रोमी 7:9 - जिरेल

⁹ थे नियम छ्या मेत्‍जीन गोमा ङा ङाराङगी छ्याःङ पाप खाबा मेत सिन ढुक्‍क खाईन देता ओतान। तिरी परमेश्‍वर नियम छ्या स्‍येनामेई थेरू दोक माकेत, थोक माकेत साबा साबाराङ खिता सेम लाकीन थेरू माकेत साबातेराङ खाईन ङे दाक पाप खाबाप। थोक खानामेई ङा सजाय ङेत्‍कीन स्‍या फाप्‍च्‍या ओङा ओतान।

रोमी 7:9 Iomraidhean Croise

मत्ती 19:20

थोक सिरजीन थे आदो स्‍याराते मिकी “गुरू, दि नियमनी ङे गाङे ङेन्‍दा ओत। था थोरूम ज्‍येनतोक काम ङे च्‍यि खिता फाप्‍कीते?” सिन सासुङ।

लूका 15:29

थोक खाला लुजीनोङ माङेन्‍गीन आबातेला थेकी ‘ङा ओङराङ मेङगो। दुरू थातासाक ङेचेन खुई योक्‍पोकी च्‍योकराङ दुक्‍पा खाईन खाईन काम खाबा ओत। थेमे खुई खि साबाते काम ङे नोमुङ मिक्‍किओ सिन साबा मेत। थोक ईन्‍सीनोङ ङे लाईदु खुई च्‍यि खाबा ओते? सेत्‍ला र्‍वाओनताङ भोज लै खि सिन खुई ङाला रे रीउज्‍यीगोङ बिन्‍दा मेत।

लूका 18:21

थोक सिरजीन थेकी “गुरू, दि नियमओननी ङे ङा च्‍याक फिजा ओत्‍जीनमेईराङ गाङे ङेन्‍गीन ओत,” सिन सिदुक।

रोमी 10:5

थोगी परमेश्‍वर नियम ङेन्‍ला दाक्‍पोनला परमेश्‍वरगी दोषी मेन सिओ सिरकान्‍ते मि बात खिन मोशेकी चुक साबा ओते सासीन “परमेश्‍वर नियमला खि साबाते गाङे साबा साबाच्‍योक खित्‍कान्‍ते मिकीचेन नोमुङ मिसिन्‍च्‍येते जुनी ङेत्‍क्‍यो,” सिन साबा ओत।

रोमी 7:10

परमेश्‍वर नियमला खि साबा च्‍योकराङ खित्‍कान्‍ते मिओनगी नोमुङ मिसिन्‍च्‍येते जुनी ङेत्‍च्‍येते ईन्‍सीनोङ थेरू खि साबाच्‍योक खिता माथुपेकी ङानी थे नियमगी तोके खाबाते सजाय ङेत्‍ला स्‍या फाप्‍च्‍या ओङा ओतान।

रोमी 7:11

ङाराङ सेमला पाप ओतेकी खित्‍सादु परमेश्‍वर नियमला माकेत साबा साबा खासीन ओङगो सिन ङा छक्‍के खाईन ङे थेरू माकेत साबा साबाते कामराङ खाबाप। थोक खाईन पाप खानामेई ङा थे नियमगी तोके खाबाते पापकी सजाय भोगे खाला स्‍या फाप्‍च्‍या ओङाते ईन।

रोमी 7:4

आज्‍यो न्‍वावे, ख्‍योकोन बादोङ होदोकराङ ईन। च्‍यि सासीन ख्रीष्‍ट स्‍यिजीन ख्‍योकोनोङ थेत्ताङराङ स्‍याप्‍ते ईन्‍देकी परमेश्‍वर नियम लाईदु ख्‍योकोन स्‍याप्‍ते छेतराङ ओङसुङ। थोक ओङनामेईचेन ख्‍योकोन स्‍यिसादुकी सोम्‍बो लोक्‍पाते ख्रीष्‍टकीतेराङ ओङा ओत। दोक ओङा ओतेकी ङुरूङ परमेश्‍वरगी खि साबाते लेमु काम खिता थुप्‍च्‍या गाला ओत।

रोमी 7:6

तर थाचेन दोक खि, थोक माकेत, दोक माक्‍यासीन सजाय ङेत्‍ला स्‍यिइओ सिरच्‍येते परमेश्‍वर नियम लाईदु ङुरूङ स्‍याप छेतराङ ओङा ओतेकी था ङुरूङ थे नियम अधीनला मेत। परमेश्‍वरला माने खित्‍च्‍या सिन गोमाबा ङुरूङगी थे नियमला खि सिन टिबा च्‍योकराङ खिता चालाप। परमेश्‍वर आत्‍मा ङेता ओतेकी थानी ङुरूङगी परमेश्‍वरला चुक खाला माने खिता फाप्‍कीते होथोकराङ खाला माने खिता थुप्‍क्‍यो।

रोमी 7:8

परमेश्‍वर नियमला “लोभ माकेत,” साबाते बात छ्या स्‍येनामेई ङे सेमला पाप ओतेकी ङाला झन झन डारताङ लोभ लाङाला स्‍यूसुङ। दोक माकेत, थोक माकेत सिरच्‍येते थे नियम मेता ईन्‍सीनचेन पाप खित्‍च्‍या सिराते ओङच्‍या मेतान।

रोमी 8:7

दाक्‍पोन खुशीला ख्‍याम्‍कान्‍ते मिचेन परमेश्‍वर विरोध खित्‍कान्‍ते ईन। थोक्‍तेबेकी परमेश्‍वर नियम मेङेनो। थेबेकी थेरू खि साबाच्‍योक खिताराङ मुथुबो।

गलाती 2:19

परमेश्‍वर नियम मेङेन्‍कान्‍ते मि सजाय ङेत्‍ला स्‍यिइओ साबा ओतेकी थेरू तोके खाबाते सजाय ङेत्‍ला ङा स्‍या फाप्‍च्‍या ओङा ओतान। थोक खाईन ङा थे नियम लाईदु स्‍याप छेतराङ ओङा ओतान। थोगी थाचेन ङा परमेश्‍वरगी खि साबा साबाच्‍योक खिता थुप्‍क्‍यो।

गलाती 3:10

परमेश्‍वर नियम ङेन्‍सीन परमेश्‍वरगी खोपरोङला दोषी मेन सिओ सिन विचार खित्‍कान्‍ते मिलाचेन गाङेला थेकी सराप बिन्‍ला सजाय तेरग्‍यो। च्‍यिला सासीन परमेश्‍वर नियमला चुक साबा ओते सासीन “नियमला खि साबाते दोक्‍पोईओङ मोतोङा खाला गाङे साबा साबा च्‍योकराङ खिन मादेत्‍सीन थोक्‍ते मिला परमेश्‍वरगी सराप बिन्‍ला सजाय तेरग्‍यो,” सिन टिबा ओत।