रोमी 4:17 - जिरेल17 दि बात परमेश्वर बातला दोक सिन टिबा ओत। च्यि सासीन अब्राहाम थे खोरोङ दोन्दु ओत्जीन परमेश्वरगी थेला “खोचेन जात जातकी मि ज्युज्यु ओङगो,” सिन साबा ओतान। परमेश्वरगी स्याप्ते मिओनला सोम्बो लोइओ थेमे थोङला ओतराङ मेतातेङ थेकी ओङस्यीत सानामेई दाक ओङगो। होदोक खिता थुप्कान्ते परमेश्वरला अब्राहामगी विश्वास खाबाते ईन। Faic an caibideil |
थे खोरोङ सन्तान छ्येत थोङा ङेत्क्यो सिरच्येते अब्राहामला छ्याःङ आश मेता ईन्सीनोङ परमेश्वरगी थेते थोक काल्बेई सन्तान ओङगो सिन साबाते बात पत्ते खाईन साबा च्योकराङ ओङगो सिन थे गुकीन देत्सुङ। थोगी परमेश्वरगी साबा च्योकराङ खाईन थे जात जातकी मि ज्युज्यु ओङसुङ। दोकराङ ओङगो सिन परमेश्वरगी अब्राहामला “खुई सखा सन्तान नामगी कार्मा छेतराङ ङोला ङ्वा मुथुप्च्या ओङगो,” सिन साबा ओतान।
थेबा ङिबोकी लेमुताङ मेलेबा छ्याःङ काम माक्याबाला थेबा क्या भन्दा गोमाराङ परमेश्वरगी रिबेकाला “आज्योतेकीका न्वातेला मान खिता फाप्क्यो,” सिन साबा ओतान। परमेश्वरगी सुइँदाला थे खोरोङ दोन्दु स्योक सिन छाने खित्जीन मिकी खाबाते लेमुताङ मेलेबा काम ताला मेन, थे खोरोङला छाने खिता सेम लाबातेला छाने खिओ सिन तेन्दालाराङ थेकी थेबा ङिबो नाङ न्वातेला थोक खाईन छाने खाबा ओतान।
परमेश्वरला विश्वास खितेकी खित्सादु थेकी दुरू दोक ओङस्यीत, थेरू थोक ओङस्यीत सिन सानामेई साबा च्योकराङ खाईन दि सा नाम थेमे सा नाम खाङ ओताते जति गाङे उत्पन्न ओङा ओतान सिन ङुरूङ पत्ते खिओ। दोक खाईन जोबाते थरिङोला मि मिगी थोङच्येते जति गोमा ओतराङ मेत्सीनोङ परमेश्वरगी दुरू दोक ओङस्यीत, थेरू थोक ओङस्यीत साकीन जोबा ओतान।
नूहे बात विचार खि। छ्यार्बा ग्याप्ला भल ग्याक्यो सिरच्येते बात थे बेलासाक थेला छ्याःङ छ्या मेत्सीनोङ परमेश्वरगी साबाच्योक पक्काराङ खिओ सिन थेला विश्वास खाईन थेकी परमेश्वरगी कोताते ङेन्सुङ। थे खोरोङ थेमे थे खाम्बे मि सुङ भलगी नुप्ला स्या माफाप्स्यीत सिन थेकी पानीजहाजज्यीक जोसुङ। दोक खाईन परमेश्वरगी साबाते ङेन्गीन थेकी दि सा लुङबे मि ज्येनचेन दोषी ईन सिन तेन्गीन बिन्सुङ। थेमे थे खोरोङला विश्वास खाबेकी खित्सादु परमेश्वरगी थेला दोषी मेन सिन सासुङ।