रोमी 12:16 - जिरेल

¹⁶ थेमे ख्‍योकोन गाङेराङ सेमज्‍यीकराङ खाला डिक्‍ला थुन्‍ला देत। छ्ये मिक्‍किता खाला दिबाङ सु ईन्‍देरो सिराच्‍योक ठाने खाबाते मिओनताङोङ साङ खि। ङा छेतते सुङ मेन सिराच्‍योक माकेत।

रोमी 12:16 Iomraidhean Croise

मत्ती 11:5

चुक सासीन अन्‍धतेबा थोङा थुप्‍च्‍या गालाते, कुज्‍येतेबा ख्‍याम्‍बा थुप्‍च्‍या गालाते थेमे जे खोबाते मिओन ठाक्‍पाते बात थेला सि। थोकराङ खाला ओन्‍बातेबा थोबा थुप्‍च्‍या गालाते, स्‍याप्‍ते मिओन सोम्‍बो लोक्‍पाते थेमे छ्याःङ मेताते मिओनला गा लाङच्‍येते बात लाप्‍कीन बिन्‍दाते बाततेबाङ गाल्‍ला थेला सि।

मत्ती 26:11

दुक्‍पा ङेताते मिओननी सधैँ ओत्‍कीन ओत। थेमे थेबाला ख्‍योकोनगी जहिलेङ मद्धत तेरा थुप्‍क्‍यो। तर ङानी था काल्‍बासाक ख्‍योकोनताङ देत्‍च्‍येते मेन।

लूका 14:13

भोज लै खित्‍जीन बरू खुई चुक खिसे सासीन छ्याःङ मेतातेबा, कुज्‍येतेबा, ख्‍याम्‍बा मुथुप्‍कान्‍तेबा थेमे अन्‍धतेबाला काताङला साप बिन।

लूका 6:20

थेरूई येशूकी थेरू ओताते गाङे चेलातेबा ओत्‍सापाला ताकीन दोक सिन बात खिताला स्‍यूसुङ। थेकी थेबाला “ख्‍योकोन दुक्‍पा ङेताते मिओन भाग्‍यमानी ईन। च्‍यिला सासीन ख्‍योकोन परमेश्‍वर राज्‍यदु स्‍यूला थेरू देता ङेत्‍क्‍यो।

शक्ति काम 4:32

येशूला विश्‍वास खित्‍कान गाङेराङ आउदी लेमु खाला डिक्‍ला थुन्‍ला देत्‍कीन ओतान। थेबा खोपरोङताङ जेराङ ओत्‍सीनोङ सुङगीङ दि ङेतेताङ थे खुईते सिराच्‍योक मिक्‍किता खाला गोला सेइन ओतान।

रोमी 11:20

ईन्‍दानी ईन। तर दि बात टोक माज्‍येत। च्‍यि सासीन परमेश्‍वरगी खोपरोङला येशू ख्रीष्‍ट छ्य्‌वापेकी लेमु खिओ सिन पत्ते माक्‍याबेकी थेकी थेबाला थोक खाईन ताङाते ईन। थेमे ख्‍योकोनगीचेन थे बात पत्ते खाईन थेला विश्‍वास खिन देतेकी खित्‍सादुकामा थेबे साटोला थेकी ख्‍योकोनला थे खोरोङ मि ईन सिरच्‍येते ईन। थोगी छ्ये मिक्‍किता खाला बरू ख्‍योकोन ज्‍यीबाका खाला देत।

रोमी 11:25

थेमे याङराङ आज्‍यो न्‍वावे, परमेश्‍वरगी इस्राएलीओनला चुक चुक खिते सिरच्‍येते बात ख्‍योकोनगी छ्या स्‍येस्‍यीत सिन ङा दि बातज्‍यीक सिरामीन। दि बात ख्‍योकोनगी खेराङ बुद्धि खिये खाला छ्या स्‍येबा मुथुबो। थेकी गोमा सुङलाङ छ्या स्‍ये च्‍युता मेताते बात च्‍यि ईन्‍दे सासीन काल्‍बा च्‍योक इस्राएलीकी परमेश्‍वरगी साबाते पटक्‍क ङेन्‍च्‍ये सेम माक्‍यासीनोङ थेबा तिरीसाक दोकराङ खिन मेदेदो। परमेश्‍वरगी ज्‍येन ज्‍येन जातकी मि नाङदुकी थे खोरोङला विश्‍वास खिओ साबाते मि जति थे खोरोङ छ्य्‌वापा लै खाईन मासिनथुपकामा थेबा दोक खिन देत्‍क्‍यो।

रोमी 12:3

परमेश्‍वरगी ङाला दया खाईन थे खोरोङ काम खि साबा ओतेकी ङा ख्‍योकोन गाङेला दि बातओनोङ सिओ। च्‍यि सासीन खेराङगी च्‍यि खिता थुप्‍कीते सिन लेमु खाला विचार मिक्‍किता खाला ख्‍योकोन सुङगीङ ङा जेङ खिता थुप्‍क्‍यो सिराच्‍योक खाला छ्ये माकेत। परमेश्‍वरगी खेराङला च्‍यि खित्‍च्‍येते सीप कि शक्ति बिन्‍ला दुका ङाला परमेश्‍वरगी दोस्‍यिकराङ खि साबाते ईन सिन विश्‍वास खाला ख्‍योकोनगी थेकी खि साबा भन्‍दाङ ल्‍हाक्‍पा खिता थुप्‍क्‍यो सिराच्‍योक माकेत।

रोमी 15:5

दोक खाला ङुरूङ सेम मेसेता खाला देता थुप्‍स्‍यीत सिन परमेश्‍वरगी ङुरूङला आँट तेरग्‍यो। ङुरूङला दोक खित्‍कान्‍ते परमेश्‍वरगीराङ ख्‍योकोनगी येशू ख्रीष्‍टकी च्‍योकराङ दाक्‍पोन फाइदा माताबा खाला काम खित्‍जीन ख्‍योकोन गाङेला डिक्‍ला देत्‍च्‍येते सेम तेरस्‍यीत सिन ङा प्रार्थना खिओ।

रोमी 6:2

ङुरूङगी पाप खिन देता मेङगो। था पापकी लाईदु ङुरूङ स्‍याप छेतराङ गाल्‍गीन सिन्‍दा ओत। दोक ईन्‍देकी ङुरूङगी चुक खाला थोरूमोङ पाप खिनराङ देता थुप्‍कीते? दोकनी खिताराङ मुथुबो।

१ कोरिन्‍थी 1:10

आज्‍यो न्‍वावे, ङुरूङ प्रभु येशू ख्रीष्‍टकीराङ ङाला दोक खित्‍च्‍येते अधिकार बिन्‍दा ओतेकी ङा ख्‍योकोनला च्‍यि सिते सासीन ख्‍योकोनगी खेराङ नाङ फाटो ओङच्‍येते काम माकेत। बरू गाङेकी सेमज्‍यीकराङ खाला डिक्‍ला काम खि।

१ कोरिन्‍थी 3:18

ख्‍योकोन सुङगीङ दाक्‍पोनगी ठुबाते डालुम नाङ दाक्‍पोनराङ स्‍यूक्‍च्‍येते काम माकेत। च्‍यि सासीन दि सा लुङबे मिकी कोईला आउदी बुद्धि ओताते मि ईन सिओ। ख्‍योकोन नाङ सुइँदाला खेराङ होथेबेकी साबा च्‍योक्‍ते मि ईन सिराच्‍योक लाङगीदुक सासीन बरू ख्‍योकोनगी ङानी छ्याःङ मेस्‍येकान्‍ते मि ईन सिराच्‍योक खि। दोक खाला छ्ये मिक्‍किकान्‍ते मिराङ बुद्धि ओताते मि ईन।

१ कोरिन्‍थी 4:10

ख्रीष्‍टकी मि ईन्‍देकी ङ्योकोनचेन छ्याःङ मेस्‍येकान्‍ते लेम्‍बाते मि च्‍योक ओङा ओत। तर ख्रीष्‍टकी खित्‍सादु ख्‍योकोननी आउदी च्‍याङबो गाल्‍दुक। थेमे ङ्योकोन छ्याःङ खिता मुथुप्‍कान्‍ते मि ईन। ख्‍योकोनचेन जेङ खिता थुप्‍कान्‍ते ईन। थोकराङ खाला मिओनगी ङ्योकोनला दिबाङ सु ईन्‍देरो सिराच्‍योक खिदुक। ख्‍योकोनलाचेन गाङेकी मान खिओ।

१ कोरिन्‍थी 6:5

ख्‍योकोनला ङोचा लोङालाराङ ङे दि बात टिबाप। आज्‍यो न्‍वा खेराङ नाङ खइँदा मिडिक्‍च्‍येते बात ओङजीन दि डिक्‍पा खिता थुप्‍कान च्‍यि ख्‍योकोन नाङ सुङ मेत?

१ कोरिन्‍थी 8:2

जे बादोङ छ्या स्‍येबा ओत सिन सिरकान्‍ते मिकीचेन छ्या स्‍येबा फाप्‍च्‍येते बात थोरूमोङ लेमु खाईन छ्या स्‍येबा मेङगो।

२ कोरिन्‍थी 13:11

लो आज्‍यो न्‍वावे, था ज्‍येन बातका च्‍यि सिरच्‍ये, ख्‍योकोनगी परमेश्‍वरगी खेराङला ज्‍वा चाला च्‍योकराङ लेमु मि ओङस्‍यीत सिन थोक्‍ते मि ओङच्‍ये छ्य्‌वापा स्‍येत खि। ङे लाःपा कोताते ङेन्‍ला था चुक खिता फाप्‍कीका थोककामा खि, ख्‍योकोन गाङेराङ सेमज्‍यीकराङ खाला डिक्‍ला थुन्‍ला देत। थोक खासीन गाङेला ङिङज्‍ये खित्‍कान्‍ते थेमे डिक्‍ला थुन्‍ला देत ज्‍युत्‍कान्‍ते परमेश्‍वर ख्‍योकोनताङ ङ्योम्‍बुराङ देत्‍क्‍यो।

फिलिप्‍पी 1:27

था जे ओङसीनोङ ख्रीष्‍टते गा लाङच्‍येते बात ङेन्‍कान्‍ते मिओनगी चुक चुक खिता फाप्‍च्‍येते ईन्‍दे ख्‍योकोनगी होथोकराङ खि। च्‍यि सासीन ख्‍योकोन गाङेराङ सेमज्‍यीकराङ खाला डिक्‍ला देत। ज्‍येनगी जे सासीनोङ जति दुक्‍पा बिन्‍सीनोङ ख्‍योकोन गाङेराङ डिक्‍ला खेराङगी ङेन्‍दाते गा लाङच्‍येते बात ङेन्‍गीनराङ देत। ङा थेपा वासीन ख्‍योकोनगी थोक खिन ओताते ङाराङगीराङ थोङगो, मासुङ सासीनोङ ख्‍योकोनगी थोक खिन दुक्‍लो सिन ङे थोबा ङेत्‍स्‍यीत।

फिलिप्‍पी 3:16

जे ईन्‍सीनोङ दाक्‍पोनगी थातासाक छ्या स्‍येबाते बात ङुरूङगी टोक मेज्‍येता खाला देता फाप्‍क्‍यो।

फिलिप्‍पी 4:2

थेमे इयोदियाताङ सिन्‍तकेला ङा च्‍यि सिते सासीन ओर्च्‍ये, खेराङ ङिकाराङ प्रभु येशू मि ईन सिन सम्‍झे खाला लोक्‍ला डिक्‍ला थुन्‍ला देत।

हिब्रू 13:5

थेमे ख्‍योकोनगी पैसे लोभ माकेत। खेराङताङ जति दुक थेलाराङ सन्‍तो खाला देत। च्‍यिला सासीन परमेश्‍वरगी “ङा ख्‍योकोनला सधैँ लेमु खाला तेइओ। नोमुङ ङा ख्‍योकोनला ताङला मोन्‍डोओ,” सिन साबा ओत।

१ पत्रुस 3:8

था बात च्‍यि सासीन ख्‍योकोन गाङेराङ डिक्‍ला थुन्‍ला देत। पीर फापा ओतातेबाला पीर माकेत सिन सि। खेराङ गाङेराङ आज्‍यो न्‍वा आज्‍यी नुमु ईन सिन सम्‍झे खाला दोक्‍पोईकी ज्‍येनज्‍यीकला ङिङज्‍ये खि। दोक्‍पोईकी ज्‍येनज्‍यीक दुक्‍पाला तो। ङा ङाराङ ईन सिराच्‍योक मिक्‍किता खाला बरू ज्‍येनला मान खि।

१ पत्रुस 5:3

ख्‍योकोन खेराङचेन थेबे मालिक ईन सिराच्‍योक खाला छ्ये खिता माछोल। थेबेकीङ खेराङगी च्‍योकराङ खिता लोप्‍स्‍यीत सिन लेमुते लुई गोठालेकी लुक लेमु खाईन ताबाच्‍योक खाला थेबाला लेमु खि।

३ यूहन्‍ना 1:9

ङे थेपा जम्‍मा ओङकान्‍ते येशू ख्रीष्‍ट मिओनला चिट्ठीज्‍यीक टिबा ओतान। ईन्‍सीनोङ ख्‍योकोन नाङ दुरूते छ्येते ङाराङ ईन सिराच्‍योक खित्‍कान्‍ते डियोत्रिफसकीचेन ङे बातला नामज्‍योकराङ मासेत्‍सुङ।