2 ಥೆಸಲೊನೀಕ 1:11 - ಕೊಡವ ಬೈಬಲ್

¹¹ ಆನಗುಂಡ್, ದೇವ ನಿಂಗಳ ಕಾಕ್‍ನಾಂಗ್ ಯೋಗ್ಯವಾಯಿತ್ ಬದ್‍ಕ್‍ವಕ್ ಸಹಾಯ ಮಾಡಂಡೂಂದ್, ಅಂವೊಂಡ ಶಕ್ತಿರಗುಂಡ್ ನಿಂಗ ಮಾಡಂಡೂಂದ್ ಗೇನ ಮಾಡಿತುಳ್ಳ ನಲ್ಲ ಕೆಲಸತ್‍ನ ಮಾಡ್‌ವಕ್ ಪಿಂಞ ನಿಂಗಡ ದೇವಡ ಮೇಲೆ ನಿಂಗ ಬೆಚ್ಚಿತುಳ್ಳ ನಂಬಿಕೇಲ್ ನಿಂಗ ಮಾಡ್‌ವ ಕ್ರಿಯೇನ ನಿಂಗ ಪೂರ್ತಿ ಮಾಡ್‌ವಕಾಯಿತ್, ನಂಗ ನಿಂಗಕಾಯಿತ್ ಇದ್‍ನೆಲ್ಲಾ ಗೇನ ಮಾಡಿತ್ ಎಕ್ಕಾಲು ಪ್ರಾರ್ಥನೆ ಮಾಡಿಯಂಡುಂಡ್.

2 ಥೆಸಲೊನೀಕ 1:11 Iomraidhean Croise

ಜ್ಞಾನತ್‌ರ ಪಡಿಮ 4:18

ನೀತಿವಂತಂಯಿಂಗಡ ಬಟ್ಟೆ ಪೊಲಾಕತ್‌ರ ಬೊಳೀರನೆಕೆ ಇಪ್ಪ, ಅದ್‌ ಎನ್ನನೆ ಎಣ್ಣ್‌ಚೇಂಗಿ ಮಜ್ಜಣತ್‌ರ ಬೊಳಿ ಪ್ರಕಾಶ ಆಯಂಡೇ ಇಪ್ಪನೆಕೆ ಜಾಸ್ತಿ ಆಯಿತ್‌ ಇಪ್ಪ.

ಮಾರ್ಕ 4:28

ಅಲ್ಲಿಯತ್‍ರ ಫಲವತ್ತಾನ ಮಣ್ಣ್‌ರಗುಂಡ್ ಗಿಡ ಬೊಳ್ಂದಿತ್, ಕೊಂಬ್ ಬಂದಿತ್, ಮೊಗ್ಗ್ ಬಂದಿತ್, ಕದ್ ಆಯಿತ್ ದುಂಬ ಪಣ್ಣಾಪ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 12:32

ನಾಡ ಶಿಷ್ಯಂಗಳೇ, ನಿಂಗ ಒಂದು ಇಲ್ಲತ ನಾಡ ಒರ್ ಚೆರಿಯ ಗುಂಪಾಯಿತ್ ಉಂಡೇಂಗಿಯು, ಬೊತ್ತತಿ, ಎನ್ನಂಗೆಣ್ಣ್‌ಚೇಂಗಿ ಅಪ್ಪನಾನ ದೇವ ಅಂವೊ ಆಳುವ ರಾಜ್ಯತ್‍ಲ್ ನಿಂಗ ಬದ್‍ಕ್‍ವಕಾಯಿತ್ ನಿಂಗಳ ಕುಶೀಲ್ ಗೊತ್ತ್ ಮಾಡಿತುಂಡ್.

ರೋಮ್ 1:9

ನಾನ್ ಎಕ್ಕಾಲು ನಿಂಗಕಾಯಿತ್, ಎಚ್ಚಕ್ ಪ್ರಾರ್ಥನೆ ಮಾಡಿಯಂಡುಳ್ಳ್‌ೕಂದ್ ದೇವ ನಾಕ್ ಸಾಕ್ಷಿಯಾಯಿತ್ ಉಂಡ್. ನಾನ್ ಎಣ್ಣುವದ್ ಸತ್ಯಾಂದ್, ಅಂವೊಂಡ ಮೋಂವೊಂಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವ ಮೂಲಕ, ನಾನ್ ತ್‍ೕರ ಮನಸ್ಸ್‌ಲ್ ಸೇವೆ ಮಾಡ್‌ವ ದೇವಡ ಪೆದತ್‍ಲ್ ಎಣ್ಣ್‌ವಿ.

ರೋಮ್ 11:29

ದೇವಡ ಕೃಪೇರ ವರವು, ಅಂವೊ ಕಾಕ್‌ನದು ಎಕ್ಕಾಲು ಬದ್‍ಲಾಪುಲೆ.

ರೋಮ್ 15:14

ನಾಡ ಅಣ್ಣತಮ್ಮಣಂಗಳೇ, ನಿಂಗ ನಲ್ಲ ಗುಣತ್‍ಲ್ ಪಿಂಞ ಎಲ್ಲಾ ಬುದ್ದಿಲ್ ದುಂಬ್‍ನಯಿಂಗಳಾಯಿತ್, ಒಬ್ಬೊಂಗೊಬ್ಬ ಬುದ್ದಿ ಎಣ್ಣುವಕ್ ಯೋಗ್ಯತೆ ಉಳ್ಳಯಿಂಗಳಾಯಿತ್ ಉಂಡ್‍ೕಂದ್ ನಾನ್ ನೇರಾಯಿತು ನಂಬಿಯಂಡುಂಡ್.

ರೋಮ್ 8:30

ದಾರ್‌ನ ಅಂವೊ ಮಿಂಞಲೇ ಗೊತ್ತ್ ಮಾಡ್‍ಚೋ ಅಯಿಂಗಳ ಕಾಕ್‌ಚಿಟ್ಟತ್; ದಾರ್‌ನ ಕಾಕ್‍ಚಿಟ್ಟತೋ ಅಯಿಂಗಳ ನೀತಿವಂತಯಿಂಗಳಾಯಿತ್ ಮಾಡ್‍ಚಿ; ದಾರ್‌ನ ನೀತಿವಂತಯಿಂಗಳಾಯಿತ್ ಮಾಡ್‍ಚೋ ಅಯಿಂಗಕ್ ತಾಂಡ ಮಹಿಮೆನ ಕೊಡ್‍ತತ್.

1 ಕೊರಿಂಥ 1:8

ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ದಿವಸತ್‍ಲ್ ನಿಂಗ ಒರ್ ತಪ್ಪು ಇಲ್ಲತಯಿಂಗಳಾಯಿತ್ ನಿಪ್ಪಕ್ ಕಡೇಕತ್ತನೆ ಅಂವೊ ನಿಂಗಳ ಸ್ತಿರಪಡ್‍ತ್‌ವ.

ಎಫೆಸ 1:16

ನಿಂಗಕಾಯಿತ್ ಎಡೆಬುಡತೆ ದೇವಕ್ ವಂದನೆ ಮಾಡಿಯಂಡುಳ್ಳ. ನಾಡ ಪ್ರಾರ್ಥನೆಲ್ ನಿಂಗಳ ಗೇನ ಮಾಡಿತ್,

ಎಫೆಸ 1:5

ಅಂವೊ ನಂಗಳ ಪ್ರೀತಿ ಮಾಡ್‍ನಗುಂಡ್, ಯೇಸು ಕ್ರಿಸ್ತಂಡ ಮೂಲಕ, ನಂಗಳ ಅಂವೊಂಡ ಹಕ್ಕ್‌ದಾರಂಗಳಾನ ಮಕ್ಕಳಾಯಿತ್, ಅಂವೊಂಡ ಕುಶಿಕಾಯಿತ್, ಅಂವೊಂಡ ಚಿತ್ತತ್‍ರನೆಕೆ ಮಿಂಞಲೇ ಗೊತ್ತ್ ಮಾಡ್‍ಚಿ.

ಎಫೆಸ 1:9

ದೇವ ಕ್ರಿಸ್ತಂಡ ಮೂಲಕ ಮಾಡಂಡೂಂದ್ ತೀರ್ಮಾನ ಮಾಡಿತ್ಂಜ, ಅಂವೊಂಡ ಕುಶೀರ ಚಿತ್ತತ್‍ರ ಗುಟ್ಟ್‌ನ ನಂಗ ಗೊತ್ತಾಪನೆಕೆ ಮಾಡ್‍ಚಿ.

ಫಿಲಿಪ್ಪಿ 1:6

ದೇವ ನಿಂಗಡಲ್ಲಿ ಸುರು ಮಾಡ್‍ನ ನಲ್ಲ ಕೆಲಸತ್‍ನ ಪೂರ್ತಿ ಮಾಡ್‌ವಕಾಯಿತ್, ಕ್ರಿಸ್ತ ಯೇಸು ಪುನಃ ಈ ಬೂಮಿಕ್ ಬಪ್ಪಕತ್ತನೆ ಮಾಡಿಯಂಡಿಪ್ಪಾಂದ್ ನಾಕ್ ನಂಬಿಕೆ ಉಂಡ್.

ಫಿಲಿಪ್ಪಿ 2:13

ಎನ್ನಂಗೆಣ್ಣ್‌ಚೇಂಗಿ ದೇವ ಅಂವೊಂಗ್ ಕುಶಿಯಾನದ್‌ನ ಮಾಡ್‌ವಕ್, ನಿಂಗಕ್ ಆಸೆ ಪಿಂಞ ಶಕ್ತಿ ತಂದಿತ್ ನಿಂಗಡ ಬದ್‍ಕ್‍ಲ್ ಕ್ರಿಯೆ ಮಾಡಿಯಂಡುಂಡ್.

ಫಿಲಿಪ್ಪಿ 3:14

ಕ್ರಿಸ್ತ ಯೇಸುರ ಮೂಲಕ ಪರಲೋಕತ್‍ರ ಇನಾಮ್‍ನ ಪಡೆಯುವಕಾಯಿತ್ ದೇವ ಕಾಕ್‍ನ ಓಟತ್‍ಲ್ ಚಾಯಿತೆ ಓಡ್‌ವಕ್ ಆಕೀರ್‍ಕತ್ತನೆ ಪ್ರಯತ್ನಪಟ್ಟಂಡುಳ್ಳ.

1 ಥೆಸಲೊನೀಕ 1:3

ನಿಂಗಡ ನಂಬಿಕೇರಗುಂಡ್ ನಿಂಗಡ ಬದ್‍ಕ್‍ಲ್ ಕಾಟಿಯಂಡ್ ಉಳ್ಳ ನಿಂಗಡ ನಲ್ಲ ಕೆಲಸ, ನಿಂಗಡ ಪ್ರೀತಿನಗುಂಡ್ ನಿಂಗ ಜನಕ್ ಮಾಡ್‌ವ ಸಹಾಯ, ಯೇಸು ಕ್ರಿಸ್ತಂಡ ಮೇಲೆ ಉಳ್ಳ ನಿಂಗಡ ನಿರೀಕ್ಷೇರಗುಂಡ್ ನಿಂಗಡ ಸಹಿಸುವ ಗುಣ, ನಂಗಕ್ ಗೊತ್ತಾನಗುಂಡ್, ನಿಂಗಕಾಯಿತ್ ನಂಗ ದೇವಡ ಪಕ್ಕ ಎಕ್ಕಾಲು ಪ್ರಾರ್ಥನೆ ಮಾಡಿಯಂಡುಂಡ್.

2 ಥೆಸಲೊನೀಕ 1:5

ನಿಂಗ ದೇವಡ ರಾಜ್ಯಕಾಯಿತ್ ಹಿಂಸೆನ ಸಹಿಸಿಯಂಡ್ ಉಳ್ಳಾಂಗ್, ಆ ರಾಜ್ಯಕ್ ನಿಂಗ ಯೋಗ್ಯವಾಯಿತ್ ಉಳ್ಳಿರಾಂದ್ ಪಿಂಞ ದೇವ ನ್ಯಾಯವಾನ ತೀರ್ಪ್ ತಪ್ಪಾಂದ್ ಎಣ್ಣ್‌ವಕ್ ನಿಂಗಡ ಸಹಿಸುವ ಗುಣವೇ ಸಾಕ್ಷಿಯಾಯಿತ್ ಉಂಡ್.

2 ಥೆಸಲೊನೀಕ 2:14

ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಮಹಿಮೇಕ್ ಪಾಲ್‍ದಾರಂಗಳಾಯಿತ್ ಇಪ್ಪಕ್, ನಂಗ ನಿಂಗಕ್ ಮಾಡ್‍ನ ನಲ್ಲ ಸುದ್ದಿರ ಬೋದನೆರ ಮೂಲಕ ಅಂವೊಂಡ ಪಕ್ಕ ನಿಂಗಳ ಕಾಕ್‍ಚಿ.

ಇಬ್ರಿಯ 12:2

ನಂಬಿಕೇನ ಸುರು ಮಾಡ್‌ವ ನಾಯಕನು ಅದ್‍ನ ಪೂರ್ತಿಮಾಡ್‍ವಂವೊನು ಆಯಿತುಳ್ಳ ಯೇಸುರ ಮೇಲೆ ಕಣ್ಣ್‌ಟ್ಟಿತ್, ನಂಗಕಾಯಿತ್ ಬೆಚ್ಚಿತುಳ್ಳ ಓಟತ್‍ನ ಪೊರುಮೇಲ್ ಓಡೋಣ. ಎನ್ನಂಗೆಣ್ಣ್‌ಚೇಂಗಿ ಯೇಸು, ತಾಂಡ ಮಿಂಞ ಬೆಚ್ಚಿತ್ಂಜ ಕುಶಿಕಾಯಿತ್, ಅವಮಾನತ್‍ನ ಗೇನ ಮಾಡತೆ, ಶಿಲುಬೇನ ಸಹಿಸಿಯಂಡ್ ದೇವಡ ಸಿಂಹಾಸನತ್‍ರ ಬಲ್‌ತೆ ಬರಿಲ್ ಅಳ್‌ತತ್.

ಇಬ್ರಿಯ 3:1

ಆನಗುಂಡ್, ದೇವಡ ಮಕ್ಕಳಾಯಿತುಳ್ಳ ನಾಡ ಅಣ್ಣತಮ್ಮಣಂಗಳೇ, ಪರಲೋಕಕ್ ಪೋಪಕ್ ಕಾಕ್‍ನಯಿಂಗಡ ಪಾಲ್‍ದಾರಂಗಳಾಯಿತ್ ಉಳ್ಳಯಿಂಗಳೇ, ನಂಗ ಅರಿಕೆ ಮಾಡ್‌ವ ಅಪೊಸ್ತಲನು, ಮಹಾ ಯಾಜಕನು ಆಯಿತುಳ್ಳ ಕ್ರಿಸ್ತ ಯೇಸುನ ಗೇನ ಮಾಡಿಯೊಳಿ.

1 ಪೇತ್ರ 5:10

ಯೇಸು ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ನಂಗಳ ತಾಂಡ ನಿತ್ಯ ಮಹಿಮೇಕ್ ಕಾಕ್‍ನ ಕೃಪೆ ದುಂಬ್‍ನ ದೇವ, ಚೆನ್ನ ಕಾಲ ಕಷ್ಟ ಅನುಬವಿಚಿಡುವ ನಿಂಗಳ ಚಾಯಿ ಮಾಡಿತ್, ಬಲಪಡ್‍ತಿತ್, ಸ್ತಿರಪಡ್‌ತಿತ್, ನಿಪ್ಪ್‌ಚಿಡಡ್.

ಪ್ರಕಟನೆ 3:4

ಆಚೇಂಗಿಯು, ತಂಗಡ ಬಟ್ಟೇನ ಅಶುದ್ದ ಮಾಡತ ಇಂಞು ಚೆನ್ನ ಜನ ಸಾರ್ದಿಸಿಲ್ ನೀಕ್ ಉಂಡ್; ಅಯಿಂಗ ಯೋಗ್ಯವಾನಗುಂಡ್, ಬೊಳ್‍ತ ಬಟ್ಟೆ ಇಟ್ಟಿತ್ ನಾಡ ಕೂಡೆ ನಡ್‍ಪ.

ಪ್ರಕಟನೆ 5:10

ನಂಗಡ ದೇವಡ ಮಿಂಞತ್, ಅಯಿಂಗಳ ರಾಜಂಗಳಾಯಿತು, ಯಾಜಕಂಗಳಾಯಿತು ಮಾಡಿತ್: ಅಯಿಂಗ ಬೂಮಿಲ್ ರಾಜ್ಯಬಾರ ಮಾಡ್‌ವಾಂದ್, ಒರ್ ಪುದಿಯ ಪಾಟ್ ಪಾಡ್‌ಚಿ.