रोमी 3:5 - जिरेल

⁵ थोगी था ङुरूङगी परमेश्‍वरगी साबाते माङेन्‍गीन मेलेबा काम खासीनोङ थेकीचेन नोमुङ मेलेबा काम मिक्‍किच्‍याक्‍वा सिन झन लेमु खाला छ्या स्‍येकीदुक सासीन ङुरूङगी च्‍यि मेलेबा खाबाते ईन्‍देरो? ङुरूङगी मेलेबा काम खासुङ सिन थेकी ङुरूङला स्‍येदाङगी चूर गाल्‍गीन सजाय बिन्‍सीन दिनी दाक अन्‍याय खाबाते ओङसुङ याङ सिरच्‍येते बादोङ थेन्‍ग्‍यो। दिनी कोई कोई मिकी खित्‍च्‍येते बातकामा ईन।

रोमी 3:5 Iomraidhean Croise

रोमी 12:19

ङिङज्‍येते आज्‍यो न्‍वावे, ख्‍योकोनगी खेराङला मेलेबा खित्‍कानला नोमुङ स्‍येदाङ मासेत। थोक्‍ते मिओनला परमेश्‍वरगीराङ छ्येन विचार खिओ सिरच्‍येते बात टोक माज्‍येत। “ज्‍येनला मेलेबा खित्‍कान्‍तेबाला स्‍येदाङ सेत्‍च्‍येते काम ङेते ईन। ङा सु सुला चुक चुक खिता फाप्‍कीते थोकराङ खाला किम्‍बा ज्‍येल्‍ग्‍यो,” सिन प्रभु परमेश्‍वर थे खोरोङगीराङ साबाते बात परमेश्‍वर बातला टिबा ओत।

रोमी 2:5

परमेश्‍वरगी दोक दया खासीनोङ थेकी साबाते मेङेन्‍दा खाईन ख्‍योकोन डेब्रो खाईन देत्‍ला दुक। थेमे मेलेबाते काम खिताङ ताङा मिन्‍दुक। दोक खिन देता ओतेकी था तिरी परमेश्‍वरगी स्‍येदाङगी चूर गाल्‍ला सुङलाङ काका पाका मिक्‍किता खाला न्‍याय खिता छोमु ख्‍योकोनगी झन छ्येज्‍यीक सजाय ङेत्‍क्‍यो।

रोमी 3:19

थेमे परमेश्‍वर नियमला खि साबाते बातबरी थे नियम ङेताते मिओनला खि साबाते ईन सिन ङुरूङला छ्याराङ ओत। थोक ईन्‍देकी ङे छ्याःङ गल्‍ती खाबा मेत सिन सुङगीङ सिरा मेङेदो। दि सा लुङबे मि गाङे दोषीराङ ईन्‍देकी गाङेकी परमेश्‍वर सजाय ङेत्‍क्‍यो।

रोमी 3:7

लोक्‍ला कोईकीचेन ङे खिओ साबाच्‍योक माक्‍यानामेई परमेश्‍वरचेन थे खोरोङगी साबा च्‍योकराङ खित्‍कान्‍ते दुका सिन छ्या स्‍येला मिओनगी थे चुक छ्ये ईन्‍दाका सिन थेला झन मान खिदुक सासीन ङे च्‍यि पाप खाबाते ईन्‍देरो? परमेश्‍वरगी ङाला पापी ईन सिन सजाय तेरा डिकराङ मिडिगो सिनोङ सारोङ।

रोमी 4:1

परमेश्‍वरगी मिओनला दोषी मेन सिरच्‍येते बात खित्‍जीन था ङुरूङ यहूदीओन ज्‍युज्‍यु अब्राहाम बातराङ खिइना। परमेश्‍वरगी थेला चुक खाईन दोषी मेन साबा ओताने?

रोमी 5:8

तर ख्रीष्‍टचेन ङुरूङ पापी ओत्‍कीन ओत्‍कीनोङ ङुरूङ लाईदु थे खोरोङ ज्‍यान बिन्‍गीन स्‍यिसुङ। ङुरूङ लाईदु ख्रीष्‍टला थोक खिताला ताङगीन परमेश्‍वरगी ङुरूङला आउदी खाला ङिङज्‍ये खिओ सिन छ्या स्‍ये च्‍युत्‍सुङ।

रोमी 6:1

परमेश्‍वरगी मिओनला दया खित्‍च्‍येते बात दोकराङ ईन्‍सीनका थोरूमोङ ङुरूङगी पाप खिनराङ देता लेमु ईन्‍दासीन। च्‍यिला सासीन दोक खित्‍जीनका ङुरूङगी खाबाते पाप माफ खिताला परमेश्‍वरगी झन दया खित्‍च्‍येते मौका ङेत्‍च्‍याक्‍वा सिन ङुरूङगी सिरा मेङगो।

रोमी 6:19

ख्‍योकोनगी लेमु खाला खोबा थुप्‍स्‍यीत सिन ङे दुरू मालिकताङ योक्‍पो बात खाबाते ईन। गोमा पापकी योक्‍पो च्‍योकराङ ओत्‍जीन ख्‍योकोनगी खिता ओङच्‍या मेङच्‍या जेसुकै ङोचा लाङच्‍येते काम थेमे परमेश्‍वरगी माकेत साबाते ज्‍येनोङ मेलेबा काम खिन ओतान। थेजीन ख्‍योकोन बोली, काम, बानी जेङ मेलेबा ओतान। गोमाबा होथोक्‍ते मेलेबा मेलेबा काम खाबा च्‍योकराङ थाचेन ख्‍योकोनगी परमेश्‍वरगी खि साबा साबा ङेन्‍ला थेकी खि साबाते खित्‍च्‍ये छ्य्‌वापाकामा स्‍येत खि। थोक खानामेई ख्‍योकोनते बोली, काम, बानी गाङे लेमु गाल्‍ला ख्‍योकोनगी परमेश्‍वरला मन परे खित्‍च्‍येते कामताङ बात खिओ।

रोमी 7:7

ङे दि बात सिरजीन थोक ईन्‍सीनका परमेश्‍वर नियमराङ मेलेबा दुका ओना सिरच्‍येते बात थेन्‍ग्‍यो। तर थे नियमनी मेलेबा ईनराङ मेन। परमेश्‍वरगी थे खोरोङ नियम माबिन्‍दा ईन्‍सीन पाप सिराते च्‍यि ईन्‍दे सिन ङे छ्याःङ छ्या स्‍येच्‍या मेतान। चुक खाला सासीन परमेश्‍वर नियमला “ज्‍येनगीते सिराते छ्याःङगीतेङ लोभ माकेत,” साबा मेता ईन्‍सीन ङाराङगी लोभ खिन ओत सिन ङे छ्याराङ स्‍येच्‍या मेतान।

रोमी 8:31

बात दोक दोक ईन्‍देकी था ङुरूङला दि बात लेमु खाला छ्या ओत। च्‍यि सासीन परमेश्‍वर ङुरूङ छ्य्‌वापा ओतेकी खित्‍सादु ङुरूङला मेलेबा खिता छोल्‍कान्‍तेबा सुङगीङ छ्याःङ खिता मुथुबो।

रोमी 9:30

थोगी बातचेन दोकराङ ईन। च्‍यि सासीन ज्‍येन ज्‍येन जातकी मिकी परमेश्‍वरगी खोपरोङला दोषी मेन सिरस्‍यीत सिन छ्याःङ माक्‍यासीनोङ परमेश्‍वरगीराङ थेबाला दोषी मेन सिदुक। परमेश्‍वरगी खोपरोङला दोषी मेन सिओ सिन थेबेकी थेला विश्‍वास खाबेकी खित्‍सादुराङ थेकी थेबाला थोक्‍ते मि ईन सिन साबाते ईन।

१ कोरिन्‍थी 15:32

मिकी साबा च्‍योकराङ स्‍याप्‍ते मिओन सोम्‍बो मोलोक्‍च्‍या ईन्‍सीनका ङा एफिससदु ङाराङ ज्‍यानगी मायाङ मारे खाला थोक खाला च्‍येन थोमताङ जीङच्‍या मेतान। स्‍यिनामेई सोम्‍बो लोक्‍च्‍येते बात छ्याःङ मेत्‍सीनका ज्‍येनगी च्‍योकराङ “लो स्‍योक ङुरूङ स्‍यीम्‍बु स्‍यीम्‍बु सेइ, थुङगी। च्‍यिला सासीन ङारो दाक स्‍याङ थुप्‍क्‍यो,” सिन सिइ ओना।

१ कोरिन्‍थी 9:8

च्‍यि ङे थाल्‍ला भर्खर साबाते बातओन मि बात च्‍योककामा लाङगीदुक? दोक्‍ते बातनी परमेश्‍वर नियमलाङ साबा ओत।

२ कोरिन्‍थी 6:4

बरू ङेत परमेश्‍वर काम खित्‍कान ईन्‍देकी थोक्‍ते मिकी खिता फापा च्‍योकराङ खाला काम खिओ। च्‍यि सासीन जति दुक्‍पा ओङसीनोङ ङ्योकोन थोक्‍ते दुक्‍पा खपे खिन देत्‍क्‍यो। ज्‍येनगी दुक्‍पा तेरजीनोङ, आपत् विपत् आइ परे खित्‍जीनोङ थेमे पीर लाङजीनोङ ङ्योकोन सेम मेसेता खाला देत्‍क्‍यो।

२ कोरिन्‍थी 7:11

लो विचार खि, परमेश्‍वरगी ख्‍योकोन सेमला फोक्‍च्‍येते थे काम खानामेई ख्‍योकोनला थोई लेमु ओङसुङा। च्‍यि सासीन था ख्‍योकोनगी ङेत गोमा च्‍योक खितराङ मिक्‍किओ सिन खालि लेमु खित्‍च्‍ये छ्य्‌वापाकामा स्‍येत खिताला स्‍यूसुङ, खेराङगी ङाला गोमाबा च्‍यिला थोक मेलेबा खाताका, थोक खाबाते लेमु मेन्‍दाक्‍वा सिन छ्या स्‍येबाला स्‍यूसुङ, था ङे ख्‍योकोनला च्‍यि खिताना चुक सिताना सिन ज्‍यीबा खिताला स्‍यूसुङ, ख्‍योकोन था ङात्ताङ ठेताला आउदी सेम खिताला स्‍यूसुङ थेमे खेराङ नाङ मेलेबा खित्‍कान्‍ते मिला सजाय तेराला टुङ्गो खासुङ। दोक दोक खाईन ख्‍योकोनगी था खेराङ दोषी मेन सिन तेन्‍दाला स्‍यूसुङ।

गलाती 2:18

बात च्‍यि सासीन होथे नियम था नोमुङ ङेन्‍दा माफाबो सिन ङेन्‍दा ताङनामेकीङ ङे याङराङ थे नियमराङ ङेन्‍दाला स्‍यूसीन ङानी थे नियम ङ्ये ज्‍युत्‍कान्‍ते मिका ओङगो।

गलाती 3:15

आज्‍यो न्‍वावे, था ङुरूङ दि बातज्‍यीक विचार खाला तेइ। सुइँदा मिकी था थे खोरोङ बात नोमुङ खुदुक मोजोओ सिन सही छाप खाईन सुइँदाला खइँदा च्‍वासुङ सासीन तिरी थेकी थोक खाबाते मेन सिन नोमुङ सिरा मेङेदो।

छ्या स्‍ये च्‍युताते बात 15:3

थेमे थेबाचेन परमेश्‍वर काम खित्‍कान्‍ते मोशेकी थे खोरोङ पालोला परमेश्‍वरते जय जय खिन लाबाते लु लिन्‍गीन ओतान। थेमे दोक सिन लुई रीउला छ्ये जोच्‍येते लुङ लिन्‍गीन ओतान। चुक सासीन “गाङे भन्‍दा छ्येज्‍यीक शक्ति ओताते प्रभु परमेश्‍वर, खुई खाबाते कामओन चुक छ्ये छ्येताङ अचम्‍ब लाङच्‍या ईन्‍दाका। खो सधैँभरि सोन्‍ला राज्‍य खिन देत्‍कान्‍ते गेल्‍बो ईन। खुई खित्‍च्‍येते काम गाङे लेमुतेकामा ईन।

छ्या स्‍ये च्‍युताते बात 18:20

“था स्‍वर्गने ओत्‍कान्‍तेबा गाङेराङ, परमेश्‍वर सन्‍तानओन, येशू ख्रीष्‍टकी खटे खाबाते मिओन थेमे परमेश्‍वर बात खित्‍कान्‍तेबा ख्‍योकोन गाङेराङ थे सार थोक खाईन छिगीन गाला थोङजीन गा खि। च्‍यिला सासीन थेकी ख्‍योकोनला मेलेबा खाबेकीराङ परमेश्‍वरगी थेला थोक छ्येज्‍यीक सजाय बिन्‍सुङ।”