रोमी 7:11 - जिरेल

¹¹ ङाराङ सेमला पाप ओतेकी खित्‍सादु परमेश्‍वर नियमला माकेत साबा साबा खासीन ओङगो सिन ङा छक्‍के खाईन ङे थेरू माकेत साबा साबाते कामराङ खाबाप। थोक खाईन पाप खानामेई ङा थे नियमगी तोके खाबाते पापकी सजाय भोगे खाला स्‍या फाप्‍च्‍या ओङाते ईन।

रोमी 7:11 Iomraidhean Croise

रोमी 3:20

च्‍यिला सासीन परमेश्‍वर नियमला खि साबाते ङेन्‍लानी सुङलाङ परमेश्‍वरगी दोषी मेन सिरराङ मिसिरो। परमेश्‍वर नियम तालाचेन खालि थे नियम माङेन्‍गीन दाक्‍पोनगी पाप खाबा ओताक्‍वा सिनकामा छ्या स्‍येक्‍यो।

रोमी 7:13

परमेश्‍वर नियम दोक लेमु ईन्‍गीन ईन्‍गीनोङ ङा थेरू तोके खाबाते सजाय भोगे खिन स्‍या फाप्‍च्‍या ओङाते थे नियमगी खित्‍सादु मेन। दोक माकेत, थोक माकेत सिरच्‍येते नियम लेमु ईन्‍सीनोङ ङे थेरू माकेत साबाते खाईन पाप खाबेकीका ङा थोक खाईन थे नियमला तोके खाबाते सजाय ङेत्‍ला स्‍या फाप्‍च्‍या ओङाते ईन। पापकी खित्‍सादु दोक ओङेकी दि पाप सिराते चुक मेलेबा ईन्‍दे थेमे दिकी खित्‍सादु मिला चुक मेलेबा ओङच्‍या ईन्‍दाका सिन ङुरूङगी लेमु खाला छ्या स्‍येकीदुक।

रोमी 7:8

परमेश्‍वर नियमला “लोभ माकेत,” साबाते बात छ्या स्‍येनामेई ङे सेमला पाप ओतेकी ङाला झन झन डारताङ लोभ लाङाला स्‍यूसुङ। दोक माकेत, थोक माकेत सिरच्‍येते थे नियम मेता ईन्‍सीनचेन पाप खित्‍च्‍या सिराते ओङच्‍या मेतान।

एफिसी 4:22

था खेराङला लापा च्‍योकराङ खि। च्‍यि सासीन गोमा खिन ओताच्‍योक खिन मेदेता खाला मेलेबाते कामताङ बात खित्‍च्‍येते बानी थोङ। गोमाबा ख्‍योकोन दाक्‍पोन सेमला लाबा लाबाच्‍योक खासीन लेमु ओङगो सिन थोकराङ खिन ओतान। होथोक खाबेकी ख्‍योकोन ङ्येला डुइन ओतान।

हिब्रू 3:13

थोगी परमेश्‍वर बात ङेन्‍दा ताङला पाप खाला परमेश्‍वर छ्य्‌वापेई ठाला माफाप्‍स्‍यीत सिन परमेश्‍वर बात ङेन्‍दा फाप्‍क्‍यो सिन ख्‍योकोनगी दोक्‍पोईकी ज्‍येनज्‍यीकला ङीमे ठाङमा सिन देत। खेराङगी “थरिङ दिन” सिरा ङेत ङेतसाकराङ ख्‍योकोनगी दोक खिनराङ देत।

याकूब 1:22

परमेश्‍वर बात ङेन्‍ला थेरू साबा च्‍योकराङ खि। थोक मिक्‍किकान्‍ते मिकीचेन दाक्‍पोनगी ठुबाते डालुमला दाक्‍पोनराङ स्‍यूक्‍च्‍येते काम खाबातेकामा ईन।

याकूब 1:26

सुइँदेकी ङानी परमेश्‍वरगी खि साबाच्‍योक खित्‍कान्‍ते मि ईन खिदुक तर खोपरोङ खाचेन थाताला मोज्‍योदुक सासीन थोक्‍ते मिकीनी दाक्‍पोनगी ठुबाते डालुमला दाक्‍पोनराङ स्‍यूक्‍च्‍येते काम खाबाते ईन। थोक्‍ते मिकी जस्‍तोराङ लेमु काम खासीनोङ थोक खाबेकी थेला छ्याःङ फाइदा मेङगो।