂಞ ಗೊತ್ತ್ ಮಾಡಿತುಳ್ಳ ದೂತಂಗಡ ಮಿಂಞತ್ ಆಜ್ಞೆ ಮಾಡ್‌ವಿ.

1 ತಿಮೊಥೆಯ 6:13

ಎಲ್ಲಾಂಗ್ ಜೀವ ತಪ್ಪ ದೇವಡ ಮಿಂಞತ್, ಪಿಂಞ ಪೊಂತ್ಯ ಪಿಲಾತಂಡ ಮಿಂಞ ನಿಂದಿತ್ ನೇರಾನ ಸಾಕ್ಷಿನ ಗೊತ್ತ್ ಮಾಡ್‍ನ ಯೇಸು ಕ್ರಿಸ್ತನಗುಂಡ್ ನಾನ್ ನೀಕ್ ಆಜ್ಞೆ ಮಾಡ್‍ವದ್ ಎಂತ ಎಣ್ಣ್‌ಚೇಂಗಿ:

2 ತಿಮೊಥೆಯ 1:6

ಇದ್ಂಗಾಯಿತ್, ನಾನ್ ನೀಡ ಮೇಲೆ ನಾಡ ಕೈಯಿನ ಬೆಪ್ಪಕ ನೀಕ್ ಕ್‍ಟ್ಟ್‌ನ ಆತ್ಮೀಯ ವರತ್‍ನ ಇಂಞು ಪ್ರಕಾಶವಾಯಿತ್ ಮಾಡ್‌ವಕ್ ನಾನ್ ನೀಕ್ ಞಾಪಕ ಮಾಡ್‌ವಿ.

2 ತಿಮೊಥೆಯ 2:16

ಈ ಲೋಕತ್‍ರ ಒರ್ ಪ್ರಯೋಜನವಿಲ್ಲತ ಹರಟೆ ತಕ್ಕ್‌ಕ್ ದೂರ ಇರ್. ಎನ್ನಂಗೆಣ್ಣ್‌ಚೇಂಗಿ ಅನ್ನನೆ ಹರಟೆ ತಕ್ಕ್‌ಲ್ ಪಾಲ್‍ದಾರಂಗಳಾಪಯಿಂಗ ದೇವಡಯಿಂಜ ದುಂಬ ದೂರ ಪೋಪ.

2 ತಿಮೊಥೆಯ 2:23

ಮೂಡ ತಕ್ಕ್ ಪಿಂಞ ಪ್ರಯೋಜನ ಇಲ್ಲತ ಚರ್ಚೆ, ಬರಿ ಜಗಳಕ್ ಬಟ್ಟೆ ಕೊಡ್‍ಪಾಂದ್ ಗೊತ್ತಾನಗುಂಡ್, ಅದ್‍ಂಜ ನೀನ್ ದೂರ ಇರ್.

2 ತಿಮೊಥೆಯ 4:1

ದೇವಡ ಮಿಂಞತ್, ಪಿಂಞ ಬದ್‍ಕಿತುಳ್ಳಯಿಂಗಳ ಪಿಂಞ ಚತ್ತಯಿಂಗಳ ತೀರ್ಪ್ ಮಾಡ್‌ವಕುಳ್ಳ ಯೇಸು ಕ್ರಿಸ್ತಂಡ ಮಿಂಞತ್, ಪಿಂಞ ಅಂವೊ ಪುನಃ ಆಳುವಕ್ ರಾಜಾನಾಯಿತ್ ಬಪ್ಪಕುಳ್ಳ ಪ್ರಸನ್ನತ್‌ಲ್ ನಾನ್ ಇದ್‍ನ ನೀಕ್ ಆಜ್ಞೆ ಮಾಡ್‌ವಿ.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 3:1

ಯೇಸುನ ನಂಬ್‍ನಯಿಂಗ, ಸರ್ಕಾರಕೂ ಅದ್ಂಡ ಅದಿಕಾರಿಯಂಗಕು ಒಳಪಟ್ಟಿತ್ ನಡ್‍ಕಂಡೂಂದ್ ಇಂಞೊಮ್ಮ ಅಯಿಂಗಕ್ ಎಣ್ಣಿತ್, ಏದ್ ನಲ್ಲ ಕೆಲಸ ಮಾಡ್‌ವಕು ತಯಾರಾಯಿತ್ ಇಪ್ಪಕ್ ಎಣ್ಣಿ ಕೊಡ್.

ಇಬ್ರಿಯ 13:9

ಬೋರೆ ಬೋರೆ ಬೋದನೆಲ್ ಚಿಕ್ಕಿತ್ ಬಟ್ಟೆ ತಪ್ಪಿ ಪೋಕತಿ. ಏದ್ ತರ ಕೂಳ್ ಎನ್ನನೆ ತಿಂಗಂಡೂಂದ್ ತಿಂಬಗುಂಡ್ ಅಲ್ಲ, ಕೃಪೇರ ಮೂಲಕ ಹೃದಯ ಸ್ತಿರವಾಪದ್ ನಲ್ಲದ್. ಕೂಳ್‍ರ ವಿಷಯತ್ ಆಚಾರ ವಿಚಾರ ಮಾಡ್‌ವಗುಂಡ್ ಒರ್ ಪ್ರಯೋಜನವು ಇಲ್ಲೆ.

2 ಪೇತ್ರ 1:13

ನಂಗಡ ಒಡೆಯನಾನ ಯೇಸು ಕ್ರಿಸ್ತ ನಾಕ್ ಕಾಂಬ್‌ಚಿಟ್ಟನೆಕೆ, ನಾನ್ ಬೆರಿಯ ಈ ತಡಿಯಿಂಜ ಪೋಪದ್ ಗೊತ್ತಾನಗುಂಡ್, ನಾನ್ ಈ ತಡೀಲ್ ಬದ್‍ಕಿಯಂಡ್ ಇಪ್ಪಕತ್ತನೆ ನಿಂಗಡ ಗೇನಕ್ ಇದ್‍ನೆಲ್ಲಾ ಎಣ್ಣಿಯಂಡ್ ಇಪ್ಪದ್ ಸರಿಯಾಯಿತ್ ಉಂಡ್‍ೕಂದ್ ಗೇನ ಮಾಡ್‌ವಿ.