1 ಥೆಸಲೊನೀಕ 4:1 - ಕೊಡವ ಬೈಬಲ್

¹ ನಂಗಡ ಅಣ್ಣತಮ್ಮಣಂಗಳೇ, ಆಕೀರಾಯಿತ್ ನಾನ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ: ದೇವನ ಕುಶಿಪಡ್‌ತ್‌ವಕಾಯಿತ್ ನಿಂಗ ಎನ್ನನೆಯೆಲ್ಲಾ ಬದ್‍ಕಂಡೂಂದ್ ನಂಗ ಎಣ್ಣಿತಂದದ್‍ನ ನಿಂಗ ಸ್ವೀಕಾರ ಮಾಡ್‍ನನೆಕೆ, ಇಂಞು ಅದ್‍ಲ್ ದುಂಬ ಬೊಳಿಯುವಕ್ ಒಡೆಯನಾನ ಯೇಸುರಗುಂಡ್ ನಿಂಗಳ ಬೋಡಿತ್, ನಿಂಗಕ್ ಬುದ್ದಿ ಎಣ್ಣಿಯಂಡ್ ಉಂಡ್.

1 ಥೆಸಲೊನೀಕ 4:1 Iomraidhean Croise

ಜ್ಞಾನತ್‌ರ ಪಡಿಮ 4:18

ನೀತಿವಂತಂಯಿಂಗಡ ಬಟ್ಟೆ ಪೊಲಾಕತ್‌ರ ಬೊಳೀರನೆಕೆ ಇಪ್ಪ, ಅದ್‌ ಎನ್ನನೆ ಎಣ್ಣ್‌ಚೇಂಗಿ ಮಜ್ಜಣತ್‌ರ ಬೊಳಿ ಪ್ರಕಾಶ ಆಯಂಡೇ ಇಪ್ಪನೆಕೆ ಜಾಸ್ತಿ ಆಯಿತ್‌ ಇಪ್ಪ.

ಯೋಹಾನ 15:2

ನಾಡಲ್ಲಿ ಇಂಜಂಡ್ ಫಲ ಕೊಡ್‍ಕತ ಕೊಂಬ್‌ನೆಲ್ಲ ಅಂವೊ ಮುರಿಚಿತ್ ಇಡ್‌ವ; ಫಲ ತಪ್ಪ ಕೊಂಬ್‍ನ ಇಂಞು ದುಂಬ ಫಲ ತಪ್ಪನೆಕೆ ಕಪಾತ್ ಮಾಡ್‌ವ.

ಅಪೊಸ್ತಲ 20:27

ನಾನ್ ಒರ್ ವಿಷಯತ್‍ನ ಸಹ ಮುಚ್ಚಿತ್ ಬೆಕ್ಕತೆ ದೇವಡ ಚಿತ್ತತ್‍ನ ಪೂರ್ತಿಯಾಯಿತ್ ನಿಂಗಕ್ ಅರಿಚಿಟ್ಟೆಯೆ.

ರೋಮ್ 8:8

ಆನಗುಂಡ್, ಪಾಪತ್‍ರ ಗುಣ ಎಣ್ಣ್‌ವನೆಕೆ ನಡ್‍ಪಯಿಂಗಕ್ ದೇವನ ಕುಶಿ ಪಡ್‍ತ್‍ವಕ್ ಕಯ್ಯುಲೆ.

1 ಕೊರಿಂಥ 11:23

ನಾನ್ ಒಪ್ಪ್‌ಚಿಟ್ಟ ಈ ಬೋದನೆನ, ದೇವಡಯಿಂಜ ನಾನ್ ಪಡ್ಂದಿಯೆ. ಅದ್ ಎಂತ ಎಣ್ಣ್‌ಚೇಂಗಿ, ಒಡೆಯನಾನ ಯೇಸುನ ವಿರೋದಿಯಂಗಡ ಕೈಯಿಕ್ ಪುಡ್‍ಚಿ ಕೊಡ್‍ಪಕ್ ಮಿಂಞ, ಆ ಬಯಿಟ್ ಒಟ್ಟಿನ ಎಡ್‌ಪಂಜಿ,

1 ಕೊರಿಂಥ 15:1

ಅಕ್ಕ, ನಾಡ ಅಣ್ಣತಮ್ಮಣಂಗಳೇ, ನಾನ್ ನಿಂಗಕ್ ಮಿಂಞಲೇ ಪ್ರಚಾರ ಮಾಡ್‍ನ ದೇವಡ ನಲ್ಲ ಸುದ್ದಿನ ಪುನಃ ನಿಂಗಡ ನೆನಪ್‌ಕ್ ಕೊಂಡ್ ಬಪ್ಪಿ. ಅಕ್ಕ ನಿಂಗಕ್ ಕ್‍ಟ್ಟ್‌ನ ಈ ಬೋದನೆಲ್ ಬೊಳ್ಂದಂಡ್, ನಂಬಿಕೇಲ್ ದೃಡವಾಯಿತುಳ್ಳಿರ.

1 ಕೊರಿಂಥ 15:58

ಆನಗುಂಡ್, ನಾಡ ಪ್ರೀತಿರ ಜನಳೇ, ನಿಂಗ ನಿಂಗಡ ನಂಬಿಕೇಲ್ ದೃಡವಾಯಿತ್ ಇರಂಡು, ಏದ್ ಒರ್ ವಿಷಯವು ನಿಂಗಡ ನಂಬಿಕೇನೆ ಅನುಮಾನ ಪಡ್‍ತ್‍ವಕ್ಕಾಗ. ಒಡೆಯ ನಿಂಗಕ್ ಒಪ್ಪ್‌ಚಿಟ್ಟ ಕೆಲಸತ್‍ಲ್ ಮಿಂಞಕ್ ಪೋಪಯಿಂಗಳಾಯಿತ್ ಮಾಡಿಯಂಡಿರಿ. ನಿಂಗ ಮಾಡ್‌ವ ಒಡೆಯಂಡ ಕೆಲಸಕ್ ಫಲ ಇಲ್ಲತೆ ಪೋಪುಲೇಂದ್ ನಿಂಗಕ್ ಗೊತ್ತುಂಡುಲ್ಲ?

2 ಕೊರಿಂಥ 10:1

ನಿಂಗಡ ಪಕ್ಕ ಇಪ್ಪಕ ತಾಳ್ಮೆಲು, ನಿಂಗಡಿಂಜ ದೂರ ಇಪ್ಪಕ ನಿಂಗಡ ಮೇಲೆ ಕಂಡಿತವಾಯಿತ್ ಉಳ್ಳನೆಕೆ ಕಾಂಬ ಪೌಲನಾನ ನಾನ್, ಕ್ರಿಸ್ತಂಡ ಶಾಂತ ಗುಣತ್‍ರ ಪಿಂಞ ದಯೇರ ಮೂಲಕ ನಿಂಗಕ್ ಬೋಡಿಯಂಡುಳ್ಳ.

2 ಕೊರಿಂಥ 13:11

ಆಕೀರ್‌ಲ್, ನಾಡ ಅಣ್ಣತಮ್ಮಣಂಗಳೇ, ನಿಂಗ ಕುಶೀಲ್ ಇರಿ, ಪೂರ್ತಿಯಾಯಿತ್ ಇರಿ, ಒಬ್ಬಂಗ್ ಒಬ್ಬ ಪುರ್‌ಡ್ ಕೊಡಿ, ಒರೇ ಮನಸ್ಸ್ ಉಳ್ಳಯಿಂಗಳಾಯಿತಿರಿ, ಸಮಾದಾನತ್‍ಲ್ ಇರಿ, ಅಕ್ಕ ಪ್ರೀತಿರ ಪಿಂಞ ಸಮಾದಾನತ್‍ರ ದೇವ ನಿಂಗಡ ಕೂಡೆ ಇಪ್ಪ.

2 ಕೊರಿಂಥ 5:9

ಆನಗುಂಡ್, ನಂಗ ತಡೀಲ್ ವಾಸಮಾಡಿಯಂಡಿಂಜತೇಂಗಿಯು ಸರಿ, ವಾಸ ಮಾಡತೆ ಇಂಜತೇಂಗಿಯು ಸರಿ, ಒಡೆಯನ ಕುಶಿಪಡ್‍ತ್‍ವಯಿಂಗಳಾಯಿತ್ ಇಪ್ಪಕ್ ಪ್ರಯತ್ನಪಟ್ಟಂಡುಂಡ್.

2 ಕೊರಿಂಥ 6:1

ದೇವಡ ಕೃಪೇನ ನಿಂಗ ಸ್ವೀಕಾರ ಮಾಡ್‍ನ ಪಿಂಞ ಅದ್‍ನ ಪ್ರಯೋಜನ ಇಲ್ಲತನೆಕೆ ಮಾಡ್‌ವಕ್ಕಾಗಾಂದ್ ದೇವಡ ಕೂಡೆ ಸೇವೆ ಮಾಡ್‌ವಯಿಂಗಳಾನ ನಂಗ ನಿಂಗಕ್ ಬುದ್ದಿ ಎಣ್ಣುವ.

ಗಲಾತ್ಯ 6:1

ನಾಡ ಅಣ್ಣತಮ್ಮಣಂಗಳೇ, ದೇವಡ ಮಕ್ಕಡಡೆಲ್ ಒಬ್ಬ ಪಾಪ ಮಾಡ್‍ನದ್ ಗೊತ್ತಾಯಿತ್, ನಿಂಗ ಅಂವೊನ ಪುಡ್‌ಚತೇಂಗಿ, ದೇವಡ ಆತ್ಮತ್‍ನಗುಂಡ್ ನಡ್‍ಪಯಿಂಗಳಾನ ನಿಂಗ, ಶಾಂತ ಗುಣತ್‍ಲ್ ಅಂವೊನ ಚಾಯಿ ಮಾಡಂಡು. ಅದೇ ಸಮಯತ್‍ಲ್ ನಿಂಗ ಸಹ ಅದೇ ಪಾಪತ್‍ಲ್ ಬೂವತನೆಕೆ ಎಚ್ಚರತ್‍ಲ್ ಇರಂಡು.

ಎಫೆಸ 4:1

ಆನಗುಂಡ್, ದೇವ ನಿಂಗಳ ಕಾಕ್‍ನನೆಕೆ, ನಿಂಗ ಅದ್ಂಗ್ ಯೋಗ್ಯವಾನ ಬದ್‍ಕ್‍ನ ಬಾಳಡೂಂದ್ ಒಡೆಯಂಗಾಯಿತ್ ಕೈದಿಯಾಯಿತ್ ಉಳ್ಳ ನಾನ್, ನಿಂಗಳ ಬೋಡುವಿ.

ಎಫೆಸ 4:20

ಆಚೇಂಗಿ, ನಿಂಗ ಕ್ರಿಸ್ತನ ಇನ್ನನೆ ಪಡಿಚಿತ್‌ಲ್ಲೆ.

ಎಫೆಸ 5:17

ಬುದ್ದಿಯಿಲ್ಲತಯಿಂಗಡನೆಕೆ ಇಪ್ಪಕ್ಕಾಗ, ದೇವಡ ಚಿತ್ತ ಎಂತ್‍ೕಂದ್ ಅರ್ಥ ಮಾಡಿಯೊಳಿ.

ಫಿಲಿಪ್ಪಿ 1:27

ಎಲ್ಲಾಕಿಂಜ ಮುಕ್ಯವಾಯಿತ್, ನಿಂಗ ಯೇಸು ಕ್ರಿಸ್ತಂಡ ನಲ್ಲ ಸುದ್ದಿಕ್ ಯೋಗ್ಯವಾಯಿತ್ ಎಲ್ಲಾ ರೀತಿಲು ನಲ್ಲದಾಯಿತ್ ಪರಲೋಕತ್‍ರ ಪ್ರಜೆರನೆಕೆ ಬದ್‌ಕಿತ್ ಕಾಟಂಡು. ಅಕ್ಕ, ನಾನ್ ಬಂದಿತ್ ನಿಂಗಳ ಕಂಡತೇಂಗಿಯು ಅಥವ ಬರಿ ಕ್‍ೕಟತೇಂಗಿಯು, ಒರೇ ಆತ್ಮ ಪಿಂಞ ಒರೇ ನೋಕತ್‌ಲ್ ನಲ್ಲ ಸುದ್ದಿರ ನಂಬಿಕೆಕಾಯಿತ್ ಒಮ್ಮಕೆ ಪೋರಾಡಿಯಂಡುಳ್ಳೀರಾಂದ್ ನಾಕ್ ಗೊತ್ತಾಪ.

ಫಿಲಿಪ್ಪಿ 1:9

ನಿಂಗಡ ಪ್ರೀತಿ ಇಂಞು ದುಂಬ ದುಂಬಿತ್ ದೇವಡ ವಿಷಯತ್‍ಲ್ ನೇರಾನ ಬುದ್ದಿಲ್, ಶುದ್ದವಾನ ಜ್ಞಾನತ್‍ಲ್ ನಿಂಗ ಬೊಳ್ಂದಂಡ್ ಬರಂಡೂಂದ್ ನಾನ್ ನಿಂಗಕಾಯಿತ್ ದೇವಡ ಪಕ್ಕ ಪ್ರಾರ್ಥನೆ ಮಾಡಿಯುಂಡುಳ್ಳ.

ಫಿಲಿಪ್ಪಿ 3:14

ಕ್ರಿಸ್ತ ಯೇಸುರ ಮೂಲಕ ಪರಲೋಕತ್‍ರ ಇನಾಮ್‍ನ ಪಡೆಯುವಕಾಯಿತ್ ದೇವ ಕಾಕ್‍ನ ಓಟತ್‍ಲ್ ಚಾಯಿತೆ ಓಡ್‌ವಕ್ ಆಕೀರ್‍ಕತ್ತನೆ ಪ್ರಯತ್ನಪಟ್ಟಂಡುಳ್ಳ.

ಕೊಲೊಸ್ಸೆ 1:10

ಅಕ್ಕ, ನಿಂಗ ಒಡೆಯಂಗ್ ಯೋಗ್ಯವಾನ ಬದ್‍ಕ್ ಬದ್‌ಕಿತ್, ಎಲ್ಲಾ ರೀತಿಲ್ ಅಂವೊನ ಕುಶಿ ಪಡ್‍ತಿತ್, ಎಲ್ಲಾ ತರತ್‍ರ ನಲ್ಲ ಕೆಲಸತ್‌ರ ಫಲತ್‍ನ ಕೊಡ್‌ತಿತ್, ದೇವನ ಗೊತ್ತಾಪಕುಳ್ಳ ಅಂವೊಂಡ ಬುದ್ದಿಲ್ ಬೊಳಿವಿರ.

ಕೊಲೊಸ್ಸೆ 2:6

ಆನಗುಂಡ್, ಕ್ರಿಸ್ತ ಯೇಸುನ ನಿಂಗ ಎನ್ನನೆ ಒಡೆಯನಾಯಿತ್ ಸ್ವೀಕಾರ ಮಾಡಿರೋ, ಅನ್ನನೆ ಅಂವೊಂಡಲ್ಲಿ ಬದ್‍ಕಂಡು.

1 ಥೆಸಲೊನೀಕ 3:12

ನಂಗ ನಿಂಗಡ ಮೇಲೆ ಬೆಚ್ಚಿತುಳ್ಳ ಪ್ರೀತಿರನೆಕೆ, ನಿಂಗ ಸಹ ಒಬ್ಬೊಬ್ಬಂಡ ಮೇಲೆ ಉಳ್ಳ ಪ್ರೀತಿಲ್ ಪಿಂಞ ಬೋರೆಯಿಂಗಡ ಮೇಲೆ ಬೆಚ್ಚಿತುಳ್ಳ ಪ್ರೀತಿಲ್ ದುಂಬಿತ್ ಇಂಞು ಬೊಳಿಯುವಕ್ ಒಡೆಯ ಸಹಾಯ ಮಾಡಡ್.

1 ಥೆಸಲೊನೀಕ 4:2

ಒಡೆಯನಾನ ಯೇಸುರಗುಂಡ್ ನಂಗಕ್ ಕ್‍ಟ್ಟ್‌ನ ಆಜ್ಞೆರನೆಕೆ, ನಿಂಗಕ್ ನಂಗ ಮಾಡ್‍ನ ಆಜ್ಞೆನ ನಿಂಗ ಗೇನ ಬೆಚ್ಚಿತುಳ್ಳಿರ.

1 ಥೆಸಲೊನೀಕ 5:12

ನಂಗಡ ಅಣ್ಣತಮ್ಮಣಂಗಳೇ, ಇಂಞು ನಾನ್ ಎಣ್ಣ್‌ವದ್ ಎಂತ ಎಣ್ಣ್‌ಚೇಂಗಿ: ನಿಂಗಕಾಯಿತ್ ಕಷ್ಟಪಟ್ಟಿತ್ ಸೇವೆ ಮಾಡಿಯಂಡ್, ನಿಂಗಳ ಒಡೆಯಂಡಲ್ಲಿಕ್ ನಡ್‍ತಿಯಂಡ್, ನಿಂಗಕ್ ಬೋದನೆ ಮಾಡಿಯಂಡ್ ಉಳ್ಳಯಿಂಗಳ ನಿಂಗ ಗನಪಡ್‍ತಂಡೂಂದ್ ನಂಗ ನಿಂಗಳ ಬೋಡಿಯಂಡುಂಡ್.

2 ಥೆಸಲೊನೀಕ 1:3

ನಂಗಡ ಅಣ್ಣತಮ್ಮಣಂಗಳೇ, ನಿಂಗಕಾಯಿತ್ ನಂಗ ಎಕ್ಕಾಲು ದೇವಕ್ ವಂದನೆ ಎಣ್ಣುವಕ್ ಜವಾಬ್ದಾರಂಗಳಾಯಿತ್ ಉಂಡ್; ನಿಂಗ ದೇವಡ ಮೇಲೆ ಬೆಚ್ಚಿತುಳ್ಳ ನಂಬಿಕೆ ಚಾಯಿತೆ ಬೊಳ್ಂದಂಡ್, ನಿಂಗ ಒಬ್ಬೊಬ್ಬಂಡ ಮೇಲೆ ಬೆಚ್ಚಿತುಳ್ಳ ಪ್ರೀತಿ ದುಂಬ ಜಾಸ್ತಿ ಆಯಂಡ್ ಉಳ್ಳಾಂಗ್, ನಂಗ ಅನ್ನನೆ ಎಣ್ಣ್‌ವದ್ ಸರಿಯಾಯಿತ್ ಉಂಡ್.

2 ಥೆಸಲೊನೀಕ 2:1

ಇಕ್ಕ ನೋಟಿ, ನಂಗಡ ಅಣ್ಣತಮ್ಮಣಂಗಳೇ, ನಂಗಡ ಒಡೆಯನಾನ ಯೇಸು ಕ್ರಿಸ್ತ ಪುನಃ ಬಪ್ಪಕುಳ್ಳ ವಿಷಯತ್‍ಲ್ ಪಿಂಞ ನಂಗ ಅಂವೊಂಡ ಪಕ್ಕ ಪೋಪಕುಳ್ಳ ವಿಷಯತ್‍ಲ್ ನಂಗ ನಿಂಗಳ ಬೋಡ್‍ವದ್ ಎಂತ ಎಣ್ಣ್‌ಚೇಂಗಿ:

2 ಥೆಸಲೊನೀಕ 3:1

ನಂಗಡ ಅಣ್ಣತಮ್ಮಣಂಗಳೇ, ಕಡೇಕ್ ನಾನ್ ಎಣ್ಣುವ ವಿಷಯ ಎಂತ ಎಣ್ಣ್‌ಚೇಂಗಿ: ನಿಂಗಡ ಪಕ್ಕ ನಂಗ ಬಂದಿತ್ ದೇವಡ ನಲ್ಲ ಸುದ್ದಿನ ಎಣ್ಣ್‌ವಕ, ಎನ್ನನೆ ಅದ್‍ನ ಎಲ್ಲಾರು ಬೆರಿಯ ನಂಬಿತ್, ಒಡೆಯಂಡ ವಾಕ್ಯ ಪಬ್ಬಿತ್ ಗನಪಡ್‌ವನೆಕೆ, ಬೋರೆ ಜಾಗತ್‍ಲ್ ಸಹ ಪಬ್ಬಿತ್ ಗನಪಡುವಕಾಯಿತ್ ನಿಂಗ ಪ್ರಾರ್ಥನೆ ಮಾಡಿ.

2 ಥೆಸಲೊನೀಕ 3:13

ಅಣ್ಣತಮ್ಮಣಂಗಳೇ, ನಲ್ಲದ್ ಮಾಡ್‌ವದ್‍ಲ್ ತಳ್ಂದ್ ಪೋಕತಿ.

1 ತಿಮೊಥೆಯ 5:21

ನೀನ್ ದಾರ್‌ನು ಮೂಡ್ ನೋಟಿತ್ ನ್ಯಾಯಮಾಡತ, ಪಕ್ಷಪಾತ ಮಾಡತೆ, ನೀನ್ ಇದ್‍ನೆಲ್ಲಾ ಮಾಡಿಯಂಡಿರ್‍ೕಂದ್ ದೇವಡ ಮಿಂಞತ್, ಯೇಸು ಕ್ರಿಸ್ತಂಡ ಪ್ರಸನ್ನತ್‌ಲ್ ಪಿಂಞ ಗೊತ್ತ್ ಮಾಡಿತುಳ್ಳ ದೂತಂಗಡ ಮಿಂಞತ್ ಆಜ್ಞೆ ಮಾಡ್‌ವಿ.

2 ತಿಮೊಥೆಯ 4:1

ದೇವಡ ಮಿಂಞತ್, ಪಿಂಞ ಬದ್‍ಕಿತುಳ್ಳಯಿಂಗಳ ಪಿಂಞ ಚತ್ತಯಿಂಗಳ ತೀರ್ಪ್ ಮಾಡ್‌ವಕುಳ್ಳ ಯೇಸು ಕ್ರಿಸ್ತಂಡ ಮಿಂಞತ್, ಪಿಂಞ ಅಂವೊ ಪುನಃ ಆಳುವಕ್ ರಾಜಾನಾಯಿತ್ ಬಪ್ಪಕುಳ್ಳ ಪ್ರಸನ್ನತ್‌ಲ್ ನಾನ್ ಇದ್‍ನ ನೀಕ್ ಆಜ್ಞೆ ಮಾಡ್‌ವಿ.

ಇಬ್ರಿಯ 11:6

ನಂಬಿಕೆ ಇಲ್ಲತಪೋನಕ ದೇವನ ಕುಶಿ ಪಡ್‍ತ್‍ವಕ್ ಸಾದ್ಯ ಇಲ್ಲೆ; ಎನ್ನಂಗೆಣ್ಣ್‌ಚೇಂಗಿ, ದೇವಡ ಪಕ್ಕ ಕೂಡ್‍ವಂವೊ ದೇವ ಉಂಡ್‍ೕಂದು, ಅಂವೊನ ತ್‍ೕಡ್‌ವ ಜನಕ್ ಅಂವೊ ಪ್ರತಿಫಲ ತಪ್ಪಾಂದು ನಂಬಂಡು.

ಇಬ್ರಿಯ 13:16

ಅದಲ್ಲತೆ, ನಲ್ಲದ್ ಮಾಡ್‌ವಕು, ದಾನದರ್ಮ ಮಾಡ್‌ವಕು ಮರ್ಂದ್ ಪೋಕತಿ; ಇನ್ನನೆ ಮಾಡ್‌ವ ಬಲೀಲ್ ದೇವ ಕುಶಿಪಡ್‍ವಂವೊನಾಯಿತುಂಡ್.

ಇಬ್ರಿಯ 13:22

ನಾಡ ಅಣ್ಣತಮ್ಮಣಂಗಳೇ, ನಾನ್ ಚೆರಿಯದಾಯಿತ್ ಒಳ್‍ದ್‍ನ ಈ ಬುದ್ದಿ ತಕ್ಕ್‌ನ ನಿಂಗ ಪೊರುಮೆಯಾಯಿತ್ ಎಡ್‍ತೊಳೀಂದ್ ಬೋಡುವಿ.

2 ಪೇತ್ರ 3:18

ನಂಗಡ ರಕ್ಷಕನು, ಒಡೆಯನು ಆನ ಯೇಸು ಕ್ರಿಸ್ತಂಡ ಕೃಪೇಲ್, ಅಂವೊನ ಗೊತ್ತ್ ಮಾಡ್‌ವ ವಿಷಯತ್‍ಲ್ ಬೊಳಿವಿರ. ಅಂವೊಂಗ್ ಇಕ್ಕಲು ಎಕ್ಕಲು ಮಹಿಮೆ ಬರಡ್. ಆಮೆನ್.

1 ಯೋಹಾನ 3:22

ನಂಗ ದೇವಡ ಆಜ್ಞೆರ ಪ್ರಕಾರ ನಡ್‌ಂದಿತ್, ದೇವಕ್ ಕುಶಿಯಾನ ಕೆಲಸತ್‍ನ ಮಾಡ್‌ವಗುಂಡ್ ದೇವಡ ಪಕ್ಕ ಎಂತ ಬೋಡ್‍ಚೇಂಗಿಯು, ದೇವ ಅದ್‍ನ ನಂಗಕ್ ತಪ್ಪ.