1 ಥೆಸಲೊನೀಕ 2:8 - ಕೊಡವ ಬೈಬಲ್

⁸ ನಂಗ ನಿಂಗಳ ಅಚ್ಚಕ್ ಪ್ರೀತಿ ಮಾಡಿತ್, ನಿಂಗಕ್ ದೇವಡ ನಲ್ಲ ಸುದ್ದಿರ ಬೋದನೆ ಮಾತ್ರ ಅಲ್ಲತೆ, ನಂಗಡ ಜೀವತ್‍ನ ಸಹ ಕೊಡ್‍ಪಕ್ ನಂಗ ಕುಶೀಲ್ ಇಂಜತ್.

1 ಥೆಸಲೊನೀಕ 2:8 Iomraidhean Croise

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 7:2

ಅಲ್ಲಿ ನೂರ್ ಸಿಪಾಯಿಯಂಗಕ್ ಅದಿಕಾರಿಯಾಯಿತ್ಂಜ ರೋಮ್ ರಾಜ್ಯತ್‍ರ ಒರ್ ಅದಿಕಾರಿಕ್ ಕುಶಿಯುಳ್ಳ ಒರ್ ಆಳ್‍ಕ್ ದುಂಬ ಕಾಯಿಲೆ ಬಂದಿತ್ ಚಾವನೆಕೆ ಇಂಜತ್.

ರೋಮ್ 1:1

ಯೇಸು ಕ್ರಿಸ್ತಂಡ ಸೇವಕನು, ಅಪೊಸ್ತಲನಾಯಿತ್‌ಪ್ಪಕ್ ದೇವ ಕಾಕ್‌ನಂವೊನು, ದೇವಡ ನಲ್ಲ ಸುದ್ದಿನ ಅರಿಚಿಡುವಕಾಯಿತ್ ದೇವ ಗೊತ್ತ್ ಮಾಡ್‍ನ ಪೌಲನಾನ ನಾನ್ ಒಳ್‍ದ್‍ವ ಕಾಗದ ಇದ್.

ರೋಮ್ 10:1

ನಾಡ ಅಣ್ಣತಮ್ಮಣಂಗಳೇ, ನಾಡ ಜನಕ್ ರಕ್ಷಣೆ ಕ್‍ಟ್ಟಂಡೂಂದ್ ಉಳ್ಳದೇ ನಾಡ ಹೃದಯತ್‍ರ ಆಸೆಯು, ನಾನ್ ದೇವಡ ಪಕ್ಕ ಮಾಡ್‌ವ ಪ್ರಾರ್ಥನೆಯುವಾಯಿತ್ ಉಂಡ್.

ರೋಮ್ 15:29

ನಾನ್ ನಿಂಗಡ ಪಕ್ಕ ಬಪ್ಪಕ ಕ್ರಿಸ್ತಂಡ ಪೂರ್ತಿ ಆಶೀರ್ವಾದತ್‍ರ ಅಳ್‌ತೆಲ್ ಬಪ್ಪೀಂದ್ ನಾಕ್ ಗೊತ್ತುಂಡ್.

2 ಕೊರಿಂಥ 12:15

ಆನಗುಂಡ್, ನಾನ್ ನಿಂಗಡಲ್ಲಿ ಎಚ್ಚಕ್ ಜಾಸ್ತಿಯಾಯಿತ್ ಪ್ರೀತಿ ಮಾಡಿಯಂಡ್ ಉಂಡೋ, ಅಚ್ಚಕ್ ಕಮ್ಮಿಯಾಯಿತ್ ನಿಂಗ ನನ್ನ ಪ್ರೀತಿ ಮಾಡ್‍ಚೇಂಗಿಯು, ನಿಂಗಕಾಯಿತ್ ನಾಡ ಪಕ್ಕ ಉಳ್ಳದ್‍ನ ಕೊಡ್‌ಪಕು, ನನ್ನ ಸಹ ಕೊಡ್‌ಪಕು ದುಂಬ ಕುಶಿ ಪಡುವಿ.

2 ಕೊರಿಂಥ 6:1

ದೇವಡ ಕೃಪೇನ ನಿಂಗ ಸ್ವೀಕಾರ ಮಾಡ್‍ನ ಪಿಂಞ ಅದ್‍ನ ಪ್ರಯೋಜನ ಇಲ್ಲತನೆಕೆ ಮಾಡ್‌ವಕ್ಕಾಗಾಂದ್ ದೇವಡ ಕೂಡೆ ಸೇವೆ ಮಾಡ್‌ವಯಿಂಗಳಾನ ನಂಗ ನಿಂಗಕ್ ಬುದ್ದಿ ಎಣ್ಣುವ.

ಗಲಾತ್ಯ 4:19

ನಾಡ ಪ್ರೀತಿರ ಮಕ್ಕಳೇ, ನಿಂಗಡ ಬದ್‍ಕ್‍ಲ್ ಕ್ರಿಸ್ತ ಪೂರ್ತಿಯಾಯಿತ್ ಬೊಳಿಯುವಕತ್ತನೆ ನಾನ್ ನಿಂಗಕಾಯಿತ್, ಒರ್ ಅವ್ವ ತಾಂಡ ಕುಂಞಿನ ಪೆರುವಕ ಬಪ್ಪ ನೊಂಬಲತ್‍ರನೆಕೆ ನಾನ್ ಪುನಃ ನೊಂಬಲತ್‍ನ ಎಡ್‍ತೊವಿ.

ಫಿಲಿಪ್ಪಿ 1:8

ಕ್ರಿಸ್ತ ಯೇಸುರ ಪಕ್ಕ ಉಳ್ಳ ಕನಿಕರತ್ಂಜ ನಿಂಗಡ ಮೇಲೆ ನಾಕ್ ಎಚ್ಚಕ್ ಪ್ರೀತಿ ಉಂಡ್‍ೕಂದ್ ದೇವನೇ ನಾಕ್ ಸಾಕ್ಷಿ.

ಫಿಲಿಪ್ಪಿ 2:17

ಎನ್ನಂಗೆಣ್ಣ್‌ಚೇಂಗಿ, ನಿಂಗಡ ನಂಬಿಕೇರ ಆರಾದನೆನ ನಿಂಗ ದೇವಕ್ ಅರ್ಪಿಚಿಡುವಕಾಯಿತ್, ನಾಡ ಜೀವತ್‍ನ ನೀರ್‌ರನೆಕೆ ದೇವಕ್ ಬೂಕಿತ್ ಕಳಂದತೇಂಗಿಯು ಅದ್‍ಲ್ ನಾನ್ ಕುಶಿ ಪಡುವಿ. ಅನ್ನನೆ ನಡ್ಂದತೇಂಗಿ ಆ ಕುಶೀನ ನಿಂಗೆಲ್ಲಾರು ಪಾಲ್ ಮಾಡಂಡೂಂದ್ ನಾನ್ ಎಣ್ಣ್‌ವಿ.

ಫಿಲಿಪ್ಪಿ 2:20

ನಾಕ್ ತಿಮೊಥೆಯನ ಬುಟ್ಟತೇಂಗಿ ನಿಂಗಳ ಇಚ್ಚಕ್ ಚಾಯಿತೆ ನೋಟ್‍ವಕ್ ನಾಡ ಮನಸ್ಸ್‌ರನೆಕೆ ಉಳ್ಳಯಿಂಗ ಬೋರೆ ದಾರೂ ಇಲ್ಲೆ.

ಫಿಲಿಪ್ಪಿ 4:1

ಇದ್ಂಗಾಯಿತ್ ನಾಡ ಅಣ್ಣತಮ್ಮಣಂಗಳೇ, ನಾನ್ ನಿಂಗಕ್ ಇಲ್ಲಿಕತ್ತನೆ ಎಣ್ಣ್‌ನದ್‍ನ ಗೇನ ಮಾಡಿಯಂಡ್ ಒಡೆಯಂಡ ವಿಷಯತ್‍ಲ್ ಸ್ತಿರವಾಯಿತ್ ಇರಿ. ನಾನ್ ನಿಂಗಳ ಎಚ್ಚಕ್ ಪ್ರೀತಿ ಮಾಡ್‌ವಿ, ನಿಂಗಳ ಕಾಂಗಂಡೂಂದ್ ನಾಕ್ ದುಂಬ ಆಸೆ ಉಂಡ್. ನಿಂಗಳೇ ನಾಡ ಕುಶಿ, ನಿಂಗಳೇ ನಾಡ ಕಷ್ಟಕೆಲ್ಲ ಕ್‍ಟ್ಟ್‌ನ ಕಿರೀಟ.

ಕೊಲೊಸ್ಸೆ 1:28

ಅದ್ಂಗಾಯಿತ್, ಎಲ್ಲಾ ಜ್ಞಾನತ್‍ಲ್ ಕ್ರಿಸ್ತನ ಎಲ್ಲಾರ್‌ಕು ಅರಿಚಿಟ್ಟಂಡ್, ಎಲ್ಲಾರ್‌ಕು ಎಚ್ಚರ ಮಾಡಿಯಂಡ್, ಎಲ್ಲಾರ್‌ಕು ಬೋದನೆ ಮಾಡಿಯಂಡ್ ಉಳ್ಳ. ಒಬ್ಬೊಬ್ಬನ ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್ ಬೊಳ್ಂದಂವೊನಾಯಿತ್ ದೇವಡ ಪಕ್ಕ ನಿಪ್ಪ್‌ಚಿಡುವಕಾಯಿತ್ ಇದ್‍ನ ಮಾಡಿಯಂಡುಳ್ಳ.

ಕೊಲೊಸ್ಸೆ 1:7

ಅದ್‍ನ ನಿಂಗ ನಂಗಡ ಕೂಡೆ ಸೇವೆ ಮಾಡ್‌ವ ಪ್ರೀತಿರ ಎಪಫ್ರಯಿಂಜ ಪಡಿಚಿರ. ಅಂವೊ ನಿಂಗಕಾಯಿತ್ ಕ್ರಿಸ್ತಂಡಲ್ಲಿ ನೇರಾನ ಸೇವಕನಾಯಿತುಂಡ್.

ಕೊಲೊಸ್ಸೆ 4:12

ಕ್ರಿಸ್ತ ಯೇಸುರ ಸೇವಕನು, ನಿಂಗಡ ಪಟ್ಟಣಕ್ ಕೂಡ್‍ನಂವೊನಾನ ಎಪಫ್ರ ಸಹ ನಿಂಗಕ್ ವಂದನೆ ಎಣ್ಣಿಯಂಡುಂಡ್. ಅಂವೊ ನಿಂಗಕಾಯಿತ್ ಎಕ್ಕಾಲು ದೇವಡ ಪಕ್ಕ ನೇರಾಯಿತು ಪ್ರಾರ್ಥನೆ ಮಾಡಿಯಂಡುಂಡ್. ದೇವ ನಿಂಗಳ ಬಲ ಉಳ್ಳಯಿಂಗಳಾಯಿತ್ ಮಾಡಂಡೂಂದು, ನಿಂಗ ಏದ್ ತಪ್ಪಿಲ್ಲತಯಿಂಗಳಾಯಿತು, ನಿಂಗಕ್ ದೇವಡ ಚಿತ್ತ ಪೂರ್ತಿ ಗೊತ್ತಾಂಡೂಂದೂ ಅಂವೊ ಪ್ರಾರ್ಥನೆ ಮಾಡಿಯಂಡುಂಡ್.

ಫಿಲೆಮೋನ 1:1

ಕ್ರಿಸ್ತ ಯೇಸುರ ವಿಷಯತ್ ಕೈದಿಯಾಯಿತುಳ್ಳ ಪೌಲುನು, ನಂಗಡ ತಮ್ಮಣನಾನ ತಿಮೊಥೆಯನು, ನಂಗಕ್ ದುಂಬ ಪ್ರೀತಿಯುಳ್ಳ, ನಂಗಡ ಕೂಡೆ ಸೇವೆ ಮಾಡಿಯಂಡುಳ್ಳ ಫಿಲೆಮೋನಂಗ್,

ಇಬ್ರಿಯ 13:17

ನಿಂಗಳ ನಡ್‌ತುವಯಿಂಗಡ ಅದಿಕಾರಕ್ ತಗ್ಗಿತ್ ನಡ್‌ಂದಿತ್, ಅಯಿಂಗಡ ಪಕ್ಕ ಅಡಕತ್‍ಲ್ ನಡ್‌ಕಂಡು. ಅಯಿಂಗ ನಿಂಗಡ ಆತ್ಮಕಾಯಿತ್ ದೇವಡ ಪಕ್ಕ ಲೆಕ್ಕ ಕೊಡ್‍ಪಕುಳ್ಳ ಜವಾಬ್ದಾರಿಲ್ ಜಾಗ್ರತೆಯಾಯಿತುಂಡ್. ಅಯಿಂಗ ಅದ್‍ನ ವ್ಯಸನತ್‍ಲ್ ಮಾಡತೆ, ಕುಶೀಲ್ ಮಾಡಡ್. ಅಯಿಂಗ ಅದ್‍ನ ವ್ಯಸನತ್‍ಲ್ ಮಾಡ್‍ಚೇಂಗಿ ಅದ್ ಪ್ರಯೋಜನವಾಯಿತ್‌ಪ್ಪುಲೆ.

1 ಯೋಹಾನ 3:16

ಕ್ರಿಸ್ತ ನಂಗಕಾಯಿತ್ ತಾಂಡ ಜೀವತ್‍ನ ತಂದಗುಂಡ್, ಪ್ರೀತಿ ಎಣ್ಣುವದ್ ಎಂತದ್‍ೕಂದ್ ನಂಗಕೆಲ್ಲ ಗೊತ್ತಾಚಿ. ಆನಗುಂಡ್ ನಂಗಳು ಸಹ ನಂಗಡ ಅಣ್ಣತಮ್ಮಣಂಗಕಾಯಿತ್ ಜೀವತ್‍ನ ಕೊಡ್‍ಕಂಡು!