1 ಥೆಸಲೊನೀಕ 3:6 - ಕೊಡವ ಬೈಬಲ್

⁶ ಇಕ್ಕ ತಿಮೊಥೆಯ ನಿಂಗಡಲ್ಲಿಂಜ ನಂಗಡ ಪಕ್ಕ ಬಂದಿತ್, ನಿಂಗ ನಂಬಿಕೇಲ್ ಸ್ತಿರವಾಯಿತ್ ಇಪ್ಪಾನ ಪಿಂಞ ಒಬ್ಬೊಬ್ಬಂಡ ಮೇಲೆ ಉಳ್ಳ ನಿಂಗಡ ಪ್ರೀತಿನ, ನಲ್ಲರಿಕೆಯಾಯಿತ್ ನಂಗಕ್ ಎಣ್ಣ್‌ಚಿ. ನಿಂಗ ನಂಗಳ ಎಕ್ಕಾಲು ಕುಶೀಲ್ ಗೇನ ಮಾಡಿಯಂಡ್, ನಂಗ ನಿಂಗಳ ಕಾಂಗಂಡೂಂದ್ ಆಸೇಲ್ ಗೇನ ಮಾಡ್‌ವನೆಕೆ, ನಿಂಗಳು ನಂಗಳ ಕಾಂಗಂಡೂಂದ್ ಆಸೆಯಾಯಿತ್ ಉಳ್ಳಿರಾಂದ್ ಅಂವೊ ನಂಗಕ್ ಎಣ್ಣ್‌ಚಿ.

1 ಥೆಸಲೊನೀಕ 3:6 Iomraidhean Croise

ಜ್ಞಾನತ್‌ರ ಪಡಿಮ 25:25

ದೂರತ್ತಿಂಜ ಬಪ್ಪ ನಲ್ಲ ಸುದ್ದಿ, ಬಾಯಾರಿಕೆಯಾಯಿತ್‌ ಉಳ್ಳಂವೊಂಗ್‌ ಕ್‌ಟ್ಟುವ ಪಚ್ಚೆ ನೀರ್‌ರನೆಕೆ ಇಪ್ಪ.

ಅಪೊಸ್ತಲ 16:1

ಅಲ್ಲಿಂಜ ಪೌಲ ದೆರ್ಬೆ ಪಿಂಞ ಲುಸ್ತ್ರ ಎಣ್ಣ್‌ವ ಜಾಗಕ್ ಬಾತ್. ಅಲ್ಲಿ ತಿಮೊಥೆಯ ಎಣ್ಣುವ ಯೇಸುನ ನಂಬ್‍ನ ಒಬ್ಬ ಇಂಜತ್; ಅಂವೊಂಡ ಅವ್ವ ಕ್ರಿಸ್ತಂಡ ಮೇಲೆ ನಂಬಿಕೆ ಉಳ್ಳ ಒರ್ ಯೆಹೂದ್ಯ ಪೊಣ್ಣಾಳಾಯಿತ್ಂಜತ್, ಆಚೇಂಗಿ ಅಂವೊಂಡ ಅಪ್ಪ ಗ್ರೀಕ್ ಜನಕ್ ಕೂಡ್‍ನಂವೊನಾಯಿತ್ಂಜತ್.

ಅಪೊಸ್ತಲ 18:1

ಇದಾನ ಪಿಂಞ ಪೌಲ ಅಥೇನೆ ಪಟ್ಟಣತ್‍ನ ಬುಟ್ಟಿತ್ ಕೊರಿಂಥ ಪಟ್ಟಣಕ್ ಪೋಚಿ.

ಅಪೊಸ್ತಲ 18:5

ಸೀಲ ಪಿಂಞ ತಿಮೊಥೆಯ ಮಕೆದೋನ್ಯತ್ಂಜ ಬಪ್ಪಕ, ಪೌಲ ದೇವಡ ವಾಕ್ಯತ್‍ನ ಬೋದನೆ ಮಾಡ್‌ವಕಾಯಿತ್ ಎಲ್ಲಾ ಕೆಲಸತ್‍ನ ಬುಟ್ಟಿತ್, ಯೇಸುವೇ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಾಂದ್ ಯೆಹೂದ್ಯಂಗಕ್ ಸಾಕ್ಷಿ ಕೊಡ್‍ತತ್.

1 ಕೊರಿಂಥ 11:2

ನಿಂಗ ನನ್ನ, ನಿಂಗಡ ಗೇನತ್‍ಲ್ ಬೆಚ್ಚಿತ್, ನಿಂಗಡ ಎಲ್ಲಾ ವಿಷಯತ್‍ಲ್, ನಾನ್ ನಿಂಗಕ್ ಬೋದನೆ ಮಾಡ್‍ನದ್‍ನ ಗೇನ ಮಾಡಿಯಂಡ್, ನಾನ್ ನಿಂಗಕ್ ಒಪ್ಪ್‌ಚಿಟ್ಟದ್‍ನ ಮಾಡಿಯಂಡ್ ಉಳ್ಳಗುಂಡ್ ನಿಂಗಳ ನಾನ್ ಕೊಂಡಾಡುವಿ.

1 ಕೊರಿಂಥ 13:13

ಆನಗುಂಡ್, ಮೂಂದ್ ವಿಷಯ ಎಕ್ಕಾಲು ಇಪ್ಪ, ನಂಬಿಕೆ, ನಿರೀಕ್ಷೆ ಪಿಂಞ ಪ್ರೀತಿ. ಈ ಮೂಂದ್‍ಲ್ ಪ್ರೀತಿಯೇ ಬಲ್ಯದ್.

ಗಲಾತ್ಯ 5:6

ನಂಗಡ ನಂಬಿಕೆ ಯೇಸು ಕ್ರಿಸ್ತಂಡ ಮೇಲೆ ಇಂಜತೇಂಗಿ, ಸುನ್ನತಿ ಮಾಡಿತ್ಂಜತೇಂಗಿಯು, ಮಾಡತ ಇಂಜತೇಂಗಿಯು, ಅದ್ ಒಂದು ಲೆಕ್ಕ ಆಪುಲೆ. ಅದ್ಂಡ ಬದ್‍ಲಾಯಿತ್ ನಂಬಿಕೇಲ್, ಪ್ರೀತಿರಗುಂಡ್ ನಂಗ ಮಾಡ್‌ವ ಕಾರ್ಯವೇ ಮುಕ್ಯವಾನದ್.

ಫಿಲಿಪ್ಪಿ 1:8

ಕ್ರಿಸ್ತ ಯೇಸುರ ಪಕ್ಕ ಉಳ್ಳ ಕನಿಕರತ್ಂಜ ನಿಂಗಡ ಮೇಲೆ ನಾಕ್ ಎಚ್ಚಕ್ ಪ್ರೀತಿ ಉಂಡ್‍ೕಂದ್ ದೇವನೇ ನಾಕ್ ಸಾಕ್ಷಿ.

ಕೊಲೊಸ್ಸೆ 1:4

ಎನ್ನಂಗೆಣ್ಣ್‌ಚೇಂಗಿ, ಕ್ರಿಸ್ತ ಯೇಸುರಲ್ಲಿ ನಿಂಗಕ್ ಉಳ್ಳ ನಂಬಿಕೆ ಪಿಂಞ ದೇವಡ ಮಕ್ಕಡ ಮೇಲೆ ಉಳ್ಳ ನಿಂಗಡ ಪ್ರೀತಿನ ನಂಗ ಕ್‍ೕಟತ್.

ಕೊಲೊಸ್ಸೆ 4:18

ಪೌಲನಾನ ನಾನ್, ನಾಡ ಕೈಯಿಂಜಲೇ ಒಳ್‍ದಿತ್ ನಿಂಗಕ್ ಈ ವಂದನೆ ಎಣ್ಣ್‌ವಿ. ನಾನ್ ಸೆರಮನೇಲ್ ಕೈದಿಯಾಯಿತ್ ಕೆಟ್ಟ್‌ಲ್ ಇಪ್ಪದ್‍ನ ಗೇನ ಬೆಚ್ಚೊಳಿ. ಕೃಪೆ ನಿಂಗಡ ಕೂಡೆ ಇರಡ್.

1 ಥೆಸಲೊನೀಕ 1:3

ನಿಂಗಡ ನಂಬಿಕೇರಗುಂಡ್ ನಿಂಗಡ ಬದ್‍ಕ್‍ಲ್ ಕಾಟಿಯಂಡ್ ಉಳ್ಳ ನಿಂಗಡ ನಲ್ಲ ಕೆಲಸ, ನಿಂಗಡ ಪ್ರೀತಿನಗುಂಡ್ ನಿಂಗ ಜನಕ್ ಮಾಡ್‌ವ ಸಹಾಯ, ಯೇಸು ಕ್ರಿಸ್ತಂಡ ಮೇಲೆ ಉಳ್ಳ ನಿಂಗಡ ನಿರೀಕ್ಷೇರಗುಂಡ್ ನಿಂಗಡ ಸಹಿಸುವ ಗುಣ, ನಂಗಕ್ ಗೊತ್ತಾನಗುಂಡ್, ನಿಂಗಕಾಯಿತ್ ನಂಗ ದೇವಡ ಪಕ್ಕ ಎಕ್ಕಾಲು ಪ್ರಾರ್ಥನೆ ಮಾಡಿಯಂಡುಂಡ್.

1 ಥೆಸಲೊನೀಕ 2:17

ಪ್ರೀತಿರ ಅಣ್ಣತಮ್ಮಣಂಗಳೇ, ನಿಂಗಳ ಬುಟ್ಟಿತ್ ಚೆನ್ನ ಸಮಯ ದೂರ ಪೋಪನೆಕೆ ಆಯಿಪೋಚೇಂಗಿಯು, ನಂಗಡ ಮನಸ್ಸ್‌ಂಜ ನಿಂಗ ದೂರ ಪೋಯಿತ್‌ಲ್ಲೆ. ನಿಂಗಳ ಪುನಃ ಕಾಂಗಂಡೂಂದ್ ದುಂಬ ಆಸೇಲ್ ಎಚ್ಚಕೋ ಪೇಚಾಡಿಯತ್.

1 ಥೆಸಲೊನೀಕ 2:9

ನಂಗಡ ಅಣ್ಣತಮ್ಮಣಂಗಳೇ, ನಂಗ ದೇವಡ ನಲ್ಲ ಸುದ್ದಿನ ಬೋದನೆ ಮಾಡ್‌ವಕ, ನಿಂಗ ದಾರ್‌ಕು ನಂಗ ಬಾರವಾಯಿತ್ ಇಕ್ಕತನೆಕೆ, ನಂಗ ಬಯಿಟ್ ಪೋಲ್ ಕೆಲಸ ಮಾಡ್‍ಚಿ. ನಂಗ ಎಚ್ಚಕ್ ಕಷ್ಟಪಟ್ಟಿತ್ ನೊಂಬಲಪಟ್ಟತ್‍ೕಂದ್ ನಿಂಗಕ್ ಕಂಡಿತವಾಯಿತ್ ಗೇನ ಇಪ್ಪ.

1 ಥೆಸಲೊನೀಕ 3:7

ಅದ್ಂಗಾಯಿತ್ ಅಣ್ಣತಮ್ಮಣಂಗಳೇ, ನಂಗಡ ಎಲ್ಲಾ ಕಷ್ಟತ್‍ಲ್ ಪಿಂಞ ಜನ ಮಾಡ್‌ವ ಹಿಂಸೆರ ಮದ್ಯತ್‍ಲ್ ನಿಂಗಕ್ ದೇವಡ ಪಕ್ಕ ಉಳ್ಳ ನಂಬಿಕೇಲ್ ಸ್ತಿರವಾಯಿತ್ ಉಳ್ಳಿರಾಂದ್ ಕ್‍ೕಪಕ ನಂಗಕ್ ಪುರ್‌ಡ್ ಕ್‍ಟ್ಟ್‌ಚಿ.

2 ಥೆಸಲೊನೀಕ 1:3

ನಂಗಡ ಅಣ್ಣತಮ್ಮಣಂಗಳೇ, ನಿಂಗಕಾಯಿತ್ ನಂಗ ಎಕ್ಕಾಲು ದೇವಕ್ ವಂದನೆ ಎಣ್ಣುವಕ್ ಜವಾಬ್ದಾರಂಗಳಾಯಿತ್ ಉಂಡ್; ನಿಂಗ ದೇವಡ ಮೇಲೆ ಬೆಚ್ಚಿತುಳ್ಳ ನಂಬಿಕೆ ಚಾಯಿತೆ ಬೊಳ್ಂದಂಡ್, ನಿಂಗ ಒಬ್ಬೊಬ್ಬಂಡ ಮೇಲೆ ಬೆಚ್ಚಿತುಳ್ಳ ಪ್ರೀತಿ ದುಂಬ ಜಾಸ್ತಿ ಆಯಂಡ್ ಉಳ್ಳಾಂಗ್, ನಂಗ ಅನ್ನನೆ ಎಣ್ಣ್‌ವದ್ ಸರಿಯಾಯಿತ್ ಉಂಡ್.

1 ತಿಮೊಥೆಯ 1:5

ಈ ಆಜ್ಞೆರ ಉದ್ದೇಶ ಎಂತ ಎಣ್ಣ್‌ಚೇಂಗಿ, ಶುದ್ದವಾನ ಹೃದಯತ್‍ಲ್, ನಲ್ಲ ಮನಸಾಕ್ಷಿಲ್, ಕಪಟ ಇಲ್ಲತ ನಂಬಿಕೆಯಿಂಜ ಬಪ್ಪ ನೇರಾನ ಪ್ರೀತಿಲ್ ದುಂಬಿತಿರಂಡೂಂದ್ ಎಣ್ಣ್‌ವದೇ.

2 ತಿಮೊಥೆಯ 1:3

ನಾನ್ ಬೈಟ್ ಪೋಲ್ ಪ್ರಾರ್ಥನೆ ಮಾಡ್‌ವಕ ನಿನ್ನ ಎಕ್ಕಾಲು ಗೇನ ಮಾಡ್‌ವಿ. ಅದಲ್ಲತೆ ನಾಡ ಮುತ್ತಜ್ಜಂಗ ದೇವಡ ಸೇವೇನೆ ಮಾಡ್‍ನನೆಕೆ, ನಲ್ಲ ಮನಸಾಕ್ಷಿಲ್, ನಾನು ಸೇವೆ ಮಾಡಿಯಂಡ್ ನೀಕಾಯಿತ್ ದೇವಕ್ ವಂದನೆ ಮಾಡ್‌ವಿ.

ಇಬ್ರಿಯ 13:3

ಕ್ರಿಸ್ತಂಗಾಯಿತ್ ಕೈದಿಯಾಯಿತ್ ಇಪ್ಪಯಿಂಗಡ ಕೂಡೆ ನಿಂಗಳು ಕೈದಿಯಾಯಿತ್ ಇಪ್ಪನೆಕೆ ಗೇನ ಮಾಡಿಯೊಳಿ; ಅವಮಾನತ್‍ನ ಸಹಿಸಿಯಂಡ್ ಇಪ್ಪಯಿಂಗಳ ಗೇನ ಮಾಡಿತ್ ನಿಂಗಕು ಅನ್ನನೆ ಆನನೆಕೆ ಗೇನ ಮಾಡಿಯೊಳಿ.

ಇಬ್ರಿಯ 13:7

ದೇವಡ ವಾಕ್ಯತ್‍ನ ನಿಂಗಕ್ ಬೋದನೆ ಮಾಡಿತ್ ನಿಂಗಳ ನಡ್‌ತ್‍ನಯಿಂಗಳ ಗೇನ ಮಾಡಿತ್, ಅಯಿಂಗಡ ಬದ್‍ಕ್ ಆಕೀರ್‍ಕತ್ತನೆ ಎನ್ನನೆ ಇಂಜತ್‍ೕಂದ್ ಚಾಯಿತೆ ನೋಟಿತ್, ಅಯಿಂಗಡ ನಂಬಿಕೇರನೆಕೆ ನಡ್‍ಪಿರ.

1 ಯೋಹಾನ 3:23

ದೇವಡ ಆಜ್ಞೆ ಎಂತ್‍ೕಂದ್ ಎಣ್ಣ್‌ಚೇಂಗಿ: ದೇವಡ ಮೋಂವೊನಾನ ಯೇಸು ಕ್ರಿಸ್ತಂಡ ಪೆದತ್‍ನ ನಂಬಿತ್ ಅಂವೊ ನಂಗಕ್ ಆಜ್ಞೆ ಮಾಡ್‍ನನೆಕೆ ನಂಗ ಒಬ್ಬೊಬ್ಬನ ಪ್ರೀತಿ ಮಾಡ್‌ವದೇ.