1 ಪೇತ್ರ 3:4 - ಕೊಡವ ಬೈಬಲ್

⁴ ಅದ್ಂಡ ಬದ್‍ಲ್, ನಿಂಗಡ ಬೋಜ ನಿಂಗಡ ಒಳ್‍ಲಿಂಜ ಬಪ್ಪದಾಯಿತ್ ಇರಂಡು. ಅದ್ ಎಂತ ಎಣ್ಣ್‌ಚೇಂಗಿ: ಪಾಳಾಯಿ ಪೋಕತ ಅಲಂಗಾರವಾನ ಶಾಂತ ಮನಸ್ಸ್‌ಲ್ ನಿಂಗಡ ಹೃದಯತ್‍ಲ್ ಮುಚ್ಚಿತಿಪ್ಪ ಗುಣವೇ. ಅದ್ ದೇವಡ ನೋಟತ್‌ಲ್ ದುಂಬ ಬೆಲೆಯುಳ್ಳದಾಯಿತುಂಡ್.

1 ಪೇತ್ರ 3:4 Iomraidhean Croise

ಮತ್ತಾಯ 11:29

ನಾನ್ ಶಾಂತವು, ತಾಳ್ಮೆ ಮನಸ್ಸು ಉಳ್ಳಂವೊ. ನಾಡ ನೊಗತ್‌ನ ನಿಂಗ ಎಡ್‍ತಂಡ್, ನಾನ್ ಎಣ್ಣುವಾನ ಪಡಿಚೋಳಿ; ಅಕ್ಕ ನಿಂಗಡ ಆತ್ಮಕ್ ಆರಾಮ್ ಕ್‍ಟ್ಟುವ.

ಮತ್ತಾಯ 21:5

ಚೀಯೋನ್‍ರ ಮಕ್ಕಕ್ ಎಣ್ಣಿ, ನೋಟಿ ನಿಂಗಡ ರಾಜ ನಿಂಗಡ ಪಕ್ಕ ಬಂದಂಡ್ ಉಂಡ್, ಅಂವೊ ಶಾಂತ ಗುಣ ಉಳ್ಳಂವೊನಾಯಿತು ಕತ್ತೆರ ಮೇಲೆ, ಅಕ್ಕು ಕತ್ತೆ ಕುಟ್ಟಿರ ಮೇಲೆ ಬಪ್ಪಾಂದ್ ಎಣ್ಣ್‌ವದೇ.

ಮತ್ತಾಯ 23:26

ಕುರ್‌ಡನಾನ ಫರಿಸಾಯನೇ, ಮಿಂಞ ನೀನ್ ಉಂಬ ಪಾತ್ರತ್‍ರ ಒಳ್‍ಲ್ ಚಾಯಿತೆ ಶುದ್ದ ಮಾಡ್. ಅಕ್ಕ, ಪೊರಮೆ ಉಳ್ಳದು ಶುದ್ದ ಆಪ.

ಮತ್ತಾಯ 5:5

ತಗ್ಗಿತ್ ಉಳ್ಳಯಿಂಗ ಆಶೀರ್ವಾದ ಪಡ್ಂದಯಿಂಗ; ಈ ಲೋಕ ಅಯಿಂಗಡದಾಯಿತ್‌ಪ್ಪ.

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 11:40

ಮುಠಾಳಂಗಳೇ! ಪೊರ ಅಂಷತ್‍ನ ಮಾಡ್‍ನ ದೇವನೇ ಒಳ ಅಂಷತನೂ ಮಾಡಿತಲ್ಲ?

ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 16:15

ಆಚೇಂಗಿ ಯೇಸು ಅಯಿಂಗಕ್, ನಿಂಗ ಎಕ್ಕಾಲು ಬೋರೆಯಿಂಗಡ ಮಿಂಞತ್ ನಲ್ಲಯಿಂಗಳಾಯಿತ್ ಕಾಂಬ್‍ಚಿಟ್ಟಂಡುಂಡ್, ಆಚೇಂಗಿ ದೇವಕ್ ನಿಂಗಡ ಹೃದಯತ್‍ನ ಗೊತ್ತುಂಡ್. ಮನುಷ್ಯಂಗ ಎಂತಾಂಗ್ ದುಂಬ ಬೆಲೆ ಉಂಡ್‍ೕಂದ್ ಗೇನ ಮಾಡ್‌ವ, ಅದ್ ದೇವಡ ಮಿಂಞತ್‍ಲ್ ಅಸಹ್ಯವಾಯಿತ್‌ಪ್ಪಾಂದ್ ಯೇಸು ಎಣ್ಣ್‌ಚಿ.

ರೋಮ್ 1:23

ಅಯಿಂಗ ನೇರಾನ, ಪಿಂಞ ಎಕ್ಕಾಲು ಬದ್‍ಕ್‍ವ ಮಹಿಮೇರ ದೇವನ ತುದಿಕತೆ, ಪಾಳಾಪ ಮನುಷ್ಯ, ಪ್ರಾಣಿ ಪಕ್ಷಿಯ ಪಿಂಞ ಜೀವಜಂತುಕಂಗಡ ರೂಪತ್‌ಲ್ ವಿಗ್ರಹತ್‍ನ ಪೂಜೆ ಮಾಡ್‌ವ.

ರೋಮ್ 2:29

ಹೃದಯತ್‍ಲ್ ಯೆಹೂದ್ಯನಾಯಿತ್ ಇಪ್ಪಯಿಂಗಳೇ ನೇರಾಯಿತುಳ್ಳ ಯೆಹೂದ್ಯಂಗ; ಒಳ್‍ತ್‍ರ ಪ್ರಕಾರ ಅಲ್ಲ, ಆತ್ಮತ್‍ರ ಪ್ರಕಾರ ಹೃದಯತ್‍ಲ್ ಆಪ ಸುನ್ನತಿಯೇ ನೇರಾನ ಸುನ್ನತಿ; ಇನ್ನನೆ ಉಳ್ಳಯಿಂಗಕ್ ಕ್‍ಟ್ಟುವ ಗನ, ಮನುಷ್ಯಡಿಂಜ ಅಲ್ಲ, ಆಚೇಂಗಿ ದೇವಡಯಿಂಜ ಬಪ್ಪ.

ರೋಮ್ 6:6

ನಂಗ ಇಂಞು ಮಿಂಞಕ್ ಪಾಪಕ್ ಆಳಾಯಿತ್ ಬದ್‍ಕತೆ, ಪಾಪತ್‍ರ ತಡಿ ಪಾಳಾಯಿ ಪೋಪಕ್, ನಂಗಡ ಪಳೆಯ ಮನುಷ್ಯನ ಅಂವೊಂಡ ಕೂಡೆ ಶಿಲುಬೇಲ್ ಇಟ್ಟಿತಾಚೀಂದ್ ನಂಗಕ್ ಗೊತ್ತುಂಡ್.

ರೋಮ್ 7:22

ನಾಡ ಒಳ್‍ಲ್ ಉಳ್ಳ ಮುನುಷ್ಯನಗುಂಡ್ ದೇವಡ ನ್ಯಾಯಪ್ರಮಾಣತ್‍ಲ್ ನಾನ್ ಕುಶಿಪಟ್ಟಂಡುಳ್ಳ.

2 ಕೊರಿಂಥ 10:1

ನಿಂಗಡ ಪಕ್ಕ ಇಪ್ಪಕ ತಾಳ್ಮೆಲು, ನಿಂಗಡಿಂಜ ದೂರ ಇಪ್ಪಕ ನಿಂಗಡ ಮೇಲೆ ಕಂಡಿತವಾಯಿತ್ ಉಳ್ಳನೆಕೆ ಕಾಂಬ ಪೌಲನಾನ ನಾನ್, ಕ್ರಿಸ್ತಂಡ ಶಾಂತ ಗುಣತ್‍ರ ಪಿಂಞ ದಯೇರ ಮೂಲಕ ನಿಂಗಕ್ ಬೋಡಿಯಂಡುಳ್ಳ.

2 ಕೊರಿಂಥ 4:16

ಆನಗುಂಡ್ ನಂಗ ತಳ್ಂದ್ ಪೋಪುಲೆ. ನಂಗಡ ಪೊರಮೆ ಉಳ್ಳ ಮನುಷ್ಯ ಪಾಳಾಯಿ ಪೋಯಂಡಿಂಜತೇಂಗಿಯು, ನಂಗಡ ಒಳ್‍ಲ್ ಉಳ್ಳ ಮನುಷ್ಯ ಓರೋರ್ ದಿನವು ಪುದಿಯದಾಯಂಡುಂಡ್.

ಗಲಾತ್ಯ 5:23

ತಾಳ್ಮೆ ಪಿಂಞ ತನ್ನಡಕವೇ. ಇದ್ಂಗ್ ವಿರೋದವಾಯಿತ್ ಏದ್ ಪ್ರಮಾಣವು ಇಲ್ಲೆ.

ಎಫೆಸ 4:2

ಎಲ್ಲಾ ತಾಳ್ಮೆಲ್, ಶಾಂತಿಲ್, ಪೊರುಮೇಲ್, ಪ್ರೀತಿನಗುಂಡ್ ಒಬ್ಬನ ಒಬ್ಬ ಸಹಿಸಿಯಂಡ್ ಇರಿ.

ಕೊಲೊಸ್ಸೆ 3:12

ಆನಗುಂಡ್ ನಿಂಗ, ದೇವ ಗೊತ್ತ್ ಮಾಡ್‍ನ ಅಂವೊಂಡ ಮಕ್ಕಳಾಯಿತ್ ಪಿಂಞ ಅಂವೊ ಪ್ರೀತಿ ಮಾಡ್‌ವಯಿಂಗಳಾಯಿತ್ ಉಳ್ಳಾಂಗ್, ನಿಂಗ ಕರುಣೆ, ದಯೆ, ತಾಳ್ಮೆ, ಶಾಂತ ಗುಣ ಪಿಂಞ ಪೊರುಮೆ ಎಣ್ಣುವ ಗುಣತ್‍ನೆಲ್ಲ ನಿಂಗ ಇಟ್ಟೊಳಿ.

ಕೊಲೊಸ್ಸೆ 3:3

ಎನ್ನಂಗೆಣ್ಣ್‌ಚೇಂಗಿ, ನಿಂಗ ಈ ಬದ್‍ಕ್‍ಕ್ ಚತ್ತ್ ಪೋಯಿತುಳ್ಳಿರ, ನಿಂಗಡ ನೇರಾನ ಜೀವ ಕ್ರಿಸ್ತಂಡ ಕೂಡೆ ದೇವಡಲ್ಲಿ ಒಳ್‌ಪ್‌ಚಿಟ್ಟಿತ್ ಉಂಡ್.

1 ಥೆಸಲೊನೀಕ 4:11

ಇದ್ ನಿಂಗಡ ನೋಕವಾಯಿತ್ ಇರಂಡು. ನಿಂಗ ಸಮಾದಾನತ್‍ರ ಬದ್‍ಕ್ ಬದ್‍ಕ್‍ವಕ್, ಪೊರಮೆ ಉಳ್ಳಯಿಂಗಡ ಬದ್‍ಕ್‍ರ ವಿಷಯತ್ ನುಗ್ಗ್‌ವಕ್ಕಾಗ. ನಿಂಗ ನಿಂಗಡ ಸ್ವಂತ ಕೆಲಸ ಮಾಡಂಡೂಂದ್ ನಿಂಗಕ್ ನಂಗ ಮಿಂಞಲೇ ಎಣ್ಣಿತುಂಡ್.

2 ಥೆಸಲೊನೀಕ 3:12

ಇನ್ನನೆ ಉಳ್ಳಯಿಂಗ, ಎಂತಾಚು ಕೆಲಸ ಮಾಡಿತ್, ಅಯಿಂಗಡ ಸಂಪಾದೆನೆಲ್ ಬದ್‍ಕಂಡೂಂದ್ ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಪೆದತ್‍ಲ್ ಹುಕುಮ್ ಕೊಡ್‌ತಿತ್ ಬೋಡಿಯಂಡುಂಡ್.

1 ತಿಮೊಥೆಯ 2:2

ನಂಗೆಲ್ಲಾ ಬಕ್ತಿಲ್, ಮರ್ಯಾದೆಲ್, ಏದ್ ತೊಂದರೆ ಇಲ್ಲತೆ, ಸುಕ ಸಮಾದಾನತ್‍ಲ್ ಬದ್‍ಕ್‍ವಕಾಯಿತ್ ನಂಗಡ ರಾಜಂಗಕು ಅದಿಕಾರಿಯಂಗಕು ಪ್ರಾರ್ಥನೆ ಮಾಡಂಡು.

2 ತಿಮೊಥೆಯ 2:25

ನೀಡ ಬೋದನೆಕ್ ಎದ್‍ರ್ ನಿಪ್ಪಯಿಂಗಕ್ ಸಮಾದಾನತ್‍ಲ್ ಅಯಿಂಗಡ ತಪ್ಪ್‌ನ ಎಣ್ಣಿ ಕೊಡ್‍ಪಂವೊನಾಯಿತಿರಂಡು. ಎನ್ನಂಗೆಣ್ಣ್‌ಚೇಂಗಿ ಒರ್ ಸಮಯ ಅಯಿಂಗ ಪಶ್ಚಾತಾಪ ಪಟ್ಟಿತ್, ಸತ್ಯತ್‍ನ ಅರಿಂಜಂಡ್ ಪುನಃ ದೇವಡ ಪಕ್ಕ ಬಪ್ಪಕ್ ದೇವ ಒರ್ ಸನ್ನಿವೇಶ ಕೊಡ್‍ಪ.

ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 3:2

ಅಯಿಂಗ ದಾರ್‌ನು ಕೆಟ್ಟಯಿಂಗಾಂದ್ ಎಣ್ಣತೆ, ದಾಡ ಕೂಡೆಯು ಜಗಳ ಮಾಡತೆ, ಎಕ್ಕಾಲು ಬೋರೆಯಿಂಗಡ ವಿಷಯತ್‍ನ ಬಲ್ಯದಾಯಿತ್ ನೋಟ್‌ವಯಿಂಗಳಾತು, ನೇರಾನ ತಾಳ್ಮೆನ ಎಲ್ಲಾ ಜನಕ್ ಕಾಟಂಡೂಂದ್ ಗೇನ ಮಾಡ್‍ಚಿಡ್.

ಯಾಕೋಬ 1:21

ಆನಗುಂಡ್ ಎಲ್ಲಾ ಹೇಸಿಗೆಯಾನ ಗುಣ ಪಿಂಞ ಪಾಳ್ ಗುಣತ್‍ನ ಬುಟ್ಟ್‌ರಿ. ನಿಂಗಡ ಮನಸ್ಸ್‌ಲ್ ನಟ್ಟಿತುಳ್ಳ ಪಿಂಞ ನಿಂಗಡ ಆತ್ಮತ್‌ನ ಕಾಪಾಡ್‌ವಕ್ ಶಕ್ತಿಯುಳ್ಳ ದೇವಡ ವಾಕ್ಯತ್‍ನ, ಸಮಾದಾನತ್‍ಲ್ ಸ್ವೀಕಾರ ಮಾಡಿಯೊಳಿ.

1 ಪೇತ್ರ 1:23

ಪಾಳಾಯಿ ಪೋಪ ಕುರುರ ಮೂಲಕ ಅಲ್ಲ, ಎಕ್ಕಾಲು ಬದ್‍ಕಿಯಂಡಿಪ್ಪ, ಜೀವವಾಯಿತ್ ಉಳ್ಳ ಪಾಳಾಯಿ ಪೋಕತ ಕುರುವಾನ ದೇವಡ ವಾಕ್ಯತ್‍ರ ಮೂಲಕ ನಿಂಗ ಪುನಃ ಪುಟ್ಟಿತುಳ್ಳಿರ.

1 ಪೇತ್ರ 3:15

ಆಚೇಂಗಿ, ಕ್ರಿಸ್ತಂಗ್ ನಿಂಗಡ ಹೃದಯತ್‍ಲ್ ಮರ್ಯಾದೆ ಕೊಡ್‍ಕಂಡು, ಅಂವೊನ ಒಡೆಯನಾಯಿತ್ ಗನಪಡ್‌ತಂಡು. ನಿಂಗಡ ನಿರಿಕ್ಷೇರ ವಿಷಯತ್ ದಾರಾಚೇಂಗಿ ಪ್ರಶ್ನೆ ಇಟ್ಟತೇಂಗಿ, ಅಯಿಂಗ ಎಲ್ಲಾರ್‌ಕು ಉತ್ತರ ಕೊಡ್‍ಪನೆಕೆ, ತಾಯಾರಾಯಿತ್ ಇರಿ. ಆಚೇಂಗಿ ಅದ್‍ನ ಮರ್ಯಾದೆಲ್ ಶಾಂತತ್‍ಲ್ ಮಾಡಂಡು.