रोमी 8:15 - जिरेल

¹⁵ योक्‍पो योङमुकी मालिकतेकी दुङगीता सिन ज्‍यीबा खुराच्‍योक खाला था लोक्‍ला ख्‍योकोनगीचेन परमेश्‍वरगी सजाय तेरगीता सिन थेत्ताङ छ्याःङ ज्‍यीबा खिता माफाबो। च्‍यिला सासीन परमेश्‍वरगी थे खोरोङ आत्‍मा बिन्‍गीन ख्‍योकोनला थे खोरोङ धर्म-पुत्र जोबा ओत। थेमे परमेश्‍वर आत्‍मे छ्य्‌वापेकीराङ परमेश्‍वरला ङुरूङ दाक आबा सिन सिओ।

रोमी 8:15 Iomraidhean Croise

मत्ती 25:25

थोगी ङाला ज्‍यीबा लाबेकी ङे हजूर खुईते पैसा से नाङ दिकीन ज्‍याक्‍पाप। लो या, था हजूर खोरोङते पैसा लोङ,’ सिन सादुक्‍लो।

मर्कूस 14:36

थेकी “आबा, खुई खिता मुथुप्‍च्‍येते काम छ्याःङ मेत। थुप थुपला दि ओङा खाबाते दुक्‍पा ङे भोगे खिता माफाप्‍सीन ओङच्‍या ओतान। ईन्‍सीनोङ ङे थोक माक्‍याबाला मेङगो सासीन ङे साबाच्‍योक मेन्‍दाला आबा खुई साबा च्‍योकराङ ओङस्‍यीत,” सिन प्रार्थना खासुङ।

लूका 11:2

थेमे थेकी “ख्‍योकोनगी परमेश्‍वरला प्रार्थना खित्‍जीन दोक सि। चुक सासीन ‘आबा परमेश्‍वर, मि गाङेकी खोल्‍ला मान खित्‍स्‍यीत। सा लुङबा खाङ पूरो खाला खुई राज्‍य ओङस्‍यीत।

लूका 22:42

थेमे खोबुकला देत्‍कीन “आबा, खुई ओङगो सासीन ङे दि दुक्‍पा भोगे खिता माफाप्‍सीन ओङच्‍या ओतान। ईन्‍सीनोङ ङे थोक माक्‍याबाला मेङगो सासीन ङे साबाच्‍योक मेन्‍दाला आबा खुई साबा च्‍योकराङ ओङस्‍यीत,” सिन प्रार्थना खासुङ।

लूका 8:28

येशूला ठेत्‍नामेकी थे मिकी गुर्बु खाला से खिन ल्‍हन्‍डीक खानापेई कस्‍स्‍ये खाला छेरा खिनकामा “ए येशू, खो गाङे भन्‍दा छ्येते परमेश्‍वर फुज्‍युङ ईन सिन ङाला छ्या ओत। खो ङाला दुक्‍पा तेराला दुरू च्‍यिला वाबे? ङाला दुक्‍पा मातेर ओर्च्‍ये,” सिन सिदुक।

लूका 8:37

दि गाङे बात थोनामेईनी थे मिओन झन ज्‍यीबेकी थरावरी गाल्‍सुङ। थेमे थे गिरासिनीबा गाङेकी वाकीन येशूला “हजूर खो ओर्च्‍ये दुरू मादेत, दुरूकी ग्‍युक,” सिन सासुङ। थेमे येशू डुङ्गाला जेकीन थेरूकी ड्वाप्‍ला ठीक खासुङ।

यूहन्‍ना 16:8

थेमे थेकी वाला दि सा लुङबे मिओनला थेबेकी पाप खाबेकी खित्‍सादु थेबा दोषीराङ ईन सिरच्‍येते, परमेश्‍वरगी चुक्‍ते मिला दोषी मेन सिते सिरच्‍येते थेमे ङीमाई परमेश्‍वरगी गाङेते न्‍याय खिओ सिरच्‍येते बात छ्या स्‍ये ज्‍युत्‍क्‍यो।

यूहन्‍ना 20:17

थेमे थेकी थेला “ङाला मादो। च्‍यिला सासीन ङा थोरूमोङ आबा ओत्‍साने गाला मेत। खो था दुरूकी गाल्‍ला ङे न्‍वाओनला ‘ङा था आबा ओत्‍साने डुइन ओत। थेचेन ख्‍योकोनतेङ आबा ईन। थे ङेते परमेश्‍वर ईन, थोकराङ खाला ख्‍योकोनतेङ परमेश्‍वर ईन,’ साला बिन,” सिन सिदुक।

शक्ति काम 16:29

थेकी थोक सिरजीन थे हाकिमगी बत्ती खोरच्‍योक साकीन ज्‍यीबेकी दारगीनकामा पावलताङ सिलास ओत्‍सादु छ्य्‌वाकीन गाल्‍गीन थेबे काम्‍बा तेगीन से खासुङ।

शक्ति काम 2:37

थेरू जम्‍मा ओङाते मिओनगी पत्रुसकी खाबाते दि बात थोकीन खोपरोङगी चुक छ्येज्‍यीक गल्‍ती खाबा ओता ईन्‍दाका सिन छ्या स्‍येकीन पत्रुस थेमे येशू ख्रीष्‍टकी खटे खाबाते ज्‍येनतेबा गाङेला “आज्‍यो न्‍वावे, थोक ईन्‍सीन था ङ्योकोनगी च्‍यि खिसे ओना?” सिन ठिसुङ।

रोमी 8:16

थेमे दाक्‍पोन परमेश्‍वर फुज्‍युङ फुमु ओङगीन सिन्‍दा ओत सिन ङुरूङला छ्या ओत। दि बात पक्‍काराङ ईन सिन ङुरूङला परमेश्‍वर आत्‍मेकीङ साबा ओत।

रोमी 8:23

ईन्‍दाका ङुरूङोङ थोरूमसाक दुक्‍पालाराङ देता फापा ओतेकी ङुरूङ सेमलाङ ढुक्‍क मेत। परमेश्‍वरगी ङुरूङला थे खोरोङ आत्‍मा बिन्‍दा ओतेकी थेकी खिओ साबाते ज्‍येनोङ था गाङे साबा च्‍योकराङ खिओ। परमेश्‍वर आत्‍मा ङेता ओत्‍सीनोङ परमेश्‍वरगी ङुरूङला स्‍या फाप्‍सादुकी टाल्‍ला दि जीउ खुदुक जोला थे खोरोङ धर्म-पुत्र सिन थे खोरोङताङ ज्‍य्‌वाच्‍येते दिन नामराङ लेबोङा सिन ङुरूङ गुकीन देता ओत।

रोमी 8:26

लोक्‍ला ङुरूङ दाक्‍पोन स्‍येतकी थोक खिता मुथुप्‍च्‍येते ईन्‍देकी परमेश्‍वर आत्‍मेकी ङुरूङला मद्धत तेरग्‍यो। थेमे परमेश्‍वरताङ चुक खाला प्रार्थना खिता फाप्‍कीते सिन छ्या मेतेकी परमेश्‍वर आत्‍मा थे खोरोङगीराङ मिकी साला सिराराङ मुथुप्‍च्‍येते बात खाला ङुरूङ लाईदु परमेश्‍वरताङ प्रार्थना खाला तेरग्‍यो।

रोमी 9:4

थेबानी परमेश्‍वरगी थे खोरोङ मि सिन साबाते इस्राएलीओनराङ ईन। थेबाचेन परमेश्‍वरगी थे खोरोङ धर्म-पुत्र जोबाते मि ईन। थेबेकी परमेश्‍वरला मिगी ताराङ मुथुप्‍च्‍या झिलिमिली नाम्‍दाकला देता ओता थोङा ओतान। थे खोरोङगी च्‍यि च्‍यि खिते सिन परमेश्‍वरगी थेबाताङ पालोताङ पालो जमान खाबा ओतान। थेमे थेबेकी चुक चुक खिता फाप्‍कीते सिन नियमओनोङ बिन्‍दा ओतान। थे खोरोङला चुक खाला माने खिता फाप्‍कीते सिन लाप्‍कीन बिन्‍गीन थेकी थेबाला आशी बिन्‍ला लेमु खिओ सिनोङ याङ याङराङ साबा ओतान।

१ कोरिन्‍थी 2:12

ङुरूङगी ङेताते परमेश्‍वर आत्‍माताङ दि सा लुङबे मिओनगी खित्‍च्‍येते बुद्धि बात दोक्‍पोईराङ मेन। परमेश्‍वर आत्‍मे छ्य्‌वापेईराङ ङुरूङगी परमेश्‍वरगी ङुरूङला च्‍यि बिन्‍दा ओते, चुक खाबा ओते सिन छ्या स्‍येक्‍यो।

२ कोरिन्‍थी 11:4

च्‍यिला सासीन सुइँदेकी वाकीन ङ्योकोनगी लापाते च्‍योक्‍ते मेन्‍देकी ज्‍येनज्‍यीकराङ येशू बात लाप्‍सीनोङ ख्‍योकोनगी थे आउदी लेमु खाला ङेन्‍च्‍याक्‍वा। थेमे थेबेकी खेराङला ङेता फाप्‍क्‍यो साबाते आत्‍मा ख्‍योकोन ङेता छोल्‍च्‍याक्‍वा। थे आत्‍माचेन ख्‍योकोनगी ङेता ओताते परमेश्‍वर आत्‍मा मेन। थोकराङ खाला ङ्योकोनगी ख्‍योकोनला लाप्‍कीन बिन्‍दा ओताते च्‍योक्‍ते मेन्‍देकी खुदुकज्‍यीकराङ गा लाङच्‍येते बात लाप्‍सीन ख्‍योकोनगी होथोक्‍ते बातराङ ङेन्‍च्‍याक्‍वा।

गलाती 2:4

ईन्‍दाका येशू ख्रीष्‍टला विश्‍वास खित्‍कान्‍ते ईन सिरकान तर थोक मेन्‍दाते कोई कोई मि ङ्योकोन बात खित्‍सादु माबा ईन्‍सीन थे खतकी चिनु जोच्‍येते बादोङ थेन्‍च्‍याराङ मेतान। येशू ख्रीष्‍टताङ जीउज्‍यीकराङ ओङगीन ङ्योकोनगी परमेश्‍वरगी ङेराङ यहूदीओनला बिन्‍दाते होथे नियम ङेन्‍दा ताङा ओताते बात छ्या स्‍येबा ओत्‍कीन ङ्योकोनगी चुक चुक खित्‍च्‍या ईन्‍दाका सिन चिवा खिताला होथेबाचेन सुङगीङ स्‍योक मासाबाला थाराङ थेरू वाबा ओतान। थेरू खइँदा बात जिन्‍दा थुप्‍सीन लोक्‍ला ङ्योकोनला होथे नियमतेबा गाङे ङेन्‍दाराङ फाप्‍क्‍यो सिराला थेबा थोक खाईन थेरू वाबा ओतान।

गलाती 5:1

ख्रीष्‍टकी खाबाते कामगी खित्‍सादु ङुरूङगी परमेश्‍वर नियम अधीनला देता माफाबो। ङुरूङगी गोमाबा खिन ओताच्‍योक नोमुङ खिता माफाबो। बात थोक ईन्‍देकी था ख्‍योकोनगी खुरा मुथुप्‍च्‍येते खुर्बु खुरा छोलाच्‍योक खाला परमेश्‍वरगी यहूदीओनला बिन्‍दाते नियम ङेन्‍ला थेरू खि साबा साबा खिता माछोल।

एफिसी 1:5

थेजीनराङ थेकी येशू ख्रीष्‍टकी खित्‍च्‍येते कामगी खित्‍सादु ङुरूङला थे खोरोङ धर्म-पुत्र जोइओ सिन साबा ओतान। थे खोरोङगी थोक खिता सेम खाबेकीराङ परमेश्‍वरगी दोक दोक खाबा ओतान।

२ तिमोथी 1:7

च्‍यिला सासीन परमेश्‍वरगी ङुरूङला थे खोरोङ आत्‍मा बिन्‍दाते ज्‍यीबा खित्‍स्‍यीत सिन मेन बरू थे आत्‍मे छ्य्‌वापेकी शक्ति ङेत्‍स्‍यीत, ज्‍येनला ङिङज्‍ये खिता थुप्‍स्‍यीत थेमे दाक्‍पोन सेम काबूला ज्‍य्‌वाबा थुप्‍स्‍यीत सिन ईन।

हिब्रू 2:15

था ङीमाई दाक स्‍यिइओ सिन मिओनगी जुनी खाङ कालगी ज्‍यीबा खुरगीन देता फापा ओतान। येशूकी थोक खाईन शैतानला ग्‍याला ओतेकी था मिओनगी कालताङ ज्‍यीबा खिता माफाबो।

याकूब 2:19

परमेश्‍वर दोक्‍पोईकामा ओत सिन खुई साबाते बात पक्‍काराङ ईन। परमेश्‍वर दोक्‍पोईकामा ओत सिरच्‍येते बातनी ल्‍हन्‍डीक स्‍यिन्‍डीपकीङ ईन सिन सिओ। थेमे परमेश्‍वर ज्‍यीबेकी थेबाङ थुरथुर दारग्‍यो।

१ यूहन्‍ना 4:18

ज्‍येनला ङिङज्‍ये खित्‍कानगी छ्याःङ ज्‍यीबा खिता माफाबो। खेकीकामा मेन्‍गीन पक्‍काराङ खाला ङिङज्‍ये खित्‍कान्‍ते मिकी ज्‍यीबा खिता फाप्‍च्‍येते बात छ्याङ मेत। ज्‍यीबा खित्‍च्‍येतेनी था तिरी ङे परमेश्‍वर सजाय ङेत्‍क्‍यो साबा च्‍योकराङ ईन। थोक खाला ज्‍यीबा खित्‍कान्‍ते मि जुनीदु थे खोरोङगी ङिङज्‍ये खाईन खिता चालाते काम परमेश्‍वरगी पूरो खिताराङ मुथुबो।