तीतस 3:7 - जिरेल

⁷ दोक खाईन थेकी ङुरूङला दया खाईन दोषी मेन सिन साबा ओतेकी ङुरूङगी आश खाईन गुकीन देताते थेकी तेरग्‍यो साबाते नोमुङ मिसिन्‍च्‍येते जुनी ङेत्‍च्‍या ओङा ओत।

तीतस 3:7 Iomraidhean Croise

मत्ती 25:34

थेमे थे खोरोङ सामे छ्य्‌वापा ज्‍याक्‍पाते मिओनला थेकी ‘ङे आबेकी ख्‍योकोनला आशी बिन्‍दा ओत। दि साताङ नाम जोजीनमेईराङ थेकी ख्‍योकोनला थे खोरोङ राज्‍यदु देत ज्‍युत्‍क्‍यो सिन साबा ओतान। लो स्‍योक, थाचेन थे राज्‍यदु स्‍यूला देत।

मर्कूस 10:17

थेमे येशू थेरूई ख्‍याम्‍बा खाबा ओते बेलाला मिज्‍यीगी छ्य्‌वाकीन वाकीन थे काम्‍बाला से खिन “गुरू, खो लेमु मि ईन सिन ङाला छ्या ओत। थोगी नोमुङ मिसिन्‍च्‍येते जुनी ङेताला ङे च्‍यि खिता फाप्‍कीते, लाप्‍ला नाङना,” सिन सिदुक।

रोमी 11:6

थेबाला थेकी खोपरोङगी खाबाते धर्म कर्मे काम ताकीन छाने खाबाते मेन। थे खोरोङ दयेकी खित्‍सादुकामा थेकी थेबाला दोक खाबाते ईन। मिकी खाबाते धर्म कर्मे काम ताकीन छाने खाबाते ईन्‍सीन थेकी थे खोरोङ दयेकी खित्‍सादुकामा मिओनला छाने खित्‍च्‍येते ईन सिन सिरा थुप्‍च्‍या मेतान।

रोमी 3:24

ज्‍येन छ्याःङ मेन्‍देकी थे खोरोङ दयेकीकामा परमेश्‍वरगी मिओनला दोषी मेन सिओ। येशू ख्रीष्‍टकी खाबाते कामगी खित्‍सादु थेकी मिओनला पापदुकी टाल्‍ला दोक खाला दोषी मेन सिओ।

रोमी 3:28

परमेश्‍वर नियम ङेन्‍ला मि सुङलाङ परमेश्‍वरगी दोषी मेन मिसिरो। येशू ख्रीष्‍टकी खाबाते कामगी खित्‍सादु खोपरोङला दोषी मेन सिओ सिन थेला विश्‍वास खित्‍कान्‍ते मिओनलाकामा थेकी दोषी मेन सिओ। दि बात ङुरूङगी लेमु खाईन छ्या स्‍येबा ओत।

रोमी 4:16

थोगी बात चुक ईन्‍दे सासीन अब्राहामगी परमेश्‍वरला विश्‍वास खाबेकीकामा थेकी थेत्ताङ जमान खाबाते ईन। परमेश्‍वरगीनी थे खोरोङ दयेकीकामा दोक खाला जमान खित्‍च्‍येते ईन। थोगी थेकी थोक खाईन अब्राहामताङ खाबाते जमान थे लाईदुकामा मेन्‍देकी थे सन्‍तानओन लाईदुङ ईन। अब्राहाम सन्‍तान साबातेचेन परमेश्‍वर नियम ङेताते यहूदीओनकामा मेन, अब्राहामगी च्‍योकराङ खाला परमेश्‍वरला विश्‍वास खित्‍कान्‍ते मि गाङेराङ ईन। परमेश्‍वरला विश्‍वास खित्‍कान्‍ते ङुरूङ गाङेते ज्‍युज्‍युचेन अब्राहामराङ ईन।

रोमी 4:4

जागिर साकान्‍ते मि बातराङ खिइना। काम खानामेई थेकी ङेत्‍च्‍येते तलब सुइँदेकी थेला दया खाईन थाराङ बिन्‍दाते ईन सिन मिसिरो। काम खानामेई तलबनी थेकी ङेत्‍च्‍येतेराङ ईन।

रोमी 8:17

थे फुज्‍युङ फुमु ओङनामेई थे खोरोङ फुज्‍युङ फुमुला तेरग्‍यो साबाते जेसुकै परमेश्‍वरगी ङुरूङला तेरग्‍यो। थोक खाला येशू ख्रीष्‍टकी ङेत्‍च्‍येते ङुरूङगीङ ङेत्‍क्‍यो। ईन्‍दालाचेन येशू ख्रीष्‍टकी खाबा च्‍योकराङ ङुरूङगीङ थरिङोला दुक्‍पा भोगे खिता फाप्‍क्‍यो। थेमे थेला छ्येज्‍यीक मान बिन्‍दा च्‍योकराङ परमेश्‍वरगी ङुरूङलाङ मान बिन्‍ला थे खोरोङगी ज्‍वा चाला च्‍योकराङ लेमु जोइओ।

१ कोरिन्‍थी 6:11

ख्‍योकोनोङ कोई कोई गोमाबा होथोक्‍ते मिराङ ओतान। तर प्रभु येशू ख्रीष्‍टताङ परमेश्‍वर आत्‍मेकी ख्‍योकोनला ठु खाईन चोके खाबाच्‍योक खाईन पापदुकी टाल्‍गीन बिन्‍दा ओत, ख्‍योकोन सेम खुदुक जोबा ओत थेमे परमेश्‍वर दोन्‍दु दोषी मेन साबा ओत।

गलाती 2:16

यहूदी ईन्‍सीनोङ परमेश्‍वर नियमला खि साबाते ङेन्‍ला सुङलाङ परमेश्‍वरगी दोषी मेन सिरच्‍येते मेन, खालि येशू ख्रीष्‍टला विश्‍वास खित्‍कान्‍ते मिओनलाकामा थेकी दोषी मेन सिओ सिन ङुरूङगी लेमु खाईन छ्या स्‍येबा ओत। थोगी ङुरूङोङ परमेश्‍वर नियम ङेन्‍नामेई थेकी दाक्‍पोनला दोषी मेन सिओ सिन मिसिरो। बरू येशू ख्रीष्‍टकी खाबाते कामगी खित्‍सादुका थेकी ङुरूङला दोषी मेन सिओ सिन ङुरूङगी येशू ख्रीष्‍टला विश्‍वास खाबाते ईन। च्‍यिला सासीन परमेश्‍वर नियमला खि साबाते ङेन्‍लानी सुङ परमेश्‍वर दोन्‍दु गल्‍ती मिक्‍किकान्‍ते मि ओङाराङ मुथुबो।

गलाती 3:29

दोस्‍यिककामा मेन, ख्‍योकोन ख्रीष्‍टताङ जीउज्‍यीकराङ ओङा ओतेकी ख्‍योकोनोङ अब्राहाम सन्‍तानराङ ओङगीन परमेश्‍वरगी थेत्ताङ थे सन्‍तानला तेरग्‍यो साबाते आशी ख्‍योकोनगीङ ङेत्‍क्‍यो।

गलाती 4:7

दोक ओङनामेकी गोमा सुइँदे खाम्‍बादु काम खित्‍कान्‍ते दाक्‍पोनते छ्याःङ हक मेताते मि छेतराङ ईन्‍दाते ख्‍योकोन गाङेराङ थाचेन परमेश्‍वर फुज्‍युङ फुमु ओङा ओत। थेमे परमेश्‍वरगी थे खोरोङ फुज्‍युङ फुमुला तेरच्‍येतेबरी ख्‍योकोनगी ङेत्‍च्‍या ओङा ओत।

२ थिस्‍सलोनिकी 2:16

ङुरूङ आबा परमेश्‍वरगी ङुरूङला ङिङज्‍ये खाईन थे खोरोङ दयेकी जहिलेङ आँट तेरगीन देत्‍ला तिरी तेरग्‍यो सिन साबातेबा गाङे पक्‍काराङ ङेत्‍क्‍यो सिन आश खाला देत ज्‍युत्‍क्‍यो। दोक खित्‍कान्‍ते परमेश्‍वरताङ ङुरूङ प्रभु येशू ख्रीष्‍ट थे खोरोङगीराङ ख्‍योकोनला आँट बिन्‍ला ख्‍योकोनगी खिन ओताते लेमुते कामताङ बात गाङे खिनराङ देत ज्‍युत्‍स्‍यीत सिन ङ्योकोन प्रार्थना खिओ।

तीतस 1:2

ङे थेबे नाङ दि काम खित्‍जीन थेबेकी नोमुङ मिसिन्‍च्‍येते जुनी ङेत्‍क्‍यो सिरच्‍येते बात पक्‍काराङ ईन सिन आश खाला गुला देता थुप्‍क्‍यो। दोक खाला मिओनला नोमुङ मिसिन्‍च्‍येते जुनी तेरग्‍यो सिन परमेश्‍वरगी थाङबो जुगलाराङ साबा ओतान। थेकी नोमुङ ढाँर मिक्‍किओ।

तीतस 2:11

येशू ख्रीष्‍ट मिओनगी होदोक दोक खिता फाप्‍क्‍यो। च्‍यिला सासीन परमेश्‍वरगी मि गाङेला पापकी सजायदुकी डेलाला दया खाईन येशू ख्रीष्‍टला देमा ताङा ओत।

तीतस 2:13

थेमे ङुरूङला पापदुकी डेल्‍कान्‍ते छ्येज्‍यीक शक्ति ओताते परमेश्‍वर येशू ख्रीष्‍ट था तिरी स्‍वर्गनेकी मिगी तापराङ मुथुप्‍च्‍या झिलिमिली नाम्‍दाकला देत्‍ला देमा ग्‍युरला ओङगो सिन ङुरूङ आश खाला गुला देत्‍क्‍यो। दिराङ ङुरूङ लाईदु आउदी गा लाङच्‍येते बात ईन।

हिब्रू 1:14

परमेश्‍वर दूतओननी गाङेराङ परमेश्‍वरगी कोता कोता खित्‍कान्‍तेबाकामा ईन। थेबा दोकस्‍यिकराङ दुक सिन मिगी थोङा मुथुबो। परमेश्‍वरगी थेबाला थे खोरोङगी पूरो खाला पापदुकी टाल्‍ला स्‍वर्गने देत ज्‍युत्‍च्‍येते मिओनला मद्धत तेराला गाङेपा ताङा ओत।

हिब्रू 11:7

नूहे बात विचार खि। छ्यार्बा ग्‍याप्‍ला भल ग्‍याक्‍यो सिरच्‍येते बात थे बेलासाक थेला छ्याःङ छ्या मेत्‍सीनोङ परमेश्‍वरगी साबाच्‍योक पक्‍काराङ खिओ सिन थेला विश्‍वास खाईन थेकी परमेश्‍वरगी कोताते ङेन्‍सुङ। थे खोरोङ थेमे थे खाम्‍बे मि सुङ भलगी नुप्‍ला स्‍या माफाप्‍स्‍यीत सिन थेकी पानीजहाजज्‍यीक जोसुङ। दोक खाईन परमेश्‍वरगी साबाते ङेन्‍गीन थेकी दि सा लुङबे मि ज्‍येनचेन दोषी ईन सिन तेन्‍गीन बिन्‍सुङ। थेमे थे खोरोङला विश्‍वास खाबेकी खित्‍सादु परमेश्‍वरगी थेला दोषी मेन सिन सासुङ।

हिब्रू 11:9

परमेश्‍वरगी तेरग्‍यो साबाते लुङबादु लेप्‍नामेकीङ अब्राहामचेन थे लुङबे मि च्‍योक खाईन मेन्‍देकी पालकामा टाँए खाईन देत्‍सुङ। थोक ईन्‍सीनोङ ङीमाई थे लुङबा परमेश्‍वरगी दाक थे खोरोङला तेरग्‍यो सिन थेकी थेला विश्‍वास खिनराङ देत्‍सुङ। थे फुज्‍युङ इसहाकताङ नातिते याकूबोङ थोकराङ खाईन पालकामा टाँए खाईन देत्‍सुङ। थेबा ङिबोलाङ परमेश्‍वरगी अब्राहामला च्‍योकराङ खाईन थे लुङबा तेरग्‍यो सिन साबा ओतान।

हिब्रू 6:17

थे खोरोङगी जमान खाबाच्‍योक पक्‍काराङ खिओ थेमे थे बात बान्‍दा खुदुक मोजोओ सिन सिराला परमेश्‍वरगीङ ना क्‍याला ओतान।

याकूब 2:5

ङिङज्‍येते आज्‍यो न्‍वावे, दि बात लेमु खाला ङेन। येशू ख्रीष्‍टला विश्‍वास खित्‍कान्‍ते मि ओङला थे खोरोङ राज्‍यदु देताला च्‍यि परमेश्‍वरगी ज्‍येनगी छ्याःङज्‍यीक खाङज्‍यीक मेताते मि ईन सिरच्‍येते मिओनलाराङ छाने खाबाते मेनरो? था थेबा परमेश्‍वरगी थे खोरोङला ङिङज्‍ये खित्‍कान्‍ते मिओनला तेरग्‍यो साबाते राज्‍यदु देता ङेत्‍क्‍यो।

१ पत्रुस 3:7

थेमे ख्‍योओ मिवे, फेम्‍मे मि खेराङ छेत ङार्मा मेङगो सिरच्‍येते बात टोक मेज्‍येता खाला ख्‍योकोनगी दाक्‍पोन फेम्‍मेला लेमु खि। परमेश्‍वरगी थेबालाङ ख्‍योकोनला च्‍योकराङ खाला दया खाला नोमुङ मिसिन्‍च्‍येते जुनी तेरग्‍यो सिरच्‍येते बादोङ टोक माज्‍येत। ख्‍योकोन खेराङ खेराङगी चुक खिता फाप्‍च्‍या ईन्‍दाका थोकराङ खासीन परमेश्‍वरगी ख्‍योकोनगी खाबाते प्रार्थना ङेन्‍ग्‍यो।