2 ಯೋಹಾನ 1:1 - ಕೊಡವ ಬೈಬಲ್

¹ ಮೂಪನಾನ ನಾನ್ ನೇರಾಯಿತ್ ಪ್ರೀತಿಚಿಡ್‍ವ ದೇವ ಗೊತ್ತ್ ಮಾಡ್‍ನ ಪ್ರೀತಿರ ಅವ್ವಂಗ್ ಪಿಂಞ ಅವಡ ಮಕ್ಕಕ್ ಒಳ್‍ದ್‍ವ ಕಾಗದ. ನಾನ್ ಒಬ್ಬ ಮಾತ್ರ ಅಲ್ಲ, ಆಚೇಂಗಿ ನೇರಾನ ಸತ್ಯ ಗೊತ್ತುಳ್ಳ ಎಲ್ಲಾರು ನಿಂಗಳ ಪ್ರೀತಿ ಮಾಡ್‌ವ.

2 ಯೋಹಾನ 1:1 Iomraidhean Croise

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 1:3

ಆನಗುಂಡ್ ಆದಿಯಿಂಜ ನಡ್ಂದ ಘಟನಾವಳಿನ ಪರಿಶೀಲನೆ ಮಾಡಿತ್, ನಾನ್ ನಿಂಗಕ್ ಕ್ರಮತ್‍ಲ್ ಒಳ್‍ದ್‍ವದ್ ಚಾಯೀಂದ್ ನಾಕ್ ಗೊತ್ತಾಚಿ.

ಯೋಹಾನ 8:32

ಅಕ್ಕ, ನಿಂಗಕ್ ಸತ್ಯ ಎಂತ್‍ೕಂದ್ ಗೊತ್ತಾಪ, ಆ ಸತ್ಯ ನಿಂಗಳ ಬುಡ್‍ಗಡೆ ಮಾಡ್‌ವಾಂದ್ ಎಣ್ಣ್‌ಚಿ.

ಅಪೊಸ್ತಲ 11:30

ಅನ್ನನೆ ಅಯಿಂಗ, ಎಲ್ಲಾನ ಕೂಟಿತ್, ಬಾರ್ನಬ ಪಿಂಞ ಸೌಲಂಡ ಕೂಡೆ, ಯೆರೂಸಲೇಮ್‍ಲ್ ಉಳ್ಳ ಸಬೆರ ಪೆರಿಯಯಿಂಗಕ್ ಈ ಸಹಾಯತ್‍ನ ಕೊಡ್‌ತಿತ್ ಅಯಿಚತ್.

ರೋಮ್ 16:13

ಒಡೆಯಂಡಲ್ಲಿ ಗೊತ್ತ್ ಮಾಡಿತುಳ್ಳ ರೂಫಂಗು, ನಾಕ್ ಸಹ ಅವ್ವಂಡನೆಕೆ ಉಳ್ಳ ಅಂವೊಂಡ ಅವ್ವಕು ವಂದನೆ ಎಣ್ಣಿ.

ಗಲಾತ್ಯ 2:14

ಅಯಿಂಗ ಇನ್ನನೆ ನಲ್ಲ ಸುದ್ದಿರ ಸತ್ಯಕ್ ಸರಿಯಾನ ರೀತಿಲ್ ಮಾಡತದ್‍ನ ನಾನ್ ಕಾಂಬಕ, ಎಲ್ಲಾಡ ಮಿಂಞತ್ ನಾನ್ ಪೇತ್ರನ ನೋಟಿತ್, ಇನ್ನನೆ ಎಣ್ಣ್‌ನ: ಯೆಹೂದ್ಯನಾಯಿತುಳ್ಳ ನೀನ್ ಯೆಹೂದ್ಯಂಗಡ ನ್ಯಾಯಪ್ರಮಾಣತ್‍ರ ಪ್ರಕಾರ ನಡ್‍ಕತೆ ಇಂಜಂಡ್, ಯೆಹೂದ್ಯರಲ್ಲತ ಜನ ಯೆಹೂದ್ಯ ಪದ್ದತಿರನೆಕೆ ನಡ್‍ಕಂಡೂಂದ್ ಎನ್ನನೆ ಒತ್ತಾಯ ಮಾಡ್‌ವಕ್ ಕಯ್ಯು?

ಗಲಾತ್ಯ 2:5

ಯೇಸು ಕ್ರಿಸ್ತಂಡ ನಲ್ಲ ಸುದ್ದಿರ ಸತ್ಯ ನಿಂಗಡಲ್ಲಿ ಎಕ್ಕಾಲು ಚಾಯಿತೆ ಇಪ್ಪಕಾಯಿತ್, ನಂಗ ಒರ್ ಗಳಿಗೆಯು ಅಯಿಂಗಕ್ ಕೆಮಿ ಕೊಡ್‍ತಿತ್‌ಲ್ಲೆ.

ಗಲಾತ್ಯ 3:1

ಓ ಮುಠಾಳ ಗಲಾತ್ಯ ಜನಳೇ! ಯೇಸು ಕ್ರಿಸ್ತ ಶಿಲುಬೇಲ್ ನಿಂಗಡ ಕಣ್ಣ್‌ರ ಮಿಂಞತ್ ಚತ್ತನೆಕೆ, ನಿಂಗಕ್ ಅಂವೊಂಡ ಚಾವ್‍ರ ವಿಷಯತ್‍ನ ನಾನ್ ವಿವರಿಚಿಟ್ಟತೇಂಗಿಯು, ಇಕ್ಕ ನಿಂಗಳ ಸೊಯ ಇಲ್ಲತನೆಕೆ ಮಾಡ್‍ನಂವೊ ದಾರ್?

ಗಲಾತ್ಯ 5:7

ನಿಂಗ ಚಾಯಿತೆ ಓಡಿಯಂಡಿಂಜೀರಲ್ಲಾ? ಪಿಂಞ ದಾರ್ ನಿಂಗಳ ಸತ್ಯತ್‍ರ ಬಟ್ಟೇಲ್ ಪೋಕತನೆಕೆ ನಿಪ್ಪ್‌ಚಿಟ್ಟದ್?

ಕೊಲೊಸ್ಸೆ 1:5

ನೇರಾನ ಸುದ್ದಿಯಾನ ದೇವಡ ನಲ್ಲ ಸುದ್ದಿ ನಿಂಗಡ ಪಕ್ಕ ಆದ್ಯವಾಯಿತ್ ಬಂದಿತ್ ನಿಂಗಕ್ ಗೊತ್ತಾನ ಕಾಲತ್ಂಜ, ನಿಂಗ ಇನ್ನನೆ ಮಾಡಿಯಂಡ್, ನಿಂಗಕಾಯಿತ್ ಪರಲೋಕತ್‍ಲ್ ಬದ್ರವಾಯಿತ್ ಬೆಚ್ಚಿತುಳ್ಳ ನಿರೀಕ್ಷೆಕಾಯಿತ್ ಪಾರಕಾತಂಡ್ ಉಳ್ಳಿರ.

1 ತಿಮೊಥೆಯ 2:4

ಎಲ್ಲಾ ಜನಕು ರಕ್ಷಣೆ ಕ್‍ಟ್ಟಂಡೂಂದು, ಎಲ್ಲಾರ್‌ಕು ಸತ್ಯ ಗೊತ್ತಾಂಡೂಂದು ಉಳ್ಳದೇ ಅಂವೊಂಡ ಚಿತ್ತವಾಯಿತುಂಡ್.

ಇಬ್ರಿಯ 10:26

ಸತ್ಯ ಎಂತ್‍ೕಂದ್ ಗೊತ್ತಾನ ಪಿಂಞ, ನಂಗ ಮನಪೂರ್ವವಾಯಿತ್ ಪಾಪ ಮಾಡ್‍ಚೇಂಗಿ, ಪಾಪತ್‍ರ ವಿಮೋಚನಕಾಯಿತ್ ಕೊಡ್‍ಪಕ್, ಬೋರೆ ಏದ್ ಬಲಿಯು ಇಲ್ಲೆ.

1 ಪೇತ್ರ 1:2

ಅಪ್ಪನಾನ ದೇವ ಎಲ್ಲಾಕಿಂಜ ಮಿಂಞ ಎಂತ ತೀರ್ಮಾನ ಮಾಡಿತ್ಂಜತೋ, ಅನ್ನನೆ ನಿಂಗಳ ಅಂವೊ ಗೊತ್ತ್ ಮಾಡಿತ್, ನಿಂಗ ಯೇಸು ಕ್ರಿಸ್ತಂಗ್ ಬಗ್ಗಿತ್ ನಡ್‍ಪನೆಕೆ, ಅಂವೊಂಡ ಚೋರೆರ ಮೂಲಕ ನಿಂಗ, ನಿಂಗಡ ಪಾಪತ್ಂಜ ಶುದ್ದ ಆಪನೆಕೆ, ಅಂವೊಂಡ ಆತ್ಮತ್‍ರ ಮೂಲಕ ನಿಂಗಳ ಬೋರೆ ಮಾಡಿತ್ ಶುದ್ದಮಾಡ್‍ಚಿ. ದುಂಬ್‍ನ ಕೃಪೆಯು ಸಮಾದಾನವು ನಿಂಗಕ್ ಇಂಞು ಕ್‍ಟ್ಟಡ್.

1 ಪೇತ್ರ 5:1

ನಿಂಗಡಲ್ಲಿ ಉಳ್ಳ ಪೆರಿಯಯಿಂಗಕ್ ಮೂಪನಾಯಿತು, ಕ್ರಿಸ್ತಂಡ ಕಷ್ಟಕ್ ಸಾಕ್ಷಿಯಾಯಿತು, ಇಂಞು ಮಿಂಞಕ್ ಬಪ್ಪಕುಳ್ಳ ಮಹಿಮೇಕ್ ಪಾಲ್‍ದಾರನಾಯಿತು ಇಪ್ಪ ನಾನ್ ನಿಂಗಕ್ ಬೋಡ್‍ವದ್ ಎಂತ ಎಣ್ಣ್‌ಚೇಂಗಿ:

1 ಪೇತ್ರ 5:13

ನಿಂಗಡ ಕೂಡೆ ಗೊತ್ತ್ ಮಾಡ್‍ನ, ಬಾಬೆಲ್‍ಲ್ ಉಳ್ಳಯಿಂಗ ಪಿಂಞ ನಾಡ ಮೋಂವೊಂಡನೆಕೆ ಉಳ್ಳ ಮಾರ್ಕ ನಿಂಗಕ್ ವಂದನೆ ಎಣ್ಣಿಯಂಡುಂಡ್.

1 ಯೋಹಾನ 2:21

ಆನಗುಂಡ್, ನಿಂಗಕ್ ಸತ್ಯ ಎಂತ್‍ೕಂದ್ ಗೊತ್ತ್‌ಲ್ಲೇಂದ್ ಅಲ್ಲ, ಆಚೇಂಗಿ ನಿಂಗಕ್ ಸತ್ಯ ಗೊತ್ತುಳ್ಳಗುಂಡು, ಏದ್ ಪೊಟ್ಟೂ ಸತ್ಯತ್ಂಜ ಪುಟ್ಟ್‌ನದ್ ಅಲ್ಲಾಂದ್ ಗೊತ್ತುಳ್ಳಗುಂಡ್ ನಾನ್ ಒಳ್‍ದ್‍ವಿ.

1 ಯೋಹಾನ 3:18

ನಾಡ ಪ್ರೀತಿರ ಮಕ್ಕಳೇ, ನಂಗಡ ಪ್ರೀತಿ ಬರಿ ತಕ್ಕ್‌ಬಾಕ್‍ಲ್ ಮಾತ್ರ ಇಪ್ಪಕ್ಕಾಗ, ಆಚೇಂಗಿ ಸತ್ಯತ್‍ಲ್ ಪಿಂಞ ಕ್ರಿಯೇಲ್ ಕಾಟಂಡು.

2 ಯೋಹಾನ 1:13

ದೇವ ಗೊತ್ತ್ ಮಾಡಿತುಳ್ಳ ನೀಡ ತಂಗೆರ ಮಕ್ಕ ನೀಕ್ ವಂದನೆ ಎಣ್ಣಿಯಂಡುಂಡ್.

2 ಯೋಹಾನ 1:5

ಇಕ್ಕಲು ಅವ್ವ, ನಂಗ ಒಬ್ಬೊಬ್ಬನ ಪ್ರೀತಿ ಮಾಡಂಡೂಂದ್, ನಿಂಗಕ್ ಪುದಿಯ ಆಜ್ಞೆಯಾಯಿತ್ ಒಳ್‍ದತೆ, ಆದಿಯಿಂಜಲೆ ನಂಗಕ್ ಇಂಜ ಆಜ್ಞೆನ ಒಳ್‍ದಿತ್ ನಿಂಗಳ ಬೋಡುವಿ.

3 ಯೋಹಾನ 1:1

ಮೂಪನಾನ ನಾನ್, ನೇರಾಯಿತ್ ಪ್ರೀತಿಚಿಡುವ ಪ್ರಿಯ ಗಾಯಂಗ್ ಒಳ್‍ದ್‍ವದ್ ಎಂತ ಎಣ್ಣ್‌ಚೇಂಗಿ,