2 ಕೊರಿಂಥ 7:3 - ಕೊಡವ ಬೈಬಲ್

³ ನಿಂಗಳ ಕುತ್ತ ಪರಿಯುವಕಾಯಿತ್ ನಾನ್ ಇನ್ನನೆ ಎಣ್ಣಿಯಂಡಿಲ್ಲೆ; ಎನ್ನಂಗೆಣ್ಣ್‌ಚೇಂಗಿ, ನಿಂಗಡ ಕೂಡೆ ಬದ್‌ಕ್‍ವಕು ಚಾವಕು ನಂಗಡ ಹೃದಯತ್‍ಲ್ ನಿಂಗ ಉಳ್ಳಿರಾಂದ್ ಮಿಂಞಲೇ ನಾನ್ ಎಣ್ಣ್‌ನ.

2 ಕೊರಿಂಥ 7:3 Iomraidhean Croise

2 ಕೊರಿಂಥ 11:11

ಎನ್ನಂಗ್ ಇನ್ನನೆ ಎಣ್ಣಿಯಂಡುಳ್ಳ? ನಾಕ್ ನಿಂಗಡ ಮೇಲೆ ಪ್ರೀತಿ ಇಲ್ಲತಗುಂಡಾ? ನಾಕ್ ಉಂಡ್‍ೕಂದ್ ದೇವಕ್ ಗೊತ್ತುಂಡ್.

2 ಕೊರಿಂಥ 12:15

ಆನಗುಂಡ್, ನಾನ್ ನಿಂಗಡಲ್ಲಿ ಎಚ್ಚಕ್ ಜಾಸ್ತಿಯಾಯಿತ್ ಪ್ರೀತಿ ಮಾಡಿಯಂಡ್ ಉಂಡೋ, ಅಚ್ಚಕ್ ಕಮ್ಮಿಯಾಯಿತ್ ನಿಂಗ ನನ್ನ ಪ್ರೀತಿ ಮಾಡ್‍ಚೇಂಗಿಯು, ನಿಂಗಕಾಯಿತ್ ನಾಡ ಪಕ್ಕ ಉಳ್ಳದ್‍ನ ಕೊಡ್‌ಪಕು, ನನ್ನ ಸಹ ಕೊಡ್‌ಪಕು ದುಂಬ ಕುಶಿ ಪಡುವಿ.

2 ಕೊರಿಂಥ 13:10

ಆನಗುಂಡ್ ನಿಂಗಡ ಕೂಡೆ ಇಲ್ಲತಿಪ್ಪಕಲೇ ಇದ್‍ನೆಲ್ಲಾ ಒಳ್‍ದಿಯೆ; ನಿಂಗಳ ಪೊಳಿಪಕಾಯಿತ್ ಅಲ್ಲ, ಕೆ‍ಟ್ಟ್‌ವಕಾಯಿತೇ ಒಡೆಯ ನಾಕ್ ತಂದಿತುಳ್ಳ ಅದಿಕಾರತ್‍ರನೆಕೆ, ನಾನ್ ನಿಂಗಡ ಪಕ್ಕ ಬಪ್ಪಕ, ಕಠಿಣವಾಯಿತ್ ಇಪ್ಪದ್ ಬೋಂಡಾಂದ್ ಕುಶಿ ಪಡುವಿ.

2 ಕೊರಿಂಥ 3:2

ನಂಗಡ ಹೃದಯತ್‍ಲ್ ಒಳ್‍ದಿ ಬೆಚ್ಚಿತ್, ಎಲ್ಲಾರ್‌ಕು ಗೊತ್ತಾಯಿತ್ ಪಿಂಞ ಅಯಿಂಗ ಓದಿಯಂಡುಳ್ಳ ನಂಗಡ ಕಾಗದ ನಿಂಗಳೇ.

2 ಕೊರಿಂಥ 7:12

ಆನಗುಂಡ್, ನಾನ್ ನಿಂಗಕ್ ಅನ್ನನೆ ಒಳ್‍ದಿತ್ಂಜತೇಂಗಿಯು, ಅದ್ ಅನ್ಯಾಯ ಮಾಡ್‍ನಂವೊಂಗಾಯಿತು ಅಲ್ಲ, ಅನ್ಯಾಯ ಆನಂವೊಂಗಾಯಿತು ಅಲ್ಲ; ದೇವಡ ಮಿಂಞತ್ ನಿಂಗಡ ವಿಷಯತ್ ನಂಗಕ್ ಉಳ್ಳ ಜಾಗ್ರತೆ ನಿಂಗಕ್‌ ಗೊತ್ತಾಪಕಾಯಿತೇ ಅನ್ನನೆ ಒಳ್‍ದಿಯೆ.

ಫಿಲಿಪ್ಪಿ 1:7

ನಿಂಗ ನಾಡ ಹೃದಯತ್‍ಲ್ ಎಕ್ಕಾಲು ವಾಸಮಾಡಿಯಂಡುಳ್ಳಗುಂಡ್, ನಿಂಗ ಎಲ್ಲಾಡ ವಿಷಯತ್‍ಲ್ ನಾನ್ ಇನ್ನನೆ ಎಣ್ಣ್‌ವದ್ ನಾಕ್ ಚಾಯೀಂದ್ ಕಾಂಬ. ದೇವ ನಾಡ ಮೇಲೆ ಕಾಂಬ್‍ಚಿಟ್ಟ ವಿಶೇಷವಾನ ಕೃಪೇರ ವಿಷಯತ್‍ಲ್, ನಾನ್ ಜೈಲ್‍ಲ್ ಇಪ್ಪಕಲು, ನಲ್ಲ ಸುದ್ದಿರ ವಿಷಯತ್‍ಲ್ ಜವಾಬ್ ಕೊಡ್‌ತಂಡ್ ಸ್ತಾಪನೆ ಮಾಡ್‌ವಕಲು, ನಾಡ ಕೂಡೆ ಪಾಲ್‍ದಾರಂಗಳಾಯಿತ್ ಉಳ್ಳಿರ.

1 ಥೆಸಲೊನೀಕ 2:8

ನಂಗ ನಿಂಗಳ ಅಚ್ಚಕ್ ಪ್ರೀತಿ ಮಾಡಿತ್, ನಿಂಗಕ್ ದೇವಡ ನಲ್ಲ ಸುದ್ದಿರ ಬೋದನೆ ಮಾತ್ರ ಅಲ್ಲತೆ, ನಂಗಡ ಜೀವತ್‍ನ ಸಹ ಕೊಡ್‍ಪಕ್ ನಂಗ ಕುಶೀಲ್ ಇಂಜತ್.