1 ಥೆಸಲೊನೀಕ 2:5 - ಕೊಡವ ಬೈಬಲ್

⁵ ನಿಂಗಕೆಲ್ಲಾ ಗೊತ್ತುಳ್ಳನೆಕೆ, ನಂಗ ಒರ್ ಕುರಿ ಸಹ ಮರ್‍ಳ್ ತಕ್ಕ್ ಪರ್ಂದಿತ್ ನಿಂಗಳ ಗೆಲ್ಲ್‌ವಕ್ ನೋಟಿತ್‌ಲ್ಲೆ. ನಿಂಗಡ ಪಣತ್‍ನ ಪರಿಪಕಾಯಿತ್ ನಂಗ ನಿಂಗಡ ಕೂಡೆ ಸ್ನೇಹಿತಂಗಡನೆಕೆ ಕಳಿಚಂಡಿಲ್ಲೇಂದ್ ನಂಗ ಎಣ್ಣ್‌ವಕ್ ದೇವ ಒಬ್ಬನೇ ನಂಗಕ್ ಸಾಕ್ಷಿಯಾಯಿತುಂಡ್.

1 ಥೆಸಲೊನೀಕ 2:5 Iomraidhean Croise

ಜ್ಞಾನತ್‌ರ ಪಡಿಮ 20:19

ಬೋರೆಯಿಂಗಡ ಮೇಲೆ ಕುತ್ತ ಪರ್‌ಂದಿತ್‌ ತಿರಿಗಿಯಂಡ್‌ ಇಪ್ಪಂವೊ ಗುಟ್ಟ್‌ನ ಬಾಯಿಬುಟ್ಟ್‌ರ್‌ವ. ಆನಗುಂಡ್‌ ಮಿತಿಮೀರಿತ್‌ ತಕ್ಕ್‌ ಪರಿಯುವಂವೊಂಡ ಸಹವಾಸ ಮಾಡತೆ.

ಜ್ಞಾನತ್‌ರ ಪಡಿಮ 26:28

ಪೊಟ್ಟ್‌ ಪರಿಯುವಂವೊ, ಅಂವೊಂಡಗುಂಡ್‌ ಕಷ್ಟಪಟ್ಟಯಿಂಗಳ ದ್ವೇಶ ಮಾಡುವ. ಕೊಚ್ಚಿ ತಕ್ಕ್‌ ಪರಿಯುವ ಬಾಯಿ ನಾಶತ್‌ನ ಉಂಟ್ ಮಾಡುವ.

ಜ್ಞಾನತ್‌ರ ಪಡಿಮ 28:23

ತಾಂಡ ನಾವ್ಯಿಂಜ ಕೊಚ್ಚ್‌ ತಕ್ಕ್‌ ಪರಿಯುವಂವೊಕಿಂಜಿ, ಚೂಕ್‌ಚಿಡುವಂವೊನ ಕಡೇಲ್‌ ಕೊಂಡಾಡುವ.

ಮಲಾಕಿ 1:10

ಪ್ರಯೋಜನ ಇಲ್ಲತೆ, ದಾರು ನಾಡ ಬಲಿಪೀಠತ್‌ರ ಮೇಲೆ ತಿತ್ತ್‌ನ ಕತ್ತ್‌ಚಿಡತೆ ಇಪ್ಪಕ್‌ ನಿಂಗಡಲ್ಲಿ ಒಬ್ಬ ದೇವಾಲಯತ್‌ರ ಪಡಿನ ಮಚ್ಚಿರ್ತೇಂಗಿ, ಅದ್‌ ಎಚ್ಚಕೋ ನಲ್ಲದಾಯಿತ್‌ಪ್ಪ. ನಿಂಗಡ ಮೇಲೆ ನಾಕ್‍ ಕುಶಿ ಇಲ್ಲೇಂದ್‌ ಸೈನ್ಯತ್‌ರ ಒಡೆಯನಾನ ಯೆಹೋವ ಎಣ್ಣಿಯಂಡುಂಡ್. ನಿಂಗಡ ಕೈಯಿಂಜ ಇಡುವ ಕಾಣಿಕೆನ ಸತ ನಾನ್‌ ಸ್ವೀಕಾರ ಮಾಡುಲೆ.

ಮತ್ತಾಯ 22:16

ಅಯಿಂಗ ಹೆರೋದ ರಾಜಂಡ ಜನಡ ಕೂಡೆ ಅಯಿಂಗಡ ಶಿಷ್ಯಂಗಳ ಅಯಿಚತ್. ಅಯಿಂಗ ಬಂತ್, ಉಪಾದ್ಯನೇ, ನೀನ್ ಸತ್ಯ ಉಳ್ಳಂವೊನು, ದೇವಡ ಚಿತ್ತತ್‍ರ ವಿಷಯತ್ ಜನಕ್ ಸತ್ಯವಾಯಿತ್ ಬೋದನೆ ಮಾಡ್‍ವಿಯಾಂದೂ, ದಾರ್‌ಕು ಬೊತ್ತ್‌ವಂವೊ ಅಲ್ಲಾಂದು, ಪಕ್ಷಪಾತ ಇಲ್ಲತಂವೋಂದು ನಂಗಕ್ ಗೊತ್ತುಂಡ್.

ಮತ್ತಾಯ 23:13

ಕಪಟಿಯಾನ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳೇ, ಫರಿಸಾಯಂಗಳೇ ನಿಂಗಕ್ ಅಯ್ಯೋ. ಜನ ಪ್ರವೇಶ ಮಾಡತನೆಕೆ ಪರಲೋಕ ರಾಜ್ಯತ್‍ರ ಪಡಿನ ಬೀಗ ಇಡ್‍ವಿರ. ನಿಂಗಳು ಅದ್ಂಡ ಒಳ್‍ಕ್ ಪೋಪುಲೆ, ಪೋಪಯಿಂಗಳ ಪೋಪಕ್ ಬುಡ್‍ವದು ಇಲ್ಲೆ.

ಅಪೊಸ್ತಲ 20:33

ನಿಂಗಡ ಬೊಳ್ಳಿ, ಪೊನ್ನ್, ಅಥವ ಉಡ್‍ಪ್ ತೊಡ್‍ಪ್‍ೕಂದ್ ಏದ್ ವಿಷಯತ್‍ಲು ನಾನ್ ಆಸೆ ಪಟ್ಟಿತ್‌ಲ್ಲೆ.

ರೋಮ್ 1:9

ನಾನ್ ಎಕ್ಕಾಲು ನಿಂಗಕಾಯಿತ್, ಎಚ್ಚಕ್ ಪ್ರಾರ್ಥನೆ ಮಾಡಿಯಂಡುಳ್ಳ್‌ೕಂದ್ ದೇವ ನಾಕ್ ಸಾಕ್ಷಿಯಾಯಿತ್ ಉಂಡ್. ನಾನ್ ಎಣ್ಣುವದ್ ಸತ್ಯಾಂದ್, ಅಂವೊಂಡ ಮೋಂವೊಂಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವ ಮೂಲಕ, ನಾನ್ ತ್‍ೕರ ಮನಸ್ಸ್‌ಲ್ ಸೇವೆ ಮಾಡ್‌ವ ದೇವಡ ಪೆದತ್‍ಲ್ ಎಣ್ಣ್‌ವಿ.

ರೋಮ್ 16:18

ಅನ್ನನೆ ಉಳ್ಳಯಿಂಗ, ನಂಗಡ ಒಡೆಯನಾನ ಯೇಸು ಕ್ರಿಸ್ತಂಗ್ ಸೇವೆ ಮಾಡತೆ, ಅಯಿಂಗಡ ಕೆಲಕಾಯಿತ್ ಸೇವೆ ಮಾಡಿಯಂಡುಂಡ್. ಅಯಿಂಗ ಅಯಿಂಗಡ ಮದುರವಾನ ತಕ್ಕ್‌ನ ಪರ್ಂದಿತ್ ಪಿಂಞ ಕುಶಿಪಡ್‌ತ್‌ವನೆಕೆ ತಕ್ಕ್ ಪರ್ಂದಿತ್, ಒಂದು ಅರಿಯತ ಜನಡ ಹೃದಯತ್‍ನ ವಂಚನೆ ಮಾಡ್‌ವಯಿಂಗಳಾಯಿತುಂಡ್.

ರೋಮ್ 9:1

ನಾನ್ ಕ್ರಿಸ್ತಂಡಲ್ಲಿ ಸತ್ಯ ಎಣ್ಣಿಯಂಡುಂಡ್. ನಾನ್ ಪೊಟ್ಟ್‌ಪರ್ಂದಂಡಿಲ್ಲೆ.

2 ಕೊರಿಂಥ 12:17

ನಾನ್ ನಿಂಗಡ ಪಕ್ಕ ಅಯಿಚಯಿಂಗಡ ಮೂಲಕ ನಿಂಗಡಿಂಜ ಎಂತಾಚು ಲಾಬ ಪಡ್ಂದಿತುಂಡಾ?

2 ಕೊರಿಂಥ 2:17

ದುಂಬ ಜನತ್‍ರನೆಕೆ, ನಂಗಕ್ ಲಾಬ ಕ್‍ಟ್ಟ್‌ವಕಾಯಿತ್ ದೇವಡ ವಾಕ್ಯತ್‍ನ ಕಲಪ್‍ಲ್ ಬೋದನೆ ಮಾಡತೆ, ಕ್ರಿಸ್ತಂಡ ಕೂಡೆ ಉಳ್ಳ ಐಕ್ಯತ್‍ಲ್, ನಂಬಿಕಸ್ತಂಗಳಾಯಿತ್, ದೇವ ಅಯಿಚಯಿಂಗಳಾಯಿತ್, ದೇವಡ ಮಿಂಞತ್‍ಲ್ ತಕ್ಕ್ ಪರ್ಂದಂಡುಂಡ್.

2 ಕೊರಿಂಥ 4:2

ಅದ್ಂಡ ಬದ್‍ಲ್, ಞಾಣ ಆಪಕುಳ್ಳ ಪಿಂಞ ಗುಟ್ಟಾಯಿತುಳ್ಳ ವಿಷಯತ್‍ನೆಲ್ಲಾ ನಂಗ ತ್‍ಕ್ಕಾರ ಮಾಡಿತ್, ಕಪಟಿಯರನೆಕೆ ನಡ್‍ಕತೆ, ದೇವಡ ವಾಕ್ಯತ್‍ನ ತಪ್ಪಾಯಿತ್ ಬೋದನೆ ಮಾಡಿಯಂಡಿಲ್ಲೆ. ಆಚೇಂಗಿ, ಸತ್ಯತ್‍ನ ಎಲ್ಲಾರ್‌ಕು ಗೊತ್ತಾಪನೆಕೆ ಅರಿಚಿಟ್ಟಿತ್, ದೇವಡ ಮಿಂಞತ್ ಎಲ್ಲಾ ಮನುಷ್ಯಂಗಡ ಮನಸಾಕ್ಷಿಕ್ ನಂಗ ಸತ್ಯವಂತಯಿಂಗಾಂದ್ ಕಾಂಬ್‍ಚಿಟ್ಟಂಡುಂಡ್.

2 ಕೊರಿಂಥ 7:2

ನಿಂಗಡ ಮನಸ್ಸ್‌ಲ್ ನಂಗಕ್ ಜಾಗ ಕೊಡಿ; ನಂಗ ಒಬ್ಬಂಗು ಅನ್ಯಾಯ ಮಾಡಿತ್‌ಲ್ಲೆ, ಒಬ್ಬಂಗ್ ಸಹ ಕ್‍ೕಡ್ ಮಾಡಿತ್‌ಲ್ಲೆ, ಒಬ್ಬಂಗು ವಂಚನೆ ಮಾಡಿತ್‌ಲ್ಲೆ.

ಗಲಾತ್ಯ 1:20

ನಾನ್ ಇಕ್ಕ ಎಂತ ಒಳ್‌ದಿಯಂಡುಳ್ಳೆನೋ ಅದ್ ಸತ್ಯ. ದೇವಕ್ ಗೊತ್ತುಂಡ್ ನಾನ್ ಪೊಟ್ಟ್ ಪರ್ಂದಂಡಿಲ್ಲೇಂದ್.

1 ಥೆಸಲೊನೀಕ 2:10

ದೇವಡ ಮೇಲೆ ನಂಬಿಕೆ ಬೆಚ್ಚ ನಿಂಗಡ ಮದ್ಯತ್‍ಲ್, ನಂಗ ಎಚ್ಚಕ್ ಪವಿತ್ರತ್‍ಲು, ನೀತಿಲು, ತಪ್ಪಿಲ್ಲತಯಿಂಗಳಾಯಿತು ನಡ್ಂದತ್‍ೕಂದ್ ನಿಂಗಳು ಪಿಂಞ ದೇವನು ಸಾಕ್ಷಿಯಾಯಿತುಳ್ಳಿರ.

1 ತಿಮೊಥೆಯ 3:3

ಅಂವೊ ಕುಡ್‌ಕನಾಯಿತ್, ಹಿಂಸೆ ಮಾಡ್‌ವಂವೊನಾಯಿತ್, ಜಗಳ ಮಾಡ್‌ವಂವೊನಾಯಿತ್, ದುಡ್ಡ್‌ರ ಮೇಲೆ ಆಸೆ ಉಳ್ಳಂವೊನಾಯಿತ್ ಇಪ್ಪಕ್ಕಾಗ. ಅಂವೊ ಶಾಂತ ಗುಣ ಉಳ್ಳಂವೊನಾಯಿತ್ ಇರಂಡು.

1 ತಿಮೊಥೆಯ 3:8

ಅನ್ನನೆ ಸಬೇಲ್ ಸಹಾಯ ಮಾಡ್‌ವಯಿಂಗಳು ಮರ್ಯಾದಸ್ತಂಗಳಾಯಿತ್ ಪಿಂಞ ನೇರಾನಯಿಂಗಳಾಯಿತ್ ಇರಂಡು; ಕುಡ್‍ಕಂಗಳಾಯಿತ್, ಕಳ್ಳತನತ್‌ಲ್ ಸಂಪಾದನೆ ಮಾಡ್‌ವಯಿಂಗಳಾಯಿತ್ ಇಪ್ಪಕ್ಕಾಗ.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 1:7

ಸಬೆರ ಪೆರಿಯಯಿಂಗ ದೇವಡ ಮಕ್ಕಳ ಚಾಯಿತೆ ನಡ್‍ತಿಯಂಡ್ ಪೋಪ ಜವಾಬ್ದಾರಿ ಉಳ್ಳಂವೊನಾಯಿತ್ ಇಪ್ಪ. ಆನಗುಂಡ್, ದಾರೂ ಕುತ್ತ ಪರಿಯುವಕ್ ಕಯ್ಯತನೆಕೆ ಅಂವೊಂಡ ಬದ್‍ಕ್ ಇರಂಡು. ಅಂವೊಂಡ ಕುಶೀರನೆಕೆ ಮಾಡ್‍ವಂವೊನಾಯಿತು, ಬೆರಿಯ ಚೆಡಿ ಬಪ್ಪಂವೊನಾಯಿತು, ಕುಡಿಪಂವೊನಾಯಿತು, ಜಗಳ ಮಾಡ್‌ವಕ್ ಕುಶಿಯುಳ್ಳಂವೊನಾಯಿತು, ದುಡ್ಡ್‌ರ ಮೇಲೆ ಆಸೆ ಉಳ್ಳಂವೊನಾಯಿತು ಇಪ್ಪಕ್ಕಾಗ.

1 ಪೇತ್ರ 5:2

ನಿಂಗಡಲ್ಲಿ ಉಳ್ಳ ದೇವಡ ಮಕ್ಕಳ ನಿಂಗ ಚಾಯಿತೆ ಒರ್ ಕೊರಿ ಗುಂಪ್‍ನ ನೋಟ್‍ವನೆಕೆ ಪೆರಿಯಯಿಂಗಡ ಸೇವೇನ ಮಾಡಂಡು. ಒತ್ತಾಯತ್‌ಲ್ ಅಲ್ಲ, ದೇವ ಕುಶಿಪಡ್‌ವನೆಕೆ ಮನಪೂರ್ವವಾಯಿತ್ ಪಿಂಞ ಕೆಟ್ಟ ಆದಾಯಕಾಯಿತ್ ಅಲ್ಲ, ಪುರ್‌ಡುಳ್ಳ ಮನಸ್ಸ್‌ಲ್ ಮಾಡಂಡು.

2 ಪೇತ್ರ 2:18

ಅಯಿಂಗಡ ಬಾಯಿಲ್ ಮುಠಾಳತನತ್‍ರ ಪಿಂಞ ಒಂದು ಇಲ್ಲತ ಬಡಾಯಿ ತಕ್ಕ್ ಮಾತ್ರ ಉಂಡ್. ಅಯಿಂಗಡ ಕಳ್ಳ ಬೋದನೆರ ಮೂಲಕ, ತಡೀರ ಇಚ್ಛೆರ ಆಸೆ, ಪಾಪ ಅಲ್ಲಾಂದ್ ಎಣ್ಣಿತ್, ಪಾಪ ಮಾಡ್‌ವ ಜನತ್‍ಂಜ, ಇಕ್ಕ ಬುಡ್‌ಗಡೆಯಾಯಿತ್ ಬಂದ ಯೇಸುನ ನಂಬ್‍ನಯಿಂಗಕ್ ಆಸೆ ಕಾಟಿತ್ ಅಯಿಂಗಳ ತಿರಿತ್ ಪೋಪಕ್ ಮಾಡಿಯಂಡುಂಡ್.

2 ಪೇತ್ರ 2:3

ದುರಾಸೇಲ್, ಅಯಿಂಗಳೇ ಮಾಡ್‍ನ ಕಥೇರ ಬೋದನೆರ ಮೂಲಕ ನಿಂಗಡಿಂಜ ಅಯಿಂಗಕ್ ಆದಾಯ ಆಪನೆಕೆ ವಂಚನೆ ಮಾಡ್‌ವ. ದೇವ ಅಯಿಂಗಳ ಪಂಡೇ ನ್ಯಾಯತೀರ್ಪ್ ಮಾಡಿರ್‌ತ್, ಅಯಿಂಗಡ ಮೇಲೆ ಬಪ್ಪ ಶಿಕ್ಷೆ ಬೆರಿಯ ಬಪ್ಪ.

ಯೂದ ಒಳ್‍ದ್‍ನ ಕಾಗದ 1:11

ಕಳ್ಳ ಬೋದನೆ ಮಾಡ್‌ವಯಿಂಗಕ್ ಅಯ್ಯೋ! ಈಂಗ ತಮ್ಮಣನ ಕೊಂದ ಕಾಯಿನ ಎಣ್ಣ್‌ವಂವೊಂಡ ಬಟ್ಟೇಲ್ ನಡ್ಂದಂಡುಂಡ್. ಪಣಕಾಯಿತ್ ದೇವಡ ಮಕ್ಕಳ ಬಿಳಾಮ ಎಣ್ಣ್‌ವಂವೊ ಮೋಸ ಮಾಡ್‍ನನೆಕೆ ಈಂಗಳು ದುಡ್‍ಕಿಯಂಡ್ ಓಡ್‍ವ. ಪಿಂಞ ಕೋರಹ ಎಣ್ಣ್‌ವಂವೊ ಎದ್‍ರ್ ತಕ್ಕ್ ಪರ್ಂದಿತ್ ಎನ್ನನೆ ಪಾಳಾಯಿ ಪೋಚೋ, ಅನ್ನನೆ ಈಂಗಳು ಪಾಳಾಯಿ ಪೋಪ.