1 ಪೇತ್ರ 3:8 - ಕೊಡವ ಬೈಬಲ್

⁸ ಕಡೇಕ್ ನಾನ್ ಎಣ್ಣುವದ್ ಎಂತ ಎಣ್ಣ್‌ಚೇಂಗಿ: ನಿಂಗ ಎಲ್ಲಾರು ಒಬ್ಬ ಒಬ್ಬಂಡ ಕೂಡೆ ಐಕ್ಯತ್‍ಲ್ ಬದ್‍ಕಂಡು; ದಯೆ ಉಳ್ಳಯಿಂಗಳಾಯಿತ್, ಯೇಸುನ ನಂಬ್‍ನಯಿಂಗಡ ಪ್ರೀತಿ ಉಳ್ಳಯಿಂಗಳಾಯಿತ್, ಕನಿಕರ ಉಳ್ಳಯಿಂಗಳಾಯಿತ್, ಪೊರುಮೆ ಉಳ್ಳಯಿಂಗಳಾಯಿತ್ ಇಕ್ಕಂಡು.

1 ಪೇತ್ರ 3:8 Iomraidhean Croise

ಜ್ಞಾನತ್‌ರ ಪಡಿಮ 28:8

ಅನ್ಯಾಯ ಬಡ್ಡಿ ಪಿಂಞ ಆದಾಯತ್‌ಂಜ ತಾಂಡ ಆಸ್ತಿನ ಜಾಸ್ತಿ ಮಾಡುವಂವೊ, ಗರೀಬಂಗಕ್‌ ದಯೆ ಕಾಟ್‌ವವೊಂಗಾಯಿತ್‌ ಅದ್‌ನ ಕೂಟಿತ್‌ ಬೆಪ್ಪ.

ಮತ್ತಾಯ 18:33

ನಾನ್ ನೀಕ್ ಕನಿಕರ ಕಾಟ್‍ನನೆಕೆ, ನೀನ್ ಅಂವೊಂಡ ಮೇಲೆ ಕನಿಕರ ಕಾಟ್‍ವಕಿಂಜತಲ್ಲ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 10:33

ಪಿಂಞ ಒರ್ ಸಮಾರಿಯ ಆ ಬಟ್ಟೇಲ್ ಪ್ರಯಾಣ ಮಾಡಿಯಂಡಿಪ್ಪಕ, ಈ ಮನುಷ್ಯನ ನೋಟಿತ್, ಕನಿಕರ ಪಟ್ಟತ್.

ಅಪೊಸ್ತಲ 2:1

ಐಂಬದ್ ನಾಳ್‌ರ ಪಂಚಾಶತ್ತಮ ಎಣ್ಣುವ ನಮ್ಮೆರ ದಿವಸ ಬಪ್ಪಕ, ಅಯಿಂಗೆಲ್ಲಾ ಒರ್ ಜಾಗಕ್ ಬಂತ್ ಒಟ್ಟ್ ಕೂಡ್‍ಚಿ.

ಅಪೊಸ್ತಲ 27:3

ಪಿತ್ಯಾಂದ್ ನಂಗ ಸೀದೋನ್ ಎಣ್ಣುವ ಹಡಗ್ ನಿಪ್ಪಲ್ಲಿಕ್ ಎತ್ತಿತ್ ಹಡಗ್‍ನ ನಿಪ್ಪ್‌ಚಿಟ್ಟತ್. ಯೂಲ್ಯ ಪೌಲಂಗ್ ದಯೆ ಕಾಟಿತ್, ಪೌಲ ತಾಂಡ ಸ್ನೇಹಿತಂಗಡ ಪಕ್ಕ ಪೋಯಿತ್ ಅಂವೊಂಗ್ ಬೋಂಡಿಯಾನ ಸಹಾಯತ್‍ನ ಪಡೆಯುವನೆಕೆ ಅಪ್ಪಣೆ ಕೊಡ್‍ತತ್.

ಅಪೊಸ್ತಲ 28:7

ದ್ವೀಪಕ್ ಮುಕ್ಯಸ್ತನಾನ ಪೊಪ್ಲಿಯ ಎಣ್ಣ್‌ವಂವೊಂಡ ನೆಲ, ಆ ಜಾಗತ್‍ರ ಪಕ್ಕತ್‍ಲ್ ಇಂಜತ್. ಅಂವೊ ನಂಗಳ ಅಂವೊಂಡ ಮನೆಕ್ ಸ್ವೀಕಾರ ಮಾಡಿತ್ ಮೂಂದ್ ದಿವಸ ಚಾಯಿ ಊಟೋಪಚಾರ ಮಾಡ್‍ಚಿ.

ಅಪೊಸ್ತಲ 4:32

ಯೇಸುನ ನಂಬ್‍ನಯಿಂಗ ಎಲ್ಲಾರು ಒರೇ ಮನಸ್ಸ್‌ಲ್ ಒರೇ ಹೃದಯತ್‍ಲ್ ಬದ್‍ಕಿಯಂಡಿಂಜತ್. ಒಬ್ಬ ಸಹ ತಾಂಡ ವಸ್ತುನ ಅಂವೊಂಗ್ ಮಾತ್ರಾಂದ್ ಎಣ್ಣಿಯಂಡಿಂಜಿಲೆ; ಅಲ್ಲಿ ಉಳ್ಳ ಎಲ್ಲಾನ ಎಲ್ಲಾರ್‌ಕು ಕೂಡನದಾಯಿತ್ಂಜತ್.

ರೋಮ್ 12:10

ಅಣ್ಣತಮ್ಮಣಂಗ ಒಬ್ಬೊಬ್ಬಂಡ ಕೂಡೆ ಚಾಯಿ ಪ್ರೀತಿಲ್ ಇರಿ; ಗನ ಪಡ್‌ತ್‍ವದ್‍ಲ್ ಎಲ್ಲಾರ್ಕಿಂಜ ಮಿಂಞ ನಿಂಗಳೇ ಮಾಡ್‌ವಯಿಂಗಳಾಯಿತಿರಿ.

ರೋಮ್ 15:5

ನಂಗಕ್ ಪೊರುಮೆ ಪಿಂಞ ಪುರ್‌ಡ್ ಕೊಡ್‍ಪ ದೇವ, ಕ್ರಿಸ್ತ ಯೇಸುಕ್ ತಗ್ಗಿತ್ ನಡ್ಂದಂಡ್ ಒರೇ ಮನಸ್ಸ್ ಉಳ್ಳಯಿಂಗಳಾಯಿತ್ ಇಪ್ಪಕ್ ನಿಂಗಕ್ ಸಹಾಯ ಮಾಡಡ್.

1 ಕೊರಿಂಥ 1:10

ನಾಡ ಅಣ್ಣತಮ್ಮಣಂಗಳೇ, ನಿಂಗ ಎಲ್ಲಾಡ ಕೂಡೆ ಸಮಾದಾನತ್‍ಲ್ ಇರೀಂದ್ ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಪೆದತ್‍ಲ್ ನಾನ್ ನಿಂಗಳ ಬೋಡ್‍ವಿ. ಸಬೇಲ್ ನಿಂಗಡಡೆಲ್ ಏದ್ ವಿಂಗಡವೂ ಇಲ್ಲತೆ ನಿಂಗಡ ಗೇನತ್‍ಲ್ ಪಿಂಞ ಉದ್ದೇಶತ್‍ಲ್ ಒರೇ ಮನಸ್ಸ್‌ಲ್ ಇರಂಡು.

1 ಕೊರಿಂಥ 12:26

ಅಕ್ಕ, ತಡೀರ ಒರ್ ಬಾಗ ಕಷ್ಟಪಟ್ಟತೇಂಗಿ, ಅದ್ಂಡಕೂಡೆ ತಡೀರ ಎಲ್ಲಾ ಬಾಗವು ಕಷ್ಟಪಡ್‌ವ. ಒರ್ ಬಾಗ ಕುಶಿಪಟ್ಟತೇಂಗಿ ಬೋರೆ ಎಲ್ಲಾ ಬಾಗವು ಕುಶಿ ಪಡುವ.

ಎಫೆಸ 4:2

ಎಲ್ಲಾ ತಾಳ್ಮೆಲ್, ಶಾಂತಿಲ್, ಪೊರುಮೇಲ್, ಪ್ರೀತಿನಗುಂಡ್ ಒಬ್ಬನ ಒಬ್ಬ ಸಹಿಸಿಯಂಡ್ ಇರಿ.

ಎಫೆಸ 4:31

ಎಲ್ಲಾ ಕೈಪ್‍ತನ, ಬೈಗಳ, ಚೆಡಿ, ಜೋರ್ ಮಾಡ್‍ವದ್, ಕೆಟ್ಟ ತಕ್ಕ್ ಪಿಂಞ ಎಲ್ಲಾ ಕೆಟ್ಟ ಗುಣವು ನಿಂಗಳ ಬುಟ್ಟಿತ್ ಪೋಡ್.

ಎಫೆಸ 4:32

ಒಬ್ಬಂಡ ಮೇಲೆ ಒಬ್ಬ ದಯೆ ಕಾಟಿತ್, ಕರುಣೆ ಉಳ್ಳಯಿಂಗಳಾಯಿತ್, ಕ್ರಿಸ್ತಂಡ ಮೂಲಕ ದೇವ ನಿಂಗಕ್ ಮನ್ನಿಚಿಟ್ಟನೆಕೆ, ನಿಂಗಳು ಒಬ್ಬಂಗ್ ಒಬ್ಬ ಮನ್ನಿಚಿಡಿ.

ಫಿಲಿಪ್ಪಿ 2:3

ನಿಂಗ ಮಾತ್ರ ಬಲ್ಯಯಿಂಗಾಂದ್ ಗೇನ ಮಾಡತಿ, ನಿಂಗಳ ತಗ್ಗ್‌ಚಿಟ್ಟಂಡ್ ಬೋರೆಯಿಂಗ ನಿಂಗಕಿಂಜ ಬಲ್ಯಯಿಂಗಾಂದ್ ಗೇನ ಮಾಡಿ.

ಫಿಲಿಪ್ಪಿ 3:16

ಆಚೇಂಗಿಯು ನಂಗ ಎಚ್ಚಕ್ ಬೊಳ್‌ಂದಿತುಂಡೋ ಅಚ್ಚಕ್ ಚಾಯಿತೆ ಗೇನ ಮಾಡಿತ್ ನಡ್‌ಕಂಡು.

ಕೊಲೊಸ್ಸೆ 3:12

ಆನಗುಂಡ್ ನಿಂಗ, ದೇವ ಗೊತ್ತ್ ಮಾಡ್‍ನ ಅಂವೊಂಡ ಮಕ್ಕಳಾಯಿತ್ ಪಿಂಞ ಅಂವೊ ಪ್ರೀತಿ ಮಾಡ್‌ವಯಿಂಗಳಾಯಿತ್ ಉಳ್ಳಾಂಗ್, ನಿಂಗ ಕರುಣೆ, ದಯೆ, ತಾಳ್ಮೆ, ಶಾಂತ ಗುಣ ಪಿಂಞ ಪೊರುಮೆ ಎಣ್ಣುವ ಗುಣತ್‍ನೆಲ್ಲ ನಿಂಗ ಇಟ್ಟೊಳಿ.

ಇಬ್ರಿಯ 13:1

ಒಬ್ಬನ ಒಬ್ಬ, ಯೇಸುನ ನಂಬ್‍ನಯಿಂಗಡ ಪ್ರೀತಿಲ್ ಪ್ರೀತಿಚಿಡಿ.

ಯಾಕೋಬ 2:13

ಈ ಲೋಕತ್‍ಲ್ ಜನಕ್ ಕರುಣೆ ಕಾಟತಯಿಂಗಕ್, ದೇವ ತೀರ್ಪ್ ತಪ್ಪ ದಿವಸತ್‍ಲ್, ಅಂವೊ ಕರುಣೆ ಕಾಟುಲೆ; ಆಚೇಂಗಿ, ನಿಂಗ ಕರುಣೆಯುಳ್ಳಯಿಂಗಳಾಯಿತ್ ಇಂಜತೇಂಗಿ, ದೇವ ನಿಂಗಳ ತೀರ್ಪ್ ಮಾಡ್‌ವ ದಿವಸತ್‍ಲ್ ನಿಂಗಕ್ ಕರುಣೆಯುಳ್ಳಂವೊನಾಯಿತಿಪ್ಪಾಂದ್ ನಿಂಗಕ್ ಗೊತ್ತಿರಂಡು.

ಯಾಕೋಬ 3:17

ಆಚೇಂಗಿ ಪರಲೋಕತ್ಂಜ ಬಪ್ಪ ಜ್ಞಾನ, ಆದ್ಯವಾಯಿತ್, ನಂಗಳ ಶುದ್ದ ಮಾಡ್‌ವ, ಅದ್ ಸಮಾದಾನ ಉಳ್ಳದಾಯಿತು ಅಡಕ ಉಳ್ಳದಾಯಿತು ಕುಶಿ ಉಳ್ಳದಾಯಿತು ಇಪ್ಪ. ಅದ್‍ಲ್ ಕರುಣೆ ಪಿಂಞ ನಲ್ಲ ಫಲ ದುಂಬಿತ್, ಎಲ್ಲಾ ಮನುಷ್ಯಂಗಕು ಒರೇ ತರ ಮರ್ಯಾದೆ ಮಾಡಿತ್, ಕಪಟ ಇಲ್ಲತ ಶುದ್ದ ನಂಬಿಕೆ ಉಳ್ಳದಾಯಿತಿಪ್ಪ.

ಯಾಕೋಬ 5:11

ಕಷ್ಟತ್‍ಲ್ ತಾಳ್ಮೆಯಾಯಿತುಳ್ಳಯಿಂಗಳ ಆಶೀರ್ವಾದ ಪಡ್ಂದಯಿಂಗಾಂದ್ ನಂಗ ಎಣ್ಣ್‌ವಲ್ಲಾ? ಯೋಬ ಎಣ್ಣ್‌ವಂವೊಂಡ ತಾಳ್ಮೆನ ಕ್‍ೕಟಿತುಳ್ಳಿರಲ್ಲ? ಒಡೆಯಂಡ ಚಿತ್ತ ಎಂತ್‍ೕಂದ್ ಕಡೇಕ್ ಕಂಡಿತುಳ್ಳಿರಲ್ಲ? ಒಡೆಯ ದುಂಬ ದಯವಂತನು ಪಿಂಞ ಕರುಣೆ ಉಳ್ಳಂವೊ ಆಯಿತುಂಡ್.

1 ಪೇತ್ರ 1:22

ಆನಗುಂಡ್, ನಿಂಗ ಕಪಟ ಇಲ್ಲತ ಯೇಸುನ ನಂಬ್‍ನಯಿಂಗಡ ಪ್ರೀತಿಲ್ ಇಪ್ಪಕಾಯಿತ್ ಪಿಂಞ ಒಬ್ಬೊಬ್ಬಂಗಡ ಮೇಲೆ ನೇರಾಯಿತ್ ಹೃದಯತ್ಂಜ ಪ್ರೀತಿ ಮಾಡ್‌ವಕಾಯಿತ್, ಇಕ್ಕ ನಿಂಗ ಸತ್ಯಕ್ ಬಗ್ಗಿತ್ ನಡ್‍ಪನೆಕೆ ಇಕ್ಕ ನಿಂಗಳ ಶುದ್ದ ಮಾಡಿರ. ಶುದ್ದ ಹೃದಯತ್ಂಜ, ನಿಂಗ ನೇರಾಯಿತ್ ಒಬ್ಬೊಬ್ಬನ ಪ್ರೀತಿ ಮಾಡಿ.

1 ಪೇತ್ರ 2:17

ಎಲ್ಲಾರ್‌ಕು ಚಾಯಿ ಮರ್ಯಾದೆ ಕೊಡಿ, ಯೇಸುನ ನಂಬ್‍ನಯಿಂಗಳ ಪ್ರೀತಿ ಮಾಡಿ, ದೇವಕ್ ಬೊತ್ತ್‌ಚಿಡಿ, ರಾಜನ ಗನಪಡ್‌ತಂಡು.

1 ಪೇತ್ರ 5:5

ಅನ್ನನೆ, ಬಾಲೆಕಾರಂಗಳೇ, ಪೆರಿಯಯಿಂಗಡ ತಕ್ಕ್‌ಕ್ ತಗ್ಗಿತ್ ನಡ್‌ಂದಂಡಿರಿ. ನಿಂಗ ಎಲ್ಲಾರು ಒಬ್ಬೊಬ್ಬಂಗ್ ಪೊರುಮೆನ ಬಟ್ಟೇರನೆಕೆ ಇಟ್ಟೊಳಿ. ಎನ್ನಂಗೆಣ್ಣ್‌ಚೇಂಗಿ, ಆಂಗಾರ ಉಳ್ಳಯಿಂಗಕ್ ದೇವ ಎದ್‍ರ್ ನಿಪ್ಪ, ಅಡಕ ಉಳ್ಳಯಿಂಗಕ್ ದೇವ ಕರುಣೆ ಕಾಟ್‍ವ.

2 ಪೇತ್ರ 1:7

ದೇವ ಬಕ್ತಿರ ಕೂಡೆ ಯೇಸುನ ನಂಬ್‍ನಯಿಂಗಡ ಮೇಲೆ ಉಳ್ಳ ಪ್ರೀತಿನ, ಯೇಸುನ ನಂಬ್‍ನಯಿಂಗಡ ಮೇಲೆ ಉಳ್ಳ ಪ್ರೀತಿರ ಕೂಡೆ ಎಲ್ಲಾ ಜನಳ ಪ್ರೀತಿಚಿಡುವ ಪ್ರೀತಿನ ಕೂಟ್‍ವಕ್ ಪೇಚಾಡಿಯಂಡಿರಿ.

1 ಯೋಹಾನ 3:14

ನಂಗಡ ಅಣ್ಣತಮ್ಮಣಂಗಳ ಪ್ರೀತಿ ಮಾಡ್‌ವಗೊಂಡ್, ನಂಗ ಮರಣತ್ಂಜ ತಪ್ಪಿ ಪೋಯಿತ್ ನಿತ್ಯ ಜೀವಕ್ ಕೂಡಿತುಂಡ್‍ೕಂದ್ ಗೊತ್ತುಂಡ್. ದಾರ್ ಪ್ರೀತಿ ಮಾಡುಲೆ ಅಂವೊ ಮರಣತ್‌ರ ಅದಿಕಾರತ್‌ಲ್ಲೇ ಉಂಡ್.