1 ಥೆಸಲೊನೀಕ 4:3 - ಕೊಡವ ಬೈಬಲ್

³ ನಿಂಗ ಪವಿತ್ರವಾನಯಿಂಗಳಾಯಿತ್ ಬದ್‍ಕಂಡೂಂದ್ ಉಳ್ಳದೇ ದೇವಡ ಚಿತ್ತ. ಆನಗುಂಡ್ ನಿಂಗ ಲೈಂಗಿಕ ಪಾಪಕ್ ದೂರವಾಯಿತ್ ಇರಂಡು.

1 ಥೆಸಲೊನೀಕ 4:3 Iomraidhean Croise

ಮತ್ತಾಯ 12:50

ಪರಲೋಕತ್‍ಲ್ ಉಳ್ಳ ನಾಡ ಅಪ್ಪಂಡ ಚಿತ್ತತ್‍ನ ಮಾಡ್‍ವಯಿಂಗಳೇ ನಾಡ ಅಣ್ಣತಮ್ಮಣ, ಅಕ್ಕತಂಗೆಯ ಪಿಂಞ ಅವ್ವಳು ಆಯಿತುಂಡ್‍ೕಂದ್ ಎಣ್ಣ್‌ಚಿ.

ಮತ್ತಾಯ 15:19

ಎನ್ನನೆ ಎಣ್ಣ್‌ಚೇಂಗಿ, ಹೃದಯತ್ಂಜಲೇ ಕೆಟ್ಟ ಗೇನ, ಕೊಲೆ, ವ್ಯಬಿಚಾರ, ಲೈಂಗಿಕ ಪಾಪ, ಕಕ್ಕಂಡೂ, ಪೊಟ್ಟ್ ಪರಿಯಂಡು, ಪೊಟ್ಟ್ ಸಾಕ್ಷಿ ಪರಿಯಂಡು, ಬೋರೆಯಿಂಗಳ ನಾಶ ಮಾಡ್‌ವಕ್ ಕೆಟ್ಟ ತಕ್ಕ್ ಪರಿಯಂಡೂಂದ್ ಉಳ್ಳ ಗೇನ ಎಲ್ಲಾ ಬಪ್ಪ.

ಮತ್ತಾಯ 5:32

ಆಚೇಂಗಿ ಇಕ್ಕ ನಾನ್ ನಿಂಗಕ್ ಎಣ್ಣ್‌ವಿ: ವ್ಯಬಿಚಾರ ಮಾಡ್‍ನ ಕಾರಣಕ್ ಅಲ್ಲತೆ ಬೋರೆ ಏದ್ ಕಾರಣಕಾಯಿತು ಒಬ್ಬ ತಾಂಡ ಪೊಣ್ಣ್‌ನ ಬುಟ್ಟ್‌ರ್‍ತೇಂಗಿ, ಅವ ವ್ಯಬಿಚಾರ ಮಾಡ್‌ವಕ್ ಇಂವೊ ಕಾರಣ ಆಪ. ಅನ್ನನೆ ಬೋಂಡಾಂದ್ ಬುಟ್ಟ ಪೊಣ್ಣಾಳ್‍ನ ಮಂಗಲ ಕಯಿಪಂವೊನು ವ್ಯಬಿಚಾರ ಮಾಡ್‍ವಂವೊನಾಯಿತ್‌ಪ್ಪ.

ಮತ್ತಾಯ 7:21

ನನ್ನ, ಒಡೆಯನೇ, ಒಡೆಯನೇಂದ್ ಕಾಕ್‍ವ ಎಲ್ಲಾರು ಪರಲೋಕಕ್ ಪೋಪುಲೆ, ಆಚೇಂಗಿ ದಾರ್ ಪರಲೋಕ ರಾಜ್ಯತ್‍ಲ್ ಉಳ್ಳ ನಾಡ ಅಪ್ಪಂಡ ಚಿತ್ತತ್‍ನ ನೆರೆವೇರಿಚಿಡ್‍ವ ಅಯಿಂಗ ಮಾತ್ರ ಪರಲೋಕಕ್ ಪೋಪ.

ಮಾರ್ಕ 3:35

ದಾರೆಲ್ಲಾ ದೇವಡ ಚಿತ್ತ ಮಾಡ್‌ವ ಅಯಿಂಗಳೇ ನಾಡ ಅಣ್ಣತಮ್ಮಣಂಗ, ಅಕ್ಕತಂಗೆಯ, ಅವ್ವಾಂದ್ ಎಣ್ಣ್‌ಚಿ.

ಯೋಹಾನ 4:34

ಅಯಿಂಗಕ್ ಯೇಸು: ನನ್ನ ಅಯಿಚಂವೊಂಡ ಚಿತ್ತತ್‍ರನೆಕೆ ಮಾಡಿತ್, ಅಂವೊಂಡ ಕ್ರಿಯೇನ ನೆರೆವೇರಿಚಿಡುವದೇ ನಾಡ ಆಹಾರಾಂದ್ ಎಣ್ಣ್‌ಚಿ.

ಯೋಹಾನ 7:17

ದೇವಡ ಚಿತ್ತತ್‍ರನೆಕೆ ಮಾಡ್‌ವಕ್ ಕುಶಿ ಉಳ್ಳಂವೊಂಗ್, ನಾನ್ ಮಾಡ್‌ವ ಬೋದನೆ ದೇವಡಯಿಂಜ ಬಪ್ಪ ಬೋದನೆಯಾ, ಅಥವ ನಾಡ ಸ್ವಂತ ಬೋದನೆಯಾಂದ್ ಗೊತ್ತಾಪಾಂದ್ ಜವಾಬ್ ಕೊಡ್‍ತತ್.

ಅಪೊಸ್ತಲ 15:20

ಅದ್ಂಡ ಬದ್‍ಲ್ ಅಯಿಂಗ ವಿಗ್ರಹಕ್ ಅರ್ಪಿಚಿಟ್ಟ ಅಶುದ್ದ ಆನ ಕೂಳ್‍ಕ್, ಚೋರೆ ತಿಂಬಕ್, ನೆರ್‌ಕಿತ್ ಚತ್ತ್‌ಪೋನ ಪ್ರಾಣಿಯಡ ಯರ್ಚಿಕ್ ಪಿಂಞ ಲೈಂಗಿಕ ಪಾಪಕ್ ದೂರವಾಯಿತ್ ಇರಂಡೂಂದ್ ಅಯಿಂಗಕ್ ಕಾಗದತ್‍ನ ಒಳ್‍ದಿತ್ ಅಪ್ಪಣೆ ಕೊಡಕನ.

ಅಪೊಸ್ತಲ 20:32

ನಾನ್ ಇಕ್ಕ ನಿಂಗಳ ದೇವಂಗೂ ಅಂವೊಂಡ ಕೃಪೇರ ವಾಕ್ಯ‌ಕೂ ಒಪ್ಪ್‌ಚಿಟ್ಟಿತ್ ಪೋಪಿ. ಈ ಕೃಪೇರ ವಾಕ್ಯ ನಿಂಗಡ ಬಕ್ತಿ ಬೊಳಿವಕು, ಅಂವೊಂಗಾಯಿತ್ ಬೋರೆ ಮಾಡಿತುಳ್ಳ ಪವಿತ್ರವಾನ ಜನಕ್ ಬೆಚ್ಚಿತುಳ್ಳ ಬಾದ್ಯತ್‌ಲ್ ನಿಂಗಕು ಕ್‍ಟ್ಟ್‌ವನೆಕೆ ಮಾಡ್‌ವ.

ಅಪೊಸ್ತಲ 26:18

ಅಯಿಂಗ ನಾಡ ಮೇಲೆ ಇಡ್‌ವ ನಂಬಿಕೇರಗುಂಡ್, ಅಯಿಂಗಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟಿತ್, ಅಂವೊಂಗಾಯಿತ್ ಬೋರೆ ಮಾಡಿತ್ ಪವಿತ್ರ ಮಾಡ್‍ನ ಜನಕ್ ಕ್‍ಟ್ಟುವ ಬಾದ್ಯತೆನ ಪಡೆಯುವನೆಕೆ, ಅಯಿಂಗ ಇರ್‍ಟಿಂಜ ಬೊಳಿಕು, ಸೈತಾನಂಡ ಅದಿಕಾರತ್ಂಜ ದೇವಡ ಕಡೇಕು ತಿರಿತ್ ಅಯಿಂಗಡ ಕಣ್ಣ್ ತೊರಕಂಡೂಂದ್ ನಿನ್ನ ನಾನ್ ಅಯಿಂಗಡ ಪಕ್ಕ ಅಯಿಪೀಂದ್ ಎಣ್ಣ್‌ಚಿ.

ರೋಮ್ 1:29

ಅಯಿಂಗ ಎಲ್ಲಾ ವಿದವಾನ ದುಷ್ಟತನತ್‍ಲ್, ಕೇಡ್‍ಲ್, ದ್ರೋಹ ಮಾಡ್‌ವದ್‍ಲ್, ಪಣತ್‍ರ ಆಸೇಲ್, ಆಂಗಾರತ್‍ಲ್, ಕೊಲೆ ಮಾಡ್‌ವದ್‍ಲ್, ತರ್ಕ ಮಾಡ್‌ವದ್‍ಲ್, ಕೆಟ್ಟ ಆಸೇಲ್, ವಂಚನೆಲ್, ಒಟ್ಟೆಕಿಚ್ಚ್‌ಲ್ ದುಂಬಿತುಂಡ್.

ರೋಮ್ 12:2

ಇಂಞು ಮಿಂಞಕ್ ಈ ಲೋಕತ್‍ರ ರೀತಿಕ್ ಒತ್ತಂಡ್ ಪೋಕತಿ. ನಲ್ಲದಾಯಿತು, ಯೋಗ್ಯವಾಯಿತು, ಪೂರ್ತಿಯಾಯಿತುಳ್ಳ ದೇವಡ ಚಿತ್ತ ಎಂತ್‍ೕಂದ್ ಗೊತ್ತಾಪಕಾಯಿತ್, ನಿಂಗಡ ಮನಸ್ಸ್‌ನ ಪುದಿಯದ್ ಮಾಡಿಯಂಡ್ ಬದ್‍ಲಾಯಂಡಿರಿ.

ರೋಮ್ 6:22

ಇಕ್ಕ ನಿಂಗ ಪಾಪತ್ಂಜ ಬುಡುಗಡೆ ಆಯಿತ್ ದೇವಡ ಅಡಿಯಾಳಾಯಿತ್ ಉಳ್ಳಾಂಗ್, ಪವಿತ್ರವಾಯಿತ್‌ಪ್ಪದ್ ನಿಂಗಕ್ ಕ್‍ಟ್ಟ್‌ವ ಇನಾಮ್, ಅದ್ಂಡ ಪ್ರತಿಫಲ ನಿತ್ಯ ಜೀವ.

1 ಕೊರಿಂಥ 1:30

ಅನ್ನನೆ, ದೇವ ನಿಂಗಳ ಕ್ರಿಸ್ತ ಯೇಸುರ ಕೂಡೆ ಐಕ್ಯತ್‍ಲ್ ಕೂಟಿತುಂಡ್. ಆನಗುಂಡ್ ದೇವ, ಕ್ರಿಸ್ತನ ನಂಗಕ್ ಜ್ಞಾನವಾಯಿತ್ ಮಾಡಿತುಂಡ್. ಅಂವೊಂಡ ಮೂಲಕ ನಂಗಳ, ದೇವಡ ಮಿಂಞತ್‍ಲ್ ನೀತಿವಂತಯಿಂಗಳಾಯಿತು, ಪವಿತ್ರ ಜನಳಾಯಿತು ಪಿಂಞ ನಂಗಕ್ ವಿಮೋಚನ ಕ್‍ಟ್ಟುವನೆಕೆ ಮಾಡಿತುಂಡ್.

1 ಕೊರಿಂಥ 7:2

ಆಚೇಂಗಿ, ಇಚ್ಚಕ್ ಲೈಂಗಿಕ ಪಾಪತ್‍ರ ಸೋದನೆ ಉಳ್ಳಗುಂಡ್ ಪ್ರತಿಯೊರ್ ಮನುಷ್ಯಂಗು ಒರ್ ಸ್ವಂತ ಪೊಣ್ಣ್ ಬೋಂಡು, ಪ್ರತಿಯೊರ್ ಪೊಣ್ಣಾಳ್‍ಕು ಒರ್ ಸ್ವಂತ ವಡಿಯ ಬೋಂಡು.

2 ಕೊರಿಂಥ 12:21

ಪುನಃ ನಾನ್ ನಿಂಗಡ ಪಕ್ಕ ಬಪ್ಪಕ, ನಾಡ ದೇವ ನಿಂಗಡ ಮಿಂಞ ನನ್ನ ತಗ್ಗ್‌ಚಿಡುವಕಾಯಿತ್, ಮಿಂಞ ಪಾಪ ಮಾಡ್‍ನ ದುಂಬ ಜನ ಅಯಿಂಗ ಮಾಡ್‍ನ ಅಶುದ್ದತ್‍ನ, ಲೈಂಗಿಕ ಪಾಪತ್‍ನ ಪಿಂಞ ತಡೀರ ಮೋಹತ್‍ನ ಬುಟ್ಟಿತ್ ಪಶ್ಚಾತಾಪ ಪಡತೆ ಇಪ್ಪದ್‍ನ ಕಂಡಿತ್ ನಾನ್ ದುಃಖಪಡುವಕ್ ಇಪ್ಪೋಂದ್ ನಾಕ್ ಪೋಡಿ ಆಯಂಡುಂಡ್.

ಗಲಾತ್ಯ 5:19

ಮನುಷ್ಯಂಡ ಪಾಪತ್‍ರ ಗುಣ ಮಾಡ್‌ವ ಕಾರ್ಯವೆಲ್ಲಾ ಪೊರಮೆ ಕಾಂಬಕ್ ಕಯ್ಯು. ಅದೆಲ್ಲ ಎಂತ ಎಣ್ಣ್‌ಚೇಂಗಿ: ಲೈಂಗಿಕ ಪಾಪ, ನೀತಿಯಿಲ್ಲತ ಕಾರ್ಯ, ತಡೀರ ಮೋಹ,

ಎಫೆಸ 5:17

ಬುದ್ದಿಯಿಲ್ಲತಯಿಂಗಡನೆಕೆ ಇಪ್ಪಕ್ಕಾಗ, ದೇವಡ ಚಿತ್ತ ಎಂತ್‍ೕಂದ್ ಅರ್ಥ ಮಾಡಿಯೊಳಿ.

ಎಫೆಸ 6:6

ಮನುಷ್ಯಂಗ ಕುಶಿಪಡ್‌ವನೆಕೆ ಅಯಿಂಗ ನೋಟ್‍ವಕ ಮಾತ್ರ ಕೆಲಸ ಮಾಡತೆ, ಕ್ರಿಸ್ತಂಡ ಅಡಿಯಾಳಾಯಿತ್, ಪೂರ್ತಿ ಮನಸ್ಸ್‌ಲ್ ದೇವಡ ಚಿತ್ತತ್‍ನ ಮಾಡಿ.

ಕೊಲೊಸ್ಸೆ 1:9

ಆನಗುಂಡ್ ನಂಗ ಇದ್‍ನ ಕ್‍ೕಟ ದಿವಸತ್ಂಜ ಎಕ್ಕಾಲು ನಿಂಗಕಾಯಿತ್ ಪ್ರಾರ್ಥನೆ ಮಾಡಿಯಂಡುಂಡ್. ನಿಂಗ ದೇವಡ ಚಿತ್ತತ್‍ನ ಗೊತ್ತ್‌ಮಾಡ್‍ವಕುಳ್ಳ ಬುದ್ದಿ ದುಂಬ್‍ನಯಿಂಗಳಾಯಿತ್, ಪವಿತ್ರಾತ್ಮ ತಪ್ಪ ಎಲ್ಲಾ ಜ್ಞಾನ ಪಿಂಞ ಬುದ್ದಿಲ್ ಪ್ರಾರ್ಥನೆ ಮಾಡಿಯಂಡುಂಡ್.

ಕೊಲೊಸ್ಸೆ 3:5

ಆನಗುಂಡ್, ಲೈಂಗಿಕ ಪಾಪ, ಪವಿತ್ರಯಿಲ್ಲತ ವಿಷಯ, ಇಚ್ಛೆ, ಕೆಟ್ಟ ಆಸೆ, ದುಷ್ಟತನ, ಅತಿ ಆಸೆಯಾಯಿತುಳ್ಳ ವಿಗ್ರಹ ಆರಾದನೆ, ಈ ಲೋಕತ್‍ರ ಗುಣವಾಯಿತುಳ್ಳ ಇದೆಲ್ಲಾ ನಿಂಗಡಿಂಜ ಪಾಳ್ ಆಪನೆಕೆ ಬುಡ್‍ವಿರ.

ಕೊಲೊಸ್ಸೆ 4:12

ಕ್ರಿಸ್ತ ಯೇಸುರ ಸೇವಕನು, ನಿಂಗಡ ಪಟ್ಟಣಕ್ ಕೂಡ್‍ನಂವೊನಾನ ಎಪಫ್ರ ಸಹ ನಿಂಗಕ್ ವಂದನೆ ಎಣ್ಣಿಯಂಡುಂಡ್. ಅಂವೊ ನಿಂಗಕಾಯಿತ್ ಎಕ್ಕಾಲು ದೇವಡ ಪಕ್ಕ ನೇರಾಯಿತು ಪ್ರಾರ್ಥನೆ ಮಾಡಿಯಂಡುಂಡ್. ದೇವ ನಿಂಗಳ ಬಲ ಉಳ್ಳಯಿಂಗಳಾಯಿತ್ ಮಾಡಂಡೂಂದು, ನಿಂಗ ಏದ್ ತಪ್ಪಿಲ್ಲತಯಿಂಗಳಾಯಿತು, ನಿಂಗಕ್ ದೇವಡ ಚಿತ್ತ ಪೂರ್ತಿ ಗೊತ್ತಾಂಡೂಂದೂ ಅಂವೊ ಪ್ರಾರ್ಥನೆ ಮಾಡಿಯಂಡುಂಡ್.

1 ಥೆಸಲೊನೀಕ 4:2

ಒಡೆಯನಾನ ಯೇಸುರಗುಂಡ್ ನಂಗಕ್ ಕ್‍ಟ್ಟ್‌ನ ಆಜ್ಞೆರನೆಕೆ, ನಿಂಗಕ್ ನಂಗ ಮಾಡ್‍ನ ಆಜ್ಞೆನ ನಿಂಗ ಗೇನ ಬೆಚ್ಚಿತುಳ್ಳಿರ.

1 ಥೆಸಲೊನೀಕ 4:4

ನಿಂಗ, ಅಯಿಂಗಯಿಂಗಡ ಪೊಣ್ಣ್‌ರ ಕೂಡೆ, ವಡಿಯಂಡ ಕೂಡೆ ಪವಿತ್ರವಾಯಿತ್, ದಾರೂ ತಪ್ಪ್ ಕಂಡ್‍ಪುಡಿಕತನೆಕೆ ಮರ್ಯಾದೆಲ್ ಬದ್‍ಕಂಡು.

1 ಥೆಸಲೊನೀಕ 5:18

ಎಂತ ನಡ್‌ಂದತೇಂಗಿಯು ದೇವಕ್ ವಂದನೆ ಎಣ್ಣಿಯಂಡ್ ಇರಿ; ಎನ್ನಂಗೆಣ್ಣ್‌ಚೇಂಗಿ, ಇನ್ನನೆ ಮಾಡ್‌ವದೇ ಯೇಸು ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ರ ಮೂಲಕ, ನಿಂಗಡ ಮೇಲೆ ಉಳ್ಳ ದೇವಡ ಚಿತ್ತವಾಯಿತ್ ಉಂಡ್.

1 ಥೆಸಲೊನೀಕ 5:23

ಸಮಾದಾನತ್‍ರ ದೇವ ನಿಂಗಳ ಪರಿಪೂರ್ಣವಾಯಿತ್ ಪಿಂಞ ಅಂವೊಂಗಾಯಿತ್ ಬೋರೆ ಮಾಡಿತ್ ಪವಿತ್ರವಾನಯಿಂಗಳಾಯಿತ್ ಮಾಡಡ್. ನಿಂಗಡ ಗೇನ, ನಿಂಗಡ ಆಸೆ ಪಿಂಞ ನಿಂಗ ಮಾಡ್‍ವದ್ ನಂಗಡ ಒಡೆಯನಾನ ಯೇಸು ಕ್ರಿಸ್ತ ಬಪ್ಪಕತ್ತನೆ ಒರ್ ತಪ್ಪು ಇಲ್ಲತನೆಕೆ ಇಪ್ಪಕ್ ಅಂವೊ ನಿಂಗಳ ಕಾಪಾಡಡ್.

2 ಥೆಸಲೊನೀಕ 2:13

ಒಡೆಯಂಡ ಪ್ರೀತಿರ ಅಣ್ಣತಮ್ಮಣಂಗಳೇ, ದೇವ ನಿಂಗಳ ಪವಿತ್ರಾತ್ಮತ್‍ರ ಶಕ್ತಿರಗುಂಡ್ ಬೋರೆ ಮಾಡಿತ್, ಶುದ್ದ ಮಾಡ್‍ನಗುಂಡ್ ಪಿಂಞ ನಿಂಗ ಸತ್ಯತ್‍ನ ನಂಬ್‍ನಗುಂಡ್ ನಿಂಗಕ್ ರಕ್ಷಣೆ ಕ್‍ಟ್ಟುವನೆಕೆ ಅಂವೊ ಮಾಡ್‍ಚಿ. ಅನ್ನನೆ ಅಂವೊ ಈ ಲೋಕತ್‍ನ ಸೃಷ್ಟಿ ಮಾಡ್‌ವಕ್ ಮಿಂಞಲೇ ನಿಂಗಳ ಗೊತ್ತ್ ಮಾಡ್‍ನಗುಂಡ್, ನಿಂಗಕಾಯಿತ್ ದೇವಕ್ ನಂಗ ಎಕ್ಕಾಲು ವಂದನೆ ಮಾಡ್‌ವಕ್ ನಂಗ ಜವಾಬ್ದಾರಂಗಳಾಯಿತ್ ಉಂಡ್.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 2:14

ಅಂವೊ, ನಂಗಳ, ನಂಗಡ ಎಲ್ಲಾ ಪಾಪತ್ಂಜ ಬುಡ್‍ಗಡೆ ಮಾಡಿತ್, ಅಂವೊಂಡ ಸ್ವಂತ ಜನವಾಯಿತ್ ಮಾಡ್‌ವಕಾಯಿತ್, ಎಲ್ಲಾ ನಲ್ಲ ಕೆಲಸತ್‍ನ ಕುಶೀಲ್ ಮಾಡ್‌ವಕ್ ಅರ್ಪಿಚಿಟ್ಟಯಂಗಳಾಯಿತ್ ಪಿಂಞ ನಂಗಳ ಶುದ್ದ ಮಾಡ್‌ವಕಾಯಿತ್ ಅಂವೊನ ಅಂವೊನೇ ನಂಗಕಾಯಿತ್ ಒಪ್ಪ್‌ಚಿಟ್ಟತ್.

ಇಬ್ರಿಯ 10:36

ನಿಂಗ ದೇವಡ ಚಿತ್ತತ್‍ರನೆಕೆ ಮಾಡಿತ್ ವಾಗ್ದಾನ ಮಾಡ್‍ನದ್‍ನ ಪಡೆಯುವಕ್ ನಿಂಗಕ್ ದುಂಬ ತಾಳ್ಮೆ ಬೋಂಡಿತುಂಡ್.

ಇಬ್ರಿಯ 12:16

ದಾರ್ ಒಬ್ಬನು ವೇಶಿತನ ಮಾಡ್‌ವಂವೊನಾಯಿತ್ ಇಪ್ಪಕ್ಕಾಗ. ಏಸಾ ಎಣ್ಣ್‌ವಂವೊ ಬರಿ ಕೂಳ್‍ಕಾಯಿತ್ ತಾಂಡ ಅಪ್ಪಯಿಂಜ ಕ್‍ಟ್ಟುವ ಆದ್ಯ ಮೋಂವೊಂಡ ಆಶೀರ್ವಾದತ್‍ನ ಮಾರ್‍ನನೆಕೆ ಬಕ್ತಿ ಇಲ್ಲತಂವೊನಾಯಿತು ಇಪ್ಪಕ್ಕಾಗ.

ಇಬ್ರಿಯ 13:21

ಯೇಸುರ ಮೂಲಕ ತಾಂಡ ಮಿಂಞತ್ ಕುಶಿಯುಳ್ಳದ್‍ನ, ನಿಂಗಡ ಮದ್ಯತ್‍ಲ್ ಮಾಡಿತ್, ನಿಂಗ ಅಂವೊಂಡ ಚಿತ್ತತ್‍ರನೆಕೆ ಮಾಡ್‌ವಕ್, ನಿಂಗಳ ಎಲ್ಲಾ ತರತ್‍ರ ನಲ್ಲ ಕ್ರಿಯೇರಗುಂಡ್ ಪೂರ್ತಿ ಮಾಡಿತ್ ಬಲಪಡ್‍ತಡ್; ಅಂವೊಂಗ್ ಎಕ್ಕಾಲು ಮಹಿಮೆ ಬರಡ್. ಆಮೆನ್.

ಇಬ್ರಿಯ 13:4

ಮಂಗಲತ್‍ನ ಎಲ್ಲಾರು ಗನಪಡ್‌ತಂಡು, ಮಂಗಲ ಕಯಿಚಯಿಂಗ ಅಯಿಂಗಯಿಂಗಡ ವಡಿಯ ಪೊಣ್ಣ್‌ಕ್ ನಂಬಿಕಸ್ತಯಿಂಗಳಾಯಿತ್ ಇಕ್ಕಂಡು; ವೇಶಿಯಳ ಪಿಂಞ ವ್ಯಬಿಚಾರ ಮಾಡ್‌ವಯಿಂಗಳ ದೇವ ನ್ಯಾಯತೀರ್ಪ.

1 ಪೇತ್ರ 1:2

ಅಪ್ಪನಾನ ದೇವ ಎಲ್ಲಾಕಿಂಜ ಮಿಂಞ ಎಂತ ತೀರ್ಮಾನ ಮಾಡಿತ್ಂಜತೋ, ಅನ್ನನೆ ನಿಂಗಳ ಅಂವೊ ಗೊತ್ತ್ ಮಾಡಿತ್, ನಿಂಗ ಯೇಸು ಕ್ರಿಸ್ತಂಗ್ ಬಗ್ಗಿತ್ ನಡ್‍ಪನೆಕೆ, ಅಂವೊಂಡ ಚೋರೆರ ಮೂಲಕ ನಿಂಗ, ನಿಂಗಡ ಪಾಪತ್ಂಜ ಶುದ್ದ ಆಪನೆಕೆ, ಅಂವೊಂಡ ಆತ್ಮತ್‍ರ ಮೂಲಕ ನಿಂಗಳ ಬೋರೆ ಮಾಡಿತ್ ಶುದ್ದಮಾಡ್‍ಚಿ. ದುಂಬ್‍ನ ಕೃಪೆಯು ಸಮಾದಾನವು ನಿಂಗಕ್ ಇಂಞು ಕ್‍ಟ್ಟಡ್.

1 ಪೇತ್ರ 4:2

ಆನಗುಂಡ್, ಇಂಞು ಮಿಂಞಕ್ ತಡೀಲ್ ಇಪ್ಪಕತ್ತನೆ, ಮನುಷ್ಯಂಗಡ ಇಚ್ಛೆಕಾಯಿತ್ ಬದ್‍ಕತೆ, ದೇವಡ ಚಿತ್ತತ್‍ರನೆಕೆ ಬದ್‍ಕ್‍ವ.

1 ಯೋಹಾನ 2:17

ಲೋಕವು ಅದ್ಂಡ ಇಚ್ಛೆಯು ಕಾಂಗತಾಯಿ ಪೋಪ, ಆಚೇಂಗಿ ದೇವಡ ಚಿತ್ತತ್‍ರನೆಕೆ ನಡ್‌ಪಂವೊ ಎಕ್ಕಲೂ ಬದ್‍ಕ್‍ವ.

ಪ್ರಕಟನೆ 21:8

ಆಚೇಂಗಿ, ಬೊತ್ತಿಯಂಡುಳ್ಳಯಿಂಗಳು, ನಂಬಿಕೆ ಇಲ್ಲತಯಿಂಗಳು, ಅಶುದ್ದವಾಯಿತುಳ್ಳಯಿಂಗಳು, ಕೊಲೆ ಮಾಡ್‌ವಯಿಂಗಳು, ವ್ಯಬಿಚಾರ ಮಾಡ್‌ವಯಿಂಗಳು, ಮಾಟಮಂತ್ರ ಮಾಡ್‌ವಯಿಂಗಳು, ವಿಗ್ರಹ ಆರಾದನೆ ಮಾಡ್‌ವಯಿಂಗಳು, ಪೊಟ್ಟ್ ಪರಿಯುವ ಎಲ್ಲಾರು ದಂಡನೆ ಚಾವಾಯಿತುಳ್ಳ ಗಂಧಕತ್‍ಲ್ ತಿತ್ತ್ ಕತ್ತಿಯಂಡಿಪ್ಪ ಕಡಲ್‍ಲ್ ಪಾಲ್‍ದಾರಂಗಳಾಪಾಂದ್ ಎಣ್ಣ್‌ಚಿ.

ಪ್ರಕಟನೆ 22:15

ನಾಯಿಂಗ, ಮಾಟಮಂತ್ರ ಮಾಡ್‌ವಯಿಂಗ, ವ್ಯಬಿಚಾರ ಮಾಡ್‌ವಯಿಂಗ, ಕೊಲೆಮಾಡ್‍ವಯಿಂಗ, ವಿಗ್ರಹ ಆರಾದನೆ ಮಾಡ್‌ವಯಿಂಗ, ಪೊಟ್ಟ್ ಪರಿಯುವಕ್ ಕುಶಿಪಟ್ಟಿತ್, ಅದ್ಂಡ ಪ್ರಕಾರ ಮಾಡ್‌ವಯಿಂಗ ಎಲ್ಲಾರು ಪಟ್ಟಣತ್‍ರ ಪೊರಮೆ ಇಪ್ಪ.