2 ಪೇತ್ರ 2:3 - ಕೊಡವ ಬೈಬಲ್

³ ದುರಾಸೇಲ್, ಅಯಿಂಗಳೇ ಮಾಡ್‍ನ ಕಥೇರ ಬೋದನೆರ ಮೂಲಕ ನಿಂಗಡಿಂಜ ಅಯಿಂಗಕ್ ಆದಾಯ ಆಪನೆಕೆ ವಂಚನೆ ಮಾಡ್‌ವ. ದೇವ ಅಯಿಂಗಳ ಪಂಡೇ ನ್ಯಾಯತೀರ್ಪ್ ಮಾಡಿರ್‌ತ್, ಅಯಿಂಗಡ ಮೇಲೆ ಬಪ್ಪ ಶಿಕ್ಷೆ ಬೆರಿಯ ಬಪ್ಪ.

2 ಪೇತ್ರ 2:3 Iomraidhean Croise

ಮಲಾಕಿ 1:10

ಪ್ರಯೋಜನ ಇಲ್ಲತೆ, ದಾರು ನಾಡ ಬಲಿಪೀಠತ್‌ರ ಮೇಲೆ ತಿತ್ತ್‌ನ ಕತ್ತ್‌ಚಿಡತೆ ಇಪ್ಪಕ್‌ ನಿಂಗಡಲ್ಲಿ ಒಬ್ಬ ದೇವಾಲಯತ್‌ರ ಪಡಿನ ಮಚ್ಚಿರ್ತೇಂಗಿ, ಅದ್‌ ಎಚ್ಚಕೋ ನಲ್ಲದಾಯಿತ್‌ಪ್ಪ. ನಿಂಗಡ ಮೇಲೆ ನಾಕ್‍ ಕುಶಿ ಇಲ್ಲೇಂದ್‌ ಸೈನ್ಯತ್‌ರ ಒಡೆಯನಾನ ಯೆಹೋವ ಎಣ್ಣಿಯಂಡುಂಡ್. ನಿಂಗಡ ಕೈಯಿಂಜ ಇಡುವ ಕಾಣಿಕೆನ ಸತ ನಾನ್‌ ಸ್ವೀಕಾರ ಮಾಡುಲೆ.

ಮತ್ತಾಯ 23:14

ಕಪಟಿಯಾನ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳೇ, ಫರಿಸಾಯಂಗಳೇ ನಿಂಗಕ್ ಅಯ್ಯೋ! ಬೋರೆಯಿಂಗ ಕಾಂಗಂಡೂಂದ್ ಉದ್ದವಾಯಿತ್ ಪ್ರಾರ್ಥನೆ ಮಾಡಿಯಂಡ್, ವಿದವೆರ ಮನೆಕ್ ನುಗ್ಗಿತ್ ಅಯಿಂಗಕ್ ವಂಚನೆ ಮಾಡಿಯಂಡ್ ಉಳ್ಳಯಿಂಗಳೇ, ನಿಂಗಕ್ ದುಂಬ ಶಿಕ್ಷೆ ಉಂಡ್.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 18:8

ಅಯಿಂಗಕ್, ಅಯಿಂಗ ಕ್‍ೕಟ ನ್ಯಾಯತ್‍ನ ಬೆರಿಯ ಕೊಡ್‍ಪಾಂದ್ ನಿಂಗಕ್ ಎಣ್ಣ್‌ವಿ. ಇನ್ನನಾಚೇಂಗಿಯು ಮನುಷ್ಯಕುಮಾರ ಬೂಮಿಕ್ ಬಪ್ಪಕ, ನಂಬಿಕೇನ ಕಾಂಬಕ್ ಕಯ್ಯುವಾಂದ್ ಎಣ್ಣ್‌ಚಿ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 20:20

ರೋಮ್ ರಾಜ್ಯತ್‍ರ ಅದಿಕಾರಿಯಾನ ಅದಿಪತಿಕ್ ಯೇಸುನ ಪುಡ್‍ಚಿ ಕೊಡ್‍ಪಕಾಯಿತ್, ನೀತಿಲ್ ನಡ್‍ಪ ಜನಡನೆಕೆ ನಾಟಕ ಮಾಡ್‌ವ ದಂಡ್ ಗೂಡಚಾರಂಗಳ, ಯೆಹೂದ್ಯಂಗಡ ಅದಿಕಾರಿಯಂಗ ಯೇಸುರ ಪಕ್ಕ ಅಯಿಚತ್. ಯೇಸು ಪರಿಯುವ ತಕ್ಕಿಂಜಿಲೇ ಅಂವೊನ ಪುಡಿಪ ಸಮಯಕಾಯಿತ್ ನೋಟಿಯಂಡ್ ಇಂಜತ್.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 22:47

ಅಂವೊ ತಕ್ಕ್ ಪರ್‌ದಂಡ್ ಇಪ್ಪಕಾಪಕ ಜನಡ ಗುಂಪ್ ಬಾತ್. ಪನ್ನೆರಂಡ್ ಶಿಷ್ಯಂಗಡಲ್ಲಿ ಒಬ್ಬನಾನ ಯೂದ ಆ ಗುಂಪ್‍ರ ಮಿಂಞತ್‍ಲ್ ಇಂಜತ್. ಅಂವೊ ಯೇಸುಕ್ ಮುತ್ತ್‌ಕೊಡ್‌ಪಕ್ ಯೇಸುರ ಪಕ್ಕ ಪೋಚಿ.

ಯೋಹಾನ 2:16

ಪಾರಿವಾಳ ಮಾರ್‌ವಯಿಂಗಳ ನೋಟಿತ್: ಇದ್‍ನೆಲ್ಲ ಇಲ್ಲಿಂಜ ಎಡ್‍ತಂಡ್ ಪೋಯಿರಿ, ನಾಡ ಅಪ್ಪಂಡ ಮನೆನ ಚತ್ತೆರನೆಕೆ ಮಾಡಂಡಾಂದ್ ಎಣ್ಣ್‌ಚಿ.

ರೋಮ್ 16:18

ಅನ್ನನೆ ಉಳ್ಳಯಿಂಗ, ನಂಗಡ ಒಡೆಯನಾನ ಯೇಸು ಕ್ರಿಸ್ತಂಗ್ ಸೇವೆ ಮಾಡತೆ, ಅಯಿಂಗಡ ಕೆಲಕಾಯಿತ್ ಸೇವೆ ಮಾಡಿಯಂಡುಂಡ್. ಅಯಿಂಗ ಅಯಿಂಗಡ ಮದುರವಾನ ತಕ್ಕ್‌ನ ಪರ್ಂದಿತ್ ಪಿಂಞ ಕುಶಿಪಡ್‌ತ್‌ವನೆಕೆ ತಕ್ಕ್ ಪರ್ಂದಿತ್, ಒಂದು ಅರಿಯತ ಜನಡ ಹೃದಯತ್‍ನ ವಂಚನೆ ಮಾಡ್‌ವಯಿಂಗಳಾಯಿತುಂಡ್.

2 ಕೊರಿಂಥ 2:17

ದುಂಬ ಜನತ್‍ರನೆಕೆ, ನಂಗಕ್ ಲಾಬ ಕ್‍ಟ್ಟ್‌ವಕಾಯಿತ್ ದೇವಡ ವಾಕ್ಯತ್‍ನ ಕಲಪ್‍ಲ್ ಬೋದನೆ ಮಾಡತೆ, ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್, ನಂಬಿಕಸ್ತಂಗಳಾಯಿತ್, ದೇವ ಅಯಿಚಯಿಂಗಳಾಯಿತ್, ದೇವಡ ಮಿಂಞತ್‍ಲ್ ತಕ್ಕ್ ಪರ್ಂದಂಡುಂಡ್.

1 ಥೆಸಲೊನೀಕ 2:5

ನಿಂಗಕೆಲ್ಲಾ ಗೊತ್ತುಳ್ಳನೆಕೆ, ನಂಗ ಒರ್ ಕುರಿ ಸಹ ಮರ್‍ಳ್ ತಕ್ಕ್ ಪರ್ಂದಿತ್ ನಿಂಗಳ ಗೆಲ್ಲ್‌ವಕ್ ನೋಟಿತ್‌ಲ್ಲೆ. ನಿಂಗಡ ಪಣತ್‍ನ ಪರಿಪಕಾಯಿತ್ ನಂಗ ನಿಂಗಡ ಕೂಡೆ ಸ್ನೇಹಿತಂಗಡನೆಕೆ ಕಳಿಚಂಡಿಲ್ಲೇಂದ್ ನಂಗ ಎಣ್ಣ್‌ವಕ್ ದೇವ ಒಬ್ಬನೇ ನಂಗಕ್ ಸಾಕ್ಷಿಯಾಯಿತುಂಡ್.

1 ಥೆಸಲೊನೀಕ 5:3

ಜನ ಸಮಾದಾನ ಉಂಡ್‍ೕಂದು, ಒರ್ ತೊಂದರೆಯು ಇಲ್ಲೇಂದು ಎಣ್ಣುವಕ, ಒರ್ ಪೊಣ್ಣಾಳ್‌ಕ್ ಪೆರುವ ನೊಂಬಲ ಎನ್ನನೆ ಒಮ್ಮಕೆ ಬಪ್ಪ, ಅನ್ನನೆ ಅಯಿಂಗಡ ಮೇಲೆ ನಾಶ ಬಪ್ಪ; ಅಕ್ಕ ದಾರೂ ತಪ್ಪ್‌ಚಿಡ್‌ವಕ್ ಕಯ್ಯುಲೆ.

1 ತಿಮೊಥೆಯ 3:3

ಅಂವೊ ಕುಡ್‌ಕನಾಯಿತ್, ಹಿಂಸೆ ಮಾಡ್‌ವಂವೊನಾಯಿತ್, ಜಗಳ ಮಾಡ್‌ವಂವೊನಾಯಿತ್, ದುಡ್ಡ್‌ರ ಮೇಲೆ ಆಸೆ ಉಳ್ಳಂವೊನಾಯಿತ್ ಇಪ್ಪಕ್ಕಾಗ. ಅಂವೊ ಶಾಂತ ಗುಣ ಉಳ್ಳಂವೊನಾಯಿತ್ ಇರಂಡು.

1 ತಿಮೊಥೆಯ 3:8

ಅನ್ನನೆ ಸಬೇಲ್ ಸಹಾಯ ಮಾಡ್‌ವಯಿಂಗಳು ಮರ್ಯಾದಸ್ತಂಗಳಾಯಿತ್ ಪಿಂಞ ನೇರಾನಯಿಂಗಳಾಯಿತ್ ಇರಂಡು; ಕುಡ್‍ಕಂಗಳಾಯಿತ್, ಕಳ್ಳತನತ್‌ಲ್ ಸಂಪಾದನೆ ಮಾಡ್‌ವಯಿಂಗಳಾಯಿತ್ ಇಪ್ಪಕ್ಕಾಗ.

1 ತಿಮೊಥೆಯ 6:5

ಅಯಿಂಗಡ ಮನಸ್ಸ್ ಪಾಳಾಯಿತ್, ಎಕ್ಕಾಲು ಜಗಳ ಮಾಡ್‌ವ. ಅಯಿಂಗಡ ಹೃದಯತ್ಂಜ ಸತ್ಯತ್‍ನ ಎಡ್‍ತ್‍ರ್‌ತ್. ಅಯಿಂಗ ದುಡ್ಡ್ ಮಾಡ್‌ವಕಾಯಿತ್ ಅಯಿಂಗಳ, ದೇವಡ ಬಕ್ತಂಗಳಾಯಿತ್ ಕಾಂಬ್‍ಚಿಡ್‍ವ.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 1:11

ಅಯಿಂಗ ಬೋದನೆ ಮಾಡತನೆಕೆ ಅಯಿಂಗಳ ನಿಪ್ಪ್‌ಚಿಡಂಡು. ಎನ್ನಂಗೆಣ್ಣ್‌ಚೇಂಗಿ, ಅಯಿಂಗ ದುಡ್ಡ್ ಮಾಡ್‌ವಕಾಯಿತ್, ಸತ್ಯ ಅಲ್ಲತ ಬೋದನೆನ ಸರಿಯಾನ ಬೋದನೇಂದ್ ಎಣ್ಣಿತ್, ದುಂಬ ಕುಟಂಬತ್‍ನ ಪಾಳ್‍ಮಾಡಿಯಂಡುಂಡ್.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 1:7

ಸಬೆರ ಪೆರಿಯಯಿಂಗ ದೇವಡ ಮಕ್ಕಳ ಚಾಯಿತೆ ನಡ್‍ತಿಯಂಡ್ ಪೋಪ ಜವಾಬ್ದಾರಿ ಉಳ್ಳಂವೊನಾಯಿತ್ ಇಪ್ಪ. ಆನಗುಂಡ್, ದಾರೂ ಕುತ್ತ ಪರಿಯುವಕ್ ಕಯ್ಯತನೆಕೆ ಅಂವೊಂಡ ಬದ್‍ಕ್ ಇರಂಡು. ಅಂವೊಂಡ ಕುಶೀರನೆಕೆ ಮಾಡ್‍ವಂವೊನಾಯಿತು, ಬೆರಿಯ ಚೆಡಿ ಬಪ್ಪಂವೊನಾಯಿತು, ಕುಡಿಪಂವೊನಾಯಿತು, ಜಗಳ ಮಾಡ್‌ವಕ್ ಕುಶಿಯುಳ್ಳಂವೊನಾಯಿತು, ದುಡ್ಡ್‌ರ ಮೇಲೆ ಆಸೆ ಉಳ್ಳಂವೊನಾಯಿತು ಇಪ್ಪಕ್ಕಾಗ.

1 ಪೇತ್ರ 2:8

ಆ ಕಲ್ಲ್ ಮನುಷ್ಯಂಗಳ ತಡ್‍ಪಕು ಬೂವಕು ಮಾಡ್‌ವ ಬಂಡೆಯಾಯಿತ್ ಆಚಿ. ಅಯಿಂಗ ದೇವಡ ಉಪದೇಶಕ್ ಬಗ್ಗ್‌ಚಿಡತಗುಂಡ್ ಅದ್ ತಡ್‍ತಂಡುಂಡ್, ಅದ್ಂಗೇ ಅಯಿಂಗಳ ನೇಮಿಚಿಟ್ಟಯಿಂಗಳಾಯಿತುಂಡ್.

1 ಪೇತ್ರ 5:2

ನಿಂಗಡಲ್ಲಿ ಉಳ್ಳ ದೇವಡ ಮಕ್ಕಳ ನಿಂಗ ಚಾಯಿತೆ ಒರ್ ಕೊರಿ ಗುಂಪ್‍ನ ನೋಟ್‍ವನೆಕೆ ಪೆರಿಯಯಿಂಗಡ ಸೇವೇನ ಮಾಡಂಡು. ಒತ್ತಾಯತ್‌ಲ್ ಅಲ್ಲ, ದೇವ ಕುಶಿಪಡ್‌ವನೆಕೆ ಮನಪೂರ್ವವಾಯಿತ್ ಪಿಂಞ ಕೆಟ್ಟ ಆದಾಯಕಾಯಿತ್ ಅಲ್ಲ, ಪುರ್‌ಡುಳ್ಳ ಮನಸ್ಸ್‌ಲ್ ಮಾಡಂಡು.

2 ಪೇತ್ರ 1:16

ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಶಕ್ತಿನ ಪಿಂಞ ಅಂವೊ ಪುನಃ ಬಪ್ಪದ್‍ನ ನಂಗ ನಿಂಗಕ್ ಎಣ್ಣುವಕ, ತಂತ್ರವಾನ ಕಥೇನ ಕಂಡ್‍ಪುಡ್‌ಚಿತ್ ನಿಂಗಕ್ ಎಣ್ಣಿತ್‌ಲ್ಲೆ. ಆಚೇಂಗಿ ಅಂವೊಂಡ ಮಹತ್ವತ್‌ನ ನಂಗಳೇ ಕಂಡಿತುಳ್ಳಯಿಂಗಳಾಯಿತ್ ಎಣ್ಣಿಯೆ.

2 ಪೇತ್ರ 2:1

ಇಸ್ರಾಯೇಲ್ ಜನಡ ಮದ್ಯತ್‍ಲ್ ಸಹ ಕಳ್ಳ ಪ್ರವಾದಿಯಂಗ ಇಂಜತ್. ಅನ್ನನೆ ನಿಂಗಡ ಮದ್ಯತ್‍ಲು ಕಳ್ಳ ಬೋದನೆಕಾರಂಗ ಇಪ್ಪ. ಅಯಿಂಗ ದಾರ್‌ಕು ಗೊತ್ತಿಲ್ಲತನೆಕೆ, ತಂತ್ರವಾಯಿತ್ ದೇವಡ ಮಕ್ಕಳ ಪಾಳ್ ಮಾಡ್‌ವ ಪಾಳ್ ಬೋದನೆನ ಬೋದನೆ ಮಾಡಿತ್, ಅಯಿಂಗಕ್ ರಕ್ಷಣೆ ತಪ್ಪಕಾಯಿತ್ ಬೆಲೆ ಕೊಡ್‍ತ ಒಡೆಯನ ಸಹ ಒತ್ತತೆ, ಅಯಿಂಗಕ್ ಅಯಿಂಗಳೇ ಬೆರಿಯ ನಾಶ ಬಪ್ಪನೆಕೆ ಮಾಡ್‌ವ.

2 ಪೇತ್ರ 2:9

ಅನ್ನನೆ ಆಚೇಂಗಿ, ಬಕ್ತಿಯುಳ್ಳಯಿಂಗಳ ಅಯಿಂಗಕ್ ಬಪ್ಪ ಸೋದನೆಯಿಂಜ ಕಾಪಾಡ್‌ವಕು, ಅನೀತಿಯಾನಯಿಂಗಳ ನ್ಯಾಯತೀರ್ಪ್ ನಾಳ್‍ಕತ್ತನೆ ಶಿಕ್ಷೇಲ್ ಬೆಚ್ಚಿತ್‌ಪ್ಪಕು ಒಡೆಯಂಗ್ ಗೊತ್ತುಂಡ್.

ಯೂದ ಒಳ್‍ದ್‍ನ ಕಾಗದ 1:11

ಕಳ್ಳ ಬೋದನೆ ಮಾಡ್‌ವಯಿಂಗಕ್ ಅಯ್ಯೋ! ಈಂಗ ತಮ್ಮಣನ ಕೊಂದ ಕಾಯಿನ ಎಣ್ಣ್‌ವಂವೊಂಡ ಬಟ್ಟೇಲ್ ನಡ್ಂದಂಡುಂಡ್. ಪಣಕಾಯಿತ್ ದೇವಡ ಮಕ್ಕಳ ಬಿಳಾಮ ಎಣ್ಣ್‌ವಂವೊ ಮೋಸ ಮಾಡ್‍ನನೆಕೆ ಈಂಗಳು ದುಡ್‍ಕಿಯಂಡ್ ಓಡ್‍ವ. ಪಿಂಞ ಕೋರಹ ಎಣ್ಣ್‌ವಂವೊ ಎದ್‍ರ್ ತಕ್ಕ್ ಪರ್ಂದಿತ್ ಎನ್ನನೆ ಪಾಳಾಯಿ ಪೋಚೋ, ಅನ್ನನೆ ಈಂಗಳು ಪಾಳಾಯಿ ಪೋಪ.

ಯೂದ ಒಳ್‍ದ್‍ನ ಕಾಗದ 1:16

ಈಂಗ ಗೊಣಗುವಯಿಂಗಳು, ಕುತ್ತಪರಿಯುವಯಿಂಗಳು, ತಂಗಡ ತಂಗಡ ಕೆಟ್ಟ ಆಸೆನೆ ಪೂರ್ತಿ ಮಾಡ್‌ವಯಿಂಗಳಾಯಿತುಂಡ್. ಅಯಿಂಗ ಅಯಿಂಗಳ ಹೊಗಳ್‍ಚಿಟ್ಟಂಡ್, ಅಯಿಂಗಕ್ ಬೋಂಡಿಯಾನದ್ ಕ್‍ಟ್ಟ್‌ವಕಾಯಿತ್ ಬೋರೆಯಿಂಗಳ ಕೊಂಡಾಡುವ.

ಯೂದ ಒಳ್‍ದ್‍ನ ಕಾಗದ 1:4

ಎನ್ನಂಗೆಣ್ಣ್‌ಚೇಂಗಿ, ದೇವಡ ಮೇಲೆ ದಂಗೆ ಮಾಡ್‌ವ ಚೆನ್ನ ಜನ ನಿಂಗಕ್ ಗೊತ್ತಿಲ್ಲತೆ ನಿಂಗಡ ಸಬೇಲ್ ನುಗ್ಗಿತ್, ದೇವಡ ಕೃಪೆ ನಂಗಳ ಕಾಮಾಬಿಲಾಷೆ ಪಾಪ ಮಾಡ್‌ವಕ್ ಅನುಮತಿ ಕೊಡ್‍ತಿತುಂಡ್‍ೕಂದ್ ಎಣ್ಣಿಯಂಡ್, ಯೇಸು ಕ್ರಿಸ್ತ ಒಬ್ಬನೇ ನಂಗಡ ಮೇಲೆ ಎಲ್ಲಾ ಅದಿಕಾರ ಉಳ್ಳ ಒಡೆಯಾಂದ್ ಉಳ್ಳಾನ ಒತ್ತಂಡಿಲ್ಲೆ. ಅಯಿಂಗಡ ತೀರ್ಪ್‌ನ ಪಂಡೇ ದೇವ ಒಳ್‍ದಿ ಬೆಚ್ಚಿತುಂಡ್.

ಯೂದ ಒಳ್‍ದ್‍ನ ಕಾಗದ 1:7

ಅನ್ನನೆ ಸೊದೋಮ್ ಗೊಮೋರ ಪಟ್ಟಣತ್‍ರ ಜನ ಪಿಂಞ ಅದ್ಂಡ ಸುತ್ತ್‌ಮುತ್ತ್‌ಲ್ ಇಂಜ ಪಟ್ಟಣತ್‍ರ ಜನಳು ಅಯಿಂಗಡನೆಕೆ ಲೈಂಗಿಕ ಪಾಪತ್‍ನ ಮಾಡಿತ್, ಮನುಷ್ಯಂಗಡ ಸರಿಯಾನ ಆಸೇನ ಅಯಿಂಗಡ ಆಸೆರನೆಕೆ ತಿರಿಕಿತ್ ಪೋಚಿ. ದೇವ ಈ ಪಟ್ಟಣತ್‍ನ ತಿತ್ತ್‌ಕ್ ಇಟ್ಟಿತ್ ನಾಶ ಮಾಡ್‍ಚಿ. ಅನ್ನನೆ ಈಂಗ ದೇವ ತಪ್ಪ ನಿತ್ಯ ತಿತ್ತ್‌ರ ದಂಡೆನೆಕ್ ಉದಾರಣೆಯಾಯಿತ್ ಉಂಡ್.