रोमी 3:4 - जिरेल

⁴ थोकनी थेकी खितराङ मिक्‍किओ। ओताते मिबरी गाङेकी खोपरोङगी खिओ साबाच्‍योक मिक्‍किता खाईन ढाँर खासीनोङ परमेश्‍वरगीचेन नोमुङ दोक मिक्‍किओ। थेकी जहिलेङ थे खोरोङगी साबा च्‍योकराङ खिओ। थे खिओ साबा च्‍योकराङ खित्‍कान्‍ते ईन सिन परमेश्‍वर बातलाङ दोक सिन टिबा ओत। चुक सासीन “परमेश्‍वर खोरोङगी खिओ साबाच्‍योक पक्‍काराङ खित्‍कान्‍ते ईन सिन मि गाङेकी लेमु खाला छ्या स्‍येक्‍यो। खुई साबा च्‍योकराङ माक्‍यासुङ सिन सुङगीङ खोल्‍ला दोष लै खिता मुथुबो,” सिन साबा ओत।

रोमी 3:4 Iomraidhean Croise

मत्ती 11:19

थेरूई परमेश्‍वर ओत्‍सादुई वाबाते मि ङाचेन दुरू वाकीन जेसुकै सोबान, थुबान। तर ङात्ताङोङ ख्‍योकोन ‘तोते थे चुकस्‍यिक ईन्‍दाका। थेनी आउदी सोलुन्‍दाईताङ छ्याङ रक्‍सी थुङकानज्‍यीकका ओताक्‍वा। थेमे थेनी कर लिन्‍कान्‍तेबा थेमे ज्‍येनोङ पापीओनताङका र्‍वा खिदुक,’ सिन स्‍येदाङ खिदुक। जे ईन्‍सीनोङ परमेश्‍वरगी खाबाते काम थोङकान्‍ते मिओनगीचेन दि काम थेकी आउदी बुद्धि पुरे खाईन खाबाते ईन सिन लेमु खाला छ्या स्‍येक्‍यो,” सिन सिदुक।

लूका 20:16

च्‍यि थेकी वाला थोक खित्‍कान्‍ते मिओनला सेत्‍ला थे स्‍यीङ ज्‍येनला फेम्‍माला मेतेरोतरो?” सिन सिदुक। थेकी थोक सिरजीन थेरू ओताते मिओनगी “दोकनी मिलामलाङ मेङस्‍यीत,” सिन सिदुक।

यूहन्‍ना 3:33

थेकी साबाते बात ङेन्‍कान्‍ते मिकीचेन परमेश्‍वर साँचोते बातकामा खित्‍कान्‍ते ईन सिरच्‍येते बातला पक्‍काराङ ईन सिन सिओ।

रोमी 11:1

बात दोक दोक ईन्‍सीनोङ परमेश्‍वरगी इस्राएलीओनला नोमुङ थे खोरोङ मि ईन सिरा ताङा मेत। थेकी दोक खितराङ मिक्‍किओ। ङालाराङ ताला विचार खिना। ङाङनी बेन्‍यामीन थरगी इस्राएलीराङ ईन। थेमे ङे ज्‍युज्‍यु अब्राहाम ईन।

रोमी 11:11

इस्राएलीओन दोक खाईन परमेश्‍वरगी साबाते मेङेन्‍कान गाल्‍सीनोङ था थेबेकी नोमुङ परमेश्‍वर छ्य्‌वापा लै खित्‍च्‍येते मौका माङेत्‍ला पापकी सजाय भोगे खिता फाप्‍क्‍यो सिनचेन ङे साबाते मेन। बरू बात चुक ईन्‍दे सासीन थेबेकी थोक खाईन परमेश्‍वरगी साबाते माङेन्‍देकी खित्‍सादु ज्‍येन ज्‍येन जातकी मिकीका परमेश्‍वरगी खोपरोङला पापकी सजायदुकी डेल्‍ग्‍यो सिरच्‍येते बात छ्या स्‍येच्‍येते मौका ङेत्‍सुङ। थेकी थेबाला दि मौका बिन्‍दा थोङनामेई इस्राएलीओनला स्‍येदाङ लाला थेबा थे खोरोङ छ्य्‌वापा लै खाला आशी ङेत्‍स्‍यीत सिनराङ परमेश्‍वरगी दोक खाबाते ईन।

रोमी 3:31

येशू ख्रीष्‍टला विश्‍वास खित्‍कान्‍तेलाकामा परमेश्‍वरगी दोषी मेन सिओ सिरजीन ङुरूङगी परमेश्‍वर नियम था छ्याःङ काम लै मिक्‍किओ सिन साबाते मेन। ङुरूङनी परमेश्‍वर नियमला साबाते बात साबा च्‍योकराङ ओङा ओत सिनका सिओ।

रोमी 6:15

परमेश्‍वर नियम अधीनला मेन, परमेश्‍वरगी दया खाबेकी थे अधीनलाका ओतेकी था ङुरूङगी थे नियम मेङेन्‍दा खाला जे खासीनोङ ओङगीतासीन सिनोङ ङुरूङगी सिरा मेङगो। पाप सिराते ङुरूङगी खिताराङ मेङगो।

रोमी 6:2

ङुरूङगी पाप खिन देता मेङगो। था पापकी लाईदु ङुरूङ स्‍याप छेतराङ गाल्‍गीन सिन्‍दा ओत। दोक ईन्‍देकी ङुरूङगी चुक खाला थोरूमोङ पाप खिनराङ देता थुप्‍कीते? दोकनी खिताराङ मुथुबो।

रोमी 7:13

परमेश्‍वर नियम दोक लेमु ईन्‍गीन ईन्‍गीनोङ ङा थेरू तोके खाबाते सजाय भोगे खिन स्‍या फाप्‍च्‍या ओङाते थे नियमगी खित्‍सादु मेन। दोक माकेत, थोक माकेत सिरच्‍येते नियम लेमु ईन्‍सीनोङ ङे थेरू माकेत साबाते खाईन पाप खाबेकीका ङा थोक खाईन थे नियमला तोके खाबाते सजाय ङेत्‍ला स्‍या फाप्‍च्‍या ओङाते ईन। पापकी खित्‍सादु दोक ओङेकी दि पाप सिराते चुक मेलेबा ईन्‍दे थेमे दिकी खित्‍सादु मिला चुक मेलेबा ओङच्‍या ईन्‍दाका सिन ङुरूङगी लेमु खाला छ्या स्‍येकीदुक।

रोमी 7:7

ङे दि बात सिरजीन थोक ईन्‍सीनका परमेश्‍वर नियमराङ मेलेबा दुका ओना सिरच्‍येते बात थेन्‍ग्‍यो। तर थे नियमनी मेलेबा ईनराङ मेन। परमेश्‍वरगी थे खोरोङ नियम माबिन्‍दा ईन्‍सीन पाप सिराते च्‍यि ईन्‍दे सिन ङे छ्याःङ छ्या स्‍येच्‍या मेतान। चुक खाला सासीन परमेश्‍वर नियमला “ज्‍येनगीते सिराते छ्याःङगीतेङ लोभ माकेत,” साबा मेता ईन्‍सीन ङाराङगी लोभ खिन ओत सिन ङे छ्याराङ स्‍येच्‍या मेतान।

रोमी 9:14

बात दोक ईन्‍सीन च्‍यि परमेश्‍वरगीराङ कोईला काका कोईला पाका खित्‍च्‍याक्‍वा सिन सिरच्‍या ओना? मेन मेन, परमेश्‍वरगी दोक खितराङ मिक्‍किओ।

१ कोरिन्‍थी 6:15

ख्रीष्‍टकी जीउकी लाक्‍पा, काम्‍बा, मिक च्‍योक्‍तेबाचेन ख्‍योकोनराङ ईन सिन च्‍यि ख्‍योकोनला छ्या मेत? थोगी च्‍यि ङुरूङ गाल्‍ला रन्‍डीताङ ङ्याला ओङगो? थोक्‍ते काम नोमुङ खिता मेङगो।

२ कोरिन्‍थी 1:18

थे खोरोङगी खिओ साबाच्‍योक पक्‍काराङ खित्‍कान्‍ते परमेश्‍वर दोन्‍दु ङा दि बात सिओ। च्‍यि सासीन बातज्‍यीकलाराङ ङा नोमुङ बाजिई ओङगो थेमे बाजिई मेङगो सिन मिसिरो। ङा ईन्‍दाते बातकामा खिओ।

गलाती 2:17

दोक खाला येशू ख्रीष्‍टकी खित्‍सादुकामा परमेश्‍वरगी ङुरूङलाङ दोषी मेन सिओ सिन थेकी ङुरूङ यहूदीओनला बिन्‍दाते नियम ङेन्‍दा ताङनामेई थे नियम मेङेन्‍कान्‍ते ज्‍येन ज्‍येन जातकी मि च्‍योकराङ पापी ओङच्‍या ओङसुङ। थोक ईन्‍सीन च्‍यि येशू ख्रीष्‍ट ङुरूङला पाप खित ज्‍युत्‍कान्‍तेका ईन ओना? पक्‍काराङ मेन।

गलाती 2:21

परमेश्‍वरगी ख्रीष्‍टकी छ्य्‌वापेकी मिओनला दया खाबाते काम ङा छ्याःङ काम लै मिक्‍किओ सिराच्‍योक मिक्‍किओ। परमेश्‍वर नियमला खि साबाते ङेन्‍देकी परमेश्‍वरगी ङाला दोषी मेन सिरच्‍येते ईन्‍दा ईन्‍सीन ख्रीष्‍ट बिनसित्तिला स्‍यापच्‍योक ओङच्‍या ओतान,” सिन साबाप।

गलाती 6:14

ङे नोमुङ होथेबेकी च्‍योक खाला दाक्‍पोनगी खाबाते खइँदा कामगी छ्य्‌वापेई छ्ये खिता माफाप्‍स्‍यीत। ङेनी स्‍यिङगी थामला टाँए खाईन सेताते ङुरूङ प्रभु येशू ख्रीष्‍टलाकामा छ्ये जोइओ सिन टुङ्गो खाईन सिन्‍दा ओत। प्रभु येशू ख्रीष्‍ट थोक खाईन स्‍याप्‍की खित्‍सादु ङाङ स्‍यिङगी थामला टाँए खाईन स्‍याप्‍ते च्‍योक ओङगीन दि सा लुङबे मिओनगी ङेन्‍दा फाप्‍क्‍यो सिरच्‍येते नियम थेमे थेबेकी माने खित्‍च्‍येते रीतिथितिओन ङे लाईदु छ्याःङ काम लै मिक्‍किच्‍या गाला ओत। थेमे ङाराङचेन होथोक्‍ते नियमताङ रीतिथिति लाईदु स्‍याप छेतराङ ओङा ओत।

१ तिमोथी 3:16

परमेश्‍वरगी गोमा सुङलाङ छ्या स्‍ये च्‍युता मेताते थे खोरोङला चुक खाला माने खिता फाप्‍कीते सिरच्‍येते बात आउदी अचम्‍ब लाङच्‍याज्‍यीक दुक। दि बात मेन सिन सुङगीङ सिरा मुथुबो। दि बात च्‍यि ईन्‍दे सासीन ख्रीष्‍टचेन मि जुनी लाकीन पृथ्‍वीदु केसुङ। थे छ्याःङ गल्‍ती मेताते ईन सिन परमेश्‍वर आत्‍मेकी छ्या स्‍ये च्‍युता ओत। थेला परमेश्‍वर दूतओनगी थोङा ओत। जात जातकी मिला थे बात लाप्‍कीन बिन्‍दा ओत। सा लुङबा खाङ मिओनगी थेला विश्‍वास खाबा ओत। थेला परमेश्‍वरगी छ्येज्‍यीक मान बिन्‍गीन स्‍वर्गने खेरा ओत।

तीतस 1:2

ङे थेबे नाङ दि काम खित्‍जीन थेबेकी नोमुङ मिसिन्‍च्‍येते जुनी ङेत्‍क्‍यो सिरच्‍येते बात पक्‍काराङ ईन सिन आश खाला गुला देता थुप्‍क्‍यो। दोक खाला मिओनला नोमुङ मिसिन्‍च्‍येते जुनी तेरग्‍यो सिन परमेश्‍वरगी थाङबो जुगलाराङ साबा ओतान। थेकी नोमुङ ढाँर मिक्‍किओ।

हिब्रू 6:18

परमेश्‍वरगी पालोई खाबाते बात बान्‍दा फरक परे मिक्‍किओ सिन छ्या स्‍येबाला बात ङि ओत। बातज्‍यीकचेन परमेश्‍वरगी मिओनला ङा दोक दोक खिओ सिन जमान खाबा ओतान। थेमे ज्‍येनतेचेन खाबाते जमान पक्‍काराङ पूरो खिओ सिन ना क्‍याला ओतान। दि बात ङि नोमुङ खुदुक ड्वा मुथुबो। परमेश्‍वरगी नोमुङ ढाँर मिक्‍किओ। दोक ईन्‍देकी थेकी खिओ साबाच्‍योक पक्‍काराङ खिओ सिन दाक्‍पोनगी आश खाईन देताते बातला ङुरूङ छ्याःङ शंका मिक्‍किता खाला देता थुप्‍क्‍यो।

१ यूहन्‍ना 5:10

थोगी येशू परमेश्‍वर फुज्‍युङ ईन सिन थेला विश्‍वास खित्‍कान्‍ते मिकी थे परमेश्‍वर फुज्‍युङ ईन सिरच्‍येते बातला छ्याःङ शंका मिक्‍किओ। थे परमेश्‍वर फुज्‍युङ मेन सिन सिरकान्‍ते मिकीचेन परमेश्‍वरनी ढाँर खित्‍कान्‍ते ईन साबाते ईन। च्‍यिला सासीन थोक्‍ते मिकी परमेश्‍वरगी थे खोरोङ फुज्‍युङ चुक्‍ते ईन्‍दे सिन साबाते बात पत्तेराङ खाबा मेङगो।

१ यूहन्‍ना 5:20

ङुरूङला ज्‍येनोङ बात च्‍यि छ्या ओते सासीन परमेश्‍वर फुज्‍युङगी दुरू वाकीन परमेश्‍वर सु ईन्‍दे, चुक्‍ते ईन्‍दे सिन ङुरूङला छ्या स्‍ये च्‍युत्‍सुङ। थेकी दोक खानामेई ङुरूङ सत्‍यते परमेश्‍वरताङ डिक्‍पा थुप्‍सुङ थेमे परमेश्‍वर फुज्‍युङ येशू ख्रीष्‍टताङ डिक्‍पा थुप्‍सुङ। येशू ख्रीष्‍टचेन सत्‍यते परमेश्‍वर ईन, नोमुङ मिसिन्‍च्‍येते जुनी तेरकान्‍तेङ थेराङ ईन।

छ्या स्‍ये च्‍युताते बात 3:7

फिलाडेल्‍फिया सारदु जम्‍मा ओङकान्‍ते येशू ख्रीष्‍ट मिओनला ताकोरा खित्‍कान्‍ते परमेश्‍वर दूतला दोक सिन टि। दि बातचेन सेमला पाप सिराते छ्याःङ मेताते, खिओ साबा च्‍योकराङ खित्‍कान्‍ते ङा सिन ओत। ङात्ताङ गेल्‍बो दाऊद सारगी गो बेत्‍च्‍येते साँचो ओत। ङे पेताते गो सुङगीङ च्‍येता मुथुबो थेमे ङे च्‍येताते सुङगीङ बेताङ मुथुबो।